Jǒn 6
6
Jisos o/nen Égot-Banet Bujam ne Etánge
(Mátyuu 14:13-21; Mâk 6:30-44; Lûk 9:10-17)
1Ké nkéré Jisos oo/raa byiraa ḿbyín, nyǐ o/bwa esim o-nyáng baya ḿbé Gályílyi. Ba-kó ng to kámbé baya ḿbé Tabyíryos. 2Bujê-banet chwóó ba/mû ne nyǐ ké kyikû, ké nǎ, mbé ba/mû baa/ri biǐtí-akat ḿbyí o/mû o/chi kyi-kim ne eringe nyí o/chi banet-byirwóm ba-nyange. 3Jisos o-yú kyíbóng-kaku, o-da-kyú áku ne bǎmgbán emen. 4Nkéré ámu dyijî-kyifen ńkyí Shwôm kyi/mû kii/fárâng. 5Jisos o/bírî achi o-ri bujê-banet ḿbú mbu bu-bâ bu-kâm ǎ. Ne o-raa ne ḿgbán emen obónge mú odabángê Fyílip o/fu, be byi-ri ng byiryíng nyá ḿbyí byidaré byi-kye banet ḿbén byi-kwárê kámbé. 6Nyǐ o/bí ńkyín o/fu, nyǐ o-kan n Fyílip, ké nǎ, nyǐ oyén o/mû mu o-nyît ng ńkyí o/chi o-chi.
7Fyílip o-faa o/fu, â ba/fu, nang yeě ké burwám-banet ḿbún oryí kaǎnyín, nang ba-ré berêt ké égot-akpuga-syílyíba ebónge oo*ba/chi o-kwárê kámbé*.
8Ḿgbán emen okíri mú odabángê Ánduru, mú wǎn-boné-Sámon Pyíta o-faa o/fu, 9kaǎwásíng-onyinchéng nke nyín ne byirim-berêt byitánge ḿbyí ba/chi ké esang-byichí nyí badakó bályi, ne ekworê efee. Nké ḿbyín byi-cen n nǎ ne byi-kwárê bujê-banet ḿbún.
10Jisos o-sét bǎmgbán emen o/fu, fu n̂g kángkáng banet ba-kyú me. Kyikit ánkyi kyi/mû ne biǐbyâa chwóó. Ne kángkáng banet ámbe ba-kyú me. Banyinchéng nké nke ba-byí i nang égot bujam ne etánge. 11Jisos o-yip berêt ámu o-kó Osówo asǎma, ne o-kyii kámú o-kye banet ḿbé ba/kyú ányi. O-chi to eringe ebónge ne ekworê ányi. Bujê-banet ámbe ba-ryí eringe nyí kyi/kwárê kámbé. 12Ké nkéré mú kángkáng banet baa/ryí ba-zût, Jisos o-sét bǎmgbán emen o/fu, bwóp n̂g ekén nyí e/waa kyísí. Kyi*da/bát ńkyí badamîng onyin nang obónge o-bên*. 13Ne ba-bwóp ekén nyí ba/ryí e-waa kyísí, nyí e/fím ké byirim-berêt ámbyi byitánge e-sú bookye diǐkpú ne bufee.
14Ké nkéré mú banet ḿbén ba/ri kiǐtí-akat ńkyín ńkyí Jisos o/chi, ba-waa ányi ba-raa ba/fu, nyín ntûntû mkpábé ámu mú odasét byiraa-Osówo, mú ba/mû ba/sét ba/fu, o/chi o-bâ ké ejíí. 15Jisos o/waa ányi o-nyît o/fu, mbe ba-bâ ǎ ekúng butu ké busa, ne o-chîdim o-mîng kámbé ányi, o-yú kǎnchí o-jâ kyíbóng-kaku.
Jisos o/cen Twóóm Kyíbóng-Kace
(Mátyuu 14:22-33; Mâk 6:45-52)
16Ké nkéré mú dyikurúku dyi/fyi, bǎmgbán emen ba-bwóp kashú ba-dim ba-wâa ké baya, 17ba-da-nung ké ókpǐ, ne ba-kpet enyáng baya ba-bwa ng esim ḿbú Kapánum. Buchú bu-ba-jí, nké Jisos o*da/bê ne o-kâm kámbé*. 18Baya ba-kpet enáng, ké ebóng, afú nyí aryên aryên nyi a-tugi ng. 19Ké nkéré bǎmgbán emen baa/fung ókpǐ ba-ribi wǎ bakyilómyíta batánge nang nyâchât, ba-ri Jisos ké o-kú o-cen n twóóm kyíbóng-kace, o-fárâng ng ókpǐ o-bâ, ne bushî bu-róng kámbé. 20Jisos o-sét kámbé o/fu, *da n̂g eshî*. Me nké mu m-bâ. 21Ne kyi/mû kyi-kú kyi-nyîn n kámbé ba/fu, mbé ba-kúng ng Jisos ké ókpǐ. Nké ókpǐ o/waa ké abe ányi o-tîm ké bukô, ké kyikit ńkyí mbé ba/mû mbe ba-wâa ng.
Banet ba/kyé Jisos
22Ké orî-dyicí, banet ḿbé ba/mû ba/waa ké esim-baya nyí áku ba/ri ba/fu, ókpǐ obónge nké nke o/waa ányi. Ba/nyît to ba/fu, Jisos o*da/dim ké ókpǐ ne bǎmgbán emen*. Nké bǎmgbán emen ba/dim ba-mîng ǎ ké esim. 23Ékpǐ ekíri nyí e/fím ḿbú oshê mú badakó Tabyíryos e/batîm ké bukô, fáráng kyi-kim ne kyikit ńkyí bujê-banet ba/mû ba/ryí berêt ámu, ányi Otu Kyítá oo/kó Osówo asǎma. 24Ké nkéré mú bujê-banet ámbe ba/kan achi ba-ri ba/fu, Jisos ne bǎmgbán emen ba*fí to ányi* mbé ba-nung ké ékpǐ, ba-nyáng ba-ribi ké oshê mú badakó Kapánum ba-kyé ng Jisos ba-câ.
Jisos mu Berêt mú Dyikpen
25Ké nkéré mú banet ámbe baa/kyé Jisos ba-ri ǎ ké esim-baya nyí ebónge, ba-bí ǎ ba/fu, ntánge byiraa-Osówo, nkéré orá mú wo a/ribi nyín.
26Jisos o-faa kámbé o/fu, me mu n-sét ng běn ntûntû n/fu, ben bamu ba-kyé ng mě, ké nǎ, ba/ryí berêt mú o/kwárê běn. *Chí ké bubwô ḿbú ben ba/nyît kyikû kyi-kim ne busa ḿbú biǐtí-akat ejí*. 27*Da n̂g ekûchi bǎmkpóngé ḿbé byiryíng ḿbyí byidabên*. Nké kû n̂g echi bǎmkpóngé ḿbé byiryíng ḿbyí byida běn ewaa ké dyikpen ńdyí ne banyá. Byiryíng ḿbyín, Wǎn-Onet nké o/chi o-kye běn, ké nǎ, Osówo mú Bonchí eten oo/tông ekap ké bubwô Wǎn ámu.
28Ne ba-bí ǎ kâng ba/fu, be byi-chi i nǎ ne byi-kûchi bǎmkpóngé ḿbé Osówo.
29Jisos o-faa kámbé o/fu, nyín bǎmkpóngé ḿbé Osówo mu o-ryuu ng o/fu, ben bachi, ben, bángê ê ne atyém enen ké onet mú nyǐ o/twóm.
30Mbé ba-bí ǎ ba/fu, ebóng ekap nyí wo a/chi a-tông, eringe nyí be byi/chi byi-ri ne byi-bángê ne wo. Wo a/chi a-chi ebóng. 31Banchí eten ḿbé kpákpá ba/ryí berêt mú badakó mána ké kyikim-dyikán, wǎ eringe nyí ba/mû ba/sáng ké ejá-Osówo nyí ba/sáng kyísí ba/fu, Osówo o/kye kámbé berêt mú o/fím kyíbóng ba-ryí.
32Jisos o-sét kámbé o/fu, me mu n-sét ng běn ntûntû n/fu, ńkyí Músis o/mû o/kye běn kyi/mû kyi*fí berêt mú o/fím kyíbóng*. Bonchí ejí nké oda běn ekye ochíchí-berêt mú o/fím kyíbóng. 33Ké ebóng, berêt mún mú Osówo mu o-kyâ běn, ányi nyǐ mú o/fím kyíbóng o-ba-kye ejíí dyikpen.
34Mbé ba-sét ǎ ba/fu, bonchí, kû bě ekye berêt mún kángkáng nkéré.
