Jǒn 2
2
Dyijî-Dyibé ńdyí ké Kína
1Ké nkéré ací a/bashwôm afee, dyijî-dyibé dyi/mû ké Kína, ké Gályílyi. Boné-Jisos o/mû ányi. 2Ba/mû ba/kó Jisos ne bǎmgbán emen to ké dyijî ándyi. 3Ké nkéré mú baa/jwáp bato ba-man, boné-Jisos o-sét Jisos o/fu, ba*fí to ne bato*.
4Jisos o-faa ǎ o/fu, boné, wo aa*man a-sét mě ńkyí ndachi*. Nkéré mú ejí o*da/fyi ne*.
5Boné-Jisos o-sét kâng bǎmgbán-oyén-dyijî ándyi o/fu, chi n̂g nang ebóng ńkyí Jisos o/chi o-sét běn.
6Banet-Jûs mbe ne byije kyi-kim ne byěm esoo, ké bubwô ámbu, bǎmkpáng-butí-omu ba/mû ányi nyâchât ḿbé ba/chi ké aká. Ba/rêe kanong kanong ḿbé bǎncáng-bato nang batánge nang nyíryinyi badanung ké ḿkpáng obónge. 7Jisos o-sét bǎmgbán-oyén-dyijî o/fu, fé n̂g omu o-sú ké bǎmkpáng ḿbén kángkáng. Ba-fé omu o-sú ké mbé pwat. 8Ne o-raa kâng ne bǎmgbán ámbe o/fu, kpé n̂g omu mún ba-kúng kámú ba-da-kye onet mú mu onet-dyishí-dyijî ńdyín. Ba-kpé kámú ba-da-kye ǎ, 9ne onyinchéng ámu o-fwôo omu ámu mú oo/bírî o/firi bato. Nyǐ o*da/nyît kyikit ńkyí bato ámbe ba/fím*. Nké ḿbé bǎmgbán ámbe ḿbé ba/kpé omu ámu ba/nyît. Onet-dyishí-dyijî ándyi o-kó kâng oyén dyijî-dyibé 10o-raa ne nyǐ o/fu, nang yeě nang yeě nké â o-kú o-chi i dyijî, o-bwóp ng kpá kashú o-kye banet bato ḿbé badanyîn ba-shwôm. Ne â ké nkéré mú banet ḿbé o/kó kámbé baa/jwáp kanong kanong, ne o-kûkye kámbé bato nang bará nang bará. Nké wo aa/tî ḿbé badanyîn ba-shwôm tete kántîk.
11Jisos o/chi mbwôp kashú-kiǐtí-akat emen ńkyín ké Kína, ké Gályílyi. Ányi nké o/tông busa emen, ne bǎmgbán emen ba-bángê ne nyǐ ne atyém ebe.
12Ké nkéré dyijî dii/man, Jisos ne boné emen ne bwǎn-bané emen ne bǎmgbán emen ba-dim ba-wâa Kapánum ba-da-rí boǒnyín-ací áku.
Jisos o/ce ké Kiǐtí-Kyise-Kyifen-Osówo echi
(Mátyuu 21:12-13; Mâk 11:15-17; Lûk 19:45-46)
13Ńdyí nkéré mú dyijî-kyifen ńkyí Shwôm ńkyí banet-Jûs oo/fárâng, Jisos o-dim kâng o-wâa Jerúsélem. 14Nyǐ o/nung ké kafâ-kiǐtí-kyise-kyifen-Osówo echi, o-ri banet ḿbé mbe ba-shee ng bampong ne ebû ne bootǒmtǒm ne banyánge akpuga to me ké ékpákpúrúk ebe, ké kafâ-kiǐtí-kyise-kyifen-Osówo echi. 15Jisos o-waa ányi o-chi kachí ké ekwop-enyam, ne o-ró kángkáng byitú ámbyi byi-byí ké kiǐtí-kyise-kyifen-Osówo echi, cibicibi ne ebû ne bampong. O-bírî ékpákpúrúk nyí banyánge akpuga ámbe o-cít bashú kyísí, o-pwó to akpuga ebe byiryibyiryi. 16Ne o-nyán banet ḿbé mbe ba-shee ng bootǒmtǒm o/fu, kúng n̂g kámbú ba-byí ne mbú. *Da n̂g echi ba-chi kyise-Bonchí ejí kyi-firi ntim-kasî*. 17Bǎmgbán emen ba-zîim ba/fu, ejá-Osówo nyí ba/sáng kyísí e/fu, dyityém ejí efé ké kyise eyên, ǎ Osówo, dyi-chi i mě n-kûsa kafâ kanong kanong.
18Batu-ashí ḿbé banet-Jûs ba-bí ǎ kâng ḿbím ba/fu, ebóng kiǐtí-akat ńkyí wo adachi a-tông bě a/fu, wo amu ne busa ḿbú adachi ńkyín.
19Jisos o-faa kámbé o/fu, bú n̂g kiǐtí-kyise-kyifen-Osówo echi ńkyín, ne ké ací achât, n/chi n-chîbi kánkyí.
20Mbé ba-bí ǎ ba/fu, wo a/chi a-chîbi kánkyí ké ací achât dí. Kyi/kúng bajam-aje bafee esim nyâchât ne ba-bi kyise ńkyín.
21Nké kyise ńkyí Jisos o/mû mu o-raa ng kyi-kim ne nkyí kyi/mû enyam-byiko emen. 22Ké nkéré mú Osówo oo/jwóbê ǎ ké bukyû, bǎmgbán emen ba-zîim kâng ba/fu, nyǐ o/raa chwǒm ńkyín, ne mbé ba-bángê ne atyém ebe ké ejá-Osówo nyí ba/sáng kyísí ne ké ńkyí Jisos o/mû o/raa.
Jisos mu o-nyît ng Kángkáng Banet
23Ńdyí Jisos mu ké Jerúsélem, ké nkéré mú dyijî-kyifen ńkyí Shwôm, banet chwóó ba/bángê ne nyǐ ńdyí ba/ri biǐtí-akat ḿbyí o/chi. 24Nké Jisos o*da/fé dyityém emen ne mbé* ké ebóng, nyǐ o/mû mu o-nyît ng kángkáng banet kanong kanong. 25Kyi/mû kyi*da/chîbyí chwǒm* ńkyí onet nang obónge oda ǎ esét kyi-kim ne banet* ké ebóng, nyǐ o/mû o-nyît ng ńkyí nkyi ké atyém ebe.
Zvasarudzwa nguva ino
Jǒn 2: BKY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Nigeria @ 1985