मती 8
8
ईसुई कोढ़ी मनके होज किदो
(मरकुस 1:40–45; लूका 5:12–16)
1ईसु जेरे मगरा माते हू नीसे उतरजो ते कईक मुटी पीढ़ वणा वाहे थाई गई। 2वियस एक कोढ़ी बी तो। वी ईसु कनी आजो नी वणाय हामे नमीनी केवा लागो, “हे परबू, अगर तु साहे ते मय सुद करी हके हे।”
3ईसुई आपड़े आत मोरी करीनी कोढ़ी मनके अडावजो नी केजू, “मुँ साहूँ हूँ के, तु सुद थाई जा नी वी तरत कोढ़ हू सुद थाई गियो।” 4पसे ईसुई वणा हू केजू, “जू, कणाहू नकी केतो वे, पण जाईनी पोताय याजके पाळ नी जी सडावो मुसाए ठेहरावजो हे, वी सडावो सडाव, ताकि मनके तारे ठिक थावा ने गवाई मले।”
ईसुई एक सुबेदार ने सेवके होज किदो
(लूका 7:1–10)
5जेरे ईसु कफरनहूम मा आजो ते एक रोमि अदिकारजी वणा कनी आवीनी विनती किदी के, 6“हे परबू, मारे एक दास घेर मा बिमार पड़जो हे। वणाय लकुओ थाई गियो हे नी कईक दुकी हे।”
7तेरे ईसुई सुबेदार हू केजू, “मुँ आवीनी वणाय होज करी।”
8सुबेदारे उतर आलजू, “हे परबू मुँ अणा लायक नीं हूँ के, तु मारे घेर आवे। तणी बस हुकम आली दे, ते मारे दास होज थाई जाहीं। 9यू मुँ जाणू हूँ केमके मुँ बी एक एवो मनक हूँ जी कणाक अदिकार ने नीसे काम करू हूँ नी मारे नीसे बी बिजा सपाई हे। जेरे मुँ एक सपाई हू कऊँ हूँ ‘जा’ ते वी जाए नी बिजाहू कऊँ हूँ ‘आव’ ते वी आवी जाए हे। मुँ आपड़े दास हू कऊँ हूँ के, ‘यू कर’ ते वा करी हे।”
10जेरे ईसुई यू हबलजू ते वी सकित थाजो, नी जी वणा वाहे आवी रेजअ त वणहू केजू, “मुँ तमय हू हासु कऊँ हूँ के, मय इज़रायेल मा बी एवो विसवास नीं डिटो। 11#लूका 13:29मुँ तमय हू कऊँ हूँ के, कईक जणअ उगमणी नी आतमणी हाड़े हू आवीनी अबराहम, इसाक नी याकूब ने हाते हरग ने राज मा खावा ने हारू आपडे आपडे जगा मा बेहीं। 12#मती 22:13; 25:30; लूका 13:28पण परमेसवर जणे मनकय हरग ने राज आलवा वालो तो वणय बान्णे अदारा मा टकिली दिदा जाहीं, विय रोवू नी दात परूड़वू थाहीं।” 13तेरे ईसुई सुबेदार हू केजू, “जा, जेवो तारे विसवास हे, वणा वजूने तय हारू थाहीं।” नी जुओ विने दास वणीस घड़ी होज थाई गियो।
ईसुई कईक बिमार मनका होज किदअ
(मरकुस 1:29–34; लूका 4:38–41)
14ईसु जेरे पतरस ने घेर गियो, ते विय पतरस ने हाहु ताव हू बिमार खाटला मा डिटी। 15ईसु वणी ने आते अड़जो नी वणी ने ताव उतरी गियो। नी वे उटीनी विने सेवा साकरी करवा लागी।
16जेरे हाज थाजी, ते वणा कनी कईक मनका लाजअ जणमा बुरी आतमा ती नी ईसुई वी बुरी आतमा आपड़े वसन हू काड़जी नी हेता बिमार होज किदअ। 17यू तणी थाजू, ताकि जी वसन यसाया परमेसवर ने हाड़े हू बुलवा वालाय केजू तु वु पुरू थाए,
