Mak 1
1
Jɔɔnn nba din wuur niib Yennu nyunwuru na labaar
(Matiu 3.1-12; Luk 3.1-18; Jɔɔnn 1.19-28)
1Ŋanne tee Yennu Bija Yisa Masia barŋanii na. 2Li din piin tee kaman nan Yennu Sɔkinii Aisaya nba din sɔb nee a
“Yennu yet a
‘Nnara, n toomue na, ki n yaa n tumɔ
a wun dɔŋ ki gar a tɔɔnn,
ki ŋamm a sɔnii ki tura.’
3Sɔɔ be muuk ni ki hoot ki yaa a
‘Ŋammit man ti Yomdaanɔ baaru sɔnii
ki lii took ki turɔ.’ ”
4Jɔɔnn nba din wuur niib Yennu nyunwuru na din be muuk ni, ki mɔɔntir ki teen niib a bin nyik bi biit ki wun wurib Yennu nyunwuru ki Yennu-n nyik chab bi biit. 5Ki niib bonchiauŋ din nyii Judea tiŋ ni nan Jerusalem doo ni, ki baar Jɔɔnn boor ni, ki tan fiit bi toonbiit, ki Jɔɔnn wurib Yennu nyunwuru, Jɔɔdann mɔkir ni.
6Jɔɔnn din lia bonkobuk nba ki bi yiu lagumii kobit liatire, ki bia boob gbann u siak ni, ki u jeet din tee naasuut nan siate. 7Ki u mɔɔntir ki teen niib a “Nirɔ nba yaa wun tan wei n poor ki baar na cheen, ki n pɔ gbaa nan ki n gbaan u tɔɔnn ni ki lot u taasaaŋmii. 8Min ŋanin wuuri nan nyume, ŋaan ŋɔɔe tan sa jii Yennu Seyeeŋ ki wuur i para.”
Jɔɔnn nba din wur Yisa biaŋinba
(Matiu 3.13–4.11; Luk 3.21-22; 4.1-13)
9Li yoo na ki Yisa din nyii Nasaret doo nba be Galilee tiŋ ni na, ki baar Jɔɔnn boor, ki Jɔɔnn wurɔ Yennu nyunwuru Jɔɔdann mɔkir maŋ ni. 10Yisa nba din nyii nyun maŋ ni ki doo yoonba, li taakpaak ni ki u la ki sanpaapo loot, ki Yennu Seyeeŋ sik tɔɔn u paak ki naan nan ŋmann; 11ki u gbat kunkɔr sanpaapo na, ki kunkɔr na yet a “Fine tee n Bilonkak; fine ki n numm gboo.”
Biaŋinba ki Sintaanii din jamm Yisa labaar
(Matiu 4.1-11; Luk 4.1-13)
12Ŋanne ki Yennu Seyeeŋ din te ki Yisa kɔɔ muuk ni; ki u din be muuk maŋ ni ki saa jaŋ dapiinna, ki Sintaanii saa jammɔ. 13Yisa nan muuk ni bonkobite din be; ki Yennu malakanba siik ki chantirɔ.
Yisa nba din yiin jansoorteeb banna biaŋinba
(Matiu 4.12-22; Luk 4.14-15; 5.1-11)
14Tɔn, ki bi din tan soor Jɔɔnn wunba wuur niib Yennu nyunwuru na, ki kɔɔnɔ dansarik; ki li poorpo ki Yisa saan Galilee tiŋ ni, ki mɔɔntir Yennu barŋanii 15ki yeen a “Yoo baara, ki Yennu naan baaru per na; li paak, teent man barŋanii maŋ yada ŋaan nyik i toonbiit.”
16Yisa nba din somm Galilee mɔkgbeŋŋir kpiŋ na, ki u tan la Simon nan u waarɔ Andru, ki bi lubin janlaauŋ mɔkgbeŋŋir na ni, kimaan bi din tee jansoorae. 17Ki u yetib a “I waan man, ki n sa te ki yii daak niib kii baat namm n boor.” 18Li taakpaak ni ki bi nyik bi janlaauŋ na, ŋaan fiir ki waau.
19Ki u bia ji din saan tɔɔnn po waaminna ki la Jems nan u waarɔ Jɔɔnn, binba din tee Sebedee waas na, ki bi din be bi burgbetir ni ki lik bi janlaant. 20Li taakpaak ni ki u yiimm; ki bi nyik bi baa Sebedee nan u toontunna burgbetir maŋ ni, ŋaan waau.
Jɔɔ nba ki narinbiiuk din be u ni na labaar
(Luk 4.31-37)
21Ki Yisa nan ŋamm din saan kɔɔ digbansiar ki li sann yi Kapenaum; ki Juu teeb foon daar tan baar, ki bi kɔɔ Yenjiantu diiuk ni, ki u piin ki want niib Yennu maan. 22Ki u wannu maŋ bakitib bonchiann, kimaan u wannib kaman nan daanɔ nba yen yikoo nee, ki ki wannib kaman nan sennu wannteeb nba wantib biaŋinba na.
23Ki li yoo na ki jɔɔ nba ki narinbiiuk be u ni na be Yenjiantu diiuk na ni 24ki yikin sanpaapo ki yeen a “Fin Yisa, Nasaret nirɔ na, timm nan fin nlee mantiki? A baar a a tan biiritee? N mi fa tee wunba; a tee Yennu Popeendaanɔ nae.”
25Ki Yisa tian u paak, ki yet a “Ŋminin fuut, ŋaan nyi u ni.”
26Ki narinbiiuk na fuun jɔɔ na ki tan lu-u ŋaan yikin sanpaapowa, ŋaan nyii u ni. 27Ki li din teen bi kur yaarlituko, ki bi boi bi leeb a “Bee na? U wann wannsaannee? U mɔk yikoo ki teen narinbiit mɔb, ki bi saak u mɔb.” 28Li taakpaak ni ki u sann din mɔɔnt ki lin Galilee tiŋ ni kura.
Yisa nba din te ki baatib bonchiann paak biaŋinba
(Matiu 8.14-17; Luk 4.38-41)
29Yisa nba din nyii Yenjiantu diiuk maŋ ni na, ki ŋɔɔ nan Jems nan Jɔɔnn din saan kɔɔ Simon nan Andru ŋaak ni. 30Ki Simon dianpook din dɔɔ ki yiar gbanantouŋ, ki bi bet Yisa u yiaru maŋ po. 31Ki Yisa din saan soor u nuu ki fiinɔ kaan, ki u gbanantouŋ maŋ gbenn, ki u fiir ki chantib saauŋ.
32Li daar maŋ dajonyiɔk, ki niib din jii baatib nan binba ki narinbiit be bi ni na, ki baat namm Yisa boor ni. 33Ki doo maŋ ni niib kura din lakin ki tan yia diiuk na tammɔb. 34Ki u te ki nisiab bonchiann binba yiar yiarbooru kura na paak, ki bia nyint narinbiit niib bonchiann ni, ŋaan ki ki sak narinbiit maŋ-n yet siari, kimaan bi din mi wa tee wunba.
Yisa nba din mɔɔntir barŋanii Galilee digbana ni biaŋinba
(Luk 4.42-44)
35Ki Yisa din dɔŋ nyii ŋaak na ni ki kojouk daa ki mɔ, ki kɔɔ muuk ni ki saa mei Yennu. 36Ki Simon nan u leeb na ji din lin ki loon u boor, 37ki saa lau ki betɔ a “Sɔɔ kura loon bin la fa be siame.”
38Ki u yetib a “Ŋaant man ki tin saan digbana nba be ti tɔɔnn po na, ki n sa mɔɔnt barŋanii na leŋ mun, kimaan li paake te ki n baar.”
39Ki u din gɔrin ki lin Galilee tingbouŋ ni kura, ki mɔɔntir barŋanii maŋ Yenjiantu diit ni, ki bia nyint narinbiit niib ni.
Yisa nba din te ki gbaatir paak biaŋinba
(Matiu 8.1-4; Luk 5.12-16)
40Tɔn, ki gbaatsɔɔ din baar Yisa boor ni, ki tan gbaan u tɔɔnn ni, ki barimɔ a “A sa fit te ki n ŋaauk na-n gbenna. A kan sakii?”
41Ki ninbaauk din soor Yisa, ki u tant u nuu ki siiu, ŋaan yetɔ a “N saka. A ŋaauk maŋ-n gbenn!” 42Li taakpaak ni ki jɔɔ maŋ ŋaauk na gbenn, ki u gbanant ji jen li bannu ni. 43Ki Yisa din kpaanɔ fanuwa, ŋaan ji nyikɔ ki u saan, 44ŋaan yetɔ a “I mi ki a bet sɔɔ li barii; i saa ki jii a mɔŋ ki wann Yennu mantɔɔ na, ki mann mannu nba ki Yennu sɔkinii Moses din senn ki jiin gbaata paaku po na, ki sɔɔ kur-n bann nan a ŋaauk maŋ set gbenna.”
45Ŋanne ki jɔɔ na saan ki mɔɔnt u paaku maŋ labaar lokir kura po; ŋanne din te ki Yisa ki fit nyi paanu ni ki kɔɔ digbansiar ni, ŋaan ji kpan be muuk ni; ki niib bonchiann din nyi lokir kur po ki baat u boor ni.
Zvasarudzwa nguva ino
Mak 1: BIM
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda