Markus 16
16
Yesus ebe iluk ageikhe wene
(Matius 28:1-8; Lukas 24:1-12; Yohanes 20:1-10)
1Itithogon hasukhasik, iniki 7 baga Allah hasik werlegat welagoukhassik nen, it he Maria ai Magdala meke etnogo men, he Maria Yakobus agosa etnogo men, he Salome men, apusu obasi hano meke Yesus warek oba wasi luogoluk oko pali lagoukha. 2Oko palogo 'biluk noge iluk hubuluke hari Minggu baga huben siakhogon mo yegelogo dagei aga korlek, oila etnogo wagoukha. 3-4Waga dogolik helekit motok kok meke tetnokhogon 'bisukhasikmo nogo nen, it-it ekhe dogolik men isukha,
“Warek helekit tetnokhogon 'bega etnogo, tha nen dipilogo thu hualnisagein,” iluk ilik wagoukha. Itithogon ilik inut thomarek waga lagoukhasik nen, inileken liakhasukha re, helekit etnogo dipilogo la'isukhama thu hualek werekma hasukha. 5Hasukhasik horokhogon witluk inebe ukisukha re, ap elege meke ageikhe asu kut uanat meke ugu iniki ebeke mot-mot hurek werekma inileken halok nen, inakmaken lageikhe. 6Inakmaken lageikhemo, at ap elege meke etnogo nen, men yogeisasikhe,
“Hinakmaken lagup o. Yesus ai o Nazaret meke o baga meldiluk wakha etnogo herarik wagap meke re, ebe yoma dek. Allah nen ilugutdekhemo werek o. Warek 'begama etnogo oboluk anek yi hinileken 'bikhani o. 7'Bikhalok hit nen at agarumi ane waganhe lageikha meke Petrus lak emenogo yogeisa lano o. At Yesus nen,
An o Galilea dageiluk hinelokhoma dogogin o, iluk yokhisasikhe hagat dageigin etnaga o. Hit dageiluk at ebe hinileken hugun o, iluk yogeisa lano o,” iluk yogeisasikhe. 8Itithogon yogeisasikhemo inobakha palagoukhasik inoageleke dik-dik lo dukhisukhasik inayuk nen wene akhuni aperek yogeisigidek piokthek lagoukha.
Yesus nen, “Alebageik he Maria ai Magdala meke nen ileken neoak o,” iluk elokhoma winam ageikhe wene
(Matius 28:9-10; Yohanes 20:11-18)
[ 9At Yesus ebe hari Minggu baga melageikhe itinem huben siakhogon melageikhesik, at he Maria ai o Magdala meke mokat inobabut weak meke inebe 7 nen akla ukisukhasik werekma haganeat mukhogo ula'isasikhe meke etnogo nen tak,
“Alebageik ileken neoak,” iluk elokhoma winam ageikhe. 10Elokhoma winam ageikhemo ileken halok, yoko it akhuni at Yesus inom welagoukha meke de agunem inoba lageikhe. 11Lageikhesik men yogeisasikhe,
“At Yesus iluk agasik werek o. Ebe arat nileken higi,” iluk yogeisasikhemo, inasuk holhukha mekeat he, eberogonat iluk apasukha dek.
Yesus nen, “It ap nagarumi inebe pere iti inileken neoak o,” iluk inelokhoma winam ageikhe wene
(Lukas 24:13-35)
12Itithogon apasukhasik werek korlek, yabokane ap inebe pere o ukul 'bugurlagatma ageikhe wisuogoluk wagunem at Yesus ebe ninat hagatlatluk,
“An nebe inileken neoak,” iluk inoporlik wageikhe. 13Inoporlik wageikhemo inileken halok inapuke inagarlak lak hetnake emenogo yogeisa lagoukha mekeat he, it inakla nen eberogonat iluk apasukha degat.
Yesus nen, “Nebe nagarumi inileken neoak,” iluk inoba ukisikhesik inelokhoma winam ageikhe wene
(Matius 28:16-20; Lukas 24:36-49; Yohanes 20:19-23; La'isasikhe 1:6-8)
14Itithogon hagarik waga lageikhesik, ebe yabokane, it at Yesus agarumi inebe 11 nen emenogo hurek hipiri nasi werekma,
“Inileken neoak,” iluk inoba ukisikhesik inelokhoma winam ageikhesik men yogeisasikhe,
“Hit yoma hinakla nen eberogonat iluk apigidek hinakla pugat yoma re! Allah nen an nebe arat nilugutnakhemo werekma, it aperek nen inileken neegasik yokhisa ageikha mekeat he, hinakla nen eberogonat iluk apigidegat yoma re!” iluk wenageisasikhe. 15Itithogon wenageisasikhesik, wene ageikhe men yogeisasikhe,
“Hit he, akhuni inukuloak etaga dopok o yi ai ti ai eloma tha'bokhogonat wene hano wene yi yogeisilik laga dogono o. 16Yogeisilik lagunem it akhuni aperek nen wene iti eberogonat iluk apagun meke ima usa'inabugun meke, Allah nen tilinabigin mekeat he, it aperek wene iti eberogonat iluk waganugun dek meke Allah nen wene inoba 'biluk weagarinabigin o. 17It akhuni aperek nen wene iti eberogonat iluk apoagaluk, it wene eberogonat iluk waganugun meke nen, yigithogon hagakhe dogogun. Mokat obabut weak meke it aperek inakla ukiluk werekma an netaga palogo mukhogo ula'isigik, inane it akhuni ninat meke inane inokodek meke elalinat igik, hagakhe dogogun. 18Itithogon hagakhe dogolik, warlo akhuni inakherek meke inikimo waganhik, it inebe watlasuagaluk akhuni watlageikharek meke isoak akla kolabogo wogeisugunem nikik, hagasugun mekeat he, iti nen weagarinakhe dogogin dek o. Nen, akhuni ageikhe u waganhunem, it nen iniki thebelinabumo, hano aga dogogunat o,” iluk yogeisasikhe.
Allah nen Yesus pogot oba wolok dageisekhe wene
(Lukas 24:50-53; La'isasikhe 1:9-11)
19Wene itithogon arat yogeisasikhemo, at Allah nen Yesus ebe pogot oba wolok dageisikhe. Itithogon wolok dageisikhemo alilu iki ebeke kok hurek welagarek. 20Itithogon wolok dageisikhemo at Yesus agarumi emenogo o yi at ti ai tha'bokhogonat wene yogeisilik lagoukha. Wene yogeisilik lagunem akhuni nen,
“It wene yoknisilik wageikha iti eberogonat,” iluk wene hutduagaluk, ninoe Etagapogot inom motok dogolik, it nen elalinat hagakhunem, at nen wene iti obatnetdisikhe.]
Zvasarudzwa nguva ino
Markus 16: LAIDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda