ရှင်လုကာ 6
6
ခန်း (၆)
ဥပုသ်နေ့ရဲ့ရှင်သခင်
(ရှင်မဿဲ ၁၂.၁-၈။ ရှင်မာကု ၂.၂၃-၂၈)
1ဥပုသ်နေ့တစ်နေ့မှာ ကိုယ်တော်ယေရှု န ဗြိတော်ဒွေဟ ဂျုံခမ်းချို့ဝို ဖြတ်သွားလေရယ်။ သူ့နို့လမ်းရှော့နေဝိုခီမှာ ဗြိတော်ဒွေဟ ဂျုံနှံချို့ဝို ခူးပီး သူနို့ရဲ့လက်ဒွေန ခွံဝိုပွတ်ပီး ဂျုံဇေ့ဒွေဝို စားဂေ့လေရယ်။ 2အယ်ဘေမဲ့ ဖာရိရှဲချို့ဟအဲမိုဇာဝိုဗြင်ပီး “ ပညတ်တရားအရ ဥပုသ်နေ့မှာ လုပ်လုပ်ခွမ့်ပြုရားဘဲဇာဝို နန်းနို့ဟ ဟဲဂျော့လုပ်နေဂေ့နူး” ဆိုပီး မေးဂေ့လေရယ်။ 3အဲခါ ကိုယ်တော်ဟ သူ့နို့ဝို “ဘုရင်ဒါဝိဒ်န သူ့နော့လိုက်ဒွေ ဗိုက်ဆာလာဝိုခီမှာ ဟဲမျိုးလုပ်ခဲ့နူးဆိုဇာဝို ကျမ်းစာ#6.3 ကျမ်းစာ ဘုရင်ဒါဝိဒ်ဟ ရှောလမုန်မန်းဆီဟနေ ထွက်ပလေးတီးရှော်ဝို ခီမှာ အဲမိုဖြစ်ပျစ်ဖြစ်ခဲ့ဇာဖြစ်ရယ်။ထဲမှာ နန်းနို့ ဖတ်ဖူးဂေ့ရလော” ဆိုပီး ပလန်ဖြေလေရယ်။ 4“သူဟ ဘုရားရှင်ရဲ့အီတော်#6.4 ဘုရားရှင်ရဲ့အီတော် ဘုရားရှင်ရဲ့အီတော် ဆိုဇာဟ အဲမိုခီဟ ဗိမာန်တော်မှေ့ဘဲရိတွက် တဲဝို ပြောဇာဖြစ်ရယ်။ထဲဝို ဝမ်ပီး ပုရောဟိတ်ဒွေဟနေလွဲပီး ခြားသူဒွေ စားခွမ့်မှေ့ဘဲဝို ဘုရားရှင်ဝို ပူဇော်ရားဝို ပါမုဒွေဝို သူကိုယ်တိုင်စားဝိုမျှဒဲမုဘဲန ချို့ဝို သူ့နော့လိုက်ဒွေဝို ပေးခဲ့ရယ်” ဆိုပီး မိတော်မူလေရယ်။ 5အဲနော့ ကိုယ်တော်ဟ သူ့နို့ဝို “လူ့သားတော်ဟ ဥပုသ်နေ့ရဲ့ ရှင်သခင်ဖြစ်ရယ်” ဆိုပီး မိတော်မူပီး ဂါးဝို ဆုံးသတ်လိုက်လေရယ်။
ညာဖက်လက်သေနေဝို လူတယော့
(ရှင်မဿဲ ၁၂.၉-၁၄။ ရှင်မာကု ၃.၁-၆)
6ခြား ဥပုသ်နေ့မှာ ကိုယ်တော်ဟ ဓမ္မာရုံထဲဝိုဝမ်ပီး ဟောပြောသွန်သန်နေခီ အဲမိုနေရာမှာ ညာဖက်လက် သန်ဇွမ်းဘဲဝို လူတယော့ရှေ့နေလေရယ်။ 7ဖာရိရှဲချို့န ကျမ်းတတ်ဆရာချို့ဟ အဲမိုနေရာမှာ ရှေ့နေဂေ့လေရယ်။ သူ့နို့ဟ ကိုယ်တော်လုပ်ဇာ မှားရယ်ဆိုပီး စွပ်စွဲဝို့ ကြောပြချင့် ရှာတွီ့ရှင်ရိတွက် ဥပုသ်နေ့မှာ ကိုယ်တော်ဟ အဲမိုလူဝို ကုသပေးမလောဆိုဇာဝို နီးကပ် စော့ကေ့နေဂေ့လေရယ်။ 8အယ်ဘေမဲ့ ကိုယ်တော်ဟ သူ့နို့ ဟဲမျိုးတွီးတောနေဇာဝို သိရိတွက် အဲမိုညာဖက်လက်သန်ဇွမ်းဘဲဝိုလူဝို “ထပီး လူဒွေဂူလုံးရှေ့မှာ မတ်တပ်ရပ်ပါ” ဆိုပီး မိတော်မူလေရယ်။ အဲနော့ အဲမိုလူဟလဲ ထပီး အဲမိုနေရာမှာ မတ်တပ်ရပ်လိုက်လေရယ်။
9အဲနော့ ကိုယ်တော်ယေရှုဟ ဖာရိရှဲ န ကျမ်းတတ်ဆရာဒွေဝို “ငါ နန်းနို့ဝို မေးမယ်။ ဥပုသ်နေ့မှာ နို့ရဲ့ပညတ်တရားဟ ဟဲရာဇာဝို လုပ်ခွမ့်ပြုနူး။ ယော့ယော့ဝို ကူညီပေးဝို့လော အဲမျိုးမုဝဆိုဝါ ထိခိုက်စေဝို့လော။ အဲမျိုးမုဝဆိုဝါ ယော့ယော့ရဲ့သက်ဝို ကယ်တံဝို့လော မုဝဆိုဝါ ဖျစ်ဆီးဝို့လော” ဆိုပီး မေးလေရယ်။ 10ဟယ်သူလဲ သူ့ဝို ပလန်ဖြေဇာမှေ့ဘဲရိတွက် သူ့ပတ်ပတ်လည်မှာရှေ့ဝို လူဒွေဂူလုံးဝို ကေ့လိုက်ပီး အဲမိုလူဝို “နန့်လက်ဒွေဝို ဆန့်ထုလိုက်ပါ” ဆိုပီး မိတော်မူလိုက်ဝိုခီမှာ အဲမိုလူဟလဲ လက်ဝိုဆန့်ထုလိုက်ဝိုခါမှာ သူ့လက်ဟ ကောတိုင်းပလန်ဖြစ်ရားလေရယ်။ 11အယ်ဘေမဲ့ ဖာရိရှဲဒွေန ကျမ်းတတ်ဆရာဒွေဟ အဲမိုဇာဝို ဗြင်လိုက်န ရားဒိုင်းဒေါသထွက်ဂေ့ပီး ကိုယ်တော်ဝို ဟယ်မျိုးလုပ်ရမယ်နူး ဆိုပီး သူ့နို့ချင်းချင်း စပီး တိုင်ဘမ်ဂေ့လေရယ်။
သာဝကဆယ့်နှေ့ယော့ဝို ဝီးချယ်ခန့်အပ်တော်မူခြင်း
(ရှင်မဿဲ ၁၀.၁-၄။ ရှင်မာကု ၃.၁၃-၁၉)
12ရစ်နဲငယ်ကြာပီးဝိုနော့မှာ ကိုယ်တော်ဟ ဘားဒဲဆုတောဝို့ တော်ဂူးပေါ်ဝို ကြွရားလေရယ်။ သူဟ အဲမိုနေရာမှာ ညစ်လုံးနေပီး ဘုရားရှင်ဆီမှာ ဆုတောတော်မူလေရယ်။ 13နော့နေ့မိုးလန်းဝိုခါမှာ ကိုယ်တော်ဟ သူ့ဗြိတော်ဒွေဂူလုံးဝိုခေါ်ပီး စုခိုင်းပီးန သူနို့ထဲဟ ဆယ်နှေ့ယော့ဝို သာဝက#6.13 သာဝက သာဝက ဆိုဇာဟ ကိုယ်တော်ယေရှု ထူးတလှယ်ဝီးချယ်ရားဝို ဗြိတော်ဒွေဖြစ်ရယ်။ဒွေဖြစ်န ဝီးထုတော်မူလေရယ်။
14အဲမိုသာဝကဒွေရဲ့နော်မယ်ဒွေဟ ကိုယ်တော်ယေရှုဟ ပေတရုဆိုပီး နော်မယ်ပေးရားဝို ရှိမုန်န သူ့ညီအန္ဒြေ၊
