Mataafa Uumata 30
30
1Raaheeli qoota Yayqoopi inna in xaaynin malla, enentaaysho'e yoote ka Yayqoopi' kiite, “Inna ana' daashe, ataakati isin ishshaay.”
2Yayqoopi ka isheetta qara' miirode ka kide, “Hela xawwi anan Waaqa ka inna ke dawre?”
3Isheetta ka ishi' kiite, “Orxayteetiyyo Paalla are kittaay olli muke, ikka paakkiyyo oppa'e hellaa ana' xaayto. Anti isheetta minannen aayya hellaa' kidamaay.” 4Ka oori orxayteetaadi Paalla akka iskatteetaadi koddito'e, Yayqoopi' daasse. Yayqoopi ka olli muke. 5Paalla ka hitte ka Yayqoopi inna diirta' xaayte. 6Raaheeli ka kiite, “Waaqa i'ana tooyyade ka qinseetiyyo kuli dakaye.” Ka maxxa innaseneti' koote ka kiite “Taani.” 7Orxayteetase a Raaheeli, paalla ka a lammattati hitteew ka inna diirta' xaayteew. 8Raaheeli ka kiite, “Soota kokkoka'en enentinno soote ka isheetta puteey,” Semmalla maxxa innooseneti a “Niftaalemi” Koddo kiite ka maxxa ishi' koote. 9Liyya'ew ete akka xaaya diisse upnaatteeyye, orxayteetaadi Siilfa qeette ka akka Yayqoopi'i iskatteeta koddito'e daasse. 10Orxayteeta Liyya, Siilfa ka Yayqoopi'i, inna diirta' xaayte. 11Liyya ka kiite, “Ha' xayyo in oloode!” Ka maxxa innooseneti' koote ka kiite “Kaati.” #30:11 Kaati afa Iprutinni “faroota fayya” kideeta 12Siilfa ka Yayqoopi'i, inna diirta a lammatta' xaayteew 13Liyya ka kiite, “Amma oori in xasoode! iskatta piisa i'ana' kida, ‘Xaadi i'olootte.’” Ka maxxa innaseniti' koote ka kiite “Aseeri.” #30:13 Aseri “Aseri” afa Iprutinni “xasa” kideeta.
14Eta kappada kooshinaaneeyye Roopeeli isookade ka qoyra Inkooy kiinaan akke ka luukkataadi pohe ka aayyassoti ishin kale. Raaheeli ka liyya' kiite, “Luukatase a innaatti ishin kalen quda shakkayteeta ana' daashe anka damo.”
15Liyya ka kiite, “Hela sede a' diirta an aqara quuatti ke' qaje? Akka amma qara'ew luukkata innaayyo ana ishin kalen tooyniiwwi?”
Raaheeli ka kiite, “Luukkatase a innaatti quda shakkayteeta ana' daashe ka Yayqoopi ka raawwaayye kapa ke olli muko.”
16Ete Yayqoopi kalaakala sookanta kela kallooyye, Liyya turopa ante ka ishi' kiite, “Akka ana olli mukto'en Raaheeli qara luukkata innaayyotin ke piddadeey, awwe ana olli' mukita.” Ikka halkeettosetiiyyi, isheetta olli muke.
17Waaqa ka qinseeta Liyya dakaye. Ikka hitte ka a kenattati Yayqoopi inna diirta' xaayteew. 18Ka kiite, “Qootan orxayteetiyyo diirtiyyo' daashe malla, Waaqa ikapa ana loqshe.” Ka maxxa innaseniti' koote ka kiite “Yisaakoori.” 19Ka amma nefo hitteew ka a lehattati inna diirta' xaayteew. 20Ka kiite, “Waaqa daassata a paxaara'e ana' daashe qootan hellaa diira lehi isha' xaaye malla, amma oori diirtiyyo i'ana jaalada.” Ka maxxa innaseniti' koote ka kiite, “Saapilooni.” 21Ka kamma'e enenta xaayte ka maxxaadi “Tiina” kiite.
22Waaqa ka qinseeta Raaheeli dakaye ka ishetta dikade ka akka xaayto' kode. 23Ikka hitte ka inna diirta' xaayte ka kiite, “Waaqa ijeeriyyo alle' jaqe. 24Amma nefo inna a diirta quda a pila'e Waaqa ana' daasha.” Kiite ka maxxa innaseniti “Yoosefi” kiite.
25Raaheeli a Yoosefi xaayte kammaayye, Yayqoopi iLaapa' kide, “Akkan piitinno an oppa dalade opa tiitaawo'e, isi qara ana xaashe. 26Yaala an ke kela yaale i''uptaay, iskattiyyo an malla ke kela yaale ka hellaayyo ana' daashe anka alle' kalo.”
27Laapa ka ishi' kide, “Akka Yaahiwwe ke minan ana' sake, we oppan tooye ka akkeey, innayti waan ke' kiina ana qara dakaye. 28Mushshaara a yaalaayti a ke kayo lelado ka in ke' daashaay.”
29Yayqoopi ka kide, “Anti atta akkiman ke' yaale, an anti sikinnooyye horeetaayti atta akama horte, atti' mattaayti i''upta. 30An anti an deenin turanne horeeta lamayteetaawwe' qapta. Amma an anti arepa de'e desa xoori, Yaahiwwe akata ke' sake. Horeetaayti ka akata lekaatte. Ata xawwi anti aytamiiyyin tikuma a mattiyyo' kodatta paayya?”
31Laapa ka isha kaassade ka kide, “Ka kuli maanan ke' daasha?”
Yayqoopi ka kide, “Wa pila an heeno ma, oton waan kiina oppa'e' salliiyyi, amma nefo horeetaayti in sikisha ka qara tooya. 32Ana awwe horeetaayti oppopa aano ka oppaayye kahirra oppa porpoora ka a''ata ka purpurraysa isho telalla a pujanjarsa piisa reexado. Ka sene mushshaariyyo' teyyado. 33Oto mushshaara an yaaliyyo' teyyade tooyya' deetooyye ka telalla a pujanjarsi in kinnini ka kahirra a poorpoori in kinnini horeetiyyo oppa akkitooyye, akkan anti hate kapa'e' dikita. Ka akkan amanammo seden upnaatta.”
34Laapa ka kide, “Aa wa atti' kiite in owsade.” 35Ma xoori Laapa kuyyaasetiiw qolpaya pujanjarsa ka oppa porpoora ka telalla purpuraysa ka a pissa a atuma oppa qapa piisa ka kaharra pooruma qapa piisa reexe ka akka sekayshane hellaadi' daashe. 36Ka Yayqoopi kapaayye pora kuyyaata sessa annaan mina co sekayshe. Yayqoopi ka xelloota horeeta a kela hasse sikinni.
37Yayqoopi ka ulewwa a dawayta ka a kaputayta isho a maaqayta a qoyya quure ka akka sira' mina'e, quda qoffolla qoyshe ka purpurrayshe. 38Ka uletase quda qoysamte horeeta turan mirka pisha kela' xaaye. Horeeta ka oto pisha ikta' deenittooyye, oli qara' shora xajeelli. 39Horeetase oto oli fayyattooyye, nyalqa purpuraysa ka a pujanjarsa isho a oppa porpoora'e dalli. 40Yayqoopi ka horeeta Laapa oppa sukeena reexe ka a purpurraysa ka a pooruma qapa turopa oorshe ka tura' qattishe. Yayqoopi pora asse pahonne horeetaadi a Laapa oppa reexe.
41Kaharra a kakappa ka papaxxaara oto oli qara' shora heenaneeyye, Yayqoopi ulewwasene a quda sire'e mirkoppa ishootta tura' xaayni, oto oli qara' shorraaneeyye ulewwasene tooyni ka nyalqa ulewwasene' paha hinni. 42Ma xoori a apda tura ulewwasene' xaayni in co. Semmalla a apda oori Laapa'e dalli, a kakappa'ew ka Yayqoopi' dalli. 43Yayqoopi ka asse kodaan akata teyantoode ka horeeta lekayteeta qapnaade ka orxaya a diira ka a iskatta ka kaalla lekaya isho harrewwa kuli qapnaade.
Nke Ahọpụtara Ugbu A:
Mataafa Uumata 30: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye