Halloo 15
15
Doono Yeeri Abraamina Tookkii Wogoon Gimo
1Ebi mooyoyee gubb, Doono Yeeri yaaꞌoona Abraamich ishichiye:
“Abraamo, shattaahine.
Ta neen gaachoochoommon quyemmo taane;
neech ta immemmi wojjoo oogeti woddoone” iye.
2Abraamiyoo “Nuggishoo Doono Yeero, bushaallo ta tunetoyich, taach ne immemmi mooyo taach amoon hallehe? Taach beeto bullin woraashemmo, hini Damaasiqee asho Elezeerine. 3Taach bushoon imo ne qajjetoyich, ta gaddiretoochee ikkoo taach beeto bullin woraashemmone” iye.
4Arooba Doono Yeeri wochinnoon Abraamich ishichiye: “Neech beeto bullin woraashemmo, ne gutenoochee kechemmi, ne hajjee bushoani, hini uro toonoone” iye. 5Maach biin kichiꞌi, “Eke kaama shimaajj ciine; xojjeneenaꞌon haddaa ciichoon ne hakkigaata haddibe. Ebiyoommon ne shiijjereenaꞌo haddaa ciyaaneenaꞌo tunemminaꞌone” iye.
6Abraamiyoo bi mulloon Doono Yeeri toommooch tooꞌiihe; ebi bi mullee tooꞌiyoo Yeeri aafoochaa biin cadiqiihe.
7Aroochee Doono Yeeri Abraamich “Hini showoon ne woraashemmoyich neech imma, Kalideenaꞌo showooch beeti Uuri katemoochee neen kichiti Doono Yeeri taane” iye.
8Tunebaani Abraami “Nuggishoo Doono Yeero, hini showoon woraashemmo ta tunoon amoona ariyehote?” iye.
9Doono Yeeriyoo “Keejje nati gidereen, keejje nati emmisheen, keejje nati bagee baaddoon, daabbichoonaa uggoonon taach deebe” iye.
10Abraamiyoo eboshi bullin deebii, guurii gutta kapphehe. Bi kapphetinaꞌon ciiniiꞌi, gutte xaaꞌooch kotiihe; tunebaani daabbichoonaa uggoonon kappheyaanoone. 11Arooba gaceenaꞌo ebi meenon maaya kindiyeete; tunebaani Abraami boonoshin yookkiye.
12Aabe giyi beddemmona, Abraamin magge tokketoo yechiye; shattiibeeti dunne manderoo bi toommooch waahe. 13Arooba Doono Yeeri Abraamich ishichiye: “Ebin manjii ariibe; ne shiijjereenaꞌo ashi showooch shiqqoo tunemminaꞌone; are showeexi asheenaꞌo guunon tunii awudde balle naton boonoshin neexi hajjemminaꞌone.#Key. 1:8-14 14Tunebaani guunon tuniiꞌi boonoshin hajjiibeeti asheenaꞌo toommooch nallemmo taane; aroyee gubb wodde gaannoon yeshiree are showoochee kechemminaꞌone. 15Tunetaa ne, diggoona beeree ne qaabbechinaꞌo waan xaꞌeyemmo neene; geene baayi qitiree, duukkeyemmo neene. 16Ne shiijjereenaꞌo hiniich wotteree boonoshi woyemmo, awuddinnee shiijjeroobaniye. Ebichi wottoon boonoshi yagemmo, hini Amooreenaꞌochi axaaxoo oogichii woddemmi wottooniye” iye.
17Aabe giyaa xumemmona, gocheexi qaaqqee cufoonaa qaaqqee conjoona ebi kapphetaa koteti meechi gutte daggoona beshehe. 18Arooba Doono Yeeri ishichiꞌi Abraamina tookkii wogoon giyiye: “Gibitsee aacoochee tiijjiree ooge aaco Efiraaxis beddaahaa, hini showoon ne shiijjereenaꞌoyich immemmo taane. 19Hini ta immemmi showoo, Qeeneenaꞌocho, Qenizeenaꞌocho, Qadimoneenaꞌocho, 20Hiteenaꞌocho, Ferizeenaꞌocho, Refayeenaꞌocho, 21Amooreenaꞌocho, Kanaaneenaꞌocho, Girigaasheenaꞌochonaa Yebuseenaꞌochonane” iye.
Zvasarudzwa nguva ino
Halloo 15: KBRC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
SIM International, 2020.