Joaancha Laenai 8
8
Ene cojoaelorohe
1Nii janate acaauru que janoriin, naain Oliboneein curuajaain nenaa atane ucuuno cue Cana Coaunera Calaohi Jesoso. 2Inae janohane janate naain Jerosaleeun cauha cue, coaiteen enacoaauneein cuu nenaa Teenforo asaae enohane coina.
Nii janate rene turuhajeeuruha arajiin cachaaurune jaun, nelauriaain relanajae Jesoso. 3Nii janate nejelau quicha que nicharatihane jana ene cojoaelorohe eruhin, mucuhin, tajiha turuaa uure, Cana Coaunera aitoonjoa que cacha relaaurera fariseeocuru. 4Nitohaneein turuaainte, nii cuu nenacaauru cataaun teein:
“Naaonjoaain nejelau quicha ainane janana, caa ene eruhin mucuhin uhacaanura cacha relaera. 5Cana Quiricha Inoaesi cuhanete laenaain cana rai rauhi teein letoaelu Moisesa, nitohaniha ene cojoaelorohe ne, sohin jaohacache ajeri que bodoosiine coina. ‘Tonaain jana ii’ ”, 6naain bajaaure, nii ene sohin joaeratenaa jerenihane colurujueeuruhane coina.
Nii janate acaauru tonoraelanaala notoroaain, biji couturi que atane laenaje. 7Nii janate cuu tonoranajae lanaala atane laenajiha biji couturi quene jana, cuu jeelai coaineeinejeein bajaebajaecuruhane jaun, couturi michuriin:
“Niha cau leinjiin inara jana osa que lanaala, chabana baaso ichae lanaala nenaa ne, nii ichoachaniha focoine ajeri que”, 8naain coaiteen notoroaain atane laenaje biji couturi que Jesoso.
9Niritoha Jesosone jaunte, aihuru bana acaauru netonai baaso ichacuruhane jaun, acaauru suujua que tacaane jaun, coejeein, biinaa que ichoaichaain leinjihana leinjihanaain mituhin cauha cuure. Inae satiin mituhin amuuruha nii ene colurujueurerana jaun, nii eneecha que jerajejeein neeorihane jaun, 10nimichuhin nichaauraain:
“Aancaauruche icholurueraauruta. Ta ishohin ijiaohache chuneine”, naain nii ene caje bajaa Jesosone janate:
11“Aiheicheta curuaanaa. Nihei casohin cajaohiche chuneita”, naa nii enene jana:
“Niheichu, canu niha natiin chatohaneein cheteein, ishohin ijiaonaa nainihaaunche. Inae caunichuche. Jiaonriha caa baiha coaiteen nosateichenera”, naain nii ene jiane Jesoso.
Cana rai chauratane cononeein niha Jesosone
12Nii baihate coaiteen cachaauru rai beebeje Jesoso:
“Canune caa chauratane que nenacaauru cononeein neeunra. Quere esenetaerate ichaonaa tera cono siricheein. Chabana nocohenaana amuhemuheriaain”, naa Cana Coaunera Calaohi Jesosone janate:
13“Nohaneeicha. Ichaajenihane aitiinte aitohicha. Nii jaun chaque nelatihei nii aitohine jaaunta”, naauruha fariseeocurune jana:
14“Caraajenihane aitiin aitocoaaunne niha natiinte, nelate quere. Canune nii uhanuluna jaan jelai coitucuun. Jana inara coitucuheeiche. Niheichu canu cunajaanu coitucuheeiche. 15Nechu jataain Cana Coaunera coitucuheneeichene jaunte, joaenreein inara suujua cuaaichene jaun, joaenreein ereereequiche. Aanca chunei colurujuerichaaun canu. 16Canu, cacha colurujianunete, esinae rauhijiriin colurujuenojoineei ne, canuhacha jelai caitono nenihane jaun, caletoaera Cana Inaca aina aitocoaunne jaun. 17Charijieein teeinti ‘Ita rijitojoeein ereeuruha coroatajai coaraaurune, esenetaacache nete ne’, naain aite inara quiricha inoaesi cuhane, nitohaneein ichaquichene coina. 18Nirijieeinne coaaraneein aitoon, nii caletoaera Ofate cajiniichaain coaaraneein ne. Nii jaun quesenetaaichenetene”, naa Jesosone jaunte:
19“Aanca aihane nii chaca”, naain bajaauruhane jana:
“Cacoitucueneeichene jaun, Ofa coitucuheeiche. Cacoitucuhichene jana nihanete, Ofa netonai coitucuriquiche”, 20naain relanajae Jesoso, nii ita taojiaauruhana jaan loreri Teenforo asaae, nii coriqui teeuruha cachaaurune jaaun neein. Niritoha Jesosone jaunte mucuhin enoanaa jerecure. Nete enoaaurene, jaiti nitohaneein teeuruhane jaan cojoinaca que turuenihane jaun.
“Nii cuhanune jaaun cunaa nainiheeiche”, naa Jesosone
21Nii baihate coaiteen aitiin:
“Inae amuhanune baihate cariirijieriquicheein inacojoeein. Nete inara osa caaun cauhacha neein oriquicheein, nii cuhanune jaun cunaa naineneeichene jaun”, naa Jesosone jaun:
22“Jerihanete raajenihane nesohin nijiaoreein. Nii jaunte nii cunajaun cuenerihacacheeine que aite”, naain ita rai ereereecuruha Jorioocurune jaun:
23“Inarate, caa chauratane que neeiniquiche. Canune jana, cana choae caje nenaa neeineeun. 24Nii jaunte oha curiquicheein osa caaun, canuneein nihanune esenetaeneeichene jaun”, naa Cana Coaunera Calaohi Jesosone jana:
25“Chaneeina jian”, naain bajaauruha Jorioocurune jana:
“Inae inara rai aitocoaacaaun turuhanune caje coaauneein. 26Niha arajiin erenaa inara rai quiicha beneei. Nii caletoaerate rauhijiriin esinae aite. Cauricho que aonacaaunna jaunna jerichanetojoeein beebejeeun, caa chauratane que neinequichene rai”, naa Cana Coaunera Calaohi Jesosone 27janate coitucusichurene, “Naaonjoain Cana Coaunera quete aitera”, naain coitucuurenihane jaun.
28Nitohaneein coitucuurenihane jaunte:
“Inara araaineein nihanu natiinte, enuha que ecu canu nujuateein canu chujuraa curiquicheein. Nii banate Curisitoneein nihanune coitucuhin, casuujua caje rocohin aitenihanune coitucuha curiquicheein. Acaihanejein carelaa Ofa Cana Coaunerana jaan que aitocoaaunne coitucuha curiquicheein. 29Chabana jelai caratirihei caletoaera Ofa, niicha jerenohin ichacaaunne jaun”, 30naa Cana Coaunera Calaohi Jesosone jaunte esenetaaure arajiin cachaauru.
Jelai teein Cana Coaunera cacha, jelai teein Moconajaaera cacha
31Nii baihate esenetaaurera Jeroocuru rai:
“Rauhijiriin quere tonoraaichenete, canu ere tonoraera esineneein neriquicheein. 32Nii banate esinae rauhijiriin, Cana Coaunera jerenohi coitucuhin raotojoeein jianacoon ichaonaa naineriquicheein”, naa esenetaerauru rai Cana Coaunera Calaohi Jesosone janate:
33“Canacaanu foeratera Abaraaun caje coaauneein nihein chunei fatoroon canacaanu cairichaera. Inasiinte nii aitohine tocohaneei enene cuhaneeicha ichoreniha jianacoon mituhin nerichaanu. Nechu jataain inoaelu caje coaauneein raotojoeein rerohecaeraelanaala ichohacaanu”, naauruha nii esenetaaichuru Jorioocurune janate:
34“Satiin quere tonoraauruhite jataain mululuhin osa tabai aiha ne. Nii chunijiun cuhin nichotenaa nainerinaain. 35Cana Coaunera Calaohineein nihanune jaunte ne carai rauhi jianacoon nii osa caje inara mitaanune coina. 36Canu nii caje jianacoon inara mitaanunete esinae rauhijiriin jianacoon mituhin neriquicheein. 37Abaraaunte chuhisi inara foeratera ne niqui, nete casohin cajaonaa jerequiche, quere esenetaeneeichene jaun. 38Carelaa Ofa najaan quena inara rai aitoon. Charijieein teeinti, inara relaa inara inacane jaan ichaquiche, nii rijijieeina canu netonai caletoaa Ofane jaa ichaaun”, naa Jesosone janate:
39“Abaraaunte canacaanu inacane”, naauruha Jorioocurune janate:
“Esinae rauhijiriin Abaraaun calaohi neeichene jana nihanetera, aichejetohalune rijijieein neriquiche inara netonai. 40Nete esinae caletoaa Cana Coaunerane que aitocoaaunne coreniha casohin cajaonaa jerequiche. Chabana nitohanai que nerurujuanaa jeriheilu Abaraaun. 41Inarate aiha inara inacane rijijieein neeiche”, naa Cana Coaunera Calaohi Jesosone janate:
“Coatiha unosineein nihacaanu, Cana Coauneraachate canacaanu inacane”, naauruha Jorioocurune janate:
42“Cana Coaunera inara inaca niha netera, canu belaicheeiche, Cana Coaunera caje uhin cau turuhin nihanune jaun. Coatiha casuujua caje coaauneein cau uhin turuhaaun. Cana Coaunera te caletoae. 43Quere esenetana jereneeichene jaunte, caa inara rai aitocoaunne aonasineeinche. 44Moconajaerate inara inaca ne. Nii jaunte, caje nenaa neeichene jaun niicha jereeicha ichaquiche. Nii Moconajaerate inoaelu caje coaauneein soserejeein ne. Chabana rauhijiriin chaque irihei. Chaque irihanete nohane, nichao nihana jaun, casaje nujuaneein nihana jaun. 45Esinae rauhijiriin aitocoaunne jaunte quesenetaeneeiche. 46Chariji inara caje osaquiin nihanune coitucue. Chanuna esinae rauhijiriin aitocoaaun natiin quesenetaeneeiche. 47Cana Coaunera cacha nequichenetera, Cana Coaunera ere rautaain aonaain tonorareeiche. Cana Coaunera cacha neneeichene jaunte, Cana Coaunera ere aohana jereneeiche.
Abaraaun ajinihate nesihane Curisito
48Esinaete rauhijiriin osaaoquicha Samaria cocoaicha”, naain Cana Coaunera Calaohi Jesoso cotaihuruha Jorioocurune jana:
49“Nihei aansijieein nejeein osaaohaun. Nechu acaihanejein Ofaacha jerenohin ichaain nihanune corenihate caansaine que ereeiche. 50Coatiha, ‘Canune caohacha cachaneeun’, naain irihaun. Curuaanaaneeinte caeteein ne Ofa. 51Esinaena rauhijiriin aitoon, quere tonoraerate chabana nitajenaachara nejeein nereein”, naa Jesosone janate:
52“Esinaete osaaoquicha. Inasiinte Abaraaun, satiin Cana Coaunera ere bera inoaesihuru, naaojoaihunri inae osichuruhalu inoaelu natiin, chere tonoraeraacha nitajenaachara nejeein neeurureta. 53Abaraaun amurijiriinna nereei iite. Inae ohane jana ohacoaauruhalu Cana Coaunera ere bera inoaesihuru netonai natiin. Chaneeina jana ii nereei”, naauruha Jorioocurune janate:
54“ ‘Canune inara curuaanaa caohati neeun’, naain irihanune caohacharihei. Nete caque: ‘Caate acaihanejein canu calaohine. Nere tonoraauche’, nae Ofa Cana Coaunera. ‘Cacoaunera’, naaiche niqui. Nete 55coitucuujueneeiche. Canune laaen coitucuun. Inara rijijieein casaje nichaaunnena, ‘Coitucuhaaun’, nareeun. Esinaena rauhijiriin caraajenihane coaracaaunne jaun, nere tonoraain caletoaane jaan ichaaun. 56Inara foeratera Abaraaunte, cau chauratane que catohaneein tururichaaunine coitucue. Nii jaunte inae ena cau turuhanune jaun coroajeein rachoojoe”, naa Cana Coaunera Calaohi Jesosone jaunte:
57“Inasina saoquichoonca jaanacaaine coaalanaala, canacaanu foeratera Abaraaun coaareei”, naauruha Cana Coaunera Calaohi Jesoso rai Jorioocurune jana:
58“Aihanu. Esinaena rauhijiriin aitoon. Inae inoaelune Abaraaun ajiniha nesiha neeun canu”, naa Cana Coaunera Calaohi Jesosone jaun, 59ajeri mucuutaaure, que bodoosihuruhane coina. Ajeri mucuutaauruhane janate, jianatoraain acaauru cataaun cuhin, Teenforo caje mituhin amue.
Nke Ahọpụtara Ugbu A:
Joaancha Laenai 8: URA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2005, 2024, Wycliffe Bible Translators, Inc.