MATTHEW 26
26
Jesus diyoolyéełgo binahast'ą́
(Mk. 14:1,2; Lk. 22:1,2; Jn. 11:45-53)
1Jesus díí saad ałtso yee niyáníłti'go bídahooł'aahii áyidííniid, 2Nihił béédahózingo naakiiską́ągo atis'adeesdzá bee bééhániihii#Ex. 12:1-27. baa hoolzhíísh, ákohgo tsin ałnáoszid bikáa'jį' Diné Silį́į'ii bił i'doolkałgo ninádidoot'ááł.
3Ákohgo aláahgo nááda'iiłniihii [áádóó bee haz'áanii yínda'niłtinii] índa Jew dine'é yá aląąjį' naazíinii éí aláahgo náá'iiłniihii, Kéíyafas wolyéhígíí, bighangi áłah silį́į́', 4áádóó t'áá nahont'inee dahwiidoołtsołgo áádóó dahodiyoołhéełgo yaa nídaast'įįd. 5Nidi ádadííniid, Hodílzingo áłah ná'ádleeh góne' éí dooda, háálá ákódeiidzaago diné hadahodínóołchał.
Jesus éí Béthaniigi ak'ah bee ats'áltį́
(Mk. 14:3-9; Jn. 12:1-8)
6Áko Béthaniigi Sáíman éí łóód ats'íís yiyáanii naałdzidii bee bąąh dah haz'ą́ą́ nít'é'ígíí bikin góne' Jesus yah ajííyáago, 7ákwii ajiyą́ągo asdzání léi' tsé alabáster wolyéhígíí bee tózis ályaago ak'ah t'áá íiyisí ílínígíí yee yah ayíí'ą́ągo hatsiits'iin yik'i yayiiziid.#Lk. 7:37,38. 8Nidi hódahooł'aahii éí dayiiłtsą́ągo, Díí lá ha'át'íí biniyé t'óó bee na'as'ne'? daaníigo yik'ee doo bił dahóózhǫǫd da. 9Háálá díí ak'ahígíí lą'í bą́ą́h ílį́įgoda nahidoonih nít'éé', áko éí béeso diné badahojoobá'íígíí bitaa'niih doo nít'éé'. 10Nidi Jesus bił bééhózingo áhodííniid, Ha'át'íí biniyé asdzání baa nídaaht'į́? Jó, éí nizhónígi shá ádziidzaa. 11Háálá badahojoobá'íígíí t'áá áłahjį' nihitaa daakai,#Deut. 15:11. nidi shí éí doo t'áá áłahjį' nihitaasháa da. 12Díí ak'ah shits'íís bik'i yadziiziidígíí, yóó'áshidi'doolníłígíí biba' hasht'eshijiléehgo ájít'į́. 13T'áá aaníígóó ánihidishní, Nahasdzáán t'áá si'ą́ą́ nít'éé' bikáá'góó díí hane' yá'át'éehii baa dahane'góó, díí asdzání ádzaaígíí bee bééhániih biniyé baa hane' dooleeł.
Júdas éí Jesus ninéididoo'áałgi yee lą́ asłį́į́'
(Mk. 14:10,11; Lk. 22:3-6)
14Ákohgo naakits'áadahígíí ła', Júdas Iskáriyat wolyéii, aláahgo nááda'iiłniihii yaa níyá, 15áko áyidííniid, Nihaa hodiní'ą́ągoshą' ha'át'íí shaa dadoohłééł? Áko béésh łigaii tádiin haa deiznil.#Zech. 11:12. 16Áko áádóó ha'át'éegoda ashja'iilaago nináhozhdidoo'áałgi baa nitsídzíkeesgo hodeeshzhiizh.
