Matay 5
5
penazangal na turu i zenan
1mena'u za salepun na trau i Yēsu, zi paseki muzenan; kemayan lra, nantu temakesi kazu paliyus kantaw i tarawiri tarawalran. 2kemirakaz panadam kanazu i intaw.
venavati za ka'inavayan
(Luka 6.20-23)
3na pakanumau za kalramalraman i lu'em na trau mu kemuda kana mika'inavayan a;
maw a zinekalranan kana kanatal i itras nazu!
4muramawan kanantu pinamelriyan zi nana i anger na trau mu kemuda kana mika'inavayan a;
tu i dele'usaw na Viruwa i itras nazu!
5na kemaira apelr i anger na trau mu kemuda kana mika'inavayan a;
kiyatuluz kanantu iyatuvang veray na piyaemanan na Viruwa i itras nazu!
6na mianger miturus pakakawang kanantu nirangeran na Viruwa i itras na trau mu kemuda kana mika'inavayan a;
na Viruwa i itras tu i pakumaway nazu!
7na mianger melraman temara za trau mu kemuda kana mika'inavayan a;
na Viruwa i itras kemazu melraman temara kanazu!
8na 'inava za kiniyaanger na trau mu kemuda kana mika'inavayan a;
nana'u kana Viruwa i itras nazu!
9na pareka'inavanava kana trau mu kemuda kana mika'inavayan a;
ku lralrak kakuwa kanazu na Viruwa i itras!
10na muramawan pakawang kanantu nirangeran kana Viruwa i itras zi kipakakuwatreng na trau mu kemuda kana mika'inavayan a;
maw a zinekalranan kana kanatal i itras nazu!
11<<nu 'alrana kurelrang mu kaninku zi kisiri mu kana trau, pakakuwatreng kanmu, marengay za marekamelrimelri za ngay kemuwatreng kanmu, i inmu kuwadakuda kana mika'inavayan a. 12kasemangal, 'alrana kani i itras ulra merevaw a pakasahar za muramawan kanmu zi kazu inepetr; na patralritralri a kinaaziyu ziyan maw mararesan kipakakuwatreng za trau.>>
na iyam zi na senan
(Maruko 9.50; Luka 1.34-35)
13<<maw mu na iyam kana trau i punapunan. na iyam nu iniyan lra tu ka'asilr mu, zi 'azi lra maruwa masalr mareveliyas 'asilr. mutu rimekan lra i intaw, 'inava nu i'atelr, kalrawalrawayay kidupa' za trau.
14<<maw mu a senan i punapunan. na kazekalran na pinarahan i itras kana zenan 'azi ta pakavulri. 15iniyan za trau nu padepe' za lrawlraw mu mukuwa meretra'a i makalusu kana vitaw, 'azika'azi meretra' i itras kana pulrawlrawan, maruwaya pasenan kana saruma'enan. 16mararesan, nanmu senan mu pasenanni i ngawayan kana trau, pana'uwan kanazu nanmu paelrangan na 'inava, semenay puitras kananmu Temama i itras.>>
venavati za kuret
17<<tu pauwayan ku iyazuwa mu maw zuwa puelaka papaziyazi kanantu kuret ni Mosē zi tu turu na patralritralri ikakuwa mianger. amelri ku zuwa puelaka papaziyazi, maw na zuwa ku papula'esi temulre'ay kanantu tatena' na pauwayan. 18penatezelra ku marengay kanmu, anu kazu ziyan na lingatr na dare', na kuret 'azi palremesan za savalrayan saturikan, palru za puludus na eman ziya#5.18 <<palru za puludus na eman ziya>> karuwa marengay za <<palru kana kakuret tu ipanadam za eman ziya uwasay peniya>>.. 19semeneng, izu na pamelri kana kuret i savakan kana maramakitekiteng na saya, pawnung panadam kana trau kemaazu mu, kazu kana kanatal i itras utu maramakitekiteng. muveliyas, izu na miturus kana kuret, pawnung kemaazu panadam kana trau miturus mu, kazu kana kanatal i itras utu maraayawayawan. 20marengaya ku kanmu, 'azi mu ka'azi marapenakasa kana sinsi na Sēsiyo zi na Palisay na trau pakakawang kanantu nirangeran na Viruwa i itras zi na karuwa musavak kana kanatal i itras.>>
venavati za ka'iyalremesan
21<<kinger mu lra, na trau a awatr ziya kemuret pinaziyazi lra za: <ipiyanatray za trau; na pinatray za trau mu kisayvangen.> 22mawmu marengaya ku kanmu, na 'iyalremes kana wadadiyan#5.22 <<na 'ilralremes kana wadadiyan>> ulra pidaya awatranan lulun puwayay za <<iniyan za pauwayan na 'ilralremes kanantu wadadiyan>>. mu, kemazu maw kisayvangen; na venavarang kana wadadiyan za <'azi mutu a eman> na kema mu, pauwain i hoing; na venavarang kana wadadiyan za <palrar> na kema mu, 'azi karuwa penusar kana apuy i zikok. 23mawna kemani, nu kazu u i ngawayan kana patavangan patavang kana Viruwa i itras mu, nu paranger u za ulra a wadadiyan 'azi semangal kannu mu, 24pauwayanay mu vilin u na ipatavang i ngawayan kana patavangan, pakunamun mukuwa kima'inavaya kantaw, kemazu zi uveliyas sunanan nannu ipatavang kana Viruwa i itras.
