Matius 23
23
Mati ftalko guru agama Yahudi fare smat Farisina riri tabeatnana
(Mrk. 12:38-39; Luk. 11:37-54, 20:45-47)
1Fola tina, Yesuse nua smat laloca fare ni muritna, 2“Guru agama Yahudi ta rto Musa ni kitab silim tasa fare smat Yahudi ta rderera fatfato Farisi, si riri karanjanna laisa re nabi Musa tantubana, bo rfaolang fatfato ta mali Musa ni kitab silim tasa. 3Gabe tina, mew nane flonga fare fderera farumi ta si rfafcule mewna. Ga mew mati fderera riri tabeatnana. Biarega si rfafcule mew, ga si tutuling rpeo pa tina. 4Si rpei fatfato agamana lal taga tebtebna gaole, taga rcula smatna rderera tina. Ga ta molangna si tutuling rpei pa fatfato tina. 5Farumi ta si rpei tina, bo smatna rtail si. Laisa pitpitan ta mali bobokorina fare kakamorina, si rlefona mali Kitabca lolo taga si rpeina rfasai. Fare, si riri juba ni lawena ma si rpeina rfalanga bo smatna rto si tina, rderera Jou famafia.
6Gabe si rcung mali ramena fare mali Ebai sombayangna, si rlokolo rtotolang po tao mali gagaw ta mafiana. 7Si rlokolo smatna rfamamagal si gabe laisa si mali gagaw ta ni smatna lal. Fare si rlokolo smatna dololaw si, ‘Apa guru.’ 8Ga mew, mati flokolo smatna dololawe mew ‘apa guruna’! Ningalena, mew nimew Guruca isa be, gabe farumi mew tina fatenow fare faramaw. 9Fare mew mati fololaw smate nesana ‘apa’, ningalena mew nimew Apaca isa be, I cia Apa ta mali sorogaica. 10Matinato mewe fabiare smatna dololaw mew ‘Ta faboboko’, ga mewe nimew ta nfabobokoca isa be, I cia Mesias, Kolano ta Jou Lahatalla njaji bo nfasalamate smatna. 11Ise mali mew ta ndadi smat ta rfoloi, i nane nleleane smate nesa laisa re smat karajan ta rleleane smat. 12Ningalena, ise be ta nbasame ni dirica nmamagal, Jou Lahatalla npei bo ndadi smat ta riri ngale pa. Ga ise ta nbasame ni dirica laisa smat ta riri ngale pa, Jou Lahatalla bo nlange i ndadi smat ta nfoloi.”
13Yesuse nu hawe, “Fkapalange to mew guru agama Yahudi ta fto Musa ni Kitab silim tasa fare smat Yahudi ta rderera fatfato Farisina! Mew fmadarawa ndumi. Ningalena, mew tutuling fpo nimew dirica pa bo ndadi Jou Lahatalla ni smat ta I bo nkawasa ndadi Kolano mali nimew tubca, fare mew tutuling ftibane smat ta dusaha bo rdadi I ni smat. Tina laisa re mew fakaico si bawa gabe bisa rdadi Jou Lahatalla ni smat si pa.
[14Fkapalange to mew guru agama Yahudi ta fto Musa ni Kitab silim tasa fare smat Yahudi ta rderera fatfato Farisina! Mewe fmadarawa ndumi. Fare mew flokolo fdarawa maping balona taga fyale riri ebaina. Ga laisa mew bo ffalafo nimew mauting nais Jou Lahatalla I, flokolo falanga matingna tina bo smatna rto mew tina smat mafia, naga enpa. Gabe tina, mew osta fduk salna tebtebna gaole].
15Fkapalange to mew guru-guru agama Yahudi ta fto Musa ni kitab silim tasa fare smat Yahudi ta rderera fatfato Farisi! Mew fmadarawa ndumi. Ningalena mewe ffalai manca-manca be sung sapang mali pnuna, fiyawa smate bo rderera nimew fatfatona. Ga laina smat tina rderera mewe to, mew fpei sina osta wlorina mayai foloi mali mewi, mew fpei bo i rciape ncung naraka.
16Fkapalange to mew ta ffabobokona! Mew tina fatailo laisa smat ta rbiafna rtuda smate nesa! Ga mew jaga fafcule smatna laitane, ‘Ise ta ncasi nu Ebai Sombayang Mamagalca, smat cia ni sasina npitan i pa. Gabe laisa i ncasi nu guraci ta en mali Ebai Sombayang Mamagal cia, i ni sasi tina npitan i.’ 17Mew tane fto paisapa fare fbiaf! Manca ta cicoalna foloi, guraci pare Ebai Sombayang Mamagalca? Ta molangna Ebai Sombayang Mamagalca, paga? Ningalena Ebai Sombayang Mamagal cia ta npei guraci pumul tina ndadi mafia. 18Mew bena fafcule laitane, ‘Ise ta ncasi nu gagaw ta tapngo i aiwani ta tpeo sadakaca, i ni sasi tina npitan i pa. Ga ise ncasi nu aiwani ta tpo sadaka mali gagaw cia, i ni sasina npitan i.’ 19Mew tane smat ta fbiaf! Manca ta foloina, aiwani ta tpoi sadaka cia, pare ni gagaw ta tapngo i sadaka cia? Ta molangna, gagaw ta tapngo i aiwani ta tpeoi sadakana tina,? Ningalena, gagaw cia ta npei sadakana ndadi molang. 20Gabe, ise ta ncasi nu gagaw ta tapngo i sadaka cia, i cia ncasina nu ga gagaw ta tapongo i sadaka cia be pa, ga farumi ta en puis gagaw ciana. 21Fare ise ncasi nu Ebai Sombayang Mamagalca, i cia ncasi ga nuna Ebai Sombayang Mamagalca be pa, ga i ncasi hawe mali Jou Lahatalla ta nteteam mana. 22Laina bena, ise ta ncasi nu sorogaca, cia i ncasi nu Jou Lahatalla ni karapesa kolanoca fare nu Jou Lahatalla ta nteteam mali karapesa cia.
23Fkapalange to mew guru agama Yahudi ta fto Musa ni Kitab silim tasa fare smat Yahudi ta rderera fatfato Farisi! Mewe fmadarawa ndumi. Ga mew jaga fpei perpuluhan, denabe rampa ta nenana laisa sulasi, ta mfanas fare pauna mafia, fare jintan, mewe fsalawe ni perpuluhan. Ga fatfato ta cicoal foloi mali Musa ni Kitab silim tasa mewe ffaduli pa, laisa fpei ta molang lali smatna, faeme nimew masiena lali smatna, fare fdadi smat ta rmanahan. Ta molangna mew nane fpei fatfato ta foloi cicoalna, fare mew bena mati folana fpei perpuluhanna. 24Mew tina ffaboboko laisa re smat ta rbiafna rtuda smate nesa! Mew jaga fpei parenta ta nenena, ga Jou Lahatalla ni parenta ta cicoal foloi tina mew fpei pa. Tina fatailo laisa mewe ftapis mumumis nena mali namew wayana, taga unta mamagal isa pumul namew wayana mewe filam i.
25Fkapalange to mew guru agama Yahudi ta fto Musa ni Kitab silim tasa fare smat Yahudi ta rderera fatfato farisi! Mew tina fmadarawa ndumi. Ningalena potalil temna mew fpei fatfato agama, naga mali wlomewna flokolo fsefto smate nesa ni okosesi fare fmampo pa bo ftahane nimew dirica tutulingna. Tina laisa smat ta duas galas fare dodai potalil be, pumul lolona pererekna gaole. 26Ee mew smat Yahudi ta rderera fatfato Farisina, fatailo mew laisa smat ta rbiafna! Ffaberesisu nimew fikiran ta mayaina, bo ahai ta mew fpei fare fu hawe tina ndadi mafia, tina laisa tfaberesi galas fare dodai pumul lolo bo ta potalilna ma beresi.
27Fkapalange to mew guru agama Yahudi ta fto Musa ni kitab silim tasa fare smat Yahudi ta rderera fatfato Farisi! Mewe fmadarawa ndumi. Mew tina laisa piling ta ni cetna bubulang. Potalil temna mafia, naga pumulna bakbaka re smat ta rmatna riri long fare farumi ta mayaina. 28Tina fatailo laisa re mew, potalil temna laisa smat ta damolang mali Jou Lahatalla nbona, naga pumul wlomewna, mewe fmadarawana gaole fare wlomewna mayai.
29Fkapalange to mew guru agama Yahudi ta fto Musa ni Kitab silim tasa fare smat Yahudi ta rderera fatfato Farisi! Mewe fmadarawa ndumi. Mew jaga fpei nabina riri pilingna mafia. Fare mew bena jaga famafia smat ta rmate tona riri tugu bo wlomew yaneto si, tugu cia ta npei bo wlor yaneto si smat ta jaga rpei ta molang mali Jou Lahatalla nbona. 30Ga mew fu laitane, ‘Gabe laisa ite tcuna ttub farerer re hma re bbur tantubana, ite osta tderera pa rpun famat nabi tinana.’ 31Gabe laisa mew fu laina, mew fatuwo to, mew tina smat ta rpun nabina ni duri mew. 32Gabe ta mafiana, mew fpei be okosesi ta mayaina to, fderera hma re bbu mew tantubana riri tabeat ta ncal tina!
33Woi mew smat ta fmayai. Mew laisa gu ta nbisana. Mew tane nimew durina smat mayai, laisa gu ta nbisa ni durina. Jou Lahatalla osta nfasunge mew lali narakaca, fare mew osta fpiyana bisa pa. 34Gabe tina, flonga famafia. Ya bo isula nabina, smat ta rpandena, fare guru agama Yahudi ta rto Musa ni kitab silim tasa. En sifis mali sili ta mew bo fpun famatna, ga ta nesana mew bo fsalip si. En bena ta nesana mali mew nimew ebai sombayangna ta mew bo fpun si re wala mali cicapona mdalim. Fare en bena ta mew bo fatagtagana bo fkangela si mali bendar isa fola lali bendar isa fare bendar ta nesana. 35Gabe tina, Jou Lahatalla bo nfasale mew ga farumi smat ta mew hma re bbu mew tantubana rpun famate to mali dunia tae, mulai mali Habel denabe Berekhya ntuna, nabi Zakharia, ta rpun famati mali Ebai Sombayang Mamagalca mali gagaw ta tapngo i sadakaca ni fapaluan re gagaw ta nmafia ta biasa Jou Lahatalla nlafo mana. Si tina smat ta jaga rpei okosesi ta molang mali Jou Lahatalla nbona. 36Flonga famafia ta Ya iku tane. Mew ta en oras taena, osta fduk salsal ningalena poko be farumi okosesi ta mayai tina.”
Yesuse nmagogoru i, ningalena smat Yerusalemna dailow pa bo rlonga I na
(Luk. 13:34-35)
37Fola tina, Yesuse nu, “Sene mew smat Yerusalemna! Mew ta fpun famat nabi ta jaga rfalafo Jou Lahatalla ni fatnaw, fare mew bena ftig si re pat denabe rmat, smat ta Jou Lahatalla ncula si lali mewina. Ilolai mailolai Ya ilokolo ifayalo mew bo fdahle Ya, laisa tatale ta rwobo nturina. Ga mew failow pa. 38Gabe tina, co mew ftarokira, Jou Lahatalla osta i ni panto mali Ebai Sombayang Mamagal taena gabe Ebai tae bo ndadi namlileina gaole. 39Flonga famafia e, mulain oras tae mew osta fem Ya panto. Ga lomanta orasna Ya ilafo hawe, mew osta fem Ya hawe taga fu laitane, ‘Ffamamagal I, Jou Lahatalla ta ncula I nlafo mali.’ ”
Nke Ahọpụtara Ugbu A:
Matius 23: BZQ
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2026 Indonesian Bible Society