Halloo 16
16
Haggaarinaa Ishmaꞌeelinochi Mooyo
1Abraami mechee Saarayi andoo bushoon shiyaaneene. Biich Haggaari getteebeeti gonnee beehan; biyoo Gibitsee asheene. 2Ikke areddoon Saarayi Abraamich “Eke ikke mooyon neech getona. Ta shiyaachemmoyich, Doono Yeeri ta maacoon dookkitone. Ebich, ebi ta gonnee Haggaar waan gibe. Diqqich bi waanaa bushiishoo taach danemmo tunemmone” iyan.
3Abraamiyoo bi mechee Saarayi getteton waayehe. Abraami aashire naton Kanaanee showooch bi kotetoyee gubb, bi mechee Saarayi bi gonnee, Gibitsee ashe Haggaarin mechee bi tunemmoyich, bi keno Abraamich immahan. 4Abraamiyoo Haggaar waan giyiye; Haggaariyoo xifahan.
Xifeti bi tunoon bi ariihooba, bi gennee Saarayin qallayiyan. 5Arooba Saarayi Abraamin “Haggaari taan qallayemmoyich tuniito neene. Biin neech immeti taane; tunebaani aree xifeti bi tunoon bi ariitoyee gubb, taan qallayitine. Neennaa taanna daggooch beeti mooyon Doono Yeeri nallibe” iyan.
6Abraamiyoo Saarayich, “Ebiyoche, ne gonnee ne kishoochiye bi beeto. Ne shunnemmon shuunebe” iye. Aroyee gubb Saarayi Haggaarin oogeton iritiyaa bi shewiitoyich, bi aafoochee kechaa maxxahan.
7Doono Yeerichi maraakoo barahooch beeti, ikke aachi xuuphee gaꞌoochaa Haggaarina danehe. Ebi aachi xuupho beeto, Shuuri barahooch daammiibeeti gommoochiye. 8Biyoo “Haane, Saarayichi gonnee Haggaare, amoochee waanne? Amoochiye ne hammaabeeto?” iye.
Haggaariyoo “Ta gennee Saaray waanee aallaꞌaniye ta hammaabeeto” iyan.
9Doono Yeerichi maraakoo, “Ne gennee waan wotteree hambe. Bulli mooyona biich deꞌa geti hajjeebe” iye. 10Wotta Doono Yeerichi maraakoo biich ishichiye: “Ne shiyemmi bushoochi shiijjereenaꞌon oogichi meechemmo taane; oogeton boonoshi meettitoyich, koniyoona haddii ciichoon hakkaachemmone” iye.
11Aroochee Doono Yeerichi maraakoo daakkiꞌi,
“Ebiyoche, and xifeti neene;
anaami bushoonoo shiyemmi neene;
Doono Yeeri iriteyaꞌa ne cookoon bi waayetoyich,
bushoochi shigoon, Ishmaꞌeeli geti shigiyemmi neene.
12Biyoo konichona deꞌa getaani babberoo tunemmone;
asho bullin shixxemmone;
asho bulliyoo biin shixxemmone;
bi xibeenaꞌon shixiree,
boonoshiyee bariree beeyemmone” iye.
13Haggaariyoo, “Iberoon taan beeggiibeeti Yeerin ta aafoona beeggaꞌa, kashoona beehote?” iyaa, biinna yibbaateti Doono Yeerin “El Rooꞌi”#16:13 El Rooꞌi geto, “Taan beeggiibeeti Yeeri” getone. iyan. 14Ebich hanaach beddaahaa#16:14 Ebi mooyo kooreeti yemeenoochani and hini no yemeenooch beddaahaa toonoone. asheenaꞌo Qadeeshinaa Bereedina daggooch beeti aachi oppoon, “Lahayi Rooꞌichi#16:14 Lahayi Rooꞌi geto, “Taan beeggiibeeti Beeyechi Nuggishoo” getone. oppo” ii ceeggiyeete.
15Haggaari bi gennee Saaray waan bi wottetoyee gubb, Abraamich anaami bushoon shiyahan. Abraamiyoo ebi bushoon, Ishmaꞌeeli ii shigiihe. 16Ebi bushoo Ishmaꞌeeli shiijjehooba, Abraami shinnaa shiritte nati ashoone.
Zvasarudzwa nguva ino
Halloo 16: KBRC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
SIM International, 2020.