ယာကုပ်၊
ယောဟန်၊
ဖိလိပ္ပု န
ဗာသောလမဲ၊
15မဿဲ န
သောမ၊
အာလဖဲရဲ့သား ယာကုပ် န
မျိုးချစ်ပုဂ္ဂိုလ်ဆိုပီး ခေါ်ဝို ရှိမုန်#6.15 ရှိမုန် ရှိမုန်ဟ ဂျူးလူမျိုးဒွေဝို ရောမအုပ်ချုပ်မှုအော့ဟနေ လွတ်မြော့စေဝို့ တိုက်ခိုက်နေဝို အုပ်စုတစ်စုရဲ့ ဖွဲ့ဝမ်ဟောဖြစ်ရယ်။၊
16ယာကုပ်ရဲ့သားဖြစ်သူ ယုဒ န
နော့ပိုင်းမှာ ကိုယ်တော်ယေရှုဝို သစ္စာဖော့ဝို့လူ ယုဒရှကာရုတ်#6.16 ယုဒရှကာရုတ် ယုဒရှကာရုတ်ဟ နော့ဆုံးညစ်ဇာစားပွဲမှာ ယေရှုဝို သစ္စာဖော့ပြီးနော့ အဲမိုမျိုးသစ္စာဖော့လိုက်မိရိတွက် နော်ဒရပီး ကိုယ့်ကိုကိုယ် သတ်သေခဲ့ရယ်။ (မဿဲ ၂၇:၅)ဒို့ ဖြစ်လေရယ်။
သွန်သန်ခြင်းနကုသခြင်း
(ရှင်မဿဲ ၄.၂၃-၂၅)
17ကိုယ်တော်ဟ သာဝကဒွေနတူတူ တော်ပေါ်ဟနေ မလေပြန့်ဝို ဆင်းလာခဲ့ဂေ့လေရယ်။ အဲမိုနေရာမှာ ကိုယ်တော်ရဲ့ ခြားဗြိအုပ် န တူတူ ယုဒပြည်၊ ဂျေရုဆလင်၊ ဇိဒုန်န တုရုဒေသပမ်လယ်ကမ်းပါး ဒေသ တရှော့လုံးမှာရှေ့ဝို ဗြို့ဒွေဟနေ လူထုပရိသတ်များဂီး န တွီ့ဂေ့လေရယ်။ 18အဲမိုလူဒွေဟ ကိုယ်တော်ရဲ့ရားတော်ဒွေဝို ကြားနာဝို့န သူနို့ရဲ့ နာရောဂါဒွေဝို ကုသဝို့ အဲမိုနေရာဝို လာရော့ဂေ့ဇာဖြစ်ရယ်။ ကောဆိုးဝါးဒွေပူးကပ်ပီး ဒုက္ခရော့နေသူ ဂူလုံးဟလဲ နာရောဂါပျော့ကမ်းရားဂေ့လေရယ်။ 19လူဒွေဂူလုံးဟ ကိုယ်တော်ယေရှုဝို တို့ထိဝို့ ကြိုးစားဂေ့လေရယ်။ ဟဲဂျော့ဆိုဝါ နာရောဂါပျော့ကမ်းဇေနိုင်ဝို ဂိုးတော်ဟ ကိုယ်တော်ဟနေ ထွက်လာပီး လူဒိုင်းဝို ကုသပေးနေရိဂျော့ဖြစ်ရယ်။
ကံကောဝိုသူဒွေ
(ရှင်မဿဲ ၅.၁-၁၂)
20အဲနော့ ကိုယ်တော်ဟ သူ့ဗြိတော်ဒွေဝို ကေ့ပီး
“ဆင်းရဲချို့တဲ့ဝိုနန်းနို့ဟ ကံကောဂေ့လိမယ်။
ဟဲဖြစ်ရိနူးဆိုဝါ ဘုရားရှင်သာသနာတော်ဟ နန်းနို့န ဆိုင်ရိဂျော့ဖြစ်ရယ်” ဆိုပီး မိတော်မူလိုက်လေရယ်။
21ခု ဗိုက်ဆာနေဝို နန်းနို့ဟ ကံကောဂေ့လိမယ်။
ဟဲဖြစ်ရိနူးဆိုဝါ ဘုရားရှင်ဟ နန်းနို့ဝို ဖလဲ့ဆည်းပေးမှာ ဖြစ်ရိဂျော့ဖြစ်ရယ်။
