Lûk 24
24
Ojwóbe ké Bukyû mú Jisos
(Mátyuu 28:1-10; Mâk 16:1-8; Jǒn 20:1-10)
1Ké dyicófóróng pirípirí, ké dyicí-ékwâbashi, banyinyi ámbe ba/dim ba-ca ké dyikun, ba-kám bakút-kyinung ḿbé ba/chi. 2Ba-ri buká ḿbú ba/mû ba/cít ké ocím-dyikun ké boo/bâa bu-firi ké bukô. 3Mbé ba-nung kâng ké kafâ-dyikun, nké mbé ba*da/ri kyikwóm-enyam-byiko ńkyí Jisos, Otu Kyítá*. 4Ké nkéré mbé ba/bwom ányi ne atyém yógeyóge, banyinchéng ashí afee ba-byí ké abe ányi ba-bwom ányi ne mbé, ne byídí ḿbyí mbyi byi-san n, byi-cé ng kpárádádát ké byiko. 5Bushî bu-róng ḿbé banyinyi ámbe ne ba-fé bashú kyísí. Banyinchéng ámbe ba-raa ne mbé ba/fu, ebóng ben bamu ba-kyé ng onet mú mu okpó ké kyikit-bakúsí. 6Nyǐ o*fí to nyín* Osówo oo/jwóbê ǎ ké bukyû. Zîim m̂ ńkyí nyǐ o/mû o/sét běn ké nkéré o/mû ké Gályílyi o/fu, 7ba-man ba-kúng Wǎn mú Onet ba-kye banchi byibî, ba-mán ǎ ké kyikwap ńkyí badashwân onet, ne Osówo o-jwóbê ng ǎ ké bukyû, ké ací achât.
8Ne ḿbé banyinyi ámbe ba-zîim kâng byiraa ḿbyín, 9ba-byí ké kafâ-dyikun ba-fyi, ba-da-sét bǎmgbán-Jisos ḿbé áku ashí diǐkpú ne din ne kángkáng banet ḿbé áku byiraa ḿbyín. 10Banyinyi ámbe ba/mû Méryi mú o/fím Mágádála ne Jowána ne Méryi mú boné-Jêmsyi. Mbé ne banyinyi bakíri ḿbé ba/mû ké burwám ne mbé ba/sét banet-kyitwóm-Jisos byěm ḿbyín. 11Nké banet-kyitwóm-Jisos ba*da/bángê ńkyí banyinyi ámbe ba/sét* ba/fu, ḿbé mbé mbe ba-sét ng kyisédéng. 12Nké Pyíta o/bûu nensang o-zóngê ochéé o-ribi ké dyikun. O-siring kyísí, o-jebe kafâ-dyikun. O-ri byídí-okpówo nké nke. O-bwa esim dyijê, kyi-waa ǎ ké dyityém yógeyóge kyi-kim ne ńkyí kyi/chi.
Bucen ḿbú ba/cen ba-nung ké Oshê mú badakó Eméyos
(Mâk 16:12-13)
13Ké dyicí ándyi dyibónge, bǎmgbán-Jisos ashí afee ba/mû mbe ba-wâa ng oshê mú badakó Eméyos, mú o/mû chwǒm wǎ bakyilómyíta diǐkpú ne din fím ké Jerúsélem. 14Mbé ba/mû mbe ba-pem m ba-câ kyi-kim ne kángkáng byěm ḿbyí bii/chi. 15Ké nkéré mú ba/mû mbe ba-pem m, ba-kán n barî ké dyishí ba-câ, Jisos o/cen o-kâm kámbé o-nung kámbé ké burwám. 16Mbé ba/ri ǎ, nké ba*da ǎ ecêe*. 17Ne Jisos o-bí kámbé ké nkéré mbe ba-cen n ba-câ éné o/fu, ben bamu ba-pem m ebóng ba-câ kashú ba-bwa ng esim.
Mbé ba-bwom cip ne bushú bafip báfip. 18Ḿgbán emen mú odabángê Kyilúpas o-bí ǎ o/fu, wo kǎnchí nké amu ocinónet mú mu ké Jerúsélem? mú o*da/jwo ne kyi-kim ne byěm ḿbyí bii/chi ányi ké boǒnyín-ací ḿbú boo/shwôm nyín ké esim*?
19Jisos o-bí kámbé o/fu, ebóng byěm.
Mbé ba-faa ǎ ba/fu, byěm kyi-kim ne Jisos mú o/fím Názáret. Onyinchéng mún o/mû mkpábé mú odasét byiraa-Osówo. Osówo ne banet kángkáng ba/kúng ǎ wǎ kiǐtí-onet ké byiraa emen ne byěm emen ḿbyí o/chi. 20Batu-banchi kyifen-Osówo eten ne banet-ashí eten ba/kám ǎ ba-kye ba/fu, bapan ǎ mpan mú bada ǎ eju, ne ba-mán ǎ ké kyikwap ńkyí badashwân onet. 21Nké be byi/mû byi/tî achi byi/fu, nyǐ nké o/chi o-chi banet-Ézerel ba-firi ké byiko ebe. Bwa kwán kâng, ací a/firi achât nyí chwǒm ńkyín kyi/chi. 22Kyicê-banyinyi ḿbé mbe ké burwám eten baa/ba bě esét kiǐshwô ńkyí nkyi bě wǎ chwǒm-akat. Mbé ba/ce ké dyicófóróng ké dyikun, 23nké ba*da/ri kyikwóm-enyam-byiko emen*. Ba-bwa esim ba-ba-sét ba/fu, mbé ba/ri chwǒm-akat ńkyí barím ḿbé banong ba/byí ba-kâm kámbé, ba-sét kámbé ba/fu, mú mǔ mu okpó. 24Kyicê-banet eten ba/ce ké dyikun ba-da-ri byěm kerededet, wǎ eringe nyí ḿbé banyinyi ba/sét, nké ba*da/ri Jisos oyén*.
25Ne Jisos o-raa kâng ne mbé o/fu, ben bamu enyam. Ebóng nkyi kyi-kúng ng běn nkéré chwóó ne ba-bángê kángkáng byěm ḿbyí bamkpábé ḿbé badasét byiraa-Osówo ba/sét. 26Kyi/mû kyi*fí ntûntû ńkyí onet mú Osówo o/kúng ǎ butu odari afaníkong ké byěm ḿbyín*? ne o-nung ké busan emen ḿbú ragerage*? 27Ne Jisos o-bwât o-sét kámbé ńkyí ba/mû ba/sét kyi-kim ne nyǐ ké ejá-Osówo nyí ba/sáng kyísí, kyi-fím ké banwet ḿbé Músis ne ḿbé kángkáng bamkpábé ḿbé badasét byiraa-Osówo ba/sáng.
28Mbé ba-ribi ké oshê mú ba/mû mbe ba-wâa ng. Jisos o-chi wǎ nyǐ o/mû mu o-bâ ebashwôm oshê ámu o-ca kashú. 29Nké bǎmgbán emen ámbe ashí afee ba-tîm ǎ arông ba/fu, rí nyín ne be, ké ebóng, kyifip kyi-kú kyi-jîi ng. Ne Jisos o-dim kâng o-da-kyú ne mbé. 30Ké nkéré mú o/kyú me mu o-ryí i byiryíng ne mbé, o-yip berêt, o-kó Osówo asǎma, o-ját kámú o-kye kámbé. 31Ne ba-kpúrî ǎ kanong kanong ba-cêe ǎ, nké nyǐ o/waa ányi o-rím kámbé ké otyém. 32Mbé ba-kpet eraa ne barî ba/fu, atyém eten a/mû a*fí a-kíbî ng bě*? ké nkéré mu o-sét ng bě ké bukwóp kyi-kim ne eringe nyí ejá-Osówo nyí ba/sáng kyísí e/sét*?
33Ba-waa ányi ba-bûu nensang, ba-bwa esim Jerúsélem. Ba-ba-ri bǎmgbán-Jisos ḿbé ashí diǐkpú ne din ké baa/kyú kyikit kyibónge ne banet ḿbé ba/mû ne mbé, 34ḿbé ba/sét kámbé ba/fu, Osówo oo/jwóbê Otu Kyítá ntûntû. Oo/batông Sámon byiko.
35Bǎmgbán ámbe ashí afee ba-sét to kámbé ńkyí kyi/chi kámbé ké bukwóp, ne eringe nyí mbé ba/cêe Otu Kyítá ké nkéré o/ját berêt o-kye kámbé.
