Matyu 23
23
To panangdellaw ne̍ Je̍sus kadito manursuru iya Linteg
se̍ dito Parisiyu
Mar. 12:38-39; Luk. 11:43, 11:46, 20:45-46
1Ket itun, nagkagi nge̍ Je̍sus kadiya toltoley se̍ kadito adalan na, nga kinunen na, 2“Diya manursuru iya Linteg se̍ diya Parisiyu, naisaad da nga mangisuru iya kaipapennan niya Linteg nito Muyse̍s. 3Itu nga talken se̍ tungpalen nu kuma ngarud amin nga isursuru da dakayu. Ngem diya wangwanglen da, madi nu kuma lugud tuladen. Ta orey mangikasaba da iya kustu nga sursuru, bekken met nga itu ya tungpalen da. 4Parigaten da diya toltoley kadiya arig nga nadammet nga agtu nga galutan da. Ket didi nga arig nga narigat nga maagtu, itu met diya ipabugtung da kadiya toltoley yin. Ngem no igida nga gennung, pulus nga madi da makibiyang kadiyan nga pakarigatan, nga madi da pe̍ itulung ya kurimeng da ngas nga agagtu.
5“Ket diya amin nga wangwanglen da, pagpasindayaw da ngas met iya imatang diya toltoley. Itu nga arimanen da nga dackel dito tekkut kuma nga nakaisuratan Bibliya nga maisimpa iya beggi da. Itu pe̍ nga arimanen da nga deddu diya balayubey diya gayad diya ke̍bal da. 6Paggugustu da met pe̍ ya agtugew kadiya kangrunaan nga pagtugawan kadiya padaya, se̍ diya kadayawan nga tugtugew iya gigimungan. 7Magustuwan da met pe̍ ya makabkablaawan kuma nga sidadayaw no uwed da iya tindaan, se̍ magustuwan da pe̍ ya awag diya toltoley igida nga ‘Mistru’.
8“Ngem dakayu, madi kayu kuma nga maawagan ka Mistru, ta is-isa ngas ya Mistru nu. Ket dakayu, agpapada kayu nga kakabsat. 9Se̍ awan kuma pe̍ idi nga lubung ya aw-awagan nu nga ‘Ama’, ta is-isa ngas ya Ama nu, ket uwed met enna langit. 10Se̍ madi kayu kuma pe̍ maawagan ka ‘Pangulu’, ta is-isa ngas ya Pangulu nu, nga itu ya Kristu. 11Ket ya maibilang nga kangatuwan dakayu, itu ya agsirsirbi dakayu. 12Ta ya orey nagan na nga mangipadayaw iya beggi na, ket maipababa nad met. Ket ya agpakumbaba, maidayaw nad met nga gennung.”
Ya panaginlilinteg dito pangpangulu diya Hudyu
Mar. 12:40; Luk. 11:39-42, 11:44, 11:52, 20:47
13“Ngem dakayu nga manursuru iya Linteg se̍ dakayu nga Parisiyu, kackaasi kayu nad ngarud, dakayu nga managinlilinteg! Ta ya kinapudnu na, dakayu met ya mangtiped kadiya toltoley iya dalan nga agturung iya panangituray niya Nailangitan. Ta dakayu, madi kayu met gabay ya aglak-am iya panangituray na, ket iparit nu met pe̍ diya duduma nga mayat nga aglak-am.
14[“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta agawen nu met diya baley diya balbalu nga babey, se̍ kayu met agkarkararag ka mabayag, ta panglinged nu diya karkararag nu kadiya wangwangel nu nga dake̍c. Dikad pe̍ nadagsen nad ngarud ya dusa nu.]
15“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta deyyu diya panagbiyahe̍ nu ka baybay winno ginet, tasun mangpasurut kayu ka orey isa ngas nga toley. Ket no uwed sumurut dakayun, ket pagbalinen nu met nga ad-adu pekkem ngem dakayu ya rebbeng na nga madusa kuma ka impiye̍rnu.
16“Kackaasi kayu nad ngarud, dakayu nga arig nga kulap nga mangge̍pe̍d. Ta isuru nu nga no ya Te̍mplu kanu was met ya pagsapata niya toley, awan kanu rebbeng na nga mangtungpal iya nisapata na. Ngem no ya balituc nga uwed iya Te̍mplu nga gennung ya pagsapata niya toley, masapul kanu nga tungpalen na. 17Ay, dakayu nga arig nga kulap nga awan pannakaawat na! Ape̍ aya nga napatpateg dakayu ya balituc nga uwed iya Te̍mplu ngem iya Te̍mplu? Ta to balituc, maibilang nga napateg e̍ Apu Diyus gapu mettas iya Te̍mplu nga pagedyanan na. 18Ket isursuru nu met pe̍ nga no ya pagdatunan ngas iya Te̍mplu ya pagsapata niya toley, awan kanu rebbeng na nga mangtungpal iya nisapata na. Ngem no ya sagut nga gennung nga naidatun iya pagdatunan ya pagsapata niya toley, masapul kanu nga tungpalen na. 19Ay, dakayu nga nakulap nga toley! Ape̍ aya nga napatpateg dakayu ya sagut nga naidatun ngem iya pagdatunan? Ta maibilang nga napateg e̍ Apu Diyus ya datun gapu mettas ito pagdatunan. 20Dikad pe̍ no pagsapata niya toley to pagdatunan, ket pagsapata na met pe̍ ya amin nga naidatun iyan, bekken nas nga to pagdatunan. 21Agten pe̍ no pagsapata niya toley ya Te̍mplu, ket pagsapata na met pe̍ nge̍ Apu Diyus nga aged-edyan iyan, bekken nas nga ya Te̍mplu. 22Se̍ agten pe̍ no pagsapata niya toley ya langit, ket pagsapata na met pe̍ ya trunu ne̍ Apu Diyus, se̍ pati pe̍ e̍ Apu Diyus nga nakatugew iyan.
23“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta nalaing kayu nga mangipaay ka apagkapullu e̍ Apu Diyus, orey kadiya pagrikadu nga rucruut nga me̍nta, se̍ anis, se̍ kuminu. Ngem diya kangrunaan nga panursuru iya Linteg, liwayan nu da ngas met, nga agten iya panagbiyag ka nalinteg, ya panangaasi se̍ ya panagtungpal ka kari. Ket tutu nga rebbeng nu nga tungpalen diyan, ket masapul pe̍ nga madi nu kuma pe̍ liwayan dito duduma nga rebbeng nu. 24Ay, dakayu nga arig nga kulap nga mangge̍pe̍d! Maiyarig kayu met iya toley nga mangsagat ka ilec tasun madi na kuma mainum. Ngem telnen na mettas ya kame̍lyu!
25“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta maiyarig kayu iya mangugas iya laskig ngas niya tasa se̍ palatu, ngem iya uneg da, adu met nga panangpilit se̍ kinarasuc. 26Ay, dakayu nga Parisiyu nga nakulap! Masapul nga ugasan nu nga mona ya uneg niya tasa se̍ palatu, tasun maibilang pe̍ nga nadalus ya laskig da.
27“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta maiyarig kayu met kadiya pantyung nga napinturan ka puraw. Ta napaw-is ya masingen iya laskig da, ngem iya uneg da, adu nga tultulang diya natey, se̍ amin pe̍ nga nadumaduma nga rugit. 28Ket agten kayu met iyan, ta agpammarang kayu nga nalinteg, ngem ya kinapudnu na, biig kayu met nga aginlilinteg, se̍ nakaru met pe̍ ya kinadake̍c iya lemlemmet nu nga madi masingen diya toltoley.”
Ya umbe̍t nga dusa kadito pangpangulu diya Hudyu
Luk. 11:47-51
29“Kackaasi kayu nad ngarud, dakayu nga manursuru iya Linteg se̍ dakayu nga Parisiyu, dakayu nga managinlilinteg! Ta agariman kayu ka napaw-is nga pantyung dito mammadtu, se̍ agbanbandus kayu pe̍ kadito pantyung nga pakalaglagipan nu kadito toley nga naibilang nga nalinteg. 30Ket kunen nu met, ‘No nagbiyag kami kuma ito timpu dito am-ama mi, madi kami met nga nakikanunung igida ito panangpatey da kadito mammadtu itun,’ kunen nu. 31Ket gapu iyan mettas nga pagkakagi nu, ipanecnec nu met ya kargu nu. Ta ipakaemmu nu nga kapututan dakayu dito nangpatey kadito mammadtu itun. 32Ala, annungen nu ngarudin ya kinadake̍c dito am-ama nu!
33“Arig kayu met nga malaga! Ngarud, kapututan dakayu diya nagita nga malaga! Ipagarup nu aya nga makalisi kayu iya pannakaukum nu ka impiye̍rnu? 34Dikad pe̍ ala! Uwed da ibon ku nad dakayu nga mammadtu, mamasirib se̍ mangisursuru. Ket diya duduma igida, patayen nu nad, winno ilansa nu da lugud met ka krus. Ket diya duduma igida, sapliten nu nad ka latiku iya uneg mettas diya gigimungan nu, se̍ kada ili, sapsapulen nu da nad nga irurumen nu da. 35Ket iya agten iyan, kargu nu met pe̍ ya pannakapatey dito amin nga napatey idi nga lubung nga awan natutup nga basul da. Didi diya napatey manipud ito pannakapatey nito Abe̍l nga awan pe̍ basul na itun, agingga ito pannakapatey nito Sakaryas nga anac nito Barakiyas, nga pinatey nu iya Te̍mplu enna nagbaettan nito pagdaydayawan se̍ to pagdatunan. 36Pudnu ngarud nga dakayu ita nga timpu, dakayu met ya makin-kargu kadito amin nga nibagac.”
To panagleddaang ne̍ Je̍sus kadito iHe̍rusale̍m
Luk. 13:34-35
37“Ay, dakayu nga iHe̍rusale̍m! Pakapateyyan met dito mammadtu ya siyudad nu. Ngarud, diya ibon dakayu ne̍ Apu Diyus, pakabatuwan da met ya siyudad nu. Mame̍npiga met nga gabay ku ya mangurnung kuma dakayu, nga arig nga panangsikuyup niya gaganac kadiya piyec na iya linung diya payac na. Ngem madi kayu met. 38Dikad pe̍ itan, nabaybay-an lugudin ya ili nu. 39Ta pudnu met nga madi dac nad masingen nin agingga iyan nga timpu nga panangibaga nu nga, ‘Madaydayaw ya agparang gapu iya turay niya Apu,’ kunen nu nad mettas,” kunen ne̍ Je̍sus.
Zvasarudzwa nguva ino
Matyu 23: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.