Matyu 22
22
To pangngarig maipanggep iya dackel nga pakalun
Luk. 14:15-24
1Ket e̍ Je̍sus, nagpangngarig manin, nga kinunen na kadito toltoley, 2“Ya panangituray niya Nailangitan, maiyarig manin iya agten idi: Uwed isa nga ari nga nangisagana ka isa nga dackel nga paragsac, ta pakalunen na ya anac na nga lalaki. 3Ket nibon nito ari diya tagabu na nga mawe̍ da palbe̍ten diya naawis ito pakalun. Ngem dito naawis, madi da met gabay ya mawe̍ makipakalun.
4“Ket to ari, nangibon ngarud manin ka sabali nga tagabu nga kinunen na igida, ‘Idi ya ibaga nu kadito naawis: “Nakasagana ngin to paragsac ku. Pinartic kun diya turu nga bakac, se̍ diya duduma nga napalucmeg nga bakac, ket nakasagana ya aminin. Umbe̍t kayu ngarud makipakalunin,” kunen nu kuma igida.’ 5Ngem orey itu to nibaga da, madi latta nikaskasu dito naawis nga toley, ket sabali nga gennung to napennan dan. Ya isa, nawe̍ iya laplapug na. Ket ya isa, nawe̍ na met siningen ya nigusiyu na. 6Ket uwed da pe̍ duduma nga nangtekkem kadito tagabu, ket naalas met to winangel da igida, se̍ da pekkem pinatey.
7“Ket to ari, nakaunget ngarudin. Itu nga nibon na diya suldadu na, nga nawe̍ da pinatey dito namatey, se̍ pinooran da met pe̍ to ili da.
8“Ket itun, kinunen manin nito ari kadiya tagabu na, ‘Nakasagana ngarudin ya pakalun ni, ngem bekken nga maikari nga umbe̍t dito inawis ku. 9Itu nga mawe̍ kayu ngarud ita kadiya daldalan nga edyan diya toley, ket awisen nu amin nga maaskuran nu nga umbe̍t da makipakalun,’ kunen na.
10“Ket nawe̍ ngarud dito tagabu kadito daldalan, ket inawis da amin nga naaskuran da nga toltoley, dake̍c man winno nanacman. Ket iya agten iyan, adu met dito sangsangaili iya panganan ito pakalun.
11“Ket ito nawe̍ nakibulun to ari kadito sangsangaili, uwed met nasingen na nga isa nga bekken nga nakakawwes iya kustu nga kawwes para pakalun. 12Ket kinunen ngarud nito ari ito sangaili, ‘Gayyem, ape̍ inumbe̍t ka idi nga awan ikew to kustu nga kawwes nga para pakalun?’ kunen na. Ngem di neg-egkim to sangaili.
13“Ket kinunen mettin nito ari kadito agsirsirbi ito pakalun, ‘Ala, punguwen nu diya ima se̍ saka na, ket itemsit nu iya kagicbettan enna deyyu. Ket diya uwed antuni nga edyan, agberrit se̍ agngaretnget da ngarud,’ kunen nito ari. 14Ta ya kinapudnu na, adu diya naawis nga agpaituray iya Nailangitan, ngem e̍teng ngas diya mapili,” kunen ne̍ Je̍sus.
To saludsud maipanggep iya panagbayad ka buis
Mar. 12:13-17; Luk. 20:20-26
15Ket dito Parisiyu, pimanaw da itunin, nga nawe̍ da nagiinnumanan no kumaan da kuma nga pagbasulen nge̍ Je̍sus gapu iya kagiyen na. 16Ket ya namaay dito Parisiyu, nangibon da ka pasurut da se̍ dito toley nito Ari He̍rude̍s ito edyan ne̍ Je̍sus. Ket kinunen dito naibon e̍ Je̍sus, “Mistru, emmu mi nga napudnu ka, se̍ mangisursuru ka nga sipupudnu iya paglinteggan ne̍ Apu Diyus. Se̍ emmu mi nga bekken nga ya kapanunutan niya toley ya ikasum, orey nagan na nga toley. Ta awan idumdumam nga saad toley. 17Itu nga ibagam kay no nagan ya makunem maipanggep iya panagbayad ka buis e̍ Ari Se̍sar, no maikuntra iya Linteg nito Muyse̍s winno bekken,” kunen da.
18Ngem e̍ Je̍sus, emmu na ngarud to dake̍c nga panggep da, itu nga kinunen na igida, “Ape̍ sintiren dac, dakayu nga aginsisingpet? 19Pasingnan dac kay ka isa kadito diplata nga pagbaybayad ka buis,” kunen na. Ket uwed ngarud niyawat da igina nga isa nga agten iyan nga diplata. 20Ket kinunen ne̍ Je̍sus igida, “Nagan ya akin-ladawan se̍ akin-nagan iya nailanad idi?” kunen na.
21Ket kinunen da, “E̍ Ari Se̍sar, a,” kunen da.
Ket iya agten iyan, kinunen manin ne̍ Je̍sus igida, “Dikad pe̍ no diya maipanggep e̍ Ari Se̍sar, ipaay nu da ngarud igina. Ket no diya maipanggep e̍ Apu Diyus, ipaay nu da mettas e̍ Apu Diyus,” kunen na.
22Ket ito nagicna da yan nga sungbat ne̍ Je̍sus, nasdaawan da ngarud, ket pinanawan da ngas nge̍ Je̍susin.