ခု ငိုနေရဝို နန်းနို့ဟ ကံကောဂေ့လိမယ်။
ဟဲဖြစ်ရိနူးဆိုဝါ နန်းနို့ဟ ပျော်ပျော်ရွှင်ရွှင်န ရယ်ဂေ့ရလိမယ် ဖြစ်ရိဂျော့ဖြစ်ရယ်။
22လူ့သားတော်ဝို ယုံကြည်ဂေ့ရိတွက်ဂျော့ လူဒွေရဲ့ မူးခံရ၊ ပယ်ခံရ၊ ကဲ့ရစ်ခံရ၊ နော်မယ်ဖျစ်ဇာဝို ခံရဝိုခါမှာ နန်းနို့ဟ ကံကောဂေ့လိမယ်။
23အဲမိုမျိုးဖြစ်ပျစ်ရယ်ဆိုဝါ ဝမ်းမြော့ဝမ်းသာ ကခူဂေ့ပါ။ ဟဲဖြစ်ရိနူးဆိုဝါ ဘုရားရှင်ဟ ရွှေဗြို့တော်မှာ နန်းနို့ဝို ဆုလာဘ်ဒွေ များဂီးပေးလိမယ်။ ရှေးဒူးဒဲဟ နန်းနို့ရဲ့ဘိုးဘေးဒွေဟလဲ ပရောဖက်ဒွေဝို အဲမိုတိုင်းဘဲ့ လုပ်ခဲ့ဂေ့ရယ်။
ဆင်းရဲဒုက္ခ ကြုံတွီ့ရဝို့လူဒွေ
24ထပ်ပီး ကိုယ်တော်ဟ
“အယ်ဘေမဲ့ ချမ်းသာဝိုသူဒွေ ဆင်းရဲဒုက္ခဂီးန ကြုံတွီ့ရလိမယ်ဖြစ်ရယ်။
ဟဲဂျော့ဆိုဝါ နန်းနို့ရရှေ့မဲ့ ကောဝိုဇာဒွေဂူလုံးဝို ခုဘဝမှာ ရရှေ့ထားဂေ့ပီးဖြစ်ရိဂျော့ဖြစ်ရယ်။
25ခု ဝဝလင်လင် စားသော့နေထိုင်ရဝို နန်းနို့ဟ ဆင်းရဲဒုက္ခ န ကြုံတွီ့ရလိမယ်ဖြစ်ရယ်။
ဟဲဖြစ်ရိနူးဆိုဝါ နန်းနို့ဟ ငတ်မွတ်ဇာဝို ကြုံရလိမယ်ဖြစ်ရယ်။
ခု ရယ်နေရဝို နန်းနို့ဟ ဆင်းရဲဒုက္ခ န ကြုံတွီ့ရလိမယ်ဖြစ်ရိဂျော့ ဖြစ်ရယ်။
ဟဲဖြစ်ရိနူးဆိုဝါ နန်းနို့ဟ ဝမ်းနည်းပူဆွေးပီး ငိုဂေ့ရလိမယ် ဖြစ်ရိဂျော့ဖြစ်ရယ်။
26လူဒွေဟ နန်းနို့ကောကြောဝိုပြောဂေ့ဝိုခါမှာ နန်းနို့ဆင်းရဲဒုက္ခကြုံတွီ့ဂေ့ရလိမယ်။
ဟဲဂျော့ဆိုဝါ အဲမိုလူဒွေရဲ့ဘိုးဘေးဒွေဟလဲ ယော်ဆော်ပရောဖက်ဒွေဝို အဲမိုမျိုးဘဲ့ ချီးမွမ်းပြောဆိုခဲ့ဂေ့ရိဂျော့ဖြစ်ရယ်” ဆိုပီး မိတော်မူလေရယ်။
ရန်သူဝိုမေတ္တာထားပါ
(ရှင်မဿဲ ၅.၃၈-၄၈၊ ၇.၁၂)
27ကိုယ်တော်ယေရှုဟ ဆစ်ပီး သွန်သန်ပီး “ငါဟောကြားတော်မူဇာဝို နားထော်နေဝို နန်းနို့ဝို ငါပြောမယ်၊ နန်းနို့ရဲ့ရန်သူဒွေပေါ်ဝို မေတ္တာထားဂေ့ပါ။ နန်းနို့ဝို မူးနေဝိုသူဒွေပေါ်ဝို ကောကျိုးဝို ပြုပေးဂေ့ပါ။” 28နန်းနို့ဝို ကလီဆဲသူဒွေဝိုလဲ ဘုရားရှင်ဟ ကောဝိုဇာဒွေ ပေးသနားဝို့ ဆုတောပေးဂေ့ပါ။ နန်းနို့ဝို ညှဉ်းပန်းနှိစစ်သူဒွေတွက်လဲ ဆုတောပေးပါ။ 29ဇုံတယော့ဟ နန့်ပါးတစ်ဖက်ဝို ရိုက်ရယ်ဆိုဝါ သူ့ဝို နော့ပါးတစ်ဖက်ဝိုပါ ရိုက်ခိုင်းလိုက်ပါ။ ဇုံတယော့ဟ နန့်ရဲ့ပေါ်အမ်းဂီဝို တောရယ်ဆိုဝါ သူ့ဝို နန့်တွမ်းခံအမ်းဂီဝိုပါ ပေးလိုက်ပါ။ 30နန့်ဆီဟ ခုခု တောခံလာသူဒွေဝို ပေးကမ်းလိုက်ပါ။ နန့်နဆိုင်ဇာခုခုဝို ယော့ယော့ဟ ယူဝါးရယ်ဆိုဝါ သူ့ဆီဟနေ ပလန်ပီး တောပါန။ 31ကိုယ့်ဝို ပြုမူဆစ်ဆံဇေရှင်ဝိုတိုင်း သူများပေါ်ဝို ပြုမူဆစ်ဆံပေးပါ။
32နန်းနို့ဝို မေတ္တာထားသူဝိုဘဲ့ ပလန်ပီးမေတ္တာထားနေမယ်ဆိုဝါ ဘုရားရှင်ဆီဟနေ နန်းနို့ဝို ချီးမွှမ်းမယ် ဆိုပီး မျှော်လင့်နေန။ ပြစ်ဒုဇရိုက်မားဒွေဂိုမှ သူ့နို့ဝိုမေတ္တာထားသူဝို ပလန်ပီး မေတ္တာထားနိုင်ဂေ့ရယ်။ 33နန်းနို့ဝို ကောသူဒွေပေါ်ဝိုဘဲ့ နန်းနို့ဟ ပလန်ကောမယ်ဆိုဝါ ဘုရားရှင်ဆီဟ ဆုလာဘ်ဝိုရမယ် ဆိုပီး မျှော်လင့်ဂေ့န။ ဟဲဖြစ်ရိနူးဆိုဝါ ပြစ်ဒုဇရိုက်မားဒွေဂိုမှ အဲမိုမျိုးလုပ်နိုင်ရယ်။ 34ပလန်ရမယ် ဆိုပီး မျှော်လင့်ပီး သူများဝို နန်းနို့ချေးငှားမယ်ဆိုဝါ ဘုရားရှင်ဟ နန်းနို့ဝို ချီးမွှမ်းမယ် ဆိုပီး ထံနေဂေ့လော။ ပြစ်ဒုဇရိုက်မားဒွေဂိုမှ ပေးဝိုပမာဏတိုင်း ပလန်ရဝို့ သူ့နို့ချင်းချင်း ချေးငှားတတ်ဂေ့ရယ်။ 35အဲမိုစား ရန်သူဒွေဝို မေတ္တာထားပီး ကောကော ပြုမူဆစ်ဆံဂေ့ပါ။ ဟဲရာဇာဝိုမှ ပလန်လည်ရရှေ့ဝို့ မျှော်လင့်ချင့်ထားဘဲန ချေးငှားဂေ့ပါ။ ဘုရားရှင်ဟ လူဒိုင်းအပြင် ကျေးဇူးသိတတ်ဘဲဝိုလူ၊ ဆိုးယုတ်ဝိုလူဒွေ ပေါ်ဝို မေတ္တာထားရိဂျော့ အဲမျိုးလုပ်မယ်ဆိုဝါ ဆုလာဘ်ဂီးဝို ရဝို့အပြင် နန်းနို့ဟ မြင့်မြတ်ဆုံး ဘုရားရှင်ရဲ့ သားမီးဒွေဖြစ်ကြော သက်သေပြပါလိမယ်။ 36နန်းနို့ရဲ့ အဖဘုရားရှင်ဟ လူဒိုင်းပေါ်ဝို နားညှာတာဝိုမျိုး ခြားသူဒွေပေါ်မှာလဲ နားညှာတာဂေ့ပါ။
