संत.जोहन 7
7
ईसु आउर हुनी आलकु बोको
1नोःआँ तयोम ईसु गलील रेगी दांड़ा एकान केनाय। हुनी जाहुदिया रे दंड़ान काय नाम केना, एता लःअय ची जाहुदीकु हुनी के हुमाअ गोगोएःग रेनअः ताक रे ताही नेनाकु। 2#लेवी 23:34; कन 16:13जाहुदीकु आला कुम्बा परब हेनाःड ताही नेना। 3हिना लःअय ईसु आलकु बोको हुनी के बेता लियाकु “नोआँड़े तरअः जाहुदिया सेनमे जेकर से आम जे काम कामीयाम, होना के चेला ताम होः नेलेकु। 4जे नुमू का-कामी चहाआय, हुनी ऊकु केते काय कमिया। जब आम नोकान कामीयाम गी दो अपन के दुनिया रअः मड़ांग दिसतार गोअ तामे।” 5एता लःअय ची हुनी आलकु बोको होः हुनी रे काकु बिसवासे केना।
6ईसु हुंकू के बेता लिकुआय, “नहाअः जगुत ईङ आला बेरा का सोदोर ताना, बकिर आपे लःअय एकसम बेरा एदनाआ। 7दुनिया आपे लोः एरे बैर दोहो सकाया, बकिर ईङ तरअः बैरेआकु, एता लःअय ची हुंकू आला काम का बेसा मेन केते, हुंकू बिरोध रे नोःआँ गोवाही एमा कुईंग। 8आपे परब लःअय जु, ईङ नोःआँ परब लःअय एरिङ सेना, एता लःअय ची ईङ आला बेरा नहाअः जगुत का पुराव ताना।” 9हुनी नोकान कंहड़ी लःअय आउर गलील रेगी ताहिः नाय।
10तयोम जब हुनी आलकु बोको परब लःअय सेनोः नाकु, दो ईसु होः दिसतार रे कोवान, बकिर उकु-उकु परब लःअय सेनोः नाय।
कुम्बा परब रे ईसु आला भासन
11जाहुदीकु परब रे ईसु के “हुनी ओकाःड़े एदानिया?” मेन केते नाम बड़ाअ दियाकु। 12आउर होड़कु रे हुनी बारे सिड़िःग-सिड़िःग ढेर बात हुयाव नेना, थोड़ेक “हुनी बेस होड़ हेके” मेनोअ केनाकु आउर थोड़ेक “कोवान, हुनी होड़कु के बहकाव कुआय” मेनोअ केनाकु 13सेरे होः जाहुदी नेताकु रेनअः बोरते ओके होड़ होः हुनी रअः बारे खुईल केते काकु बाते केना।
14जब परब रअः आधा दिन बिताव ना, दो ईसु बड़े बिनती ओड़ाअ रेनअः ढाबा रे सेन केते उपदेस एम दाय। 15तब जाहुदीकु छकित केते कंहड़ीः दाकु “नुई ओका हिला होः काय पढ़ाव ताना, नुई के नोःआँ लुर-बुधी ओका तरअः भेटाव ना?”
16ईसु हुंकू के कंहड़ी रूवाड़ोअ लिकुआय “ईङ आला उपदेस ईङ आला नलागे, बकिर ईङ आली भेभेजावी आला हेके। 17जदि जाहें परमेसर आला मरजी रे चलाअ नामाकु, दो हुनी नोःआँ उपदेस रअः बारे पाड़ी केआय ची नोःआँ परमेसर पखा तरअः हेके, चाहे ईङ अपन पखा तरअः कंहड़ीयीङ। 18जे अपन पखा तरअः कंहड़ीयाय, हुनी अपने आला गी बड़ाईयाय, बकिर जे अपन भेभेजावी आला बड़ाई चहाआय हिनी सचा हेके, आउर हुनी रे अधरम कनोआँ। 19मुसा आपे के कनहुन काय एमा तदपेआ एतान? सेरे होः आपे मेसे ओके होः कनहुन मोताबिक काकु चलाआ, आपे ईङ के एता लःअय गोगोएःग नामापे?” 20होड़कु कंहड़ी रूवाड़ोः लियाकु “आम रे मुवाँ आतमा एदानिया आम के ओके हुमाअ गोएःग नमाए हेः।” 21ईसु हुंकू के कंहड़ी रूवाड़ोः लिकुआय “ईङ मियांड काम कामी लाईङ आउर आपे जामा अचराजेआपे। 22#लेवी 12:3; एहेः 17:10नोःआँ चलते मुसा आपे के खतना रअः कनहुन एमा लेपेआय, (नोःआँ कोवान ची होना मुसा पखी तरअः एदनाआ) बकिर पुरखा तरअः हीःग दराआ, आउर आपे सथाअ हिला होड़ आला खतनायापे। 23#सं.जोह 5:9जब सथाअ हिला होड़ आला खतना याकु जेकर से मुसा आला कनहुन आलु टगाअ, दो आपे सथाअ हिला ईङ मियांड होड़ के बेस केन, बेस आमीन लियीङ लःअय एता लःअय ईङ के खिसोईङापे। 24मेःड-मुहांड़ नेल केते आलपे नेयाये सचाई ते नेयायेपे।”
ईसु गी ख्रीस्त हेके एतान?
