San Lucas 17
17
Surojünä̧ ma̧'ä̧chü̧rü̧ ra̧wä̧pi̧ja̧'a̧
(Mt 18.6-7,21-22; Mc 9.42)
1Jesú-mä̧ u̧wo̧juȩtä̧u̧rü pä'inü̧: surojüra̧'a̧ ma̧ttä̧cha̧ pä'ü kkü'kekumä̧ juiyokü jä̧kuȩ, ja̧'wa̧nü̧ ja̧'a̧nä̧ surojüra̧'a̧ ma̧ttä̧chü̧nä̧ jȩpü̧rü̧mä̧; ¡isottü̧! jua̧u̧ru̧ juiyo ra̧wä̧pi̧ja̧'a̧. 2Ttü cho'ka'anä̧ ichätü ppo̧'ä̧tü̧ttü̧, ya̧tȩrü̧ Dio-rü esetä'ija'a ma̧ä̧chü̧nä̧ jȩpü̧rü̧mä̧, ya'utettü u̧ru̧pä̧'kȩnä̧, trigo kkäräwä ido'ki ti̧'ä̧dü̧, rü̧ä̧ duboranä̧ do'opü ttikuarü pä'ütä adiwa ja̧'a̧. 3Ja̧'wa̧nü̧ ja̧'a̧ttü̧ ¡ttü̧'ȩpä̧rä̧kuä̧u̧ kka̧kuä̧tu̧kui̧! kui̧jä̧wa̧ ukuru suronä̧ jȩü̧ttü̧mä̧, ji'äu ro̧'ȩpi̧rü̧; ja̧'wa̧nü̧ jȩ'kuo̧mȩnä̧, kädi'üttümä̧, eseku ikuirü. 4Ja̧'wa̧ta̧nü̧, ya'ute mo̧ro̧mä̧, kko̧ro̧mü̧ttü̧nü̧ todäre jo̧mȩnä̧ ukuru suronä̧ jȩü̧ta̧'a̧nü̧, ji̧yȩta̧'a̧kuä̧ ukuru ichi'ü, täkü suronä̧mä̧ jȩpo̧kü̧sä̧ päüttümä̧, pärokua'aku'i̧nä̧ suronä̧mä̧ chamükuädokokujä̧ pä'irü.
Ta̧'kua̧ tu̧wȩnä̧rü̧nä̧ ppä'äditü
5Apótore-mä̧ ttu̧ru̧wa̧rü̧ pä'inä̧tü̧:
—Yabonü̧ ta̧'kua̧ tu̧wȩnä̧rü̧nä̧ ppä'äditü.
6Pättäku ttu̧ru̧wa̧mä̧ ädätinä̧u̧:
—Kua̧'kua̧ ku̧wȩnä̧rä̧tu̧ku̧mä̧, suro mostaza u̧wä̧ju̧ isäte jä̧'i̧jü̧ta̧'a̧nü̧ jü̧ttü̧'i̧nä̧, pi dau sicómoro isäi: porümä̧ pporächi'ü, rü̧ä̧ ajenä̧ kkä̧mä̧di̧, päkuätukuttü'i̧nä̧, esetäkua'a.
U̧mü̧wä̧ya̧ jȩa̧ pä'ü jü̧ wȩnȩ
7Ukututtümä̧, u̧mü̧wä̧ya̧ pättara̧'a̧ aditü i̧wä̧ji̧'ka̧ ichi'omȩnä̧mä̧ ja̧'wa̧ta̧nü̧ pä̧kä̧yü̧rü̧ tta̧'a̧rü̧ i̧wä̧ji̧'ka̧ ichi'omȩnä̧mä̧ ¿do'ächi'ü ku̧kuȩ, mesa isodänä̧ pä̧mä̧dü̧ kuiti pä'ä'ijä̧tü̧jä̧? 8Ja̧'wa̧nü̧mä̧ pä'okotü pä'ijä̧tü̧jä̧, pärokua'aku, ttü chu̧kuȩ jo̧mȩnü̧ jȩpü̧ iyopo'ittü, jua'a chawa'a'i̧nä̧, chukua'a'i̧nä̧ jo̧mȩnü̧ ppä'ädi'ü'ka̧tä̧, ukumä̧ aukkä̧nü̧, kukuajä̧ ku̧kuȩmä̧ pä'ä'ijä̧tü̧jä̧. 9Ja̧'wa̧ta̧nü̧ ku̧mü̧wä̧ya̧tu̧ku̧ru̧mä̧, wedäji jȩ'kuä̧ja̧'a̧ttü̧, ukuru eseusä pä'okotü pä'ijätüjä̧. 10Ja̧'wa̧nü̧ jü̧ta̧'a̧nü̧, ukutu'i̧nä̧ Dio weü jo̧mȩnü̧ jȩ'kuä̧tu̧kuo̧mȩnä̧mä̧, päkuätukuajä̧: umüwäyotü ta'anä̧ jȩtü̧ juiyünä̧ wotüjä̧to, suro weütätä jȩtä̧ja̧'a̧ttü̧.
Repra na̧nȩpä̧tü̧rü̧, Jesú-mä̧ aditü ikuinü̧
11Jesú-mä̧ Jerusarȩ́ ütawiyära̧'a̧, 'chä̧nü̧ kkä̧nü̧, Galirea rȩjȩnä̧'i̧nä̧, Samaria rȩjȩnä̧'i̧nä̧ 'kuä'opinü̧. 12Ja̧'wa̧nü̧ ja̧'a̧ yo̧mȩtȩ doächi'omȩnä̧, Repra mä̧richei na̧nȩpä̧tü̧ rä'o'ü, otonä̧ kka̧kuä̧mü̧, 13wopinä̧tü̧: ¡Jesú, wo̧juȩkuä̧ i̧sa̧, ujuturu re kkä̧wi̧tü̧!
14Wottäku, Jesú-mä̧ topo'ü päinä̧u̧:
Sacerdote wotürü i̧jȩkuä̧jä̧tu̧kui̧.
Ja̧'wa̧nü̧ wȩä̧jä̧u̧, tti̧'cho̧mȩ kkä'kottü, ttumä̧richeittümä̧ adiutä pȩji̧pi̧nä̧tü̧. 15Juätüttü ya̧tȩ umä̧richei jä̧ji̧ttü̧ adiutä pi̧'o̧po̧'ü̧mä̧, ppa̧'ä̧chä̧chi̧nü̧ Dio-rü eseu rü̧ȩnä̧ wo̧pä̧ya̧. 16Jesú ä'ka jo̧mȩ ichi'ü, iwe'kiyunä̧ rȩjȩ ja̧rȩyu̧nu̧ pä̧mä̧di̧nü̧, ppäkuädäjäkusä pä'ü eseu. Jua̧u̧mä̧ Samaria ttü̧ja̧sa̧ ji̧na̧'a̧. 17Jesú-mä̧ jua̧u̧ru̧ pä'inü̧:
—¿Pȩji̧pä̧jä̧tü̧mä̧ to̧mü̧rȩ ruwä jo̧mȩnä̧ jo̧ka̧'a̧ pädäjä'ä? ¿To tti̧'chä̧ja̧'a̧jä̧ttü̧, kkorotü nueve-nü wotümä̧? 18¿Suro kko̧ro̧jä̧ ttü̧ja̧sa̧tä̧ ja̧'a̧, Dio-rü eseu ppa̧'ä̧chi̧'ä̧ji̧mä̧?
19Pä'ü kä'ädü jua̧u̧ru̧ pä'inü̧:
—Ä̧rä̧mi̧'ü̧ täi; kua̧'kua̧ ku̧wȩnä̧ro̧mȩttü̧ kumä̧richeittümä̧ pi̧'ä̧ji̧jä̧.
¿Ti̧yȩnü̧ ichäkua'attü̧ ru̧wa̧ Dio weümä̧?
(Mt 24.23-28,36-41)
20Fariseo wotü, Jesú-ru ¿ti̧yȩnü̧ rȩbȩwä̧kua̧'a̧jä̧ttü̧, ru̧wa̧ Dio weümä̧? pättäku ädätinä̧u̧:
—Ru̧wa̧ Dio weümä̧ ttu̧wo̧juö̧nä̧mä̧ ichoka'a jä̧kua̧'a̧, 21ja̧'wa̧nü̧ ja̧'a̧ttü̧: Yȩna̧ja̧ kka̧'a̧, yo kka̧'a̧, jü̧nä̧mä̧ päwoka'a jä̧kua̧'a̧. Täkü Ru̧wa̧ Dio weümä̧ ukutu ku̧'kä̧tȩtu̧ku̧nä̧ kka̧'a̧ttü̧.
22Pä'ü kä'ädü, Jesú-mä̧ u̧wo̧juȩtä̧u̧rü pä'inü̧:
—Ji̧yȩtȩ mo̧ro̧ ichäkua'a ubo I̧tti̧ uruwoku wea'a to'kua päkuätuku mo̧ro̧ ja̧'wa̧nü̧ ja̧'a̧nä̧, topokotü kuäkuotüjä̧. 23Ja̧'wa̧nü̧ ja̧'a̧ pä̧ttä̧kuä̧u̧jä̧: «Topi yȩna̧ja̧ wea'a» «topi yo wea'a» pätta'anä̧ rä'o'ümä̧ topü kui̧'chä̧tu̧kuä̧. 24Isopäi'ünä̧ ubo I̧tti̧ weü mo̧ro̧mä̧, ku'upä mo̧ro̧jä̧nä̧ ürowomȩnä̧, päkuäda'akuttü ürowa'anä̧, pätekua'anä̧'i̧nä̧ kkȩdȩpo̧'ä̧cha̧'a̧ jä̧'i̧jü̧'a̧nü̧ jä̧kua̧'a̧. 25Ja̧'wa̧nü̧ ja̧'a̧nä̧, ä̧kuo̧mȩnä̧mä̧, jitä mo̧ro̧ ttü̧ja̧ ttüjü'koka'a ja̧'a̧, rü̧ȩnä̧ usurä ȩmä̧wä̧kua̧. 26Nué ü̧ji̧nü̧ mo̧ro̧ ji̧nü̧ta'anü̧ jä̧kua̧'a̧, ubo I̧tti̧ weü mo̧ro̧ päi'omȩnä̧mä̧. 27Jua̧u̧nu̧mä̧, ttü̧ja̧mä̧ ttu̧kuȩ kuä̧nü̧ a̧wä̧rü̧ pȩjü̧, ttirekuarü ȩmü̧, tta̧mü̧nä̧ pa̧ja̧tü̧ ü'käkuäu, jȩpü̧ ttü̧ja̧kua̧'a̧, Nuémä̧ woi'kanä̧ do'ächinü̧. Doächi'a'anä̧ ajiya ma̧ä̧mo̧mȩnä̧, o'katoi'ünä̧tä̧ to'e'ä'chinä̧tü̧. 28Ja̧'wa̧ta̧nü̧tä̧ 'kuäopina̧'a̧ Lot ü̧ji̧nü̧ mo̧ro̧'i̧nä̧: Ttu̧kuȩ kuä̧nü̧ a̧wä̧rü̧ pȩji̧nä̧tü̧, ttiäre ȩmä̧'chü̧ mikuänä̧ iyä'chinä̧tü̧, ttu̧kuȩ kuäwä kku̧nä̧'chü̧, ttoju ode a̧di̧tä̧rü̧tä̧, jü̧nä̧. 29Ja̧'wa̧nü̧ jȩtta̧'a̧nä̧, Lot-mä̧ Sodoma-ttü̧ rä'opächinü̧. Räopächa'anä̧ azufre pättüku, okuriyäku mo̧ro̧jä̧ra̧'a̧ttü̧ ma̧ä̧mo̧mȩnä̧ o'katoi'ünä̧tä̧ to'e'ächinä̧tü̧. 30Ja̧'wa̧nü̧ jä̧kua̧'a̧ ubo I̧tti̧ i̧jȩkuä̧chü̧ mo̧ro̧mä̧.
31Jua̧u̧nü̧ mo̧ro̧mä̧, isode wä̧mȩ kkü̧mä̧, kuiäre jakuoju kka̧ku̧ kuȩma̧ pä'ümä̧ kui̧mȩyȩwä̧; ja̧'wa̧ta̧nü̧ pättara̧'a̧ kkü̧mä̧, kuojusodekumä̧ ppa̧kuä̧chä̧. 32Lot irekuarü 'kuäopinü̧ kuamükuädätukuajä̧. 33O'katoi'ünä̧tä̧ wa'ü ttiku juiya pä'ü usätümä̧, totte'ächäkuotü. Ja̧'wa̧ta̧nü̧ o'katoi'ünä̧tä̧ to'e'ächätümä̧, ttü̧ji̧pä̧kuo̧tü̧.
34Ja̧'wa̧ta̧nü̧ pädäu̧jä̧: Ji̧yȩnü̧ yodó, ta̧ju̧ cama-nä̧ pȩjä̧tü̧rü̧mä̧; ya̧tȩrü̧tä̧ ȩmä̧wä̧kua̧'a̧, kka̧ra̧mä̧ kku̧ni̧kuä̧kua̧'a̧. 35Ja̧'wa̧ta̧nü̧ nä̧tü̧ ta̧ju̧, trigo i̧sa̧ppȩ kkärü ttü̧ja̧ku̧ttü̧mä̧, yajuterütä ȩmü̧, kkarajurumä̧ kku̧ni̧kuä̧kua̧'a̧. 36[Pättanä̧ ta̧ju̧ ttü̧ja̧kuä̧kuo̧tü̧; ya̧tȩrü̧tä̧ ȩmü̧ kka̧ra̧rü̧mä̧ kku̧ni̧kuä̧kua̧'a̧.]
37Ja̧'wa̧nü̧ pä̧i̧yä̧u̧ jä'epü ttä̧ju̧kui̧nä̧ku̧:
—¿Jua̧u̧mä̧ torü 'kuäopä̧kuȩjä̧ttü̧ Chu̧ru̧wa̧?
Pättiyäku Jesú-mä̧ ädätinä̧u̧:
—Wa'are pȩjo̧mȩtä̧, ttü̧ka̧ka̧kuä̧kuo̧tü̧ ȩjo̧tü̧mä̧.
നിലവിൽ തിരഞ്ഞെടുത്തിരിക്കുന്നു:
San Lucas 17: PNT13
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Sociedades Biblicas Unidas en Venezuela