Jẹnẹsis 47
47
1Etiyin Josẹf da yanran ra ta ki Fero, Ọsẹ mẹ vẹ emesẹ mẹ vẹ uchuru rayen vẹ eranvwe kugbe eyere rayen ejobi, nẹ otọ ri Kenan rhire, ayen obi Goshẹn Asakiephana. 2O da reyọ eshare iyori vwẹ usun re emesẹ rọye ọ da vwẹ ayen nẹ Fero 3Fero da ta kẹ emesẹ rọye, Didi iruo we ruẹ? Aye da kpahe ki Fero, Idibo wẹn isuigodẹ kirobo rẹ esẹ rẹ avwanre ruru. 4Ayen da ta ki Fero, Avwanre rhe ukane vwẹ otọ na, kidie a rha mrẹ egbri vwọ kẹ igodẹ rẹ idibo wẹ-ẹn, fiki rẹ owẹvwe na ganọ vwẹ obo otọ ri Kenan, Asakiephana avwanre rẹ wẹ, jẹn idibo wẹn dia otọ ri Goshẹn na. 5Etiyin Fero da ta ki Josẹf, Ọsẹ wẹn vẹ emesẹ wẹn bru vwe rhe. 6Otọ rẹ Ijipt na ejobi obọ wẹn ọ epha; jẹn ọsẹ wẹn vẹ emesẹ wẹn dia asan ro Me yovwi vwẹ otọ na; jẹn ayen dia otọ ri Goshẹn, wọ da rha mrẹ ohwo rọ ganre vwẹ usun rayen, gbe jọ vwẹ ẹro te eranvwe mẹ.
7Josẹf da reyọ ọsẹ rọye Jekọp rhe o de mudia vwẹ obaro ri Fero, Jekọp da nẹ ẹrhovwo ki Fero. 8Fero da ta ki Jekọp, Bro ikpe wọ dia akpọ re? 9Jekọp da ta ki Fero, Me akpọ ikpe ujosan gbẹ ihwe re, ehahavwe e ke je vọn vẹ ọdjarhe, vwẹ enana ejobi na Me je tọn te esẹ mẹ-ẹ. 10Jekọp da nẹ ẹrhovwo ki Fero, ọ da yan nẹ obaro ri Fero. 11Etiyin Josẹf da vwẹ asan kẹ ọsẹ rọye vẹ emesẹ rọye dia, ọ da ghare ẹkẹn kẹ ayen vwẹ otọ rẹ Ijipt, asan ro Me yovwi vwẹ otọ na, vwẹ otọ ri Ramsis, kirobo ri Fero dje kẹ. 12Josẹf kọye re ghẹrẹ ọsẹ rọye vẹ emesẹ rọye kugbe evwruwevwi rẹ ọsẹ rọye ejobi, ọtiobo rẹ unu re ria emu vwẹ uwevwi rayen bute.
Isuesun ri Josẹf vwẹ Ọke rẹ Owẹvwe vwo fie
13Asakiephana emuọre rha otọ na ejobi-i, kidie owẹvwe na firi gangan, etiọye na te otọ rẹ Ijipt vẹ otọ ri Kenan de rhi vwioro ku fiki rẹ owẹvwe na. 14Josẹf de koko igho ra mrẹre vwẹ otọ re Ijipt na ejobi kugbe otọ ri Kenan na ejobi, igho rẹ ọka ra dẹre, Josẹf da ghwẹ igho na phihọ uwevwi ri Fero. 15Ọke rẹ igho rẹ otọ rẹ Ijipt kugbe otọ ri Kenan vwo re nu, ihwo rẹ Ijipt ejobi de bru Josẹf rhe, ayen da ta, Kẹ avwanre emu, die avwanre di vwo ghwu vwẹ irharo wẹn? Kidie igho rẹ avwanre reri. 16Josẹf da kpahe, Kẹ vwẹ uchuru wẹn, ki mi vwẹ emuọre wene uchuru na kẹ wẹ, o da dianẹ igho wẹn reri. 17Etiyin ayen da ghwẹ uchuru rayen rhe Josẹf; Josẹf da vwẹ emuọre wene iyesi, igodẹ, uchuru vẹ ekẹtẹkẹtẹ rayen, ọ da vwẹ emu wene uchuru rayen ejobi ukpe yena. 18Rẹ ukpe yena vwo re nu, ayen de bro rhe vwẹ ukpe ro kpaherọ, ayen da ta kẹ, Avwanre sa djahe orovwovwe-e nẹ igho rẹ avwanre ejobi reri; uchuru rẹ avwanre ejobi ke e rẹ ọrovwovwe vwẹ etinẹ na; emu ọvuọvo gbi chekọ kẹ avwanre-e ọrovwovwe jokpa rẹ ugboma ofefe rẹ avwanre kugbe otọ rẹ avwanre. 19Die sorọ rẹ avwanre di vwo ghwu vwẹ irharo wẹn, te avwanre te etọ rẹ avwanre? Dẹ avwanre kugbe etọ rẹ avwanre vwẹ ọ rẹ emuọre, te avwanre te etọ rẹ avwanre ke dia eviẹn ri Fero; kẹ avwanre emamọ, re avwanre rhọ, ru Me je ghwo, rere otọ na vwo je fue.
