Tika Lisano Ya Kopamela Basusu | Eteni 6Mwa ndambo

LOBIKO

Na Yoane 3:17, 12:47 & 5:45, Yesu azali koloba na ntina na kosambisama lokola etumbu, Alobaki: “Naye kosambisa mokili te”, kasi na lisolo oyo (Yoane 9:39), Yesu azali koloba na ntina na kosambisama ya etumbu te kasi kosambisama ya lobiko oyo ezali kopesa ngolu mpe pole na baoyo bazali koyamba Ye. Bokufi miso ya molimo elimboli kozanga koyeba to buluyeke kati na molimo. Bobele baoyo bazali na komikitisa lokola moto oyo azalaki mokufi miso nde bakobikisama na nzoto mpe na molimo. Ezali na ntina mingi mpo na biso lokola bato ete tondima bolingo ya Nzambe epai na biso na komikitisa mpe kondima solo oyo ezali moto mosusu te kasi bobele Yesu Klisto. Nzambe asili kopesa biso lobiko ya ofele, na yango tika ete tozala bato ya bwanya mpe tozwaka mokumba na koyanolaka yango na lolenge malamu; tobebisa ntango te na komekaka kosangana na lisano ya kopamela basusu.

Koboya kondima Klisto te mpona bizaleli ya songisongi na bokosi ya mondimi songolo to pakala. Okoki kozala na 1 Million na 1 ya bantina ya malamu mpo na nini osengeli kobongola motema te kasi ezali na motango moko te ya bantina oyo ekoki kopekisa yo na kondimela Yesu lokola mobikisi mpe Nkolo na yo, mpo lobiko esombamaka te, ezalaka mpe ya lisanga te kasi ezali ya ofele mpe ya moto na moto. Na yango, na boboto nyoso, tika kosambisa basusu ndima Yesu Klisto mpe okobika.

Libondeli: Tata Nzambe natondi yo mpo na likabo ya lobiko, nakoki kotekisa yango te na eloko moko na mokili oyo mpe na mokili ekoya. Nabondeli mpo na baye nano bandimi te ete Nzambe epesa bango nzela ya kobika, molimo Mosantu afongola miso mpe matoyi na bango ya molimo mpo ete balongwa na koazanga boyebi mpe bandimi Yesu Klisto lokola mobikisi mpe Nkolo na bango. Na Nkombo na Yesu, AMEN.

Botangi mosusu: Matayo 13:10:16|Baloma 1:20-25|Emoniseli 3:17-18|2 Bakolinto 4:2-4|1 Yoane 5:12-21 |Yoane 3:16-21|