To saludsud maipanggep iya panagungar
Mar. 12:18-27; Luk. 20:27-40
23Ket iyan mettas nga algew, uwed da pe̍ Sadusiyu nga nawe̍ ito edyan ne̍ Je̍sus, nga itu didi diya madi mamati nga agungar nad diya natey. Ket dito Sadusiyu, uwed nisaludsud da e̍ Je̍sus, 24nga kinunen da, “Mistru, kinunen nito Muyse̍s ito Linteg, nga no matey ya isa nga lalaki nga awan pekkem putut na, rebbeng kanu niya kabsat nito lalaki nga asawaen ya nabalu nga ipag na. Asawaen na kuma kanu tasun aganac da ka pannakaanac nito natey nga kabsat na nga lalaki, kunen nito Muyse̍s itun.
25“Kaspagarigan ta uwed itun dakami diya pitu nga lalaki nga agkakabsat. Ket to inauna, nangasawa, ngem natey met nga awan pekkem naputut na. Itu nga inasawa nito maikadduwa to balu. 26Ngem agten pe̍ itun to napasamac ito maikadduwa nga lalaki. Ket agten pe̍ iyan ito maikatlu nga lalaki, se̍ dito duduma pe̍ nga kakabsat da, agingga nga natey yin to maikapitu, nga awan pekkem putut na. 27Ket kalpasan niyan, natey met pe̍ to babey yin nga nod-odi ngem igida. 28Ket agten idi ya saludsud mi: Nad no panagungar diya natey, nagan ngata igida nga pitu nga agkakabsat ya akin-asawa nad ito babey yin? Ta inasawa da met nga amin to babey,” kunen da.
29Ket simungbat ngarud nge̍ Je̍sus igida, nga kinunen na, “Nairradu kayu met iya panagpanpanunut nu! Ta madi nu ngamin emmu ya banag nga naisurat iya Bibliya, se̍ madi nu pe̍ emmu ya pannakabalin ne̍ Apu Diyus. 30Ta ya kinapudnu na, no panagungar nad diya natey, madi da nad met mangasawa winno makiasawa ngin, no di lugud agten da nad met kadiya anghe̍le̍s enna langitin. 31Ket no maipanggep iya panagungar diya natey, siguradu nga agungar da. Di nu pekkem aya nabasa to naisurat iya Bibliya nga kagi ne̍ Apu Diyus dakayu? 32Ta kinunen na, ‘Iyaken ya Diyus ne̍ Abraham, se̍ ya Diyus ne̍ Isaac, se̍ ya Diyus ne̍ Hakub,’ kunen na. Ngarud, diya kameng ne̍ Apu Diyus, bekken da met nga maibilang nga natey, no di lugud maibilang da nga sibibiyag,” kunen na.
33Ket nasdaaw ngarud diya toltoley nga nakagicna iyan nga panursuru na.
Ya kangrunaan nga bilin
Mar. 12:28-34; Luk. 10:25-28
34Ito nadamag dito Parisiyu nga inabac ne̍ Je̍sus dito Sadusiyu, naguurnung da antuni nin. 35Ket uwed igida ya isa nga masirib iya Linteg nito Muyse̍s, nga nagsaludsud ngarud e̍ Je̍sus tasun sintiren na, nga kinunen na, 36“Mistru, nagan kad kadito bilbilin niya Linteg nito Muyse̍s ya kangrunaan?” kunen na.
37Ket kinunen ne̍ Je̍sus igina, “‘Ayatem ngarud ya Apu nga Diyus mu iya amin nga kabaellam nga mangipateg nga uwed iya pusum, iya nakem mu, se̍ iya sirib mu.’ 38Itu yani ya kangrunaan se̍ kapatgan nga bilin. 39Ket ya maikadduwa nga bilin nga ipalagip ku ikew, ket agten mettas ito nona ya pateg na: ‘Ayatem ya padam nga toley, nga agten mettas iya panagayat mu iya beggim.’ 40Ket ya banag didi nga duwa nga bilin, itu ya pakabangunan niya amin nga naisurat iya Bibliya nga Linteg nito Muyse̍s, se̍ diya kagi dito mammadtu,” kunen na.
Maipanggep iya Kristu
Mar. 12:35-37; Luk. 20:41-44
41Ket ito uwed pekkem dito Parisiyu nga naur-urnung iyan, nagsaludsud nge̍ Je̍sus igida, nga kinunen na, 42“No dakayu, nagan ya makunen nu maipanggep iya Kristu? Nagan ngata ya makin-putut igina?” kunen na.
Ket kunen dito Parisiyu, “Kapututan ngarud nito Ari Dabid,” kunen da.
43Ket e̍ Je̍sus, kinunen na igida, “Ket no agten iyan, ape̍ ngarud nga ito niturung niya Ispiritu ne̍ Apu Diyus to Dabid, inawagan met nito Dabid ya Kristu ka ‘Apu’, ito kinunen na,
44‘Kinunen niya Apu iya Apuc,
“Agtugew ka idi nga madiwanan ku
agingga nga mapasukuc diya gumurgura ikew,
nga arig nga ipatey ku ya sakam igida,”’
kunen nito Dabid itun. 45Dikad pe̍ no ‘Apuc’ to kunen mettas nito Ari Dabid maipanggep iya Kristu, kumaan na ngarud nga kapututan na ya Kristu?” kunen na.
46Ket awan met nakasungbat ka orey nagan na ito saludsud ne̍ Je̍sus. Ket manipud iyan nga algew, awan nakaitured nga nagsalsaludsud e̍ Je̍susin.
Zvasarudzwa nguva ino
Matyu 22: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.