JOHAN 3
3
Jesu leh Nikodem kihoulimna
1Pharisaite lah a mi, amin Nikodem kichi Judate vaihawmpa khat a um hi. 2Ama zanlai in Jesu kungah ahing haw a, akungah “Rabbi, Pasian akipat a hing pei Siepa na hi chi ka thei uhi. Pasian umpilou mi koima’n na chiemtena lamdang bawlte abawl thei sih ding uhi,” achi hi.
3Jesu’n adawng a akungah, “Adihtahin ka hing hil ahi, mi koipou apientha sih leh Pasian gam amu sih ding hi,” achi hi. 4Nikodem in akungah, “Mi ateh nuain bangchin apiengtha thei diei? anu sunga nivei lut in apieng thei diei mah?” achi hi. 5Jesu’n adawnga, “Adihtahin ka hing hil ahi, Mi koipou tui leh Hagau a, apientha sihleh Pasian gam alut thei sih ding hi. 6Tahsa a pieng pouma tahsa ahia, Hagau a pieng pouma Hagau ahi. 7Na pientha ngeingei ding ahi, na kunga kachi lamdang sa sin. 8Hui a utna lamlam ah alaang a aging na za hi, hinanleh heia hing kipan a, heilang a pei ding ahiei chi na thei sih hi. Michin Hagau a pieng pouma tuabang ahi.”
9Nikodem in adawnga, akungah, “Tam silte bangchi’n ahithei diei?” achi hi. 10Jesu’n adawng a, akungah, “Israelte Siepa khat hinapi a, tam silte theilou na mah? 11Adihtahin ka hinghil ahi, kouten ka thei uh ka gen ua, ka mu uh ka theisah uhi; ahivangin nouten koute theipina thu na pom sih uhi. 12Leitung silte ka hing hil nangawn tahsang utlou na hi u’leh, vanlam silte hing hil leng bang na chi tahsan ding uoi? 13Van a kipat a hing kumsuh, Mihing Tapa van a um chiloungal koima van ah akaltou nai sih hi.
14 #
Kisim. 21.9
Tualeh Mosi in gamdai a gul akhaikang bangin Mihing Tapa zong khaikangin aum ngeigei ding hi. 15Koipou Ama gingtain mangthai lou a, kumtawn hinna anei zawhna ding ahi. 16Aziehpen Pasian in khovel a it sengsenga, tuachi’n a tapa tangkhat neisun apie hi, koipou Ama gingta in amanthat lou a kumtawn hinna anei zawhna dingin. 17Khovel siemlou tangsah dingin Pasian in atapa leitungah asawl sih a, Khovel Ama vanga hundam ahitheina dingin asawl zaw hi.
18Ama gingta pouma siemmaw tansahin aum sih a, hinanleh agingta lou pouma siemmaw tansah zou ahita, Pasian Tapa tangkhat neisun min agintat lou zieh in. 19Tua khu siemlou tanna ahi, vah leitungah ahing pei a, hinanleh miten vah sangin miel adei zaw uhi, asilbawlte uh agitlou zieh in. 20Aziehpen Koipou sil gilou bawl in vah a huo uhi, tualeh vah ah zong ahing pei ut sih uhi; tuachilouin asil bawlte uh akilang kha ding hi. 21Hinanleh koipou sildih bawl khu vah ah ahing pei ua, asil bawlte uh Pasian a bawl ahi chi akilat theina dingin.
Johan in Jesu atheipina nukhia pen
22Tam silte nuain Jesu anua zuite toh Judia gamah ahing pei ua, khunah amautoh a umkhawm a abaptis#Baptispa Johan baptisma piehpen kisiana baptisma ahi. zel hi. 23Johan in zong khuna tui atam ziehin Salim kunga Aenon ah abaptis a, tualeh amaute a hing pei ua, baptisma atang uhi. 24#Mat. 14.3; Mak. 6.17; Luk. 3.19,20Khum hunlai in Johan suongkul ah akikhum nai sih hi.
25Tuachi’n Johan nuazuite leh Judate kikaal ah kisiensuona thu ah kinielna ahing umta hi. 26Amaute Johan kungah ahing pei ua, akungah “Rabbi Jordan gal a na kunga um atanchin na theipipa’n baptis abawl a, akungah mizousie ahing pei uhi,” achi uhi.
27Johan in adawnga akung uah, “Van akipat a pieh ahisihleh mihingin bangma anei thei sih hi. 28#Jn. 1.20Kei Khrist khu ka hisih a, amasang a sawl ka hi zaw hi chi noute mama in na hing theipi uhi. 29Mouneipa khu mou pasal ahia, hinanleh mouneipa lawmpa akung a dinga, athu ngaikhieh khu mouneipa aw ziehin alung nuom mama a, Tuaziehin tam ka lungnopna abukimta hi. 30Aman khanlam anaw dinga, Ken kiemlam ka naw ding hi.”
31Tunglam a kipat a hing peipa khu mi zousie tung a ahi a, lei a pieng khu leimi ahia, leilam sil mama agen hi; van akipat a hing peipa khu mi zousie tunga ahi. 32Aman amu leh azahte a theipi a, koiman a thu theipina thu apom sih hi. 33Koipou athu theipina pom in Pasian a dih ahi chiin apom uhi. 34Aziehpen Pasian misawlpa’n Pasian thu agen a; Pasian in lah a kungah Hagau tedetdet in ape sih hi. 35#Mat. 11.27; Luk. 10.22Pa in tapa a it a, akhut ah sil zousie apeta hi. 36Koipou tapa gingta in kumtawn hinna aneita, koipou tapa gingta louin hinna amu sih ding a, hinanleh Pasian thangpaina atungah a um den ding hi, achi hi.
Zvasarudzwa nguva ino
JOHAN 3: ZOUBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.