Tobikisami Mpo Na Kosala | Eteni 1Mwa ndambo

KOTYA NTEMBE NA YO MOKO

Nazali nani ? Na kotuna motuna wana, Moize azalaki na ntembe na ntina na libyangi na ye. Ekoki kozala ete makambo mabe oyo akutanaki na yango ntango amekaki kosunga bana ya Yisalaele na mayele na ye moko nde epesaki ya makanisi wana. Yango ebimisaki mbuma mabe mpe asengelaki kokima Ezipito mpo na kokende na mboka mopaya. Kotika te été makambo ya mabe oyo okutanaki na yango epekisa yo kondima kobengama na Nzambe. Makambo ya mabe oyo tokutanaka na yango ezali na kati ya makambo oyo tosala mpo na kozwa formasyo. Moto moko alobaki ; bato ya kolonga bakweyaka te, bayekolaka kaka lolenge ya sika ya kosala makambo. Ntango osali likambo moko mpe olongi te, oyebi ete makambo esalemaka ndenge wana te mpe na yango oyekoli lolenge ya sika ya kosala makambo. Kokanisa te ete ozali na makoki ya kosalela Nzambe te mpo ete osila kokwea liboso, TE. Okoki kaka kokoba kosalela ye na ndenge ya malamu.

Mbula 40 oyo Moize alekisaki na esobe esalaki ete amiyoka azali kaka ye moko mpe azalaki lisusu na elikya te. Amonaki neti Nzambe asundoli ye mpe bato na ye moko batekaki ye.

Na yango, amiyokaki ete abongi te mpo na mokumba yango. Kotika te ete mayoki ya kozala yo moko to ya kobwakama epusa yo na komiyoka neti obongi te mpo na kosalela Nzambe. Ezali te likambo ya moto oyo abyangami, kasi ya ye oyo abyangaka ; Ye oyo akomisaka moto oyo abongi te ete akokisa masengami, azali Nzambe oyo akomisaka moto oyo abongi te akokisa yango. Esila kokomela yo omona ete moto nyonso ata mpe Nzambe, asundoli yo ? Bato bakoki kotika yo mpe koteka yo kasi Nzambe akoki kosala yango te. Nzambe asundolaki Moise ata moke te, kasi atyaki ye pembeni mpo na koteya ye. Ntango nyonso oyo bakoboya yo to bakoteka yo, kobanga te, yeba kaka été ezali ntango ya komimesenisa mpo na mosala oyo ezali liboso na yo.

Moize azwaki formasyo na boumeli ya mbula 40, bayekoli bazwaki formasyo na boumeli ya mbula misato na ndambo, kasi likambo ya mawa, bandimi mosusu balingaka te kozwa formasyo. Basusu bakoloba été, kopakolama ekoki, nazali na mposa ya kolakisama te, mpe basusu bakolobaka ete nazali na mposa ya kopakolama te, formasyo na ngai ekoki. Osengeli kozwa formasyo mpe kopakolama mpo été kobengama na biso ezala na bopusi. Osengeli kozala na komikitisa mpo na kozwa formasyo mpe kozala na nyonso oyo esengeli mpo na kokokisa mokumba yango. Formasyo ekoki kopesama na lolenge oyo ebongisami te mpe na lolenge oyo ebongisami. Kowelisa te, zala na motema molai mpo na kolanda nzela ya mateya mpe kozela ntango ya Nzambe, mpamba te yangp ezali ntango oyo eleki malamu mpo na kosala yango. Ntina oyo Moize alongaki kosala makambo na ndenge na ye mpe na ntango oyo ye moko alingi. Soki olingi kolonga na mosala na yo, osengeli kosala yango na ntango mpe na lolenge ya Nzambe. Kobongisama mpe botosi ezali na ntina mingi mpe ezali makambo ya bomoi mobimba oyo moto nyonso oyo abyangami na Nzambe asengeli kozala na yango.

Na kotunaka soki nazali nani ? Moize azalaki na komikitisa mpo na koyeba été akokaki te kosala yango na makasi na ye moko, biso mpe tosengeli kozala na komikitisa mpo na koyeba été lokola tozali bato tozali na ndelo, mpe tokoki te kokokisa mokumba ya Nzambe na makasi na biso moko. Tozali na mposa ya nguya ya Nzambe mpo na kolonga kati na mosala na biso.

Libondeli: Nkolo Nzambe, nazali na makoki mpe namibongisi mpo na mosala, namikitisi mpo na koteyama mpe Kotambwisama na Molimo Mosantu. Nabosanaka makambo nyonso ya mabe oyo nakutana na yango mpamba te nandimi été ozali kosala likambo moko ya sika na bomoi na ngai lelo oyo. Na ntembe te, ngai na yo tokosala makambo minene mpo na kotombola bokonzi na yo. Na nkombo na Yesu, Nabondeli, Amen.

Botangi mosusu: Hebrews 5:8 | Hebrew 12: 5,11 | 1 Samuel 18: 5-12, 14-15, 28-29 | 2 Samuel 5:4 |