“वणाय अमारे कमजोरी लई लिदी नी अमारे बिमारी उटावी लिदी।”
ईसु ने सेला बणवा ने किमत
(लूका 9:57–62)
18ईसुई जेरे आपड़े समकोरी पीढ़ डिटी, ते वणाय आपड़े सेलो ने हुकम आलजो के, दरिया ने पीली हाड़े जाता रो। 19तेरे पसे एक मुसा ने नियम हिकाड़वा वालाय वणा कनी आवीनी केजू, “हे गरू, जिय कय तु जाई, मुँ तारे वाहे आवी।”
20ईसुई वणाहू केजू, “हेयाल ने बलअ नी आकास ने जनावर ने हारू गुळा वय, पण मय मनक ने सुरा ने हारू मुड़कु टाके अतरी बी जगा नीं हे।”
21नी एक फेर सेलाय वणा हू केजू, “हे परबू, पेले मय जावा दे के, मुँ मारे बापे गाडू।”
22पण ईसुई वणा हू केजू, “एवअ तु मय वाहे थाई जा नी वणे मनकय आपड़े मड़दअ गाड़वा दे जणअ पाहे अनन्त जीवन नीं हे।”
ईसुई कुरेण रूकजो
(मरकुस 4:35–41; लूका 8:22–25)
23जेरे ईसु एक नाव मा बेटो, ते विने सेला बी वणा हाते ता। 24नी जुओ, वणीस वला दरिया मा अतरो मुटो कुरेण आजो ते नाव अळकारे हू दबणा लागी। पण ईसु हुई रेजो तो। 25तेरे पसे विने सेला वणा कनी आजा नी वणाय जगाड़ीनी केजू, “हे परबू अमय वसाव, अमअ नास थावा वाला हअ।”
26तेरे ईसुई वणहू केजू, “हे थुड़ोक विसवास करवा वाले हय बियो हो?” तेरे पसे वणाय उटीनी कुरेण नी पाणीय वलगेजू नी समकेरी सानती थाई गई।
27नी व हेता सकित थावा लागअ नी कय हे, “ई केवो मनक हे? कुरेण नी पाणी बी इने हुकम माने हे।”
बे आदमजी बुरी आतमा हू सुटकारो
(मरकुस 5:1–20; लूका 8:26–39)
28जेरे ईसु दरिया ने पीली हाड़े गदरेनिया ने परदेस मा पुगो, ते वणाय माहणअ हू बे मनक निकलीनी आवता थकण मलजा, जणअ मा बुरी आतमा ती। वा अतरा खतरनाक ता के, वणी वाटे थाईनी कणु नीं जाई हकतु तु। 29नी जुओ, वा डाडी करीनी केवा लागा, “हे परमेसवर ने सुरा, तु अमय हू हूं साहे हे? हूं तु समय हू पेले अमय सजा आलवा निय आजो हे?”
30विय थुड़क सिटी कईक पडुरअ ने टुलो सरी रेजो तो। 31नी वी बुरी आतमा वणाहू विनती करीनी केजू, “अगर तु अमय काड़े ते वणअ पडुरअ ने टुला मा जावा दे।”
32तणी ईसुई वणअ हू आग्या आलीनी केजू, “जो।” नी वी निकलीनी पडुरअ मा पेही गई नी जुओ, हेतो टुलो होड़ा माहू लड़तो, पड़तो नी दोड़ता थकण दरिया मा जाई पड़जा नी पाणी मा डुबीनी मरी गिय।
33नी गुआलजा नाटा नी नगर मा जाईनी ई हेती वाती, नी जणअ मा बुरी आतमा ती वणअ हेता ने खबर केई हबलावजी। 34नी जुओ, नगर हू हेता मनका ईसु हू भेट करवा निकलीनी आजा नी वणा हू विनती करवा लागा के, “अमारे निय हू जातो रे।”
Nke Ahọpụtara Ugbu A:
मती 8: WBR
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023 NLCI
CC BY-NC-ND 4.0