Jǒn 1
1
Ejá nyí Dyikpen
1Ejá e/mû kpá ne Osówo o-kûchi ejíí. Nyǐ e/mû ne Osówo, ne nyǐ to e-chi i Osówo. 2Kyi-fím ké kiimkpet kyikû chíchí, Ejá e/mû ne Osówo. 3Osówo o/chi kángkáng byěm ké bubwô emen. Chwǒm nang kyibónge kyi*fí ké kángkáng byěm ḿbyí Osówo o/chi ńkyí Ejá e/mû e*fí*. 4Ejá ányi e/mû kiimkpet kyikû-dyikpen, ne dyikpen ándyi dyi/kye banet kiinwángé. 5Kiinwángé ánkyi nkyi kyi-san n ké kyifip, ne kyifip to kii*man erîp kánkyí*.
6Osówo o/twóm onyinchéng obónge mú mu onet-kyitwóm emen, mú odabángê Jǒn, 7mú o/bê banet esét kyi-kim ne kiinwángé ánkyi. Nyǐ o/bê ebasét kámbé, eringe nyí mbé kángkáng ba/chi ba-jwo kyitwóm ánkyi, ba-bángê ké nkyí ne atyém ebe. 8Jǒn oyén o/mû o*fí kiinwángé ánkyi*. Nyǐ o/bê esét banet kyi-kim ne nkyí. 9Ejá ńnyín nké nyi ochíchí-kiinwángé ńkyí nkyi kyi-bâ ké ejíí, ne kyi-kûsan kángkáng banet ké byiko.
10Ejá ányi e/mû ké ejíí. Ne Osówo o/chi ejíí ké bubwô emen, nké ejíí e*da/nyît kányí*. 11Nyǐ e-bâ ké ochíchí-oshê emen, nké banet emen ba*da/koo kányí*. 12Nké banet bakíri ba/koo kányí, ne ba-fé to atyém ebe ne nyǐ. Ne e/kye kámbé kâng busa ḿbú ba/firi bwǎn-Osówo. 13Mbé ba/firi bwǎn-Osówo ké busa ḿbú Osówo, *chí ké ḿbú baróng* nang ké ḿbú kyijé-enyam-byiko* nang ké ḿbú onet*. Osówo oyén nké o/mû Bonchí ebe.
14Ejá e/bírî onet, ne o-kyú ne be, ne byi/ri kanong ne ntûntû mú Osówo ḿbyí bii/sú ǎ ké byiko. Be byi/ri busa emen ḿbú nyǐ o/koo kámbú wǎ ncen-Wǎn mú Bonchí emen.
15Jǒn o/sét kyi-kim ne nyǐ. Jǒn o/wonge o/fu, nyín onet mú me m/mû n-raa ng kyi-kim ne nyǐ ké nkéré mú n/raa n/fu, nyǐ mu o-bâ mě ké esim, nké nyǐ o/rêe o-shwôm mě, ké ebóng, nyǐ o/mû kô kpá ne ba-kû mě efwon.
16Nké ké kanong ńké Osówo ńké kaa/sú ǎ ké byiko, nyǐ oo/jware bě ashí amúmú, o-kyâ bě kanong emen o-nye ng o-fâ. 17Osówo o/kye bě byije emen ké bubwô-Músis, nké o/kye bě kanong ne ntûntû emen ké bubwô-Jisos Karâs. 18Nang onet obónge o*fí mú oo/ri Osówo*. Kyi*da/shwôm ncen-Wǎn emen kǎnchí mú mu eringe ebónge ne nyǐ* ne mu ké dyityém ńdyí Bonchí emen nké oo/chi banet ba-nyît ǎ.*
Kyitwóm ńkyí Jǒn mú Nkye Banet Osoo mú Osówo
(Mátyuu 3:1-12; Mâk 1:1-8; Lûk 3:1-18)
19Nyín ńkyí Jǒn mú Nkye banet osoo mú Osówo o/faa ké nkéré mú batu-ashí-banet-Jûs ḿbé mbe ké Jerúsélem ba/twóm banchi kyifen-Osówo ne bǎmgbán-banchi kyifen-Osówo ba/fu, bada-bí ǎ ba/fu, wo ebóng onet.
20Jǒn o*da/né efaa kámbé* nké nyǐ o/sét kámbé wááng o/fu, me, *chí onet mú Osówo o/kúng ǎ butu*.
21Mbé ba-bwa ba-bí ǎ ba/fu, aa wo yeě kâng. Wo a-chi i Elája dí.
Jǒn o-faa kámbé o/fu, aa*wááng* me, *chí Elája*.
Ba-bí ǎ ba/fu, wo a-chi i mkpábé ámu mú odasét byiraa-Osówo dí.
Nyǐ o-faa o/fu, aa*wááng*.
22Ne mbé ba-raa ne nyǐ ba/fu, sét bě kâng dyizong-onet ńdyí wo amu. Ké ebóng, be byi-man byi-bwa esim ne chwǒm ńkyí ada bě efaa byi-da-sét banet ḿbé ba/twóm bě. Wo a/fu, wo a-chi i ebóng dyizong-onet.
23Jǒn o-faa kámbé o/fu, dǐi dyizong-onet ńdyí me mu i. Me ejá nyí onet mú mu o-wonge e ké kyikim-dyikán o/fu, chi n̂g kiǐfáng ńkyí dángdáng ńkyí Otu Kyítá odacen. Ńkyín nké mkpábé obónge mú odasét byiraa-Osówo, mú odabángê Azáya o/mû o/sét.
24Banet-ncibi mú badakó Fárasyî nké ba/mû ba/twóm banet-kyitwóm ámbe. 25Banet-kyitwóm ámbe ba-bí Jǒn ba/fu, ebóng ńkyí wo amu a-kyâ banet osoo mú Osówo, â wo aa*chi onet mú Osówo o/kúng ǎ butu* nang Elája* nang mkpábé mú odasét byiraa-Osówo*.
26Jǒn o-faa kámbé o/fu, me mu n-kyâ banet osoo mú Osówo ké omu, nké onet mu nyín mú ben ba*fí ba-nyît ng ǎ*. 27Nyǐ mu o-bâ mě ké esim, nké me n*da/kwárê mú nda ǎ efiri nang abe emen*.
28Byěm ḿbyín něen kángkáng byi/chi ké Bétányi, ké bukô-kace ḿbú áku ńké badakó Jódan, ké kyikit ńkyí Jǒn o/mû o-kyâ banet osoo mú Osówo.
Wǎn-Etám-Ebû mú Osówo
29Ké orî-dyicí, Jǒn o-ri Jisos ké o-kú o-bâ o-kâm ǎ, ne Jǒn o-raa o/fu, nyín něen Wǎn-Etám-Ebû mú Osówo o/chi o-yip o-chi kyifen eringe nyí odafîm byibî ḿbyí ké ejíí. 30Nyín něen onet mú me m/mû n-raa ng kyi-kim ne nyǐ ké nkéré mú n/raa n/fu, onyinchéng obónge mu o-bâ mě ké esim, nké nyǐ o/rêe o-shwôm mě, ké ebóng, nyǐ o/mû kô kpá ne ba-kû mě efwon. 31Me n*da/nyît dyizong-onet ńdyí nyǐ o/chi o-kyú* nké me m/bê m-ba-kpet banet osoo mú Osówo ekye ké omu, eringe nyí ndachi banet-Ézerel ba-nyît ǎ.
32Nyín něen ńkyí Jǒn o/sét wǎ ntûesé kyi-kim ne Jisos o/fu, me n/ri Busun-Osówo bu/fím kyíbóng bu-shû kyísí éné wǎ karúú bu-ba-tû ǎ ké byiko. 33Me oyén n*da ǎ enyît ne* nké Osówo mú o/twóm mě o/fu, me nkye banet osoo mú Osówo ké omu, o/sét mě o/fu, onet mú wo a/chi a-ri Busun-Osówo bu-shû bu-ba-tû ǎ ké byiko, nyǐ nké o/chi o-kye banet osoo mú Osówo ké Busun-Osówo. 34Jǒn o-raa o/fu, me nn/ri kámbú, ne me mu n-sét ng běn n/fu, nyǐ o-chi i Wǎn-Osówo.
Bambwôp Kashú-Bǎmgbán-Jisos
35Ké orî-dyicí, Jǒn o/mû o/chîbwom ányi ne bǎmgbán emen ashí afee. 36Ké nkéré o/ri Jisos mu o-cen n o-bâ, Jǒn o-raa o/fu, nyín něen Wǎn-Etám-Ebû mú Osówo.
37Bǎmgbán-Jǒn ámbe ashí afee ba/jwo ńkyí Jǒn o/raa éné, ne ba-waa ányi ba-dim ne Jisos ké kyikû. 38Jisos o-bírî achi o-ri kámbé ké mbe ba-bâ ne nyǐ ké kyikû, ne o-bí kámbé o/fu, ben bamu ba-kyé ng ebóng.
Mbé ba-faa ba/fu, wo amu a-kyú u nyá, ǎ Rába. Rába, ányi kyi/byí, ntánge byiraa-Osówo.
39Nyǐ o-faa o/fu, bâ n̂g ba-ba-ri. Ne ba-dim kâng ne nyǐ ba-da-ri kyikit ńkyí mu o-kyú u, ne ba-waa ányi ne nyǐ ké dyicí ándyi. Kyi/mû chwǒm wǎ égbáng enyii nyí dyikurúku.
40Onet obónge ké burwám-banet ámbe ashí afee ḿbé ba/jwo ńkyí Jǒn o/raa éné, ne o-dim to ne Jisos ké kyikû o/mû o-bángê e Ánduru, mú wǎn-boné-Sámon Pyíta. 41Ka*da/bwon* Ánduru o-ri Sámon mú wǎn-boné emen, o-sét ǎ o/fu, be bii/ri onet mú Osówo o/kúng ǎ butu. Ányi kyi/byí, Karâs. 42Ne Ánduru kâng o-kpî Sámon o-da-tông ǎ Jisos.
Jisos o-tún Sámon dííng o-nyît dyityém emen, ne o-raa ne nyǐ o/fu, wo a-bángê e Sámon mú wǎn-Jǒn. Dyizîn eyên dyi/chi dyi-kûbángê Séfas. Ńdyín ndyi eringe ebónge wǎ Pyíta, ne kyikû emen kyi/byí, buká.
Jisos o/kó Fyílip ne Natányel
43Ké nnyinyěng-dyicí, Jisos o/fu, nyǐ o-kú o-dim m o-wâa Gályílyi, o-ri Fyílip, o-sét ǎ o/fu, bâ ne me ké kyikû. 44Fyílip o/mû o/fím Bét-Sáda, oshê mú Ánduru ne Pyíta ba/mû mbe ba-kyú u. 45Fyílip o-ri Natányel ne o-sét ǎ o/fu, be bii/ri onet ámu mú Músis o/mû o/sáng ké Nwet-Byije emen kyi-kim ne nyǐ. Mú bamkpábé ḿbé badasét byiraa-Osówo ba/sáng to kyi-kim ne nyǐ. Nyǐ o-bángê e Jisos mú wǎn-Josêf, mú o/fím Názáret.
46Natányel o-bí ǎ o/fu, chwǒm ńkyí kyinong to kyi-man n efím ké Názáret?
Fyílip o-faa ǎ o/fu, bâ kâng a-ba-ri.
47Ké nkéré mú Jisos o/ri Natányel o-kú o-bâ o-kâm ǎ, o-kpet eraa kyi-kim ne Natányel o/fu, nyín něen ochíchí-onet-Ézerel. Nyǐ o*fí ne kyipang nang kyibónge*.
48Natányel o-bí ǎ o/fu, wo a/cen nǎ ne a-nyît mě.
Jisos o-faa o/fu, me n/ri ǒ ńdyí a/mû ké kyikû-busi-kyichí ńkyí badakó fyîk, ne Fyílip o-kû ǒ ekó.
49Natányel o-faa o/fu, ntánge byiraa-Osówo, wo a-chi i Wǎn-Osówo. Ne a-chi i to otu mú Ézerel.
50Jisos o-bí ǎ o/fu, wo aa/bángê, ké ebóng, n/sét ǒ n/fu, me n/ri ǒ ké nkéré a/mû ké kyikû-busi-kyichí ńkyí badakó fyîk dí. Wo a/chi a-ri byěm ḿbyí byi/rêe byi-shwôm ńkyín něen. 51Ne o-raa ne mbé o/fu, me mu n-sét ng běn ntûntû n/fu, ben ba/chi ba-ri bubóng ké boo/bâa, ne barím ḿbé banong ḿbé Osówo to ké ba-kú ba-yú u Wǎn-Onet ké byiko ba-shû ng kyísí.
Zvasarudzwa nguva ino
Jǒn 1: BKY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Nigeria @ 1985