JEHOVAH NO MPIANDRY ANAO !

“..Jehovah no Mpiandry ahy….” (ny Baiboly, Salamo 23:1)

Ireo teny ireo dia mampiditra ity salamo nosoratan’i Davida ity, lahatsoratra izay tena anisan’ny nahakasika olona maro eran-tany. Mivavaka aho mba ho tena loharanom-pitahiana miavaka ho anao ny hafatra ao anatiny.

Ity salamo ity dia miresaka momba an’i Jehovah, izay antsoina koa hoe Andriamanitra mandrakizay. Mampahafantatra eto ny mpanjaka Davida fa mpiandry azy Izy.

Mialohan’ny nahatongavan’i Davida ho mpanjaka, dia mpiandry ondry koa izy. Fantany fa ny mpiandry ondry dia manana fitiavana manokana ho an’ny ondriny tsirairay avy. Fantany fa ao anatin’ny alina maizina indrindra, dia tsy hisalasala ny mpiandry ondry hanaraka sy hamonjy ny ondry izay very, maratra na anaty fahasarotana.

Nanao vy very ny ainy Davida hiarovana ny ondriny amin’ny biby mpiremby. Indray andro, raha niresaka ny ondriny tamin’ny Mpanjaka Saoly izy, dia izao no nolazainy :

“‘Fa hoy Davida tamin'i Saoly: Ny mpanomponao niandry ny ondrin-drainy, ary nisy liona sy bera tonga tao ka nahalasa zanak'ondry teo amin'ny ondry, dia nanenjika azy aho ka namely azy, ary azoko teny am-bavany ilay zanak'ondry; ary nony handramatra ahy izy, dia nohazoniko tamin'ny somony, ary nasiako ka matiko. ’” (ny Baiboly, 1 Samoela 17:33-37)

Fantany fa ny mpiandry ondry dia mahalala tsara ny ondriny tsirairay avy, ary tiany manokana ny tsirairay.

Ho an’i Davida dia tsy misy fisalasalana : Andriamanitra no Mpiandry azy. Mpiandry ondry tsara. Ny tsara indrindra amin’ny mpiandry ondry. Mpiandry ondry avy any an-danitra. Mpiandry ondry amin’ny mpiandry ondry rehetra!

Davida dia nanao ny tenany ho tahaka ny ondry, izay miankina amin’ny mpiandry azy. Ny ondry dia tsy manana tamboho; tsy manana fiarovan-tena ankoatran’ny mpiandry azy izy. Ary izay no tena ilainy hahatsapany fa voaaro izy.

Jesosy dia nilaza, “‘Ny mpangalatra tsy avy raha tsy hangalatra sy hamono ary handringana; Izaho avy mba hananany fiainana, sady hananany be dia be. Izaho no Mpiandry Tsara; ny Mpiandry Tsara manolotra ny ainy hamonjy ny ondry. Ary ny mpikarama, satria tsy mpiandry na tompon'ny ondry izy, koa raha mahita ny amboadia avy, dia mandao ny ondry ka mandositra, ary ny amboadia misambotra ny ondry ka mampihahaka azy; mandositra izy, satria mpikarama ka tsy mitandrina ny ondry. Izaho no Mpiandry Tsara; ary fantatro ny Ahy, sady fantany Aho, dia tahaka ny ahafantaran'ny Ray Ahy sy ny ahafantarako ny Ray; ary Izaho manolotra ny aiko hamonjy ny ondry.” (ny Baiboly, Jaona 10:10-15)

Jesosy no tena mpiandry tsara. Fantany tsara ianao ry namako. Nanolotra ny ainy ho anao Izy satria ondriny sarobidy ianao. Ary tia anao fatratra Izy!

Misaotra fa misy ianao !

Eric Célérier

P.S. Inty ny andro voalohany amin'ity planina ity. Raha maniry handray fampaherezana ao amin'ny mailakao ianao isan'andro dia manasa anao aho hisoratra anarana ao amin'ny Fahagagana isan'andro .