သူများဝို ပြစ်ဒဏ်သတ်မှတ်ဇာဒွေ လုပ်န
(ရှင်မဿဲ ၇.၁-၅)
37ကိုယ်တော်ယေရှုဟ ဆစ်ပီး မိတော်မူဇာဟ “ခြားသူဒွေဝို စစ်ကြောစီရင်ဝိုဇာဒွေ လုပ်န၊ အဲမျိုးဆိုဝါ ဘုရားရှင်ဟလဲ နန်းနို့ဝို စစ်ကြောစီရင်မှာမုဝ။ သူများဝို ပြစ်ဒဏ်သတ်မှတ်ဇာ လုပ်န၊ ဘုရားရှင်ဟလဲ နန်းနို့ဝို ပြစ်ဒဏ်သတ်မှတ်ဇာ လုပ်မှာမုဝ။ ခြားသူဒွေဝို ခွမ့်လွှတ်ပေးရယ်ဆိုဝါ ဘုရားရှင်ဟလဲ နန်းနို့ဝို ခွမ့်လွှတ်ပေးပါလိမယ်။” 38သူများ လိုအပ်ဝိုဇာမှန်သမျှဝို ပေးကမ်းလိုက်ပါ။ အဲမိုမှဘဲ့ နန်းနို့ လိုအပ်ဝိုဇာဝို ရဂေ့လိမယ်။ ဘုရားရှင်ဟ နန်းနို့တွက် ပိုပီးများများဝမ်ဆန့်ဝို့ သိထည့် ဖိထည့် လှုခါထည့်ပီး ဘေးဝိုဂိုမှ ဖိကလဝိုထိ များပြားဝို ပမာဏဝို ပလန်လည်ပေးကမ်းဇာ ခံရလိမယ်။ ပေးကမ်းဝိုခါမှာ နည်းများမဆို ဟဲရာတိုင်းတာဝိုဘဲ့ သုံးသုံး နန်းနို့သုံးရားဝို တိုင်းတာတိုင်း ပလန်ပေးကမ်းဇာခံရလိမယ်။
39အဲနော့ ကိုယ်တော်ဟ သူ့နို့ဝို ပုံဥပမာခုဝိုသုံးပီး မိတော်မူဝိုဇာဟ “မျစ်မမြင်တစ်ယော့ဟ ခြားမျစ်မမြင်တစ်ယော့ဝို ဦးဆော်လမ်းပြနိုင်ပါ့မလော။ အဲမိုနှေ့ယော့စလုံး မြောထဲ ပြုကလရားမယ်မုဝလော။ 40ဆရာထက် ပိုသာဝို ဗြိ ဆိုပီး မှေ့ရ။ အယ်ဘေမဲ့ သူ့နို့ဟ လေ့ကျင်မှုကောကောယူရားရယ်ဆိုဝါ သူ့နို့ဆရာဝိုမျိုး ဖြစ်လာလိမယ်။
41နန်ဟ ဖူမုလော့ဘဲ့ရှေ့ဝို နန့်မိဆွေရဲ့ မှားသေးသေးရားဝို ဒိထားမိပီး နန့်မျစ်လုံးထဲဟ သစ်တုံးလော့ရှေ့ဝို သစ်စဝိုမျိုး နန့်ရဲ့မှားဂီးရီးခုဝို ဒိထားမိဘဲန နေသင့်ရ။ 42နန့်ရဲ့မှားဂီးရီးဝို ဖြေရှင်းဘဲန နန့်မိဆွေဝို ‘မိဆွေ၊ နန့်ရဲ့ မှားသေးသေးရားဝို ငါ ပြုပြင်ပေးပါရစေ’ ဆိုပီး ပြောဝိုဇာဟ မှားရယ်။ အဲမျိုးပြောရယ်ဆိုဝါ နန်ဟ သူတော်ဂေါယော်ဆော်ဝိုသူ ဖြစ်လိမယ်။ ဦးဆုံး နန့်မှားဒွေဝို ပြင်ဆင်သင့်ရယ်။ ပြီးမှဘဲ့ နန့်မိဆွေရဲ့ မှားသေးသေးရားဝို ပြင်ဆင်ဝို့ နန်ကူညီပေးနိုင်လိမယ်ဖြစ်ရယ်။”
