Jǒn 5
5
Jisos o/chi Orwôm mú Onyinchéng Obónge, mú o/mû ké Bukô-Kiǐdé-Omu o-man
1Ké nkéré ńkyín kii/shwôm, banet-Jûs ba/tî dyijî-kyifen ebe kyibónge. Jisos o-dim o-wâa Jerúsélem. 2Kiǐdé-omu ne ákpamê atánge kyi/mû ányi ké Jerúsélem, kyi-kim ne ocím-dyifyi mú badakó Ocím-Dyifyi-Etám-Ebû. Ké ejá-Hyíburu ba-kó ng kándyí Bét-Zéta. 3Bujê-banet-byirwóm chwóó, bansêe achi ne bankwa ne banet-kyibok ba/mû ányi sáre ké ákpamê ányi. [Mbé ba/mû mbe ba-bám m ba/fu, kiǐdé-omu kyináng. 4Ké ebóng, ka/bwon ka/bwon, orím mú onong mú Otu Kyítá o-shû o-nung ké kiǐdé-omu ánkyi o-da-buu kánkyí. Onet mú odabwóp kashú o-nung ké nkyí, ké nkéré orím mú onong oo/buu kánkyí, orwôm emen nang orá mú o/mû ne mǔ o-man.] 5Onyinchéng obónge o/mû ányi mú oo/rwôm ké aje bujam esim onyiryiká ne achât. 6Jisos o/ri ǎ ányi sáre, ne nyǐ o/mû o-nyît ng o/fu, onyinchéng ámu oo/rwôm ké bujê-nkéré ámbu. Ne o-bí ǎ kâng o/fu, wo amu a-ryuu ng a/fu, orwôm eyên oman?
7Onyinchéng ámu o-faa Jisos o/fu, bonchí, me n*fí ne onet nyín mú oda mě efé ké kafâ-kiǐdé-omu* ké nkéré baa/buu kánkyí*. Ké nkéré me n-kú n-wâa ng edanung, onet okíri o-bwóp kashú o-nung o-sí mě.
8Jisos o-raa ne nyǐ o/fu, bûu nensang, a-kúng kyipe eyên a-dim. 9Ké abe ányi, onyinchéng ámu o-waa o-nyange. O-kúng kyipe emen o-kpet ecen o-ca.
Chwǒm ńkyín kyi/chi ké dyicí-ékwâbashi. 10Ne batu-ashí ḿbé banet-Jûs ba-sét onyinchéng ámu mú Jisos oo/chi ǎ o-nyange ba/fu, kurún dyicí-ékwâbashi. Kyije eten kyi*da/bángê kyi/fu, wo akúng kyipe eyên*.
11Onyinchéng ámu o-faa kámbé o/fu, onyinchéng mú o/chi mě n-nyange nké o/sét mě o/fu, kúng kyipe eyên a-dim.
12Mbé ba-bí ǎ ba/fu, ebóng onyinchéng mú o/sét ǒ o/fu, wo akúng kyipe eyên a-dim.
13Nké onyinchéng ámu mú Jisos o/chi ǎ o-nyange éné o/mû o*fí o-nyît ng Jisos* ké ebóng, banet ba/mû ba/jê ké kyikit ánkyi chwóó, ne Jisos to o/mû oo/kpili o-dim.
14Ńdyí kaa/bwon kaǎnyín, Jisos o-ri ǎ ké kafâ-kiǐtí-kyise-kyifen-Osówo echi, ne o-raa ne nyǐ o/fu, ké ntûntû, kántîk, wo aa/nyange. Mîng byibî echi. Â kyi*fí éné* chwǒm kyikíri ńkyí kyidabên kyi-shwôm kyi/chi kyi-chi ǒ.
15Onyinchéng ámu o-dim kâng o-da-sét banet-ashí ḿbé banet-Jûs o/fu, Jisos nké o/chi ǎ nyǐ o-nyange. 16Ké bubwô ámbu, mbé ba-kpet ekye Jisos afaníkong, ké ebóng, o/chi onet ámu o-nyange ké dyicí-ékwâbashi.
17Jisos o-faa kámbé o/fu, Bonchí ejí mu o-chi i bǎmkpóngé kángkáng nkéré, me to m-man n-chi éné.
18Ejá nyí o/fu něen e/chi batu-ashí ḿbé banet-Jûs ba-tigi ne atyém ebe ba/fu, mbé ba-ju ng ǎ, *chí ké bubwô ḿbú nyǐ oo/bên kyije ńkyí ékwâbashi nké nke* nké o/raa to o/fu, Osówo o-chi i Bonchí mú emen, ne ké bukwóp ḿbún, nyǐ oo/kúng byiko emen jangjang ne Osówo.
Busa ḿbú Wǎn-Osówo
19Jisos o-faa kámbé kâng o/fu, me mu n-sét ng běn ké ntûntû n/fu, Wǎn-Osówo o*fí o-chi i chwǒm nang kyibónge ké busa ḿbú emen*. Nyǐ mu o-chi i ńkyí nyǐ mu o-ri ng Bonchí emen mu o-chi i nké nke. Ńkyí Bonchí mu o-chi i, nké Wǎn to mu o-chi i. 20Ké ebóng, Wǎn mu o-jê ng Bonchí, ne Bonchí mu o-tông ng ǎ kángkáng byěm ḿbyí nyǐ oyén mu o-chi i. Nyǐ o/chi o-tông ǎ byěm ḿbyí odachi, ḿbyí byi/rêe byi-shwôm ńkyín, ne ben kángkáng ba/chi ba-waa ocím ké dyishí fúú. 21Ké ebóng, wǎ eringe Bonchí mu o-jwóbê ng banet ké bukyû o-kyâ kámbé dyikpen, ké bukwóp ámbu to bubónge nké Wǎn mu o-kyâ banet dyikpen ḿbé bada ǎ enyîn dyityém. 22Bonchí oyén oo*pan onet nang obónge mpan* nké oo/kye Wǎn emen kángkáng busa ḿbú odapan banet mpan. 23Eringe nyí kángkáng banet ba/chi ba-kye Wǎn ofê ké dyizong-bukwóp bubónge ḿbú mbe ba-fâ Bonchí emen. Nang yeě nké o*da/kye Wǎn ofê* ányi kyi/byí, o*fí o-fâ Bonchí emen mú o/twóm ǎ*.
24Me mu n-sét ng běn ntûntû n/fu, nang yeě nké mu o-jwo ng byiraa ejí, ne o-bángê e to ne dyityém emen ké nyǐ mú o/twóm mě, onet ámu o/firi ne dyikpen ńdyí ne banyá. Baa*ba/chi ba-pan ǎ mpan* nké nyǐ oo/shwôm bukyû o-ribi ké dyikpen. 25Me mu n-sét ng běn ntûntû n/fu, nkéré mu o-bâ, ne nkéré oo/fyi mú banet ḿbé baa/kpú ba/chi ba-jwo ejá nyí Wǎn-Osówo. Banet ḿbé ba/jwo kányí ba/chi ba-kpen. 26Ké ebóng, eringe nyí Bonchí oyén mu o-kyâ dyikpen, ké eringe ányi to ebónge nké nyǐ oo/chi Wǎn emen o-firi onet mú mu o-kyâ dyikpen. 27Ne nyǐ oo/kye Wǎn emen busa ḿbú odapan banet mpan, ké ebóng, Wǎn ámu o-chi i Wǎn-Onet. 28Ńkyín něen kyi*dachi kyi-chi běn wǎ chwǒm-akat* ké ebóng, nkéré mu o-bâ mú kángkáng banet ḿbé baa/kpú ba-ryii kámbé ké akun ba/chi ba-jwo ejá emen. 29Ne ba/chi ba-byí ké akun ebe. Banet ḿbé ba/mû ba/chi kanong, Osówo o/chi o-jwóbê kámbé ké bukyû ba-kpen, ne banet ḿbé ba/mû ba/chi byibî, Osówo o/chi o-jwóbê kámbé ké bukyû o-két mpan o-bên kámbé.
Bantûesé ḿbé Jisos
30Jisos o-raa o/fu, me mm*man echi chwǒm nang kyibónge ké kakim ńké ejí*. Me mu m-pan n banet mpan eringe nyí Osówo o/sét mě o/fu, me mpan. Ké bubwô ámbu, mpan ejí mú mu m-pan n banet mu kerededet, ké ebóng, me n*fí n-kan n n/fu, n-chi i ńkyí mu n-ryuu ng* nké mu n-chi i ńkyí nyǐ mú o/twóm mě mu o-ryuu ng nké nke.
31Â me mu n-sét ng byiraa ké kakim ńké ejí, ńkyí me mu n-sét ng baa*ba/chi ba-koo kánkyí wǎ ochíchí-chwǒm ńkyí ntûntû*. 32Nké onet mu kô okíri mú mu o-sét ng ké bubwô ejí, ne mu n-nyît ng to n/fu, ńkyí nyǐ mu o-sét ng kyi-kim ne me nkyi ntûntû. 33Ben ba/twóm banet-kyitwóm enen ba-ca ba-kâm Jǒn mú Nkye banet osoo mú Osówo, ne nyǐ o/raa ké bubwô ḿbú ntûntû. 34Kyi*fí wǎ me m-man n-kyú ne ntûesé mú orî-onet*. Me mu n-raa ng ńkyín, eringe nyí Osówo oda běn enyii. 35Jǒn o/mû wǎ otyuryíkáng mú mu o-mang ng, o-san n ragerage, ne ben ba/mû ba-ryuu ng ké kyikim-nkéré ba/fu, ba-jwo ng bunyîn-kiinwángé emen. 36Nké ńkyí me mu ne nkyí ńkyí ndasét kyi/rêe kyi-shwôm ńkyí Jǒn o/sét, ké ebóng, bǎmkpóngé ḿbé Bonchí ejí o/kye mě o/fu, me nchi, ochíchí-bǎmkpóngé ḿbén ḿbé me mu n-chi i mbe ba-bwom m mě ntûesé ba/fu, Bonchí ejí nké o/twóm mě. 37Bonchí ejí to mú o/twóm mě, mu o-sét ng to ké bubwô ejí. Ben ba*da/jwo ne ejá emen* ba-ri nang bushú emen*. 38Kyitwóm emen to ba*fí ba-tî ng kánkyí ké atyém enen* ké ebóng, ben ba*fí ba-bángê e ne atyém enen ké onet mú nyǐ o/twóm*. 39Ben bamu ba-kwâa ng ejá-Osówo nyí ba/sáng kyísí, ké ebóng, ben bamu ba-kabe ng ba/fu, ké nyǐ nké ben ba/chi ba-já dyikpen ńdyí ne banyá. Ne ejá-Osówo nyí ba/sáng kyísí nyǐ eyén nyi e-raa ng kyi-kim ne me. 40Nang ké nkyi éné, ben ba*fí ba-ryuu ng ba/fu, ba-bâ ba-kâm mě* eringe nyí badafiri ne dyikpen*.
41Me n*fí n-ryuu ng akpee nyí banet*. 42Nké me mu n-nyît ng běn. Mu n-nyît ng n/fu, Osówo o*fí o-jê ng běn ké atyém enen*. 43Me mm/bê ké busa ḿbú Bonchí ejí, nké ben ba*da mě ekoo*. Ké nkéré onet oo/bê ké busa ḿbú emen nyǐ oyén, ben ba/chi ba-koo ǎ. 44Ben kyi-nyîn n běn ńkyí barî-banet bada běn ekûkye akpee. Nké ben ba*fí ba-kan n eringe nyí badakoo akpee ne Osówo* mú mu Osówo kǎnchí*. Ben ba-cen n nǎ kâng ne ba-bángê ne atyém enen. 45*Da n̂g echi ba-kûkabe ba/fu, me n/chi m-bîn běn ké bushú-Bonchí ejí*. Músis nké o/chi o-bîn běn. Músis mú ben ba/mû ba/tî okabe ne nyǐ. 46Â ben ba/mû ba/bángê ne Músis ne atyém enen ké ntûntû, ben ba/mû ba/chi ba-bángê to ne me ne atyém enen, ké nǎ, nyǐ o/sáng kyi-kim ne me. 47Nké eringe nyí ben ba*fí ba-bángê e ké ńkyí nyǐ o/sáng* ben ba-cen n nǎ kâng ne ba-bángê ké ńkyí me mu n-sét ng.
Zvasarudzwa nguva ino
Jǒn 5: BKY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Nigeria @ 1985