Ekleziastika 47
47
I Natana
1Manaraka izany niseho i Natana,
mba haminany, tamin’ny andron’i Davida.
I Davida
2Toy ny fanavaka ny sabora#47,2 Toy ny sabora: satria ny sabora no tsara indrindra amin’ny nofom-biby izay atao sorona, noho izany dia avahana izy hatolotra ho an’ny Tompo; toy izany koa i Davida, noho izy tsara indrindra sady mamin’Andriamanitra loatra, dia navahana tao afovoan’ny Zanak’i Israely. amin’ny sorona fisaorana,
no nanavahana an’i Davida teo amin’ny zanak’i Israely.
3Nilalao tamin’ny liona, toy ny amin’ny zanak’osy izy,
ary tamin’ny orsa, toy ny amin’ny zanak’ondry kely#47,3 Jereo 1Sam 17,34..
4Fony izy mbola tanora, tsy namono ilay goavam-be va izy,
ka nahafa-kenatra ny vahoaka,
nony nanainga tanana mbamin’ny vaton’antsamotadiny izy,
sy nanongana ny reharehan’i Gôliata?#47,4 Jereo 1Sam 17,40 sy ny manaraka.
5Satria niantso ny Tompo Avo Indrindra izy,
ary ny Tompo nanome hery ny tanany ankavanana,
hamono mahafaty an’ilay mpiady mahery,
mba hanandratra ny tandroky ny vahoakany.
6Ka dia nankalazaina izy, noho ny amin’ireo iray alina;
noderaina izy, noho ny fitahian’ny Tompo;
ary natolotra azy ny satroboninahitra#47,6 Jereo 1Sam 18,7; 2Sam 5,1-3..
7Fa nomontsaniny hatraiza hatraiza ny fahavalo,
nohoseny tamin’ny tongony ny Filistinina, ny mpanohitra;
noketrahiny mandrak’androany#47,7 mandrak’androany. Nihaika ny Filistinina tamin’ny ady imbetsaka i Davida ary nanetry mihitsy ny fahefan’izy ireo, ka tsy afa-niarina izy ireo nandritra ny taona maro be. ny herin’ireny.#47,7 Jereo 2Sam 8,1; 21,5 sy ny manaraka.
8Tamin’izay rehetra nataony izy nanolotra haja,
ny Masina, ny Avo Indrindra, tamin’ny teny fiderana;
tamin’ny fony tokoa nanao hira fankalazana
ary tia an’Ilay nanao azy.
9Nanendry mpihira eo anoloan’ny ôtely izy,
ary nampandre hira mireondreona mahafinaritra tamin’ny feon’ireo.
10Nataony manetriketrika ny fety,
ary kanto tapitra ohatra ny fankalazana ny andro lehibe,
amin’ny fotoana ankalazan’ny mpihira ny Anara-masin’ny Tompo,
sy ampanakoakoany ny fitoerana masina vao maraina.
11Ny Tompo kosa namela ny hadisoany,
nanandratra ny fahefany ho mandrakizay;
ary nataony azo antoka ny hananany taranaka mpanjaka,
sy ny seza fiandrianana be voninahitra eo amin’i Israely.
I Salômôna
12Nitsangana nanarakaraka azy ny zanaka feno fahendrena anankiray,
tao anatin’ny fandrosoana no nahavelomany noho ny amin-drainy.
13Nanjaka tamin’ny androm-piadanana i Salômôna,
fa nomen’Andriamanitra fitsaharana amin’ny manodidina rehetra izy,
mba hanorina tempoly ho an’ny Anarany#47,13 Ho an’ny Anarany: izany hoe, ho an’ny Anaran’ny Tompo.,
sy hamboatra fitoerana masina mandrakizay.
14Endrey izany fahendrenao, tamin’ny fahatanoranao,
niboiboika fahalalana toy ny ony!
15Niely eran’ny tany#47,15 Niely eran’ny tany, sns. Izany dia angamba hain-teny ho enti-manambara ny fikarohan’i Salômôna ny zava-maniry sy ny metaly ary ny biby, sns. Ampitahao 1Mp 4,29 sy ny manaraka. ny fahiratan-tsainao,
dia nofenoinao oha-teny mifono hevitra izy.
16Tonga hatrany amin’ny lavitra ny anaranao,
ary tian’ny olona teo amin’ny fiadananao ianao.
17Ny hiranao masina, ny ohabolanao, ny fanoharanao,
ary ny valin-teninao efa nigagan’izao tontolo izao anao.
18Tamin’ny Anaran’ny Tompo Andriamanitra,
izay antsoina ho Andriamanitr’i Israely,
ianao nanangona volamena toy ny fira-potsy,
nampiasa volafotsy toy ny firaka.
19Nanaram-po tamin’ny vehivavy ianao,
ary nomenao fahefana tamin’ny vatanao izy;
20nasianao pentina ny voninahitrao,
ary nolotoinao ny taranako,
ka dia niantso hatezerana ho amin’ny zanakao ianao.
21Mahatsiaro mangirifiry noho ny hadalanao aho;
fa izany no antony nivakian’ny fanjakana,
ka avy amin’ny Efraima no nitrangan’ny filohan’ny fanjakana nikomy.
22Kanefa ny Tompo tsy hiala amin’ny famindram-pony,
ary tsy hasiany levona iray akory ny asany;
tsy hamongotra ny taranak’ilay voafidiny izy,
ary tsy ataony lany tamingana ilay tia Azy.
I Jakôba namelany dimby;
ary i Davida namelany solofo iray razana aminy.
I Rôbôama
23Nody mandry tany amin’ny razany i Salômôna,
ary ny navelany nanarakaraka azy, dia zanany iray razana aminy,
iray, olona adala eo imason’ny vahoaka, tsy manam-pahalalana,
i Rôbôama izay nanao izay hihatahan’ny vahoaka amin’ny heviny;
I Jerôbôama
ary i Jerôbôama, zanak’i Nabata, izay nampanota an’i Israely,
sy ny sori-dalana hidiran’i Efraima amin’ny fivadihana.
24Dia tafahoatra loatra ny fahotan’i Israely
ka nentina lavitra ny taniny izy.
25Nivarina tamin’izao karazam-paharatsiana rehetra
izao izy,
mandra-pidonan’ny famaliana azy ireo.
Voafantina amin'izao fotoana izao:
Ekleziastika 47: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.