Matiu 28
28
Yisa kuunfiiru labaar
(Mak 16.1-10; Luk 24.1-12; Jɔɔnn 20.1-10)
1Ki Juu teeb foon daar na gar, ŋaan ki lasir daar sanyafaar ki Mari Magdaliin nan Mari lɔɔ na nyii saan a bin saa gɔn kaauk na. 2Ki tiŋ din damm bonchiann, kimaan Yennu malaka nyii sanpaapo sik, ki tan bikit katangbeŋŋir na kamɔb na boor, ki ŋmant ki kar li paak. 3Ki u gbanant din nyirii kaman nan sanyikintii nee, ki u liant peen kaman nan sanpagbanpeeuŋ na. 4Ki jaŋmaanii din soor guuteeb na bonchiann, ki bi ji jekir ki tan baa ki dɔɔ dɔɔ kaman nan kpeemm na.
5Ki malaka na bet poob maŋ a “Yimm daa tiin jaŋmaanii man. N mi nan i loon Yisa nba ki bi kpaau dapunpunn paak nee. 6U kaa nna, u fiir kuun niwa kaman nan wa yet biaŋinba na. I saana man ki tan got wa daan dɔɔ siaminba na. 7I saa man yian yian, ki saa yet u poorpoweiteeb a u fiir kuun ni ki gar saan Galileewa. Leŋewa ki i sa lau. Barmɔniie ki n beeri na.”
8Ki poob na nyii kaauk maŋ peŋ ki chiar saa a bin saa bet u poorpoweiteeb; ki jaŋmaanii lek mɔkib, ŋaan ki bi bia mɔk parpeenn bonchiann.
9Ba din saa na, ki Yisa chetib sɔnu paak ki foontib; ki bi gbaan u tɔɔnn ki jiantɔ. 10Ki u betib a “I daa tiin jaŋmaanii; i saa man ki saa bet n naa waas maŋ a bin saan Galilee; leŋewa ki bi sa lan.”
Guuteeb na nba ŋmat saa yet biaŋinba
11Poob maŋ nba din saa na, ki guuteeb nba guu kaauk na siab ŋmat saan doo ni, ki saa wann Yennu jiantu yudamm na linba teen maŋ kura. 12Ŋanne ki Yennu jiantu yudamm maŋ nan saakab lakin kar ki lor lor; ki tur guuteeb na likirii bonchiann, 13ŋaan betib a “Yi yet a Yisa poorpoweiteebe baar tansuunii, yoo nba ki i dɔɔr ki gɔɔnt na, ki tan jan piit u gbanant; 14ŋaan li-i tee ki tiŋ yudaanɔ na gbat nnaie, timm sa dɔkin i paak u boor ni ki nyinni.”
15Ki guuteeb maŋ gaar likirii na, ŋaan ŋmat ki saa bet niib nan ba wannib biaŋinba na. Ki Juu teeb gaar maan na ki li teen barmɔnii mɔkmɔk nan dinna.
Yisa nba dɔkit u poorpoweiteeb paak biaŋinba
(Mak 16.14-18; Luk 24.36-49; Jɔɔnn 20.19-23; Toona 1.6-8)
16Ki Yisa poorpoweiteeb piik nan yenɔkɔɔ na saan Galilee jɔsiar paak, siaminba ki Yisa din wannib a bin saan na. Ki bi din tan lau leŋ. 17Ba lau yoonba ki bi gbaan ki jiantɔ; ŋaan bi nisiab din biris u paak. 18Ŋanne ki u chat ki nakimm, ŋaan yet a “Yennu turin sanpaapo nan tiŋ ni yent kurawa. 19Li paak, i saa man tingbouŋ na ni, nibooru kura boor ni, ki saa teemm n poorpoweiteeb, ki wurib Yennu nyunwuru, n Baa Yennu sann ni, nan min u Bija sann ni, nan Seyeeŋ sann ni, 20ki wannib ki bin sak linba ki n wanni na kura. Ŋaan yii tian man nan n sii be i boor ni yoo kura mɔkmɔk nan dunia gbennu.”
Zvasarudzwa nguva ino
Matiu 28: BIM
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda