Mataafa Uumata 31
31
Yayqoopi Laapa kapaayye alle' paqe
1Yayqoopi ka a hellaa Laapa kiinaane, “Yayqoopi teyanta a qapo piisa a aappinno'ew, ikka piisa ollopa pootade” Dakaye. 2Yayqoopi ete Laapa tooynooyye, a deyyo mina'e ishi' xasa in qapo. 3Yaahiwwe ka Yayqoopi' kide, “Anti ke ollin caadaay, piita toollaassina isho a sanynyeetaayshina opa alle' kale.”
4Yayqoopi ka akka pora oppa horeeta kaltopa de'ane'e, Raaheeli isho Liyya kamma nama erke. 5Ka ishootta' kide, “Aappaayshin akka a deyyo mina'e xasa ana in qapo. Ma xoori Waaqase a aappinno'e ana olli ca. 6Anti an aappaayshin kela koda koonooyye, akkan apari an' nessannin ishina mattaayshina i'uptan. 7Isha' xoori kudaninni a ana sassapanno quda ca. Ka mushshaara yaaliyyo puppurinni. Ma akka ana miiddo'e Waaqa alle anan diinne. 8Ete ana' kide'e, ‘Yaalaayti kapa'e horeeta a purpurraysa'e teyyatta’ Horeeta piisa a purpurraysa'e dalte. Ete kideewwe, ‘Apujanjarsa'e' teyyatta’ Horeeta piisa ka a pujanjarsa' dalteew. 9Waaqa pora asse pahonne horeeta a aappaayshina' qeede ka ana' daashe.
10“Oto eta a horeeta oli qara' shorritta kayteeyye, kuyyaata takka olsaan olsoode ka qolpalla purpurraysa ka a oppan poorpoora ka telalla qara' shorra'en akke. 11Erkampattoota Waaqa ka olsasene oppan ana haleete ka kiite, ‘Yayqoopi’ anka ehade. 12Ikka ana' kiite, ‘Qolpalla telalla qara' shoora piisa, akkima purpurraysan ka poorpooruma oppa qapan tooye! Waan malla asse kode, akka Laapa ke miidden akke ka malla asse kode. 13Anti an Waaqase Peteliiyyi porase a oppa daka dishte ka qara' sayteeta daatite ke akkaade, akka tura kalsha lelatte ana. Amma piisse are kitto oppa xa'e ka piita a oppa delatte opa alle' kale.’” #uuma 28:18-22
14Raaheeli isho Liyya ka ishi oorshen ka kidene, “Hela aappinno kapa wa ino qoottama icaane? 15Ata kara isha ino katade ka orra laayyoti ino dikeey, maana ino daasha? 16Semalla Waaqa teyantose piisa oto aappinno qara qeede ka, ino isho hellaanno daasheeyye, atti wa Waaqa ke kide piisa kode.”
17Yayqoopi ka iskattaadi ka hellaadi kaalla qara kukkutiishe. 18Ka mehaddaadi piisa teyyade ka horeeta a piita Mosoppotaamiyaati horade piisa ittura' qattishe ka aappaaysho Hisaaqi kapopa piita Kene'aani opa anta' xa'e. 19Ete Laapa kaharra quda nyirfa muja' aaneeyye, Raaheeli killowwa a aappaaysho tikoppa qapa'e doqqite. 20Yayqoopi asse soorittase Laapa talalsade ka a isha in lellin mali kela tawe. 21Ikka wa qapa piisa ollopa oorsade ka xa'e ka jarjartan kirra Efraatisi tuulle ka qinda piitase kunkunnaawwa qapto, a piita Kele'aati opa aane.
Laapa poroppa'e Yayqoopi qaqqaape
22Laapa kuyyaata sessa kammaayye akka Yayqoopi alle kela tawe dakaye. 23Ka hellaasso isi quda' qeede ka Yayqoopi kamma xopta dawe. Ka kuyyaata tappa kammaayye, piitase a kunkunnawwa, Kele'aditi isha qaqqaape. 24Ma xoori Waaqa halkeettoseti olsaan Laapa' kide, “Akka Yayqoopi'i we takkan nefo a' kiinini'i isi tooytaado!” 25A Laapa Yayqoopi qaqqaapeeyye, Yayqoopi Kele'adi'i kunkunnaata qara tukkana daapade. Laapa ete isha qaqqaape hellaasso ollinni eeyye tukkanna daapaden.
26Laapa ka Yayqoopi' kide, “Hela sakine, maana'e asse ana sassapatte ka hellaayyon dekatte ka akka orra a orannaappa poojame mina' qulatte? 27Maana malla a ana a' lelin mali dekatte ka alle' qahate? Kadi ana' lelte kiitiiyyi, kehayta ka timpa dawtannen kahanna ka ulfeena isho xasan ke keessini henne. 28Innayti akkima ishin dapte, allu helatiiyyi hellaayyo isho oopaddaayyo nefon dinka, an ka olli' nakayta orinnaay. 29Allu asu wetinnin ke kodan kidema, Waaqa a aappaayshina'e xallapo olsaan ana dawre ka kide, ‘Akka Yayqoopi we takkan nefo a' kinini'i, isi tooytaado.’ 30Anti nefo atta akka tika toolaayshina opa kalta keppa xaate in upa ma, maana'e waaqaddaayyo hatteew?”