Jisos o/byí o-kâm Bǎmgbán Emen
(Mátyuu 28:16-20; Mâk 16:14-18; Jǒn 20:19-23; Âak 1:6-8)
36Ké nkéré bǎmgbán ámbe mbe ba-sét ng ńkyín, Otu Kyítá o-waa ké abe ányi o-byí o-bwom kámbé ké otyém, o-raa ne mbé o/fu, bunyîn-dyityém bukyú ne ben.
37Nké bushî bu/róng kámbé kanong kanong, ké ebóng, mbé ba/mû mbe ba-kabe ng ba/fu, mbé mbe ba-ri ng okúsí. 38Nké Jisos o/raa ne mbé o/fu, ebóng atyém nyi a-yógê ng běn. Ebóng atyém enen nyi kabekabe. 39Tún n̂ abwô ejí ne byiká ejí ba-ri, ba-nyît ba/fu, me oyén nké m/bwom něen. Fwôo n̂g mě abwô ké byiko ba-ri. Ké ebóng, okúsí oo*kyú ne enyam-byiko ne byikúú wǎ eringe nyí bamu ba-ri ng mě ne mbyí*.
40Nyǐ o/raa ńkyín ne o-tông kámbé abwô emen ne byiká emen. 41Ké nkéré mbé ba/tôong éné ba*fí ba-bángê e* ké bunyîn-dyityém ḿbú boo/sú kámbé* Jisos o-bí kámbé o/fu, ben bamu ne chwǒm ányi ńkyí badaryí? 42Mbé ba-kye ǎ kaǎkím-kakworê ńké baa/rám. 43Ne Jisos o-koo o-ryí ké bushú ebe.
44Ne o-raa kâng ne mbé o/fu, nyín bachíchí-byiraa ḿbé me m/mû n/sét běn ké nkéré me m/mû n/tôong ne ben n/fu, kángkáng byěm ḿbyí ba/sáng ké ejá-Osówo nyí ba/sáng kyísí kyi-kim ne me, ké Nwet-Byije-Músis, ne ké byiraa ḿbyí bamkpábé ḿbé badasét byiraa-Osówo, ne ké Nwet-Ekwan-Osówo mú badakó Sâm, byi-man byi-chi wǎ eringe nyí ba/sét.
45Ne o-sét kámbé kyi-wángê kámbé kyi-kim ne ejá-Osówo nyí ba/sáng kyísí. 46O-raa ne mbé o/fu, něen nké ba/sáng kyísí. Ba/fu, onet mú Osówo o/kúng ǎ butu o-man o-ri afaníkong, ne ké ací achât, Osówo o/chi o-jwóbê ǎ ké bukyû. 47Ne ké bubwô emen nké ben ba/chi ba-kpet esét kyitwóm ńkyín, fím nyín ké Jerúsélem tete ba-ribi ejíí emúmú ba/fu, byiko byikpú běn ba-mîng byibî echi, ne Osówo o/chi o-pwoo běn byibî enen. 48Ben baa/ri byěm ḿbyín ne ba/chi ba-sét banet kyi-kim ne mbyí. 49Me kâng ké byiko ejí n/chi n-twóm běn ńkyí Bonchí ejí oo/ryí běn ocím. Nké ben ba-man ba-kyú nyín ké oshê mú Jerúsélem tete busa ḿbú mbu bu-fím m kyíbóng bu-bâ bu-kâm běn.
Osówo o/yip Jisos o-jâ ne Nyǐ Kyíbóng
(Mâk 16:19-20; Âak 1:9-11)
50Ne Jisos o-kpî kámbé ba-mîng Jerúsélem, ba-cen tete ba-ribi Bétányi. Ne o-nabe abwô emen ké ashí ebe, o-jware kámbé. 51Ké nkéré mú nyǐ mu o-jware ng kámbé éné, o-rím kámbé, Osówo o-yip ǎ o-jâ ne nyǐ kyíbóng. 52Mbé ba-tím arông kyísí ba-fé ǎ, ne ba-bwa esim Jerúsélem ne bunyîn-dyityém chwóó. 53Ne ba-ba-kyú kâng kángkáng nkéré ké kiǐtí-kyise-kyifen-Osówo echi, ba-kyâ Osówo akpee.
Zvasarudzwa nguva ino
Lûk 24: BKY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Nigeria @ 1985