20Ọtiọye na Josẹf da dẹ etọ rẹ Ijipt vwọ ki Fero, kidie ihwo rẹ Ijipt ejobi shẹ etọ rayen re, fiki rẹ owẹvwe na firi gangan. Etọ na ejobi ke ri Fero, 21vwọ kẹ irere na, ọ da vwẹ ayen ru eviẹn nẹ oba rẹ Ijipt ọvo re te ọrivẹ. 22Etọ rẹ irherẹn ọvo ọye o jẹ dẹ; kidie irherẹn na vwo uchosa ri Fero hwa kẹ ayen: fiki rẹ ọtiọye na ayen gbe shẹ etọ rayen. 23Etiyin Josẹf da ta kẹ ihwo na, Nighe, nonẹ na Me dẹ ovwan vẹ etọ rẹ ovwan vwọ ki Fero. Enana ibi rẹ emamọ na, ovwan gba kọn otọ na. 24Vwẹ ọke orhọ we gbe toro akuori vwọ ki Fero, akuẹne ri chekọ ke re ovwan, kẹ Etiyin wa da re kugbe Etiyin wa da je kọn, Etiyin uwevwi rẹ ovwan da re kugbe imitete rẹ ovwan ejobi. 25Ayen da ta, Wo Sivwi avwanre nure, gbe je o je ọrovwovwe, avwanre ke dia eviẹn ri Fero. 26Ọtiọye Josẹf vwi ro ru urhi vwẹ otọ rẹ Ijipt, urhi na ji mudia rhi te nonẹ, nẹ, Fero gbe vwo akuori rẹ orhọ, otọ rẹ irherẹn na ọvo kọye je ọ ri Fero ẹdia.
Uku ri Jekọp ro ka Oba
27Kẹ enẹ Izrẹl rhe vwọ dia otọ rẹ Ijipt, vwẹ otọ ri Goshẹn, ayen de vwo ẹkẹn vwẹ evun rọye, ayen de vwiẹ buebu gangan. 28Jekọp da dia otọ rẹ Ijipt ikpe ihwe gbẹ ighwrẹ; ọtiọye ẹdẹ ri Jekọp, kugbe ikpe rọ tọn te da dia ikpe ujughwrẹ gbẹ ighwrẹ 29Rẹ ọke rẹ ughwu rẹ Izrẹl vwọ kẹrẹ otọ re, o de se ọmọ rọye Josẹf ọ da ta kẹ, Ọ da dianẹ ivun mẹ ghene vwerhe owẹ, gbe phi obọ wẹn phihọ otọ rẹ ekpoghowọ mẹ, ru wo vẹ nẹ wo nene uvwe yeri eyere rẹ ọghọ vẹ uyota. Wo shi vwe phihọ Ijipt rẹ, 30ẹkẹvuọvo shi vwe kẹrẹ esẹ mẹ, mu vwe nẹ Ijipt rere wo shi vwe phihọ ogbẹ rayen. O da kpahe nẹ, Mi ru kirobo wọ tare. 31Ọ da ta, Duvwu iyori kẹ vwẹ, o de ghine duvwu iyori kẹ. Etiyin Izrẹl de gbe uyovwi kpotọ vwẹ enu rẹ ehwa rọye.
Zvasarudzwa nguva ino
Jẹnẹsis 47: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.