انجیلِ مَتّی 7
7
دیگرون قضاوت کردن
1«کسی قضاوت مَکَرا تا شَمانی قضاوت مَبا. 2چون هِمنه که شَما دیگرون قضاوت کَرا، شَما نی قضاوت کَرِنده و هَه پیمانه ییَم که وزن کَرا، شَمانی وَزن کرنده. 3چرا سِمَری که اِشته برا چَشم دَ اِسِه وینی، امّا اَ کُندَه ای که اِشته چشم دَ اِسِه نیوینی؟ 4چه طَرَه تونی اِشته برا بوای، ”بارز اَ سِمَر اِشته چَشمَ دَ اسه اَبَر بایرم “با اَم که اِشته چَشمَ دَ ای کُندَه ای داری؟ 5ای دِ دیم، اول کُندَهِ اِشته چَشمَ دَ اَبَر بایر اُخُری چاکتر وینی تا اَ سِمَر اِشته برا چَشمَ دَ اَبَر بایری.
6«اَ چه که مقدّس اِسه، سِبه هون مَدَیا و شَما مرواریان، خویون پیش مَندازو مبادا اَوه بِویلنده و آگَردنده و شَماهون اَنجَن اَنجَن بِکَرنده.
آخازا، بگردا، بکوعا
7«آخازا، که آدایه بی، بِگردا، که آلَوا، بَرَ بکوعا، که بر شاما دیمَ آبی. 8چون هر که آخازه، اجو آدایه بی و هر که بِگرده، آلوِ و هر که بَرِه بوکوعه، بر چو دیمَ آبی. 9شَما میون کومین اَز شَما اگم چو زا چو کودَ نانی آخازه، نانِ جا ای سِگی اَجو آدی؟ 10یا اَگم ای مایی آخازه، ای ماری اَجو آدی؟ 11پس اگم شَما که بَدَ آدمونی اِسییا، زونو که چه طَرَه چاک هدیه عون شَما خوردگون آدیا، چنده ویشتر شَما آسمانیه په، به اوه که چوکودَه چیزی آخازِنده، چاکه چیون دی. 12پس مردمییَم هِمنه رفتار بِکَرا که گَوا اَوه شَماییَم رفتار بِکَرِنده. اَم کتاب تورات و پیغمبرون نیوشته‌هونِ.
زندگی راه
13«تَنگَ بَرَ دَ دِله بِشا، چون اَ راهی که چو آخر عاقبت هلاکته، آسونه و چُو بَر فِراعه و اَوی که ام بَرَ د دِلَه بِشنده پِرندِه. 14امّا اَ راهی که به اَبدیه حیات منتهی بی، چتینِ و چو بَر تنگ و اَونی که اَم راه آلَوِنده، کم اِسنده.
دار و چُو میوَه
15«دوروغیه پیغمبرانَ دَ دوری بکرا. اَون گوسپندون خَلاوییَم آینده شَما وَر، امّا چون باطِن دَرَنده وَرگِ شارینِنده. 16دارُن چون میوه‌هونَ دَ آزونِنده. مگَم اَنگورِ، خارَ بوتَه دَ، یا اَنجیِرِ، علف هرزه دَ چینا؟ 17هِمنَه هر سالمَ داری چاکه میوه دی، امّا آفَتیه دار، بَده میوه دی. 18سالمَ دار نِتونه بدَ میوه بیدی و آفَتیه دار نِتونه چاک میوه بیدی. 19هر داری که چاک میوه مَدیه، اجو ایبِرِنده و آتش دلَ فِر دیندِ. 20پس شَما اجون چون میوه هونَ دَ آزونو.
21«هِمنَه، نی که هر که اَمِن بِوا ”خداوند، خداوند“ آسمان پاتشاهی دِله بشی، بلکم اَوه که چِمِن پِه خواستَه که آسمان دَ اِسِه انجام بدی، آسمانه پاتشاهی دِله شی. 22داوری روزَ خیلیه اَمِن وانده: ”خداوندا، خداوندا، مگم اِشته نومَ دَ نبوتِمون نِکه؟ مگَم اِشته نومَ دَ دیومون اَبَرمون نکه؟ مگم اِشته نومَ دَ پِر معجزمون نکه؟“ 23اَز رُک اَجون وام، ”هرگز شماهون اونزونِسَیم ای بدکارون، چَمَنَ دور آبا!“
دانا معمار و نادان معمار
24«پس هر که چمن اَم لاوَعون بَشنوه و اَجون عمل بِکره، ای عاقِلَ مردکی شارینِ که اِشتن کییه سِگِ سَر بَناش بِکه. 25وارون بوارس، سیل بومه، باد بِوَزس و اَ کییش فشار بایرد امّا اَ کییه خراو نبه چون اَ کَه سِگِ سَر بَنا بییه به. 26امّا هر که چِمن اَم لاوَعون بَشنوه و اَجون عمل مَکره، نادانه مردکی شارینِ که اِشتن کییَش شِنِ سَر بَناش بِکه. 27وارون بِوارس، سیل بومه، باد بِوَزس و اَ کییش فشار بایرد اَ کییه ویرانه ببه و اَ کییه ویرانی پِر ببه!»
28وختی عیسی اَم لاوِش تموم بِکَه مردم چو تعلیمَ دَ مات بِبِنده، 29چون کسی شارین تعلیمِش دایَی که قدرت صاحاب به، نه چون تورات معلمین شارین.
ទើបបានជ្រើសរើសហើយ៖
انجیلِ مَتّی 7: KTT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company