Jẹnẹsis 46
46
Jekọp vẹ Ekru ọye mu Oyan Kpo Ijipt
1Etiyin Izrẹl de mu oyan te ọye te emu ro vwori ejobi, o de rhi te Bẹẹrsheba, o de ze izobo kẹ Ọghẹnẹ rẹ ọsẹ rọye Aizik. 2Ọghẹnẹ da ta ota kẹ Izrẹl vwẹ evwerhẹ vwẹ ason, ọ da ta, Jekọp, Jekọp o de nyo nẹ, Mẹvwẹ na. 3Etiyin ọ da ta, Mẹvwẹ Ọghẹnẹ, Ọghẹnẹ rẹ ọsẹ wẹn, wọ djẹ oshọ ri wo vwo kpo Ijipt na-a, kidie Me dia oboyin ru we phihọ ẹgborho rode. 4Me yan nene uwe kpo Ijipt na, Me je vwo we rhivwi rhe, abọ ri Josẹf ki rhurhu we ẹro. 5Etiyin Jekọp de vrẹn ni Bẹẹrsheba, emọ rẹ Izrẹl de mu Jekọp rẹ ọsẹ rayen, imitete rayen, kugbe eya rayen, phihọ ekpẹrẹ ri Fero vwọ rhe nẹ vwo muo rhe. 6Ayen de ji mu uchuru rayen kugbe eyere rayen, re ayen vwori vwẹ otọ ri Kenan, ayen da rhe Ijipt, ti Jekọp vẹ uvwiẹ rọye ejobi, 7emọ rọye rẹ emeshare, kugbe emọ rẹ emọ rọye, emetẹ rọye kugbe emọ rẹ emetẹ rọye ejobi, uvwiẹ rọye ejobi vẹ ọye usun re gba rhe Ijipt.
8Enana keye edẹ rẹ uvwiẹ rẹ Izrẹl, re rhe otọ rẹ Ijipt, Jekọp vẹ emọ rọye. Rubẹn rẹ ọwanra, 9kugbe emọ ri Rubẹn: Hanọk, Pallu, Hezron, vi Karmi. 10Emọ ri Simiọn Jemuel, Jamin, Ohad, Jakin, Zohar, vi Shaul ọmọ rẹ aye rẹ ohwo ri Kenan. 11Emọ ri Livae; Gẹrshọn, Kohat, vi Merari. 12Emọ ri Juda: Ẹr, Ọnan, Shelah, Pẹrẹz, vi Zerah (ẹkẹvuọvo Ẹr vẹ Ọnan de ghwu vwẹ otọ ri Kenan); emọ ri Pẹrẹz ke rha Hezron vi Hamul. 13Emọ rẹ Isaka: Tola, Puvah, Jashub, kugbe Shimrọn. 14Emọ ri Zẹbulọn: Serẹd, Elọn, vi Jahleel 15(enana emọ ri Leah, ro vwiẹ ki Jekọp vwi Padanaram, vi Dinah rẹ ọmọtẹ rọye; ayen ejobi te emeshare vẹ emetẹ rọye da dia ọgban gbẹ erha). 16Emọ ri Gad: Zifion, Haggi, Shuni, Ezbon, Eri, Arodi, vi Areli. 17Emọ ri Asha; Imnah, Ishvah, Ishvi, Beriah, vi Serah rẹ oniọvo rọye. Emọ ri Beriah Heber vi Malkiel. 18(Enana emọ ri Zilpah, ri Laban vwọ kẹ Leah rẹ ọmọtẹ rọye, enana keye o vwiẹ ki Jekọp ihwe gbẹ esan). 19Emọ ri Rachel, rẹ aye ri Jekọp: Josẹf kugbe Bẹnjamin. 20Vwẹ obo otọ rẹ Ijipt Josẹf de vwiẹ Manasse kugbe Ifrem, rẹ Asenath, rẹ ọmọtẹ ri Potifera re orherẹn ri On, vwiẹ kẹ. 21Emọ ri Bẹnjamin: Bẹla, Becher, Ashbel, Gera, Naaman, Ehi, Rosh, Muppim, Huppim, vẹ Ard 22(enana emọ ri Rachel, ro vwiẹ ki Jekọp – ayen ejobi ihwo ihwẹne). 23Emọ ri Dan: Hushim. 24Emọ ri Naftali Jahzeel, Guni, Jezer, vi Shillem 25(enana emọ ri Bilhah, ri Laban vwọ ki Rachel ọmọtẹ rọye, enana keye o rhe vwiẹ ki Jekọp – ayen ihwo ighwrẹ). 26Ihwo ejobi ri Jekọp vwori re rhe otọ rẹ Ijipt, re dia emọ rẹ orhẹn rọye, e kere eya rẹ emọ ri Jekọp kugbe-e, ayen ejobi da dia ujorha gbẹ esan; 27emọ ri Josẹf, ro vwiẹri vwẹ Ijipt, da dia ivẹ, ihwo rẹ uwevwi ri Jekọp ejobi re rhe otọ rẹ Ijipt da dia ujorha gbẹ ihwe.
Jekọp vẹ Ekru Rọye vwẹ Ijipt
28O de ji Juda ka obaro bru Josẹf, rere o re dje idjerhe ri Goshẹn ke ayen, ayen de rhi te otọ ri Goshẹn. 29Etiyin Josẹf da rhuẹrẹ idjighere rọye ọ da ra vwa Izrẹl ọsẹ rọye vwi Goshẹn: ọ da vwẹ oma nẹ, o da gbanọ ohọre, ọ da viẹ kuo ohọre krekri. 30Izrẹl da ta ki Josẹf, Asakiephana gbe ju vwe ghwu, re Me vwọ mrẹ opharo wẹn nure na, Me ke rha riẹn nẹ wọ je akpọ. 31Josẹf da ta kẹ emesẹ rọye, kugbe evwruwevwi rayen, Me yanran re Me ra vuẹ Fero, re Me ta kẹ nẹ, Ọsẹ mẹ vẹ emesẹ mẹ vẹ evwruwevwi rayen ejobi, re otọ ri Kenan bru vwe rhe, 32ihwo na ichuru igodẹ ayen ruẹ, kidie uchuru ayen churẹ, ayen je ghwa uchuru rayen rhe, te eranvwe rayen, kugbe obo rẹ ayen vwori ejobi. 33Ọke ri Fero de se we, rọ da tanẹ, Didi iruo ovwan ruẹ? 34ku wo tanẹ, Idibo wẹn eranvwe ichurẹ nẹ ọke-emọ rhe ri te ọke na, te avwanre te ese rẹ avwanre, rere wa mrasa dia otọ ri Goshẹn na, kidie osuigodẹ kosuigodẹ ẹgua kẹ ihwo rẹ Ijipt.
Zvasarudzwa nguva ino
Jẹnẹsis 46: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.