JONI Na i Vakamacala Taumada
Na i Vakamacala Taumada
Na i Tukutuku Vinaka sa Vola o Joni e tukuni Jisu ni sai koya na Vosa tawamudu ni Kalou, o koya “sa liatamata ka sa bula ena keda maliwa.” (1.14) Me vaka e tukuna na i vola oqo, sa volai na i Tukutuku Vinaka oqo me rawa kina vei ira era sa wilika me ra vakabauta ni sai Jisu na i Vakabula ka sa yalataki, na Luve ni Kalou, ka sa rawa me ra vakabulai ena nodra vakabauti koya (20.31).
Ni sa oti na kena vakamacalataki taumada na semati ni Vosa ni Kalou tawamudu vata kei Jisu, e tarava yani ena i matai ni wasewase ni vola na cakacaka mana eso ka vakatakila ni ko Jisu sai koya na i Vakabula sa yalataki, na Luve ni Kalou. E tarava oqo na veivunau leleka e vakamacalataka na i balebale ni veicakacaka mana o ya. Na i wasewase ni vola oqo e vakaraitaka na nodra yaco me ra vakabauti Jisu eso na tamata ka ra yaco me ra nona i lawalawa, ia eso era saqati koya ka sega ni via vakabauta. Na wase e 13—17 e tukuni sara kina vakabalavu na nodratou veiwekani voleka sara ko Jisu kei iratou na nona tisaipeli ena bogi sa vesu kina, kei na nona vosa ni veivakarautaki kei na veivakayaloqaqataki vei iratou ena yakavi ka tarava na siga me vakararawataki kina. Na veiwase eso ena i tinitini ni vola oqo e tukuna na vesu nei Jisu, nona lewai, nona vakararawataki, nona tu cake tale kei na nona rairai vei iratou na nona tisaipeli ni sa oti na tu cake tale.
Sa vakabibitaka o Joni na i solisoli na bula tawamudu ena vuku i Karisito, e dua na i solisoli sa tekivu sara ga oqo, ka sa yaco mai vei ira sa tauri Jisu me sala dina kei na bula. E dua na ka e veilauti ena i Tukutuku Vinaka i Joni na kena vakayagataki vakatayaloyalo na veika e vakayagataki sara ga ena veisiga me vaka na wai, na madrai, na rarama, na i vakatawanisipi, na nona sipi, na vunivaini kei na vuana - me dusia na veika dina vakayalo.
Na Lewe ni Vola
Vakamacala Taumada 1.1-18
O Joni na Dauveipapitaisotaki kei iratou na i sevu ni tisaipeli i Jisu 1.19-51
Na cakacaka i Jisu vei ira na lewe vuqa 2.1—12.50
Na i otioti ni vica na siga e Jerusalemi kei na veivanua volekata 13.1—19.42
Na tucake tale kei na rairai mai ni Turaga 20.1-31
Kena i tinitini: e dua tale na nona rairai mai Kalili 21.1-25
Nke Ahọpụtara Ugbu A:
JONI Na i Vakamacala Taumada: FNV
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Fijian New Version Bible, Revised Edition © Bible Society of the South Pacific, 2017, 2021.