25<<nu ulra a trau kokso kannu mu, tu i kezengaw u mukuwa i hoing mu, nu 'azi mu ziyan mukuwa i hoing pakangawayan mu pakunamun pareka'inava kantaw. nu 'azi mu, mengangara za musavak lra i hoing, tu i verayanay u kana hokang, na hokang tu i verayanay u kana kingsas i hoing, pusavakaw u i imengan. 26marengaya ku kannu, uwaimeng u, palru za piya u semavung kana talikuzakuzan na saya tangpiya.>>
venavati kana semiya'
27<<kinger mu lra a awatr ziya ulra kemani a turu marengay: <isasiya'.> 28mawmu marengaya ku kanmu, na mena'u za vavayan zi pimamelri mianger mu, piya lra semiya' kantaw i anger. 29nannu matra na tarawalran nu pupamelri kannu mu, kerutru pupana, 'atelran! nu parainiyan ta za saya i iyan i zazek mu para'inava kana mutani peniya ta zazek i zikok. 30nu papamelri kannu nu lima na tarawalran mu, salretevu putani, 'atelran! nu parainiyan za saya i iyan i zazek mu para'inava kana mutani peniya na zazek i zikok.>>
venavati kana raretra'an za 'azin na vavayan
(Matay 19.9; Maruko 10.11-12; Luka 16.18)
31<<ulra ziya kemani a turu marengay: <na marenger meretra' 'ematelr za 'azin na vavayan mu, 'azika'azi venavalray za meretra' na valray veray kantaw.> 32mawmu marengaya ku kanmu, nu amelri maw 'azi patezelr na 'azin na vavayan mu, na 'azin na ma'inayan 'azi karuwa meretra' 'ematelr kantaw. 'alrana, nu masalr mi'azin na vavayan, maresan za pasiya' kanantu 'azin i intaw; na mi'azin kantaw na ma'inayan mu kemazu maw maresan za semiya'.>>
venavati kana putani za ngay
33<<kinger mu ziya na trau a awatr ziya kanantu turu marengay: <isuwaveli kana iputani na ngay; na iputani na ngay i ngawayan kani Luzu mu ika'azi pula'esi.> 34mawmu marengay ku kanmu, 'azi mu karuwa putani za ngay. itatuzu' piyalingatr putani za ngay, 'alrana na lingatr maw nintaw pazangal na kakayanan kana Viruwa i itras; 35itatuzu' piyadare' putani za ngay, 'alrana dare' maw nintaw dade'elran za kuy na Viruwa i itras; zi itatuzu' i Yērusalem putani za ngay, 'alrana maw nintaw kazekalran kana ma'izang na ayawan; 36arusay za itatuzu' i tranguru' putani za ngay i inta, 'alrana 'azi u maruwa venalis paka'uze'uzem zi za pakavulretri' za sasaya kanannu 'arevu. 37nu venavati mu mu, nu maw mu, maw kema ta, nu amelri mu, amelri kema ta; nu marengay ziya za sazu mu maw mupana kemay kanizu na pimamelri.>>
venavati kana venavales
(Luka 6.29-30)
38<<kinger mu lra ulra kemani a turu marengay: <na kiyamatra kiyamatrayay venales, na kiwalri kiwalriyay venales.> 39mawmu marengaya ku kanmu, ivavales kana temariyaeman kanmu na trau. 40nu ulra a trau semelretra' kanannu mudingan i tarawalran mu, arusay na mudingan i tarawiri paselretra'an kantaw mu! nu ulra a trau kemezeng kannu mukuwa i hoing, aelakay u kanannu kavang na pakesavak, arusay i panayan na kavang verayan kantaw mu! 41nu ulra a trau#5.41 <<ulra a trau>> karuwa marengay za <<ulra na semalraw 'emaraw na hitay>>. pa'a'isel papazek kanantu inurung zi pakakawang za saya kilo za dalan mu, kurelrang kantaw kemakawang za zuwaya kilo a! 42nu ulra a trau kiyaveray za eman kannu mu, verayi i intaw; nu ulra a trau kiyavulas za eman kannu mu, pavulasi i intaw.>>
venavati za lraman kana 'alra
(Luka 6.27-28, 32-36)
43<<kinger mu ziya za kemani a turu marengay: <kalramanu nannu 'ali'an, kawilesu nannu 'alra.> 44mawmu marengaya ku kanmu, kalramanu nanmu 'alra, pawnung kiyanuni na pakakuwatreng kanmu na trau. 45kemani mu, kararuwa mu mutu lralrak kani Ama i itras. 'alrana, na i Ama i itras tu pasenanay kana kadaw na 'inava na trau, zi mararesan kemazu pasenan kana kuwatreng na trau; 'emudalr veray kana mipaelrangan za 'inava, zi veray kana kemuwaatreng 46nu pakarasa mu lraman kanazu na lraman kanmu na trau mu, na Viruwa i itras mu kemudaya veray za pakasahar kanmu? arusay na kisasata mu kemazu! 47nu pakarasa mu kimazayar za 'ali'an, ulra a eman kamamatrasan i izu? arusay na kirekamelri na sinziya mu kemani kemakuda! 48mutulre'aya mu, kamawan kananmu Temama i itras maw a mutulre'ay.>>
ទើបបានជ្រើសរើសហើយ៖
Matay 5: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023