Ny Baiboly Ho An’ny AnkizySantionany

Marobe ny fahagagana vitan'i Jesoa. Izany dia maneho ny maha-Zanak'ANDRIAMANITRA Azy. Tao amin'ny fampakaram-bady iray izay no nanaovan'i Jesoa ny fahagagana voalohany. Nisy zava-manahirana nitranga. Tsy ampy ny divay ho an'ireo nasaina.

Lasa i Maria, renin'i Jesoa, nilaza izany olana izany tamin'ny Zanany. Avy eo dia noteneniny ireo mpikarakara mba hanaraka izay hasain'i Jesoa hataony.

"Fenoy rano ny siny", hoy Jesoa. "Rano?" hoy izy ireo angamba nanontany. Eny e! Tena rano tokoa no nambaran'i Jesoa.

Avy eo dia nasain'i Jesoa nentina tany amin'ny tompon'andraikitry ny sakafo ny siny iray mba handramany. Niova ho divay ilay rano. Divay tsara. Faran'izay tsara.

Nivanaka ireo mpikarakara. Nanova ny rano ho tonga divay i Jesoa. ANDRIAMANITRA irery ihany no mahavita fahagagana toy izany.

Nahavita fahagagana hafa koa Jesoa. Indray hariva, tany an-tranon'i Petera i Jesoa sy ny mpianany. Narary ny rafozambavin'i Petera. Voan'ny tazo izy.

Noraisin'i Jesoa ny tanan'ilay marary. Niaraka tamin'izay, sitrana ilay vehivavy. Nitsangana izy ka nikarakara an'i Jesoa sy ny mpianany.

Io hariva io ihany, nitangoronan'ny iray tanàna ny tranon'i Petera. Maro ireo marary tonga teo: ny jamba, ny marenina, ny mandringa. Tao aza ireo nitoeran'ny fanahy ratsy. Ho vitan'i Jesoa ve ny hanampy ireo rehetra ireo?

Vitan'i Jesoa, Ilay Zanak'ANDRIAMANITRA, ny hanampy azy ireo. Nampian'i Jesoa izy. Sitrana avokoa izay rehetra nanatona an'i Jesoa. Nisy olona nandeha tamin'ny tehina hatrizay niainany no nandeha, nihazakazaka sy nitsambikimbikina.

Nisy hafa koa tonga teo. Olona nosimbain'ny habokana ny tarehiny.

Na ireo olatra navelan'ny habokana aza dia tsy hita intsony rehefa nodiovin'i Jesoa ireo.

Nisy lehilahy sy vehivavy, nampaorian'ny devoly, nijoro nanoloana an'i Jesoa. Nobaikon'i Jesoa ireo devoly mba hiala. Raha vao nanaiky an'i Jesoa ireo devoly ka niala dia indreo fa tony sy miramirana ireo olona nihorohoro sy nijaly teo.

Tao aorian'ireo olona marobe ireo, nisy efa-dahy nitondra ny namany marary hanatona an'i Jesoa. Tsy afaka anefa izy ireo fa nifanisika loatra ny olona. Inona no azony natao?

Nakarin'ireto sakaizany efatra teny ambony tafo ilay marary. Nanendahany ny tafo ka teo no nampidinany ilay namany marary. Ary dia tonga teo akaikin'i Jesoa izy.

Rehefa hitan'i Jesoa ny finoan'izy efa-dahy dia hoy Izy tamin'ilay marary: "Voavela ny helokao. Betao ny fandrianao ka mandehana." Dia nitsangana ralehilahy. Sitrana sady natanjaka izy. Jesoa no nanasitrana azy.

Taty aoriana kely, nandeha sambokely niaraka tamin'ny mpianany i Jesoa. Nisy tafiodrivotra mahery nampisavoaravoara ny ranomasina. Jesoa anefa natory. Natahotra ny mpianany ka namoha Azy. Niantso mafy izy ireo hoe: "Tompo ô! Vonjeo fa maty izahay."

"Mangina, mitsahara" hoy i Jesoa nibaiko ny onja. Niaraka tamin'izay, nitony ny ranomasina. "Lehilahy manao ahoana re Io, fa ny rivotra sy ny ranomasina aza dia manaiky Azy e!" hoy ireo mpianany nifanontany. Nino izy ireo fa Zanak'ANDRIAMANITRA tokoa i Jesoa ka maneho ny voninahiny izao fahagagana izao. Ary ny mpianatra tsy nahalala fa mbola hahita zava-mahagaga lehibe noho izao efa hitany izao izy ireo, nandritra ny fotoana niarahan'i Jesoa tamin'ny olona, nanompo an'ANDRIAMANITRA.

Tapitra