मत्ती 21
21
यरुसलेम मां ईसुन आवणु
(मरकुस 11:1-11; लुका 19:28-40; युहन्ना 12:12-19)
1जत्यार चे यरुसलेम धड़े गुया, ने जेतुन बयड़ा पर बेतफगे गांव धड़े आया, ती ईसु आपसा दुय चेला काजे ज्य कय्न मकल्यु, 2“तुहुं पलो सांबो देखाये, तीना फळ्याम जावु। ने चां पुगतेत तुहुंक एक गदड़ी बांदली देखाव पड़से, ने तेरे पुठ्ये पीलो बी तुहुंक देखाव पड़से। तीना गदड़ाक छुड़ीन मार धड़े ली आवु। 3कदी तुहुंक कुय काय कह्वे, ती तीनाक तुहुं असा कह्जु, मालीक काजे जो गदड़ो चाहजे ती कवजु की मालीक काजे हेरो काम छे, तत्यार चु तत्काल तीनुक मकली देसे।”
4ज्य तेरेमां हयो की, ज्य बुल भगवानेन अघी सी आवणे वाळी वात देखाड़न्या माणसेन साहरे कह्लो चो पुरो हय जाय:
5“सीयोनेन सहरे मां रहण्या माणसेक कह्वु,
देख, तुंद्रु राजु तुंद्रे धड़े आवणे बाजी रयु।
चु भुळु छे,
चु गदड़ी पर बस रयु, बाकुन पीला पर सवारी कर रयु।”
6चेला चाल पड़्या, ने चे ईसु कह्यु तसोत चे कर्या। 7ने गदड़ीक ने पीला गदड़ाक ली आया, तेरे पर आपसा साल्या तीनु गदड़ाक पांगराय देदा, ने ईसु पीला गदड़ा पर सवारी कर्यु। 8तत्यार बेसका माणसे आपसा साल वाट मां आथर्या, ने थुड़ाक माणसे झाड़कान डाळ्या काटीन वाट मां आथरीन तेरो आव-भाव कर्या। 9ईसुन अगळ-अगळ जाता जाय्न ने पछळ-पछळ चालीन आवता जाय्न, जुर सी आयड़ी-आयड़ीन कवतेला, “दावुद राजान अवल्यात काजे होसान्ना कवतेला, जु भगवान मालीकेन नाव सी आवे, चु बरकतवाळु छे, आखाम सरगे मां रहण्या भगवानेक बी होसान्ना कवतेला#21:9 भगवानेन बड़ाय हवे ।”
10जत्यार ईसु यरुसलेम मां पुग्यु, ती आखा सहरेन माणसे कलो-कलो करता, जाय्न पुछणे बाजी गुया, ज्य कुण छे? 11तत्यार ईसु पुठ्ये आवला माणसे कह्या, “भगवानेन अघी सी आवणे वाळी वात देखाड़न्यु ईसु छे, जु गलील जीलान नासरत सहर वाळु छे।”
ईसु मंदीर मां वेपार करन्या माणसेक बाहर नीकाळे
(मरकुस 11:15-19; लुका 19:45-48; युहन्ना 2:13-22)
12ईसु भगवानेन मंदीर मां जाय्न तीनु आखा काजे, जे मंदीर मां लेणु देणु करतेला, तीनुक बाहर नीकाळ देदु, चु पयस्या आटे-साटे करन्यान टेबल्या ने पेरवा वेचण्यान चारला अंधला देदु। 13ने तीनुक असु कह्यु, “चुखला सास्तुर मां लिखलो छे, की ‘मारो घर दुवान घर कह्वायसे।’ बाकुन तुहुं ते हीना काजे धाड़ु पाड़न्या ने चुट्टान#21:13 डाकुओ खंगरु बणाय देदा!”
14मंदीर मां आंदळा ने भागड़ा, ईसु धड़े आया, ने चु तीनुक वारु कर्यु। 15बाकुन जत्यार मुख्या पुजाराक ने यहुदी धरम सीकाड़न्या मास्तर्या ईसुन मटला काम काजे, ने ज्य ईसु कर्यु, ने पुर्या काजे मंदीर मां दावुदेन अवल्यात काजे होसान्ना करीन आयड़तेला देख्या, ती चे बेसका रीसवाय गुया, 16ने चे ईसु काजे कह्या, “जे काय कवणे बाजी रया चो तु सामळे काय?” ईसु तीनुक कह्यु, “हव सामळी रयु; तुहुं ज्य चुखली सास्तुर मां नी भण्या काय? पुर्या ने दुत पीण्या नानला पुर्यान मुंहडा सी तु आपसुत गुण गावाड़लु छे।”
17अतरामा कय दीन ईसु तीनुक छुड़ीन सहर मां बाहार नीकळीन बेतन्या गांव मां जाती रयु ने चांहान आखी रात रयु।
ईसु अंजीरेन झाड़काक सराप दीन चेला काजे दुवान बारामां सीकाड़े
(मरकुस 11:12-14,20-24)
18दीसरे दाहड़े ईसु अगुत सहर भीणी जाणे बाजी रवलु, ती ईसु काजे भुक लागी। 19सयड़केन धड़े अंजीरेन एक झाड़को देखीन चु तेरे धड़े गुयु, ने पान्टा काजे छुड़ीन चां काय नी जड़्यो तीना अंजीरेन झाड़काक कह्यु, “हय सी तारे मां जलम नी फळ लागणु चाहजे।” ने अंजीरेन झाड़को तत्यारुत सुक गुयो।
20ज्य देखीन चेला घाबराय गुया ने चेला कह्या, “ज्य अंजीरेन झाड़को तत्काल कसों सुक गुयो।”
21ईसु तीनुक कह्यु, “मे तुंद्रे सी छाचलीन कह्वो, कदी तुहुं भुरसु करु ने मन मां संक्या नी करु, ती जसु मे अंजीरेन झाड़काक कह्यु तसत हय गुयो तसात तुहुं बी कवसु तेबी हय जासे, बाकुन कदी तुहुं हीना बयड़ा सी बी कवसु की, उखळीन जां, ने समुदर मां जाय्न पड़ जां, ती तसों हय जासे। 22ने ज्य काय तुहुं दुवा मां भुरसु करीन मागंसु ती चो भगवान तुहुंक आप देसे।”
ईसुन हकेन बारामां यहुदी ईसु धड़े सवाल करे
(मरकुस 11:27-33; लुका 20:1-8)
23ईसु मंदीर मां जाय्न सीकाड़ने बाजी#21:23 उपदेश रवलु, ती मुख्या पुजारा ने डाहा-बुड़ा माणसे ईसु धड़े आवीन पुछ्या, “तु ज्य आखो काम कुणीन हक सी करे? ने ज्य हक तुसे कुण आप्यो?” 24ईसु तीनुक कह्यु, “मे बी तुंद्रे सी एक वात पुछो; कदी ची वात मेसे बताड़सु, ती मे बी बताड़ीस की ज्य काम कुणीन हक सी करो। 25युहन्ना बपतीस्मा आपण्या काजे, बपतीस्मा काहा सी जड़लो? सरगेन भीणी सी की माणसे भीणी सी जड़लो?” जी वात सामळीन चे असा वीच्यार करने बाजी गुया, “कदी हामु कवजे सरगे सी भगवान आपलु, ती हयु कवसे, ‘ती तुहुं तेरे पर भुरसु काहानी कर्या?’ 26ने कदी कवसुन ‘माणसे भीणी सी’ ती हामुक हीनु माणसेन टुळा सी धाक छे, काहाकी जे आखा युहन्ना काजे भगवानेन अघी सी आवणे वाळी वात देखाड़न्यु माने।” 27अळतेन चे ईसु काजे असा जपाप आप्या, “हामु नी जाणजे।” ती ईसु बी तींद्रे सी कह्यु, “ती मे बी तुहुंक।”
नी बताड़तु की ज्य काम कुणीन हक सी करने बाजी रयु।
दुय पुर्यान दाखलु
28ईसु यहुदीन मुख्या माणसे काजे कवतु गुयु, “तुहुं काय वीच्यारु? एक माणसेन दुय पुर्या हतला; चु पेहला धड़े जाय्न कह्यु, ‘ए पुर्या, आज अंगुरेन वाड़ी मां काम कर।’ 29बाकुन चु पेहलु पुर्यु असु जपाप आप्यु, मे नी जाम, बाकुन थुड़ीक वार मां तेरा मन अंगुरेन वाड़ीम काम करने जाणेन वीच्यार आय गुयु ने चु काम करने गुयु। 30अळतेन चु बास दीसरा पुर्या धड़े जाय्न असुत कह्यु, चु जपाप आप्यु, ‘हव मे जायस करीन कह्यु’ बाकुन चु नी गुयु। 31हीनु दुय पुर्या मां सी काहनु बासेन मरजी पुरी कर्यु?” चे कह्या, “पेहलु पुर्यु।”
ईसु हींद्रे सी कह्यु, “मे तुंद्रे सी छाचलीन कव की फाळु लेणे वाळा आफसर ने रंड्या तुंद्रे सी पेहले भगवानेन राज मां भरायसे। 32काहाकी युहन्ना बपतीस्मा आपण्यु धरमेन जीवनेन वाट देखाड़तु जाय्न तुंद्रे धड़े आयु, ने तुहुं तेरे पर भुरसु नी कर्या; बाकुन फाळु लेणे वाळा ने आफसरेन ने रंड्या तेरी वात पर भुरसु कर्या। ने तुहुं ज्य देखीन पछेन बी मन नी बदले ने तेर पर भुरसु कर लेय।
खुन करन्या किरसाणेन दाखलु
(मरकुस 12:1-12; लुका 20:9-19)
33“एक अळी दाखलु सामळु,” एक किरसाण हतलु, “अंगुरेन वाड़ी लागाड़्यु, तेरे चारे मेर वाड़ बांदयु, ने तीनी वाड़ी मां एक अंगुरेन रस नीकाळने करीन एक हळाव बणायु ने एक पाक्कु माळु बणायु, ने किरसाण काजे साजा मां आपदीन दीसरा देस मां जाती रयु।” 34जत्यार अंगुर फळ आवरेन दाहड़ा आया, ती चु किरसाण हेरा गुलाम पावर्या काजे साजेल्या किरसाण भीणी अंगुरेन फळेन हीस्सु लेणे करीन मकल्यु। 35बाकुन चे साजेल्या किरसाण चां तेरा पावर्या काजे धरीन, हींद्रेन मां सी काहानाक काजे ठुक्या, ने काहानाक काजे दगड़ाट्या, ने काहनाक काजे मारीत नाख्या। 36अळतेन चु एक कावा अळी पेहला सी अदुस पावर्याक मकल्यु, ने चे किरसाण हींद्रे साते बी असात कर्या। 37चे मारा पुर्यान ईज्जत राख्से करीन आकरी कावा हेरा पुर्या काजे भेळु हयु। 38बाकुन किरसाण पुर्या काजे देख्या ती एक दीसरा काजे कह्या, जु ते वारीसदार छे, आवु, हीनाक बी मार नाखता ने हेरा धन पर कब्जु कर लेता। 39अळतेन चे तीना काजे धर लेदा ने अंगुरेन वाड़ी सी बाहार नीकाळीन मार नाख्या।
40अळतेन ईसु हेरा सामळन्या माणसेक पुछ्यु, “जत्यार अंगुरेन वाड़ीन मालीक पछु आवसे, ती चु तीनु किरसाण सी काय करसे?” 41चे ईसु काजे कह्या, “चु तीनु कुहर्या माणसे काजे मारीन सार नाखसे; ने हेरी अंगुरेन वाड़ी दीसरा किरसाण काजे साजा मां आप देसे, जे टेम-टेम पर अंगुरेन मेरेन हीस्सु आप्या करसे।”
42ईसु तीनु काजे कह्यु, “तुहुं चुखला सास्तुर मां ज्य कदी नी भण्या?”
तीना दगड़ा काजे मीस्तर्या फालतु समजीन बाहार उराट देदा
चु दगड़ुत घरेन पायेन खुणे वाळु दगड़ु बण ज्य?
ज्य मालीक भीणी सी हयो ज्य;
ने हामरी नींगा मां बेसकी वारु वात छे!
43“तेरेमां मे तुंद्रे सी कह्वो की भगवानेन सरगेन राज तुंद्रे हात मां सी हापकी लेसे ने असी नी-यहुदी माणसेक आप देसे जे हेरो फळ लावसे, आप देसे। 44जु हीना दगड़ा पर हीट पड़से, तेरो छेदर्या-छेदर्या हय जासे; ने तीना पर ज्य दगड़ु पड़से, तीना काजे दळ देसे।”
45मुख्या पुजारा ने फरीसी माणसे ईसुन दाखलु काजे सामळीन समजी गुया की ईसु आपणेत बारामां कवणे बाजी रयु। 46ने चे ईसु काजे धरने चाहतेला, बाकुन चे माणसेक देखीन बीही गुया काहाकी चे ईसु काजे भगवानेन अघी सी आवणे वाळी वात देखाड़न्यु मान तेला।
Nke Ahọpụtara Ugbu A:
मत्ती 21: NTBSP23
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.