Matius 28
28
Yesuse npaling hawe
(Mrk. 16:1-10; Luk. 24:1-12; Yoh. 20:1-10)
1Oras ta wol Sabat ca nmaralapis, wol ta smat agama Yahudina bisa rkarajan pa, neta wol Minggu dorororam isube ta mayaina, Maria smati mali Magdala fare Maria ta nesana rfane dem Yesuse ni pilingna. 2Rgarayanna suica ncicoalna gaole ningalena Jou Lahatalla ni malaikat isa ndurui mali sorogai. Malaikat cia nfaolol pat ta tiban bawa piling goa taga i ntotolang puis pat cia. 3I uhngoca nsasaletam laisa lemlemna, taga ni kabayaca nbubulangna gaole. 4Tentara ta rjaga manana damcaitna gaole denabe damderer, gabe rmarapawil nap, rngangala pa laisa smat ta rmatna.
5Gabe Malaikatca nua maping tasa, “Mati famcaitna! Ya ito mewe fiyawa Yesus ta rcalip i cia. 6I mantane pa. I npaling hawe, laisa re ta I nu popise ina. Fsung mali bo fem gagaw ta si dising mayatcana. 7Tane to, mewe flolai, taga fabinga I ni muritna, fu, ‘Yesus ta nmatca npaling hawe. Gabe I ntuba lali batang Galilea to. Pulina mewe osta fem I.’ Gabe wlomew yaneto e, farumi ta ya iku tane!”
8Gabe, mapingna rfateam piling cia. Si damcait ga rbasamna rcangnangna gaole. Si rfarera bo rfabinga Yesuse ni muritna.
9Garayan mali lalingca popo, Yesuse nlafo ga nu tabea lali sili. Gabe si rdahle Yesus, rgope I ficona, taga rcuba I.
10Gabe Yesuse nua si, “Mati famcaitna. Lali bo ffabinga Ya nik delna, fu Ya ipaling hawe. Gabe Ya bo ituba lali Galilea, pulina taga si bo dem Ya.”
Tentarana rfabinga du, muritna rlois Yesuse ni mayatca
11Oras ta maping tina si mali laling popo sube, tentara ta rjaga Yesuse ni pilingna rfan Yerusalem. Pulina tentarana rfabinga agama Yahudina riri imam ta rfaboboko sina ga farumi ta ndadi i tona. 12Gabe imamna riri ta rfabobokona fare simosimo Yahudina rfayalo si taga rfatator. Gabe si riri fatatorca bo doce tentarana tiwi bo si mati rfabingana. 13Gabe si dua tentara tina, “Laitane: gabe laisa smatna rfautan, mewe fu beto, ‘Doram, orasna amame kamtoal, Yesuse ni muritna rlafo ga rlois Yesuse ni mayatca.’ 14Gabe laisa gubernur Pilatuse nlonga tina, mewe mati famcaitna, lomanta amame kmauting re i bo mew mati fduk salna.”
15Fola tina, tentarana jal tiwi tina taga rpei laisa ta rcula sina. Gabe denabe oras tae, smat Yahudina jaga dafetang, Yesuse ni muritna ta rlois Yesuse ni mayatca.
Yesuse ncula ni muritna
(Mrk. 16:14-18; Luk. 24:36-49; Yoh. 20:19-23; Kis. 1:6-8)
16Yesuse ncula ni murit yafasa re isa tasa rfan lali lolas isa mali batang Galilea. 17Rlafo pulina, si dem Yesus gabe rcuba I, ga smat sifis mali silina rdela uatupau be cia fatutua Yesus.
18Yesuse ndahle si taga nu, “Ya iduke ndumi to kawasa ta mali sorogai fare mali dunia taena. 19Gabe tina, mewe ffane to bo fpei farumi suku tae ndadi Ya nik murit. Mew ta fsisop si fpake Apa ngahnyona, Jou Lahatalla Ntuca fare Jou Lahatalla ni Rohca. 20Fare mewe fafcule si rpei farumi parenta ta Ya ifafcule mewna. Mew wlomew yaneto famafia e, Ya ifarerer re mew denabe lali.”
Nke Ahọpụtara Ugbu A:
Matius 28: BZQ
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2026 Indonesian Bible Society