25हिमीन रे थोड़ेक जिरोसलेम रे ताहिनोअ कु कंहड़ीः दाकु “नुई हिनी नलागे एतान जेके नेताकु हुमाअ गोगोएःग रअः टाप रे ताही नोआकु। 26बकिर नेलीपे, हुनी दो खुलुमखुला बातेआय आउर ओके होः हुनी के एतान होः काकु बेताईया। सरदारकु सथेगी पाड़ी केदाकु ची नीईगी ख्रीस्त हेके सेके एतान? 27नुई के दो आबु ओका रिनी हेके सेके पाड़ी आबु, बकिर जब ख्रीस्त हीःग कोआय दो ओका रिनी हेके सेके ओके होः एरकु पड़ीआ।” 28ईसु बड़े बिनती ओड़ाअ रे उपदेस एम यअते हकाव केते बेता लिकुआय “ईङ के आपे पाड़ी आपे आउर ईङ ओका रिनी हेके सेके होः पाड़ी आपे। ईङ अपन-हारते काईंग हीःग ताना, बकिर ईङ आली कु-कुलगोःडि सचा एदानिया हुनी के आपे कापे पड़ीआ। 29ईङ हुनी के पाड़ीईङ, एता लःअय ची ईङ हुनी दुबाःड़े तरअः हीःग तानिङ, हिनी ईङ के कुलगोःड तदिङाय।” 30नोःआँ चलते हुंकू हुनी के सस:ब नाम केनाकु, बकिर ओके होः हुनी रे तीः काकु लगाव लअः, एता लःअय ची नहाअः जगुत हुनी आला बेरा का सोदोर थिना। 31सेरे होः तुन्दरा मेसे ढेर होड़कु हुनी रे बिसवास लअकु आउर कंहड़ी लअकु “ख्रीस्त जब हिजोआय दो जे नुई कामी लःअय नोःआँ तरअः जादे चिनहा-छकरीत काम देखाव केआय एतान?”
ईसु के सस:ब रअः अटकार
32फरीसीकु होड़कु के हुनी रअः बारे रे नोःआँ बात सिड़िःग-सिड़िःग बा-बतियाव आयुम लिकुआकु, आउर बड़े पुरोहितकु आउर फरीसीकु हुनी के सस:ब लःअय सिपाही कुलगोःड लिकुआकु। 33हिमीन बेरा ईसु बेता लिकुआय “नहाअः दो ईङ थोड़ेक दिरी जगुत आपे लोः ताही कुईंग, नोःआँ तयोम ईङ के जे कुलगोःड तदिङाय हुनी दुबाःड़े सेन कोईंग। 34आपे ईङ के नाम किङापे बकिर एरपे नाम दड़ीआ। ईङ जे एड़े एदानिया, आपे होनाःड़े एरपे हीःग दड़ीआ।” 35नोःआँ रे जाहुदीकु आकु-आकु कंहड़ी लअकु, “नुई ओकाते सेन कोआय ची आबु एरबु नाम दड़ीआ? एतान नुई युनानीकु ताला रे बसाव उनकु जाहुदीकु दुबाःड़े सेन कोआय आउर युनानीकु के उपदेस एमा किकुआय? 36हुनी जे कंहड़ी लःअय होना रेनअः एतान माने हेके, जे आपे ईङ के दांड़ा किङापे बकिर एरपे नामीङा, आउर जे एड़े ईङ एदानिया, होनाःड़े आपे एरपे हीःग दड़ीआ?”
