Jẹnẹsis 49
49
Jekọp mraro kpahe Emọ Rọye
1Etiyin Jekọp de se emọ rọye, ọ da ta, Wa ghwẹ oma koko, re Me ta kẹ ovwan obo re cha phia kẹ ovwan vwẹ ẹdẹ rọ cha.
2Aghwe oma koko re we nyo, E emọ
ri Jekọp, kerhọ rẹ ọsẹ rẹ ovwan.
3Rubẹn, wẹ ọwanra mẹ,
ẹgba mẹ, vẹ omamọ rẹ ẹsosuọ rẹ
ogangan mẹ, ro titiri vwẹ eheri,
ro kperi usi vwẹ ogangan.
4Ragha ragha kiri ame, wo rhe kperi
usi-i kidie wo kpo ehwa rẹ ọsẹ wẹn;
wo de miovwo wo de kpo asan Me da rioma.
5Simiọn vi Livae iniọvo ivẹ,
emu gbrigbri ayen vwẹ elọkọ rayen ruẹ
6E, erhi mẹ, wọ vwẹriẹ umẹ raye-en,
E, erhi mẹ, wo te ukoko raye-en,
kidie vwẹ ophu rayen ayen hwe ihwo,
vwẹ ẹro hrehre rayen ayen yoro uriẹn nẹ awọ rẹ erhuẹn.
7Eka kẹ ophu rayen, kidie ọ ganọ,
kẹ ivuemiovwo rayen, kidie ọ branọ;
Me ghare ayen phihọ Jekọp ke Me hra ayen vwẹ Izrẹl.
8Juda, imoni wẹn ejobi ki jiri uwe;
obọ wẹn kọ yọnrọn ubiupho rẹ ivwighrẹ wẹn;
Emọ rẹ ọsẹ wẹn ki diguẹ te otọ kẹ wẹ.
9Juda ọmọ rẹ okpohrokpo;
vwẹ eranvwe emuo, ọmọ mẹ, wo de vrẹn
kpenu. Orhuẹri, o fiọnko
kiri okpohrokpo, kiri okpohrokpo rẹ aye, kono ri se guegue?
10Ọkpọ na rhe se ni Juda-a,
eye ọkpọ rẹ osun na rhe se nẹ
agada rọyee, bẹsiẹ ro che vwo te
obọ rẹ ohwo ro viri, kọye ihwo na ejobi che mu ọghọ ke.
11Kọ gba upene rẹ ekẹtẹkẹtẹ mui vain
ekẹtẹkẹtẹ na ke churo mui vain ro fori,
kọ hworhẹ ewun rọye vwẹ udi ri vain
adagba rọye vwe ọbara ri otiẹ;
12ẹro rọye kọ vwara gbae fiki ri wain,
ako rọye kọ fon toto fiki rẹ ameivie.
13Zẹbulọn obo erhuru ọ cha dia,
Etiyin eko che gbo phihọ,
ughwru rọye ki Zidon ọ dia.
14Isaka kọ họhọ ekẹtẹkẹtẹ,
ro fiọnko phihọ uvwre rẹ ogba rẹ igegede,
15ọ mrẹre nẹ ẹdia rẹ urovwoma yovwiri,
nẹ otọ na ji vwo erhuvwu,
ọtiọye o de gbe igabọ otọ mu,
ọ da rhe dia ọviẹn rẹ owian.
16Dan kọ dia oguẹdjọ re ihwo rọye
kiri ẹgborho ọvo vwẹ Izrẹl na.
17Dan kọ dia ọrọdekọ vwe ugbo idjerhe,
ọrobiebi vwẹ orhaghwa,
rọ rhọvwe iyesi ukowọ
ohwo rọ gua mi she kpuko.
18Me hẹrhẹ esivwo wẹn, E Ọrovwohwo.
19Ofru ki che gborho Gad,
ẹkẹvuọvo ko bresi rẹ ichiyin rayen.
20Emu rẹ ọdafe ọye Asher cha re,
emu rọ vwerhere rẹ ovie na ọye rhere.
21Naftali ọye uzo rọ rha nẹ ufi,
rọ djẹ etọ dorie dorie.
22Josẹf abọ rẹ urhe rọ riẹmọ,
abọ re urhe rọ riẹmọ vwẹ orhoma rẹ urhie,
abọ rọye de gro vrẹn enu rẹ ogba.
23A da vwẹ ibige bro ra,
e siro phihọ a sarọ gangan,
24dede na umurhabọ rọye yegherii,
Etiyin abọ rọye ke tua
vwẹ obọ rẹ Ogangan ọvuọvo ri Jekọp
(vwẹ odẹ rẹ Osuigodẹ, Orhaga rẹ Izrẹl).
25vwẹ obọ rẹ Ọghẹnẹ rẹ ọsẹ wẹn rọ cha wẹ uko,
vwẹ obo rẹ Ọghẹnẹ ro vwo Ẹgba ko
bruphihọ kẹ wẹ rọ kẹ wẹ ebruphihọ rẹ odjuvwu,
ebruphihọ rẹ urhie rọ nọhọ otọ,
ebruphihọ re evie kugbe eyenre.
26Ebruphihọ rẹ ọsẹ wẹn
i vwo ẹgba no ebruphihọ rẹ igbenu ri bẹdẹ na,
oburhubu rẹ igbenu ri bẹdẹ,
e dia uyovwi ri Josẹf,
o dia arhare rẹ ohwo ra hẹriẹre nẹ
oma rẹ emesẹ rọye.
27Bẹnjamin okpohrokpo rọ chẹghẹ emu,
irhiọke ọ Me savwọ eranvwe rọye
vwẹ ovwọnvwọn kọ ghara ibu rọye.
28Enana ejobi na eye orua ihwivẹ rẹ Izrẹl; Ọnana kọye obo rẹ ọsẹ rayen ta kẹ ayen rọ vwọ nẹ ẹrhovwo kẹ ayen, dohwo dẹrhovwo ro foro.
Ughwu kugbe Esho ri Jekọp
29Etiyin o de ji urhi kẹ ayen ọ da ta kẹ ayen, Mi che kpo bru ihwo mẹ rare, we shi vwe kugbe esẹ mẹ vwẹ ẹmwa rọ ẹghwa rẹ Efrọn ohwo ri Hẹt na, 30ẹmwa rẹ ẹghwa vwi Mak-pela, rọ obọhwere ri Mamre, vwẹ otọ ri Kenan, re Ebraham dẹ kugbe ẹghwa mie Efrọn ohwo ri Hẹt, rere ọ dia ogbe. 31Etiyin e shi Ebraham phihọ kugbe Sera rẹ aye rọye, Etiyin e shi Aizik phihọ kugbe Rebeka rẹ aye rọye, Etiyin mi ji shi Leah phihọ 32ẹghwa na kugbe ẹmwa na rọ herọ na a de ayen mie ohwo ri Hẹt. 33Ri Jekọp vwọ ta eta enana ejobi nu kẹ emọ rọye, o de si awọ rọye ro ehwa, o de phi ẹnwẹn họ, e de sho kugbe ihwo rọye.
Zvasarudzwa nguva ino
Jẹnẹsis 49: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.