Jẹnẹsis 48
48
Jekọp nẹ Ẹrhovwo kẹ Ifrem kugbe Manasse
1Rẹ Ọnana vwọ wan nu ka ta ki Josẹf nẹ, Nighe, ọsẹ wẹn herọ mwa, Etiyin ọ da reyọ emọ rọye ivẹ, Manasse vẹ Ifrem 2Ka vuẹ Jekọp nẹ, Ọmọ wẹn Josẹf rhe mrẹ wẹ; Etiyin Izrẹl da vwẹ ẹgbẹgba vrẹn, o de Tidia ehwa. 3Jekọp da ta ki Josẹf, Ọghẹnẹ ro vwo Ẹgba vwẹ oma phia kẹ vwẹ vwi Luz vwẹ otọ ri Kenan o da nẹ ẹrhovwo kẹ vwẹ, 4ọ da ta kẹ vwẹ, Nighe, mi ru we ogbaọmiovwọ, ki mi ru we bu, ki mi ru we urogho rẹ ihwo, ke Me vwẹ otọ na kẹ uvwiẹ wẹn rọ cha vwẹ obuko wẹ re ọ dia ẹkẹn rayen bẹdẹ. 5Asakiephana emọ wẹn ivẹ na, ru wo vwẹriẹ vwẹ otọ rẹ Ijipt na tavwe re Me ke rhe Ijipt na, e mẹ; Ifrem vi Manasse ke dia e mẹ, kirobo ri Rubẹn vi Simiọn epha. 6Emọ rẹ ayen che vwiẹ ejobi ke dia ewẹn; ka vwẹ odẹ rẹ emesẹ rayen vwo se ayen vwẹ ẹdia rẹ uku rayen. 7Kidie ọke mi vwo nẹ Padan cha, Rachel da va vwẹ abọ ghwu vwẹ otọ ri Kenan vwẹ idjerhe, yẹ asan na vẹ Ephrat ji oshesheri, mi de sho vwẹ idjerhe rẹ Ephrat (kọye Bẹtlẹhẹm). 8Ọke rẹ Izrẹl vwọ mrẹ emọ ri Josẹf, ọ da ta, Ena amono? 9Josẹf da ta kẹ ọsẹ rọye, Ena emọ mẹ, rẹ Ọghẹnẹ vwọ kẹ vwẹ etinẹ. Ọ da ta kẹ, Reyọ ayen rhe vwe, Me rẹ wẹ, rere Me nẹ ẹrhovwo kẹ ayen. 10Asakiephana ẹro rẹ Izrẹl djeri fiki rẹ oghwo, o gbi jọ mrẹrẹ-ẹ. Etiyin Josẹf da reyọ ayen kẹrẹ; ọ da fiọnfiọn ayen unu ọ da gbanọ ayen. 11Izrẹl da ta ki Josẹf, Mi gbi roro jovwo nẹ Me mrẹ opharo wẹn vẹrhe-e, gbe nighere, Ọghẹnẹ kọye jabọ Me sa vwọ mrẹ emọ wẹn rhe. 12Etiyin Josẹf de mu ayen nẹ igbo rọye, o de diguẹ bọvwọ opharo rhu otọ. 13Josẹf da reyọ ayen ivẹ na, Ifrem da obọrhe rọye kọye obọhwẹre rẹ Izrẹl, Manasse da obọhwẹre rọye kọye obọrhe rẹ Izrẹl, o de si ayen kẹrẹ. 14Izrẹl da riẹn obọrhe rọye vwọ kpahe Ifrem uyovwi, rọ dia omotete, ọ da ghwẹ obọhwẹre rọye kpahe uyovwi ri Manasse ọ da vwẹ obọ wan ohwohwo, kidie Manasse ọye ọwanra. 15Ọ nẹ ẹrhovwo ki Josẹf, ọ da ta,
Ọghẹnẹ rẹ Ebraham vẹ Aizik rẹ esẹ mẹ yan nene,
Ọghẹnẹ ro sun vwe vwẹ akpọ mẹ rhi te nonẹ,
16amakashe rọ tan vwẹ nẹ idẹbono ejobi,
bruphihọ kẹ emọ nana;
jẹn odẹ mẹ wan oma rayen va phia,
kugbe odẹ rẹ esẹ mẹ Ebraham vẹ Aizik;
jẹn ayen bu phihọ ẹgborho vwẹ enu rẹ akpọ na.
17Ọke ri Josẹf vwọ mrẹ ọsẹ rọye rọ ghwẹ obọrhe rọye kpahe uyovwi rẹ Ifrem, o rhe je-e, ọ da kpare obọ rẹ ọsẹ rọye, nẹ uyovwi rẹ Ifrem re phihọ ọ ri Manasse. 18Josẹf da ta kẹ ọsẹ rọye, Ọ dia ọtiọye-e, baba, fikiridie Ọnana ọye ọmọkpako, Ghwẹ obọrhe wẹn kpahe uyovwi rọye. 19Ẹkẹvuọvo ọsẹ rọye da sen tanẹ, Me riẹnre mọmẹ, Me riẹnre, okpuyovwi rọye je cha dia ohwo rhe, ọ je cha rho; dede na oniọvo rọye rẹ otete na cha rhonọ, uvwiẹ rọye che hirhe ẹgborho rode. 20Ọtiọye kọye ọ nẹ ẹrhovwo kẹ ayen vwẹ ẹdẹ yena tanẹ,
Oma wẹ yẹ Izrẹl wan nẹ ẹrhovwo tanẹ,
Ọghẹnẹ ru we kiri Ifrem vi Manasse;
kẹ etiọye ọ vwẹ Ifrem ka obaro ki Manasse. 21Etiyin Izrẹl da ta ki Josẹf, Nighe, mi muegbe rẹ ughwu re, ẹkẹvuọvo Ọghẹnẹ nene uwe dia, rọ je vwo wẹ rhivwi rhi te otọ rẹ esẹ wẹn. 22Ọ rọ ma rho ejobi Me vwọ kẹ wẹ ọ dia emesẹ wẹ-ẹn, ọghwrọrọ ọvo re Me vwẹ ọlọkọ vẹ umurhabọ mẹ vwọ reyọ mie ihwo rẹ Amọr.
Zvasarudzwa nguva ino
Jẹnẹsis 48: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.