जिनगी-दाअ रअः नाई
37 #
लेवी 23:36
परब रअः आखरी आउर आसली हिला ईसु तिंगु नेनाय, आउर जोड़ से हकाव केते कंहड़ी लःअय “जदि जाहें तेताङाय दो हुनी ईङ दुबाःड़े हिजोआय आउर नुई। 38#जहेज 47:1; जखरि 14:8जे ईङ रे बिसवासेआय जे लकान धरम पुथी रे लिखा लअः एदनाआ, ‘हुनी आला बुका तरअः जिनगी रेनअः दाअः रअः नाई बुहकाव उडुंग कोआ।’” 39हुनी नोःआँ वचन पबितर आतमा रअः बारे कंहड़ी लःअय जे हुनी रे वि-बिसवासकु नानाम वाला ताही नेनाकु, एता लःअय ची आतमा नहाअः जगुत का अड़गु थिना, एता लःअय ची ईसु नहाअः जगुत अपन महिमा रे काय सोदोर थिना। 40नोःआँ कंहड़ी आयुम केते तुन्दरा मेसे थोड़ेक होड़ कंहड़ी लअकु “सचे नीई हुनी आगमजानी हेके।”
41थोड़ेक एटाअ होड़ कंहड़ी लअकु “नुई ख्रीस्त हेके” बकिर थोड़ेक होड़ कंहड़ी लअकु, ख्रीस्त गलील तरअः हिजोई एदानिया एतान? 42#2 समु 7:12; मीका 5:2धरम पुथी रे नोःआँ लिखा लअः कनोआँ एतान? ची ख्रीस्त दाऊद आला बंसवाईर तरअः आउर बाइतुलेम डिही तरअः हीःग कोआय, जे एड़े दाऊद ताहिनोअ केनाय? 43नोःआँ लकान ईसु रअः बारे रे होड़कु रे छिट-फुट हुयाव ना। 44हुंकू मेसे थोड़ेक हुनी के सस:ब नाम केनाकु, बकिर ओके होः हुनी रे तीः काकु लगाव लअः।
जाहुदी अगुवाकु आला का बि-बिसवास
45तब सिपाहीकु बड़े पुरोहितकु आउर फरीसीकु दुबाःड़े रूवाड़ हीःग नाकु, आउर हुंकू दरवान कु के कुली लिकुआकु “हुनी के एता लःअय सःब केते कापे आगु लिया?”
46सिपाहीकु कंहड़ी रूवाड़ लअकु “जे लकान हुनी होड़ कंहड़ीयाय, होना लकान ओके होः हिरगीस काकु कंहड़ी लअः।”
47नोःआँ रे फरीसीकु कंहड़ी लअकु “आपे होः हुनी आला बहकाव रे हीःग नापे एतान? 48सरदार चाहे फरीसीकु मेसे जाहें होः हुनी रे बिसवास तदाकु एतान? 49नोःआँ भीड़ मुसा आला कनहुन के काकु पाड़ीआ हिना लःअय सापिताकु।”
50 #
सं.जोह 3:1,2 निकोदिमुस, जे ईसु लोः भेंटोः हीःग ताहिनाय, हुंकू मेसे मिहोंड़ ताही नेनाय, हुनी हुंकू के बेता लिकुआय। 51“आबु आला कनहुन जब तक जाहें आला सुनवाई का हुयाव ताहिनोआ, आउर हुनी एतान तदाय होना आलु पता चलाअ, तब तक कनहुन मोताबिक जाहें के दोसी ठा-ठहराव उचित एदनाआ एतान?”
52हुंकू हुनी के कंहड़ी रूवाड़ोः लिकुआय “एतान आम होः दो गलीली रेनमे नलागे? जाँच पड़ताल केते गलील तरअः आगमजानीकु कहियो काकु सिरजाआ नेल केपे।”
53 # 7:53 नोःआँ थोड़ेक पुथी रे का भेटाआ। नोःआँ तयोम जामा अपन-अपन ओड़ाअ सेनोः नाकु।
Nke Ahọpụtara Ugbu A:
संत.जोहन 7: ASR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023 NLCI CC BY-NC-ND 4.0