Jesus éí atis'adeesdzá bee bééhániihii hódahooł'aahii bił dazhdooyį́į́ł
(Mk. 14:12-21; Lk. 22:7-14,21-23; Jn. 13:21-30)
17Nít'éé' díík'ǫsh t'áágééd bááh ályaii hodílzingo áłah ná'ádleeh ła'a jį́ aleeh góne' ídahooł'aahii Jesus yaa yíkaigo ádaaní, Atis'adeesdzá bee bééhániihgo yidánígíí dííyį́į́ł biniyé háadishą' ná hasht'ediilnííł? 18Áko áhodííniid, Nílááh, kin haal'áajį' doh'aash, ákwe'é diné ła' ábididoohniił, Na'nitiní ání, Shá haz'ánígíí koshídę́ę́' hadziih; nighangi atis'adeesdzá bee bééhániihgo yidánígíí shídahooł'aahii bił dadeeshį́į́ł. 19Áko íhooł'aahii t'áá Jesus ádazhdooníiłii yee hoł hoolne'ígi ádadziidzaago atis'adeesdzá bee bééhániihgo dadoodį́łígíí t'áá áłdįįłt'éego áyiilaa.
20Áko i'íí'ą́ągo Jesus hódahooł'aahii naakits'áadahígíí bił dazh'dooyį́į́ł biniyé jidineezbin, 21nít'éé' da'jiyą́ągo Jesus ázhdííniid, T'áá aaníí ánihidishní, Nihí ła' nináshididooh'ááł. 22Áko t'ááłá'í jinítínígo t'áá íiyisí bąąh daháni'go t'áá ałkéé', Bóhólníihii, da' shíísh? dajiníigo baa nízhdiikai. 23Áko haadzíi'go ádííniid, T'áá shił éé'é'áhígíí éí nináshididoo'ááł.#Ps. 41:9. 24Diné Silį́į'ii t'áá bá bee ak'e'ashchínígíí bik'ehgo ábidi'doolnííł, nidi Diné Silį́į'ii ninázhdiní'ánígíí éí doo hojooba' ájíníi da! Éí dinéhígíí t'áadoo ho'dizhchį́į́jígo há yá'át'ééh nít'éé'. 25Áko Júdas, nináhodee'aahígíí áhodííniid, Na'nitiní, da' shíísh? Áko Jesus áháłní, Jó, bee háínídzíí'.
Bóhólníihii biDiyingo Adą́ áyiilaa
(Mk. 14:22-26; Lk. 22:15-20; 1Cor. 11:23-25)
26Áko da'jiyą́ągo Jesus bááh néidii'ą́, áádóó yik'i sodoolzingo niyiizti', áádóó bídahooł'aahii yitaiznii'go áyidííniid, Nídahidooh'aahgo daahsą́; díí shits'íís át'é. 27Áádóó doodlį́įłii néidiiką́, áko sodoolzingo yaa ahééh niizį́į́' áádóó kóníigo hainíką́, T'áá ánółtso daahdlą́, 28háálá díí shidił#Ex. 24:8. bee aha'deet'áanii ániidíii,#Jer. 31:31-34. t'óó ahayóí bąąhági át'éii bá yóó'ahididoot'ááł biniyé bá deezna'ígíí át'é. 29Nidi ánihidishní, Kodóó ch'il na'atł'o'ii bitoo' doo ła' náádeeshdlį́įł da, shiTaa' bee bóhólníihgo bił haz'áanii biyi'di índa ch'il na'atł'o' ii bitoo' ániidíii nihił náádadeeshdlį́į́ł. 30Áádóó sin ła' bee dahojíítáalgo,#26:30 Atis'adeesdzá bee bééhániihii ałtsogo Sin 115-118 bee dahojiitáál. Dził Álivzgóó dashdiikai.
Peter éí Jesus doo bééhasin da bizhdidooniiłígíí t'áá bítséedi baa hane'
(Mk. 14:27-31; Lk. 22:31-34; Jn. 13:36-38)
31Áko Jesus áháłní, Díí tł'éé' t'áá ánółtso shí shiniinaa t'ą́ą́' anídínóohdah, háálá kót'éego bee ak'e'ashchį́,
Na'niłkaadii atídeeshłííł,
áádóó dibé nideiniłkaadii da'níłts'ą́ą́'góó taidoojah.#Zech. 13:7.
32Nidi dasétsą́ą́dę́ę́' nááshi'diilzáádóó bik'ijį' Gáliliigóó nihiba' yisháał doo.#Mt. 28:16. 33Nidi Peter haadzíi'go áhodííniid, Azhą́ t'áá ádzíłtso niniinaa t'ą́ą́' anázhníídee' nidi, shí t'éí ts'ídá doo t'ą́ą́' anídeeshtłish da. 34Jesus áhodííniid, T'áá aaníígóó ándishní, Díí tł'éé' naa'ahóóhai biką'í t'áadoo ániihí, táadi doo hwééhasin da náshididíí'niił. 35Peter áháłní, Azhą́ t'áá níighah dasétsą́ą nidi, doo hwééhasin da doo nidideeshniił da. Áko hódahooł'aahii ałdó' t'áá ałtso t'áá ákót'éego hadaasdzíí'.
Gethsémaniidi Jesus sodilzin
(Mk. 14:32-42; Lk. 22:39-46)
36Ákohgo Jesus Gethsémanii hoolyéhígi bídahooł'aahii yił yíkaigo ííłní, T'áá kwe'é nahísóotą́, shí éí t'ah wónásígóó deesháałgo áadi sodideeszįįł. 37Áko Peter índa Zébedii biye' nidilt'éego bił dashdiikai, nít'éé' t'áá íiyisí yíní biih jíítłizh áádóó nitsidzídzá. 38Ákohgo áhodííniid, Shii' sizíinii nitseeltłah, t'áá hoyółhéełgo, t'áá kǫ́ǫ́ nahísóotą́ągo shił hada'ísídół'į́į́'. 39Áádóó t'áá áháníjį' dashdiiyáago, ákwii tsé'yaa jineeshjoolgo kójíníigo sozdoolzin, ShiTaa', bohónéedzą́ą́ ládą́ą́', díí doodlį́įłii shits'ą́ąjį' kódíílííł, ákondi shí íinisinígíí éí dooda, nidi ni íinínízinígíí ádoonííł. 40Áko hódahooł'aahii baa nídzídzá, nít'éé' da'ałhosh lá, áko Peter ábijiní, Ha'át'íí lá! Da' t'ááłá'í ahéé'ílkidjį' nidiísh doo shił hada'ísídół'į́į́' ádanoht'ée da? 41Hada'ísídół'į́į́' áádóó sodadołzin, áko doo nihídahodínóotah da; níłch'i ii' sizíinii éí lą́ nízin, nidi ats'íís éí doo bidziil da. 42Áádóó naakidi aleeh góne' anáádzoodzáago, kójíníigo sonáázdoolzin, ShiTaa', díí t'áadoo yishdlání ts'ídá doo shits'ą́ąjį' kódoolnííłgóogo, íinínízinii bohodoolnííł. 43Áko haa nínáádzídzá, nít'éé' nááda'jiłhosh lá, háálá t'áá íiyisí bił ho'niighą́ą́'. 44Áko hats'ą́ą́' dah náázdiidzáago, táadi aleeh góne' saadígíí t'áá éí bee sonáázdoolzin. 45Ákohgo hódahooł'aahii baa nínáádzídzáago ábijiní, Da' t'ahdiísh da'ołhosh áádóó háádaałyį́į́h? Jó'akon, áajį' o'oolkid, índa Diné Silį́į'ii éí bąąhági ádaaníiłii bílák'eejį' ninádeet'ą́. 46Nídoohjeeh, k'ad yiikah doo; jó'akon, nináshidee'aahígíí aadę́ę́' yigááł.
Jesus ninádeet'ą́ áádóó bi'diiltsood
(Mk. 14:43-50; Lk. 22:47-53; Jn. 18:3-12)
47T'ahdii yájíłti'go Júdas, naakits'áadahígíí ła' nilíinii níyá, áádóó aláahgo nááda'iiłniihii índa diné yá aląąjį' naazíinii bits'ą́ą́dóó diné t'óó ahayóí diltłish índa tsihał dayíjáahgo yił haa nánízą́. 48Áko nináhodiní'ánígíí éí yaa honíłtínígíí bee ééhózin dooleełii ła' yee yił hoolne' lá kóníigo, T'áá séts'ǫsígíí ííshją́ą́ éí bí át'į́į doo; éí deidoołtsoł. 49T'áá áko Jesus yich'į' niníyáago, Yá'át'éhéii, Na'nitiní! hałníigo hazts'ǫs. 50Áádóó Jesus áhodííniid, Kwá'ásiní, ha'át'íishą' biniyé kwe'é yíníyá? Áko Jesus yich'į' niikaigo deisiłgo dayiiłtsood. 51Nít'éé' jó'akon, Jesus yił naakaígíí ła' bidiltłish hayíítą́ągo aláahgo náá'iiłniihii binaalte' bijaa' na'iidiiłhaal. 52Nít'éé' Jesus ábíłní, Nidiltłish iih nánítįįh, háálá t'áá diltłish bił hadajiideełígíí éí t'áá ádzíłtso diltłish bee ádazhdoodįįł. 53Da' shiTaa' néideeshkąąłgo, t'áá áko diyingo nidaal'a'í tsosts'idiindóó ba'aan naakidi mííl yázhí bilááh ánéelą́ą'go shich'į' iidiyooł'aałígíísh doo baa nitsídaahkees da? 54Nidi kót'éego áhodooníiłgoshą' Diyin God bizaad bee ak'eda'ashchínígíí haa yit'éego bohodoolnííł? 55Áko ákwii hoolzhishgo Jesus éí diné yíl'áhígíí áyidííniid, Da' shił nidadoohdiłísh biniyé diltłish índa tsihał dayínóhjáahgo agha'ii'níiłii bich'į' oonééł nahalingo shich'į' ch'ínooná? Shą́ą́', t'áá ákwíí jį́ kin bii' sohodizin bił haz'ání góne' sédáago na'nishtin nít'éé',#Lk. 19:47; 21:37. nidi t'áadoo dashoołtsood da. 56Nidi Diyin God yá dahalne'ii yee ak'eda'ashchínígíí bohodoolnííł biniyé díidí t'áá ałtso k'ad áánííł. Ákohgo hódahooł'aahii t'áá ałtso hats'ą́ą́' dah diijée'go yóó'aheeswod.
Jesus éí diné ándaha'áii bidááhdę́ę́' niho'deedlóóz
(Mk. 14:53-65; Lk. 22:54,55,63-71; Jn. 18:13,14,19-24)
57Áádóó índa Jesus dahoołtsoodígíí Kéíyafas aláahgo náá'iiłniihii yaa dahazlóóz, áadi bee haz'áanii yínda'niłtinii índa diné yá aląąjį' naazíinii haa áłah silį́į́'. 58Nidi Peter éí nízaadę́ę́' hakéé' yigáałgo, aláahgo náá'iiłniihii bikin binaagi haz'ą́ągo biná'ástł'iní góne' yah ííyá, áko haa hodoonííł nízingo, ákwii siláo yił naháaztą́. 59Ákohgo aláahgo nááda'iiłniihii [áádóó diné yá aląąjį' naazíinii] índa diné ándaha'áii t'áá ałtso wooch'ííd binahjį' Jesus hodi'yoolyéłígíí ch'ééh yíkadadilts'i', 60nidi t'áá ádin lá, azhą́ lą'í dabiyooch'íidgo dahalne'ii hadahaasdzíi' nidi. Áadi índa diné nidilt'éego t'áá ádzaagóó haa halne'go niní'áázh, 61áko áháłní, Díí diné ání, Diyin God bikin bii' sohodizin atídeeshłííł, áádóó táá' yiską́ąjį' áńdeeshdlíiłgo bíneesh'ą́,#Jn. 2:19. jiní. 62Áádóó aláahgo náá'iiłniihii nídii'na'go áhodííniid, Da' doósh ák'ihadidíídzih da? Díí dinéshą' ha'át'íí yee naa dahalne'? 63Nidi Jesus t'áadoo ák'ihazdoodzíi' da. Nít'éé' aláahgo náá'iiłniihii ánááhodoo'niid, Diyin God hináanii binahjį' ándishní, Christ, Diyin God biYe' daats'í nílínígíí bee nihił hólne'. 64Nít'éé' Jesus áháłní, Jó, bee háínídzíí'. Nidi ándishní, Diné Silį́į' ii éí Aláahgo Bidziilii yinish'náájí dah sidáago, índa yádiłhił biyi'dę́ę́' k'os bił yildohgo deidoołtsééł.#Dan. 7:13. 65Nít'éé' aláahgo náá'iiłniihii ák'ina'ooldláadgo#26:65 Ák'ina'ooldláadgo jiníigo éí hashké hwiindzin índa t'óó hoł badaa'ihgo yaa halne'. ání, Diyin God baa'ihgo bá hadzoodzíí'. Ha'át'íishą' biniyé ła' ch'ínáádahót'aah doo? Jó, k'ad Diyin God baa'ihgo bá hadzoodzíi'go dahosidoots'ą́ą́'. 66Éí haash yit'éego baa nitsídaahkees? Nít'éé', Hodiyoolyééł lą́ą, dadííniid.#Lev. 24:16. 67Ákohgo hanii'jį' yik'ídahidizheeh, áádóó nídahoniłts'in, índa ła' yéego ninádahodiika'go,#Is. 50:6. 68ádaaní, Christ nílíinii, Diyin God yá halne'ii nílį́įgo háí nándííłts'in, bee nihił hólne'.
Peter éí, Jesus doo bééhasin da, jiní
(Mk. 14:66-72; Lk. 22:56-62; Jn. 18:15-18,25-27)
69Áko Peter tł'óo'di kin binaagi haz'ą́ągo biná'ástł'iní góne' dzizdá. Nít'éé' asdzání naal'a'í kóníigo hach'į' niníyá, Ni la' ałdó' Jesus Gáliliidóóígíí bił nanikai ni'. 70Nidi t'áá ałtso dabinááł dooda jidííniid, Baa yáníłti'ígíí doo shił bééhózin da, jiníigo. 71Áko ch'é'étiin haz'áníjį' ch'ízhníyáago náánáła' asdzání naal'a'í nááhoołtsą́, áko ákǫ́ǫ́ naazínígíí ííłní, Díí diné ałdó' Jesus Názarethdóóígíí yił naakai ni'. 72Áko dooda náázhdoo'niid, Éí dinéhígíí doo bééhasin da, jiníigo bee ádee hadzoodzíí'. 73Áádóó t'óó nááhodoo'na'go, ákǫ́ǫ́ naazínígíí Peter yaa yíkaigo ánáádeidoo'niid, T'áá aaníí ni ałdó' éí ła' ánít'į́, jó, nizaadígíí bee nééhózin. 74Áko ádił ni'jít'įįhgo ádee hanáázdoodzíí', Éí dinéhígíí doo bééhasin da. T'áá áko naa'ahóóhai biką'í ádííniid. 75Áko Peter éí Jesus, Naa'ahóóhai biką'í t'áadoo ániihí táadi doo hwééhasin da shididííniił, hodííniidii bééjoolnii'. Áko ch'ízhníyáago aníjíchago jíícha.
Селектирано:
MATTHEW 26: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).