मत्ती 28
28
यीशु यह्च़ा श्रींङमी
(मरकु 16:1-8; लूको 24:1-12; यहून्न 20:1-10)
1अरामो ध्याड़ो थल सप्ताहों पहला ध्याड़ा रिंङ मुंजे शुहबीरंङ ए मगदल शहरो मरियम अई मरियम कब्र खंड्री अन्दे। 2दंङ खांई, इच्च़ा मोह्ड़े भुयंल शुई छना कुचे प्रभु इच्च़ा दूत सर्गंङज़ि तकसिरी दंङ कछंङ अंज़े दोई कब्रो रघ ऐखा केहतो, दंङ दोऊ टोईच़ी बंङज़ा इलि। 3दोऊ रूप बिजलिऊ ठ्रोह ए दोऊ खमज़े पालो ठ्रोह छंङसे तोहई। 4दोऊ बेह्द ज़ि सैनिकरे डकेकपी लेहतिरे, दंङ सिऊ ठ्रोह शुहचे इलिरे।
5स्वर्गदूते मेच़िमी तंङ कुहतो, “बेंईन थाह गेह ञेंएगा कि केहच़ी यीशु अंऊ क्रूसो टोईच़ी चढ़ाएतिरे, पेट्रातंई। 6दुह देहर माह, पर एनोह बचनो हिसाबे षीङे इलजी तोह अतंई, दिह ठहरि खांई, अंऊर प्रभु केहषी तोहई। 7दंङ यहप्पा इलजे दंङ दोऊ चेला तंङ साते कुड़ु कि दुह सीइतु विचंङज़ि षिङे इलजी तोह दंङ दुह केरे बे तुई गलील प्रदेशो हखा योतो, दोहर दोऊ दर्शन खोकपोंई। खांई गेह केतिंङ कुचे केहतग।”
8दोरे बेहदऐ चेला तिंङ दिह समाचार दोऊ चेला तिंङ दिह समाचार रंड्रीमी थल्जी ज़रका रेंईर। 9दंङ यीशु दोतिंङ दोहरी। दंङ कुड़ी, “नमस्ते” दोच़ी कछंङ अंज़े ए यीशु कोंज़ा च़ुमने दोबि फ्यग लाहतेर। 10दंङ यीशुज़ि दोतिंङ कुहतो, “बेंईन थाह गिऊ चेला तु कछंङ इलजे कुंई कि गलीलो हखा अच्च़ा ईलांई दोहर गेह खमोर।”
पहरेदार तिंङ सुचना
11दोरे मेच़मीरे चेला तिंङ दिह खबर रंड्रीमी थल्जी य्वातिरे दुह ए मुक्का सेनिकज़ि अंऊ कब्रो रखवाली लहज़ी लेहकी तोईरे इलजे भत्ते हाल यहुदी मोह्ड़े पुरोहिताबि कंज़े रन्दो। 12दंङ यहुदी मोह्ड़े पुरोहितरे यहुदी सेंहणातंङ साते दोईरे दंङ योजना लहरिर। दोच़ी सेनिकातिंङ महस लस रंड्रीमी फेंसला लहरिग कि दोच़ी कमोर कि कब्र छिले खाली तोहई। 13दोच़ी सेनिकातिंङ साते कुंई, भत्तेतंङ साते कुंई कि रातारिंङ अपेहल ञेंरे इमरिंङ तोहई, “दंङ दोऊ चेलारे अंज़े दोबि कज़ा लेन्ज़ा शिलिरे। 14अगर दिह गप्पा हाकिमो रेड्रा तचेक पिच़ि इलि, कि केरे रखवाली मुक्का इमरिंङ तोईन, ञेंहच़ी दुह समझाए केयोनि दंङ केतिंङ छिला गप्पो पाहठी चिंद लेहई ज़रूरत माह। ञेंहच़ी केरे बचाएकि च़रपोंई।” 15दिऊ थल्जी दोच़ी ढबाह लेहपच़े छना सिखाएसी ताहरेर, ध्वांए लहरिर। दिह गप्पा तोग तचेक यहुदी तु बिचंङ माशुहरे तोह।
यीशु मीहतिंङ तंङफी ए अंतिम आज्ञा
(मरकु 16:15-18)
16सेहईदि चेलारे गलील प्रदेशंङ दुह गोहू दोहर इलदेर, अंऊ यीशुज़ि दोतंङ कांहषी तोहई। 17दोच़ी यीशु बि खांई दोबि फ्यग लहरिर, पर रेह तिंङ शक शुई कि दुह श्रींङे इलजे तोह। 18यीशुज़ि दोतु कछंङ अंज़े कुंई, “स्वर्ग ए धरतीऊ भत्ते अधिकार गिह्बी रांहषी तोह। 19दिऊ थल्जी केहरे ईलांई, दंङ भत्ते जातिऊ मीहतिंङ चेला बणाक्तुंई; दंङ दोतिंङ बाह ए, योह ए, पवित्र आत्मो मिन्ज़ी बपतिस्मा रांई, 20दंङ दोतिंङ भत्ते हुकुम अंऊ गेह केतिंङ रांहषी तातग, मनेक्च़ी कंड्रुंई; दंङ रेड्रुंई, गेह संसारो अनंत तचेक हमेशा केतंङ साते तोतोग।”
Nke Ahọpụtara Ugbu A:
मत्ती 28: LBFNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.