31Yayqoopi ka ishi oorshe ka kide, “In kide ana qara tuparraatti sarta ka sede fuure. 32Ma nama a kapa Waaqaddaatti teyto a to'o. Ma amma ino daltaytaayti are ke kapan kinnaay waatti faddado ka teyyado.” Ata Yayqoopi akka Raaheeli' doqqite in upnaanne ka malla asse kide.
33Sekkammaayye, Laapa ka tukkanna a Yayqoopi ka a Liyya ka a orxaya Lakki kelopa takka takka minaadesa kulle ka fade ka dape. Ka piraampira qaraayye, tukkana Raaheeli kelopa kulle. 34Raaheeli ka killowwasene qeette ka koorricca kela' juutte ka qara' kutiite. Laapa ka mehadda tukkana kela ca piisa kara fade ka dape. 35Isheetta ka ishi' kiite, “Poqallaayyo, xopta iskatta'e ana quda ca, anka semmalla ke tura an xaaniniiy, ana in miiroodan.” Laapa pora pisa oppa fade, umma killowwasene in teyne.
36Yayqoopi ka oori tanoode ka miiran Laapa' kide, “Innayti maanaaytin mihishe? Xawwi maanaannen dape akka asse ana kamma awlite? 37Ka amma ete mehaddaayyo kara faateeyye wa a xaayti kodde maana oppa teyte? Amma wa oppa teyte, daltaytiyyo ka daltaytaayti tura' lele; ikka nama dapa taaki dukaata qapo lelen. 38Para kunda lakki piisan ke kapa' kallaade. Umma kaharraatti isho telallaatti apari in saldessine, umma horeetaayti oppa nyelqitta takka nefo an damme. 39Oton pinanta qapa nefooyye, oppa'en xayyo daanni diisheey so'aan ke an kalli an co. A kera kuyyaate taaki halkeette hato kuli oppa'e ana xaffalsiisini. 40Kuyyaate xaalayta atoota ka ana kukkupni, halkeette qorra ka olopa ana kokinni, anka mukitta an qapnin. 41Ka para kunda lakki asse ke kapa' kallaade. Parroosen oppaayye para kudanka afur tuparraatti lakki mallan yaale. Ka para lehiiw horeetaaytippa koddayyaata akkatta malla ke kela yaale. Atti' xoori kudaninni ana tura mushshaara yaaliyyo puppursanni. 42Kadi Waaqase a aappadaanno, Waaqa Aprihaami ka a Yayqoopi ana olli in kinnini kiiteeyye, awwe nefo helani lulle ana kalinni heente. Ma xoori Waaqa yaaliyyo isho kafattootiyyo akke ka xallapo ke peeqe.”
Akka Yayqoopi isho Laapa olli' kalen
43Laapa ka Yayqoopi' kide, “Iskattose are co hellaayyo, hellasene a xaayene nefo oopaddaayyo. Horeese are kitto piisa nefo, a xayyoow. Wa areppa akkaanna piisa keeton a xayyo. Ma hellaayyo ka oopaddaayyo xayyo ma an teyyado. 44Akka otantinno oppa maakkitta koddito'e, ana isho ke oltura kodeeta kodanna.”
45Yayqoopi ka daka kutta qeede ka dishe. 46Ka toolaadi piisa' kide, “Dakada ollopa poha.” Ikka dakaddaasene ollopa pohen ka olqaropa kuulen ka qara' damta damen. 47Laapa ka dakaddaasene olopa kuuleneti “Yikarsaahaduta” kide, Yayqoopi ka Kele'adi kide. 48Laapa ka kide, “Dakaddoosen are' kuulame akkan olli' kalle ishootta qarannen matte oorsanna.” Semmalla maxxa porooseti a Kele'adi kidamo. 49Laapa ka kide, “Oton olkela pasnooyye, a Waaqa ino piisa tooyto.” Ka poroseti “Misippa” kide. 50Ka kide, “Oton tuparraayyo' miiddita taaki qara iskatta pila hemitaayye, kadi punu nama ana' lelo in kinniniiyyi, Waaqa akka ino piisanta akkino upnaado. 51Dakadosen an are' kuulle ka dakoose an dishe tooye. 52Anti akkiman ke torpa'e dakadosen kuulame qaran an tarpinin, atti ka ana torpa'e dakadosen kuulame ka dakose dishame qaran a' tarpinini'i, dakadosen kuulame ka dakose dishame a ino' xeela kodden. 53Waaqa Aprihaami ka Waaqa a Naakoori a nama kamma dapo qatta'o.” Yayqoopi ka maxxa Waaqa a aappaaysho a Hisaaqi ishi' sakatannootin xaxade. 54Ka irroota qara Waaqa' kalisoota kalshe. Ka firaadi Piisa damtoppopa hale ikka eetaden ka eeyyew muken. 55Laapa ka parri paraappan xa'e ka tuparraadi ka oopaddaadi diddinke ka ishootta' sake ka piitaadipa alle' kalta tiitaawe.
Nke Ahọpụtara Ugbu A:
Mataafa Uumata 31: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye