JOHAN 4
4
Jesu leh Samaria numei kihouna
1Tuaziehin Jesu’n Johan sangin nuazui tamzaw asiema abaptis hi chi Pharisaiten aza uh chi Mangpa’n atheitah in, 2(Ahivang in Jesu hiel in a baptis sih a anua zuiten abaptis uh ahi zaw hi.) 3Judia gam anuasie a, Galili gamah apei kiata hi. 4Hinanleh Samaria gam tawn malam a apei ding ahi.
5 #
Siem. 33.19; Josh. 24.32 Tuachi’n Samaria khopi khat Saikar achi uh, Jakob in atapa Joseph kunga mun apiehna kung ahing tungta a, 6Khunah Jakob tuikul aum a, Jesu zong akhuolzin lampeina agim ziehin tuikul geiah atou a, tua khu sunkim laitah ahi. 7Tuachi’n Samaria numei khat tuitawi dingin ahing pei a, Jesu’n akungah “Dawn ding hing pe vawi,” achi hi. 8Anuazuite lah khopi lam ah neh ding leiin apei siengta uhi.
9 #
Ezr. 4.1-5; Neh. 4.1,2 Tuachi’n Samaria numei in akungah, “Bangchidan a nang Juda mi in Kei Samaria numei kunga dawn ding na hing nget ahiei?” Judaten lah Samaria mite bangma a na ngai lou uh hilou ahieimah? achi hi. 10Jesu’n a dawnga akungah, “Pasian silpieh leh na kunga dawn ding hing piein chipa koi ahiei chi theilachin nang akunga ngen zaw ding hima ve chin, Aman tuihing hing pe ding hiven,” achi hi. 11Numei in akungah, “Pu aw asawhna ding bangma na nei sih a, tuikul lah athuh mama in, hei a kipata tua tuihing la ding na hiei? 12Ka pu uh Jakob sanga thupi zaw na hiei mah? Aman tami tuikul ahing pie a, tualeh ama ngelin zong adawn a, atate leh aganhonten zong a dawn uhi,” achi hi.
13Jesu’n adawnga, akungah, “Koipou tami tui dawn pouma adangtah kia ding hi. 14Hinanleh ken akunga ka pieh ding tui dawn pouma bangchih tanin adangtah nawn sih ding uhi. Akunga ka pieh ding tui khu ama ah tuinah ahing hi ding a, kumtawn hinna phain akikhotou ding hi,” achi hi.
15Numeinu’n akungah “Pu aw, Ka dangtah kia nawnlou na dingin leh tui tawi dinga tana ka hing kuon nawn louna dingin tua tui khu hing peve,” achi hi. 16Jesu’n akungah: “Pei inlen na pasal va han inlen tanah hing pei kia in,” achi hi. 17Tuachi’n numeinu’n adawnga, “Pasal ka nei sih” achi hi. Jesu’n akungah, “Pasal ka nei sih na chi, na chidih hi. 18Atahtah in Pasal nga na neita a, tulai tah a na nei zong na pasal ahi sih hi, na thugen adih ahi,” achi hi.
19Numeinu’n akungah, “Pu aw guolnei khat na hi chi ka theita hi. 20Ka pu ka pate un tami muol tungah Pasian abie ua, hinanleh nouten Jerusalem vateh a miten Pasian abieh ding uh ahi” nachi sese uhi.
21Jesu’n akungah “Numei aw, hing gingtain, tam muol#Tam muol-Gerizim muol china ahi. tung sese lou ah zong, Jerusalem sese lou ah zong Pa na bieh hun uh hing tung ding ahi. 22Nouten na theilou uh na bie uhi, Kouten ka bieh uh ka thei uhi; aziehpen hundamna Judate a hing kipan ahi. 23Hinanleh ahun tung ding ahita, tu’n zong atung ahita, tua hun chiengin abe tahtahten Pa khu Hagau leh thutahin abe ding uhi, aziehpen Pa in tuabang mi Ama be ding in asui hi. 24Pasian khu Hagau ahia, abe miten Hagau leh thutah a abieh ding uh ahi.”
25Numeinu’n akungah, “Khrist kichi Messiah ahing pei ding chi ka thei hi; Ama ahing pei chieng in bangkim ahing hil ding hi,” achi hi. 26Jesu’n akungah, “Kei na kunga thugenpa khu Ama ka hi,” achi hi.
Nuazuite thuhilna
27Tua hunlai tahin anuazuite ahing tung ua, numeinu akihoupi lamdang asa mama ua; hinanleh koiman “Bang ahiei na dei?” “Bangding a numeinu toh kihou na hiei?” achi sih uhi. 28Tuachi’n numeinu in atuibel anuasie a, khopi lam ah apei a, mite kung ah. 29“Hing pei unlen hing En un, ka sil bawlsate zousie hing hil mi khat a um hi. Khrist hilou ding ahiei mah? 30Tuachi’n amaute khopi apat apawtdoh ua, akungah ahing peita uhi.
31Tuakaal in anuazuiten “Rabbi ann ne phot in” chiin asawl uhi. 32Hinanleh Aman akung uah, “Noute theilou ann neh ding ka nei hi,” achi hi. 33Tuaziehin anuazuite khat leh khat akihou ua, “Mi koi ahiei in a neh ding ahing tawipieh adiei?” achi uhi.
34Jesu’n akung uah, “Ka ann khu kei hing sawlpa deilam bawl leh Ama nasep zaw ding ahi. 35Nouten bu laah na ding hali avatna lai hi, na chi sih uh amah? Ngai un, ka hinghil ahi, Dahkhie unlen, loute en un, laah hun in amin siengta hi. 36Bulapain thaman amu a, kumtawn hinna tana um ding ga alakhawm a; atu pa leh a atpa akipah khawm theina ding un. 37Khat in atu a adangin aga a at zel chi thu tanah adih ngel hi. 38Na sepgim louna uh ga at dingin ka hing sawl ahi. Midangten ana semgimta uh a, nouten asepgimna uh na sutzop uh ahi,” achi hi.
Jesu leh Samarimite
39Tua numei in, “Aman ka silbawlsa zousie ahing hil hi” chi theipina thu agen ziehin tua khopi a, Samarimite tampi in Jesu agingta ta uhi. 40Tuachi’n Samarimite Jesu kung ahing tun un akung ua taam tadi dingin ahou ua, khunah ni ni atamta hi. 41Tualeh Ama thugen ziehin midang tampi in agintat belap uhi. 42Amauten numeinu kungah, “Tuin vang nang thugen zieh a gingta ka hinawn sih ua, kouma mamain ka za ua tualeh tampa pen leitung hundampa, Khrist ahi chi ka thei uhi,” achi uhi.
43Tualeh ni ni nuain khuna kipat in apawt a, Galili gam ah apeita hi. 44#Mat. 13.57; Mak. 6.4; Luk. 4.24Aziehpen Ama Jesu ngel in guolnei ama gam lam ah pahtawi in a um ngai sih chi atheisah ta hi.
Mithupi khat tapa damsahna
45 #
Jn. 2.23
Tuachi’n Galili gam ahing tun tahin, Galili miten Ama ana kipahpi uhi. Amaute Jerusalem khuo a peikan annkuongluina a, va haw ahizieh un asil bawl zousie ava mu uhi. 46#Jn. 2.1-11Tuachi’n Jesu khu tui uoin asuohsahna Galili gam a Kana khuo ahing tung kia hi. Khunah mi thupi khat, atapa Kapernaum khuo ah china in a um hi. 47Ama’n Judia gam a pat Galili gam ah Jesu ahing tung chi azahtah in, akung ah ahing pei a, tualeh vapeisuh a atapa va sudam dingin angen vanguo hi, aziehpen ama ashi, dihdih ahita hi. 48Jesu’n akungah “Chiemtena leh sil lamdang na mu sih u’leh na gingta sih ding uh,” achi hi.
49Mithupipa’n “Pu aw, Ka tapa ashi masangin hing hawsuh in,” achi hi. 50Jesu’n akungah, “Peita’n na tapa adamta hi,” achi hi. Tuachi’n amapa’n Jesu’n akunga athugen agingta a, apeita hi. 51Ama lampi a apeisuh laiin asuohten atapa adamta chi thu toh ana dawn uhi. 52Tuachi’n aman ahing dampat lai hun adonga amaun akungah, “Zani nai sagi in a chithuo in ama anuasieta hi,” achi uhi. 53Tuachi’n apain tua khu Jesu’n akunga “Na tapa adamta” achi hun laitah ahi chi atheita hi; tualeh ama leh a innkuonpi tengin agingta ta uhi.
54Tam pen Judia gam a pat Galili gam ahing tun nua a, chiemtena lamdang Jesu’n abawl ni veina ahi.
Zvasarudzwa nguva ino
JOHAN 4: ZOUBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.