Tobikisami Mpo Na Kosala | Eteni 1Mwa ndambo

KOBENGAMA

Moize abotamaki na Ezipito na ntango oyo mibeko ya mokili yango mizalaki kopesa nzela te na kobotama ya mwana mobali nyonso oyo abotami sika na libota ya Baebele ; kasi Nzambe abikisaki ye mpe abatelaki ye ; mpe likolo na nyonso, Nzambe asalaki ete Moize azwa mateya ya bakonzi na ndako ya Falo. Osengeli koyeba ete Nzambe abikisaki yo, abateli yo mpe asali ete ozala na bomoi kino lelo mpo na mokano moko bobele moko; mpo na kokokisa mokano na ye. Baninga na yo mingi oyo bobotama elongo na bango basi bakufa, kasi Nzambe abateli yo mpo na kosalela ye. Baninga na yo mosusu nano babongoli mitema na bango te, Nzambe abikisi yo mpo osalela ye.

Nzambe akoki kosalela ba nzela ndenge na ndenge mpo na kobenga biso kasi mokano ya kobengama na biso ezali kaka moko: Kosalela Ye. Mpo na Moize, amonaki nzete ezopela moto kasi ezo zika te, mpo na Yelimia liloba ya Nzambe eyaki epai na ye, mpo na Dawidi, Nzambe alobaki na nzela ya mosakoli Samwele, mpo na Yesu, mongongo eutaki likolo, mpe ebenga ekitaki likolo na moto na ye, mpo na Neyemi ye moko amibengaki mpo na kotonga efelo ya Yelusaleme mpe Nzambe azalaki na ye. Likambo oyo eleki motuya na kosalela Nzambe ezali mposa oyo ezali kopusa yo kasi lolenge obyangami te. Nalingi ososola ete ata babengaki yo na lolenge kani; mokano mozali bobele moko; kosalela Nzambe. Kokanisa te ete ozali moto monene to moto ya mpamba mpo na lolenge oyo Nzambe asalelaki mpo na kobikisa to kobenga yo. Lolenge ya kobengama na biso ekoki kokesana kasi ntina ya kobengama na biso ezali kaka moko; kosalela Nzambe.

Tobongoli mitema na ba nzela ndenge na ndenge (Ba croisades en direct, mayangani ya eklezia, ba palteformes ya internet, ba radio to etando mike mpe bongo na bongo…) Nzela moko te kati na ba nzela oyo ekoki kosala ete moto moko abongola motema koleka basusu mpo biso banso tobikisami na ngolu na nzela ya kondima. Tokoki kozala na makabo ndenge na ndenge engebene ngolu oyo epesameli biso, kasi mokomoko na biso asengeli kosalela yango na mokano moko: Kozwa milimo mpo na Klisto. Ata misala mitano mizali bobele na mokano moko mpo na kotonga lingomba; yango elimboli ete bazali ba kowelana te kasi bazali nde kosalisana mpo na kokokisa mokano ya Nzambe mpo na bato. Kotika te ete lolenge oyo obengamaki to obikisamaki epesa yo mayoki ya kozala likolo to na nse, tya likebi na yo likolo na mokano ya kobengama na yo na esika ya lolenge oyo obengamaki. Ba Klisto mike na ya minene bazalaka te. Bato ya Nzambe minene na ye mike bazalaka te.