သစ်ပမ်နသစ်သီး
(ရှင်မဿဲ ၇.၁၆-၂၀၊ ၁၂.၃၃-၃၅)
43“သစ်ပမ်ကောဟ ကောဘဲဝို သီးဝိုသီးနိုင်ရ။ အဲမိုမျိုးဘဲ့ ကောဘဲဝို သစ်ပမ်ဟလဲ သီးကောဝို သီးနိုင်ရ။ 44လူဒွေဟ သီးဝိုကေ့ပီး ဟဲမျိုးပမ်ဖြစ်ရယ် ဆိုဇာဝို သိဂေ့ရယ်။ ဥပမာနေန ပြောရမယ်ဆိုဝါ နန်းနို့ဟ ဆူးပမ်ဟနေ သဖန်းသီးဝို ခူးနိုင်ဘဲဝိုမျိုး ချုံပုတ်ဟနေလဲ ဗျစ်သီးဝို ခူးရိရမှာမုဝ။ 45အဲမိုမျိုးဘဲ့ ကောဝိုလူဟ ကောဝိုဇာဒွေဝိုဘဲ့ တွီးရိဂျော့ သူဟ ကောဝိုဂါးဝိုဘဲ့ ပြောတတ်ရယ်။ ကောဘဲဝိုလူကလလောဝါ သူ့စိထဲမှာ ကောဘဲဝိုဇာဒွေဝိုဘဲ့ တွီးရိဂျော့ ကောဘဲဝိုဇာဝိုဘဲ့ လုပ်တတ်ရယ်။ အဲဂျော့ လူတစ်ယော့ပြောဆိုဝို ဂါးဒွေဟ သူ့နို့ရဲ့စိဝို ဖော်ပြလေ့ရှေ့ရယ်” ဆိုပီး မိတော်မူလေရယ်။
အီဆော့သူနှေ့ယော့
(ရှင်မဿဲ ၇.၂၄-၂၇)
46ကိုယ်တော်ယေရှုဟ ဆစ်ပီး “နန်းနို့ဟ ငါပြောဝိုဇာဒွေဝို နန်းနို့နာခံဘဲန ဟဲဂျော့ ငါ့ဝို ‘အရှင်၊ အရှင်’ ဆိုပီး ခေါ်နေဂေ့နူး။ 47ငါ့ဆီ လာပီး ငါဟောကြားဇာဒွေဝို နာကြားပီး လိုက်နာဝိုလူဟ ဟဲမျိုးလူန တူရယ်ဆိုဇာဝို နန်းနို့ဝို ငါပြောပြမယ်။ 48အဲမိုလူဟ တွမ်းဝို နက်နက်တူးပီး ကလော့ခံမလေပေါ်မှာ အုမလစ်ခဝို အီဆော့သူနတူရယ်။ ဗြစ်ရေကီးလာပီး အဲမိုအီဝို ရိုက်ခတ်လာဝိုခါမှာ အဲမိုအီဟ သေးချာဆော့ရားရိတွက် ခါရမ်းဇာဒွေမှေ့ရ။ 49အယ်ဘေမဲ့ ငါရဲ့ရားတော်ဒွေဝို နာကြားပီး လိုက်နာဘဲဝိုသူဟ မလေပေါ်မှာ တွမ်းဝို နက်နက်တူးဘဲန အုမြစ်မခလဘဲ အီဆော့သူနတူရယ်။ ဗြစ်ရေကီးလာပီး အဲမိုအီဝို ရိုက်ခတ်လာဝိုခါမှာ အဲမိုအီဟ ချင့်ချင်း ပြိုလဲပီး လုံးဝ ပျစ်ဆီးရားပါလိမယ်။” ဆိုပီး မိတော်မူလေရယ်။
ទើបបានជ្រើសរើសហើយ៖
ရှင်လုကာ 6: TVN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dawei (ထားဝယ်) Bible by Beyond Translation is licensed under Creative Commons Attribution-ShareAlike 4.0 License.