Matay 4
4
kilralrimaw i Yēsu
(Maruko 1.12-13; Luka 4.1-13)
1kemazu mu, na Vangesar Lu'em pilralrangaw i Yēsu mukuwa i alalas, kilralrimaw kana akuma. 2'emiway za makapetelr 'uninan 'aremeng, savelaw lra i Yēsu. 3izu na melralrimaw mungawayan marengay kantaw: <<nu maw u nintu Alrak na Viruwa i itras mu, seratri nanni na varasa' muvalis mutu pang!>>
4temuvang i Yēsu: <<marengay na Sēsiyo: <tu iyavaaw na trau mu 'azi mawmau kuretalrima kana aekanen, a maw kuretalrima kanantu ngay na saya saya kana Viruwa i itras.> >>
5na akuma masalr ziya tu pilralrangaw i Yēsu mukuwa kana vangesar kazekalran, tu patikeziraw kana vangesar ruma' na maraitraitras, 6zi marengay kantaw: <<nu maw u nantu Alrak kana Viruwa i itras mu, unekun mulusu i inu; 'alranu marengay na Sēsiyo:
na Viruwa i itras muramawan kannu patalru kanantu tēnsi;
tu i 'elrupaw u za lima nazu,
'aziya tremengal kana varasa' nannu kuy zi mavuli'.>>
7temuvang i Yēsu: <<mawmu kemazu marengay na Sēsiyo: <ilralrimaw kani Luzu -- nannu Viruwa i itras.> >>
8talikuzakuzan, na akuma tu pilralrangaw i Yēsu paseki za pasalaw atras na zenan, pana'u kantaw kana kanatanatal i punapunan zi nantu kavavulayan peniya. 9marengay na akuma: <<nu malrituzu u semungal kaninku mu, ku vaverayanay nanni peniya kannu.>>
10temuvang i Yēsu: <<satang, uveruk usanin! marengay na Sēsiyo: <sungal kani Luzu -- nannu Viruwa i itras, pakamawmau semungal kantaw.> >>
11kemazu zi, muwaday lra na akuma kani Yēsu, zi zuwa lra na tēnsi temara kantaw.
i Yēsu kemirakaz i Galili palenak za vati
(Maruko 1.14-15; Luka 4.14-15)
12a kinger i Yēsu za muimeng i Yohanē i imengan, zi muwaliki, mukuwa i Galili. 13'azi kikazu i Nazalē i intaw, zi mukuwa kikazuwa i Kabēnum. izu na zekalr kazu i Zēbulun zi i Naftali na pinidare'an, adalrep i Galili na danaw. 14i ini mu pula'esi kanantu vati na patralritralri i Isaya:
15i Zēbulun zi i Naftali na dare',
makangaydiran kana lrevek na dalan, i Yorudan na zinanuman i makakuwaziyu,
tu Galili na sizumayan na trau!
16na kaazu i 'aremeremeng na trau
mena'u lra za ma'izang kana senan;
na kaazu kana kinazuwan na minatray na trau
ulra a senan pasenan kanazu.
17kemirakaz a azu, i Yēsu palenak za vati marengay: <<uwasalr pakavekal a, 'alrana adalrep lra mula'esi na kanatal i itras!>>
i Yēsu demaulr kana apat na kivavulraw
(Maruko 1.16-20; Luka 5.1-11)
18i Yēsu kemakawang makangaydiran i Galili kana danaw, mena'u kana zazuwa marewadi na kivavulraw, i Simon (ipu'avalr kani Pētēro) zi i waditaw i Antēlē, penauwa makuwa temavukulra i danaw. 19marengay i Yēsu kanazu: <<alamu kurelrang kaninku! ku kamawanaw mu kana kivavulraw za aelak za trau.>> 20payas meretra' kana tavukulr nazu, kurelrang lra kani Yēsu.
21i Yēsu kemakawang ziya mungawayan, mena'u zuma a zazuwa maruwadi -- alrak ni Zēbēdē i Yakob zi i Yohanē; nazu mukasa kani temamataw kazu i itras kana tamina temuwalre'ay kana tavukulr. demaulr i Yēsu kanazu, 22payas meretra' kana tamina nazu, marengay za uwaverukan kani temamataw, kurelrang kani Yēsu.
ipanadam ni Yēsu zi na paka'inava za kuwalengan
(Luka 6.17-19)
23i Yēsu paketrepay kemakawang i Galili, kazu kana makaiyaiyan ziya na waazukan ruma' panadam za trau, venavati za fukuing kana kanatal i itras, paka'inava kana marekamelrimelri na kuwalengan i zazekazekalr. 24tu ngadan mu'ivat lra i Siliya peniya, mawna kemani zi na zinekalranan i kazu na mikuwalengan za marekamelrimelri, na minanayan za marekamelrimelri na trau: paruwalruwanay kana kipalrar, na merarutreng, na mutuwalre'ap, urungaw mapiya mukuwa i ngawayan kantaw, tu paka'inavayaw kemasaesa nazu i intaw. 25mulalepun na trau kemay i Galili, Dēkapulis, Yērusalem, Yodaya, zi na Yorudan zinanuman i makakuwaziyu kana dare' zuwa kurelranga kantaw.
ទើបបានជ្រើសរើសហើយ៖
Matay 4: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023