35Jisos o-sét kámbé o/fu, me n-chi i berêt mú dyikpen. Nang yeě nké o/bê o-kâm mě, esong ee*ba/chi e-nwa ǎ*. Nang yeě to nké o/bángê ne me ne dyityém emen, omu oo*ba/chi o-jê ǎ*. 36Nké m/mû n/sét běn n/fu, ben baa/ri mě, nké ba*fí ba-bángê e ne me ne atyém enen*. 37Nang yeě mú Bonchí ejí mu o-kúng ng ǎ o-kyâ mě, o/chi o-ba-kâm mě. Me mm*ba/chi n-ró onet nang obónge mú mu o-bâ o-kâm mě*. 38Ké ebóng, me n/fím kyíbóng m-bâ echi ńkyí nyǐ mú o/twóm mě mu o-ryuu ng, *chí ńkyí me mu n-ryuu ng*. 39Nyǐ mú o/twóm mě mu o-ryuu ng o/fu, me nchi ńkyín něen. O/fu, me n*dachi m-mîng onet nang obónge o-tánê* ké kángkáng banet ḿbé nyǐ oo/kye mě* nké me njwóbê kámbé kángkáng ké bukyû ba-firi ké dyikpen, ké nkuli kyikû-dyicí. 40Ké ebóng, ńkyí Bonchí ejí mu o-ryuu ng nkyi něen o/fu, kángkáng banet ḿbé ba/ri Wǎn emen ne ba-bángê ne nyǐ ne atyém ebe, bafiri ne dyikpen ńdyí ne banyá, ne me n/chi n-jwóbê kámbé ké bukyû ba-firi ké dyikpen, ké nkuli kyikû-dyicí.
41Banet-Jûs ḿbé ba/mû ányi ba-kpet erime ne Jisos ké kyitông, ké nǎ, Jisos o/raa o/fu, me n-chi i berêt mú o/fím kyíbóng. 42Ne ba-raa kâng ba/fu, onyinchéng mún, *chí Jisos mú wǎn-Josêf něen*? Be byimu byi-nyît ng bonchí ne boné emen. Kyi-cen n nǎ kâng ne nyǐ o-bwa o-fu o/fu, nyǐ o/fím kyíbóng.
43Jisos o-faa kámbé o/fu, mîng n̂g erime ké kyitông ne barî. 44Onet o*fí mú odaman ebê o-kâm mě* tete Osówo mú Bonchí ejí, mú o/twóm mě o-tut ǎ o-fárâng mě. Ne me to n/chi n-jwóbê onet ámu o-bwa ké dyikpen, ké nkuli kyikû-dyicí. 45Bamkpábé ḿbé badasét byiraa-Osówo ba/sáng kyísí ba/fu, Osówo o/chi o-tángê kángkáng banet byěm. Nang yeě nké o/jwo Bonchí ejí, ne o-kwâa to byěm ne nyǐ, o/chi o-bâ o-kâm mě. 46Ńkyín kyi*da/byí kyi/fu, nang onet obónge oo/ri Bonchí ejí*. Nyǐ mú o/fím ké kyikit ńkyí Osówo mu, nyǐ kǎnchí nké oo/ri Bonchí ejí. 47Me mu n-sét ng běn ntûntû n/fu, nang yeě nké o/bángê ne dyityém emen, oo/já dyikpen ńdyí ne banyá. 48Me mu berêt mú dyikpen. 49Banchí enen ḿbé kpákpá ba/ryí berêt mú badakó mána ké kyikim-dyikán, nké ba/kpú. 50Nké berêt mú o/fím kyíbóng mu dyizong ńdyí, â nang yeě nké o/ryí kámú, oo*ba/chi o-chîkpú*. 51Me mu berêt mú dyikpen mú o/fím kyíbóng. Nang yeě nké o/ryí berêt mún o/chi o-kyú ké dyikpen ńdyí ne banyá. Berêt mú me n/chi n-kye ǎ, ányi enyam-byiko ejí nyí me n/chi n-kye, eringe nyí banet ba/chi ba-já dyikpen.
52Ńkyín kâng kyi/chi banet-Jûs ámbe ba-kpet ekán barî ké dyishí kanong kanong ba/fu, onyinchéng mún o-cen n nǎ ne o-kye bě enyam-byiko emen byi-ryí.
53Jisos o-raa kâng ne mbé o/fu, me mu n-sét ng běn ntûntû n/fu, â ba*da/ryí enyam-byiko nyí Wǎn-Onet* ne ba-jwáp to baróng emen* baa*ba/chi ba-já dyikpen ké byiko enen*. 54Nang yeě nké o/ryí enyam-byiko ejí o-jwáp to baróng ejí oo/já dyikpen ńdyí ne banyá, ne me to n/chi n-jwóbê ǎ ké nkuli kyikû-dyicí. 55Ké ebóng, enyam-byiko ejí e-chi i ochíchí-byiryíng ḿbyí badaryí, baróng ejí ba-chi i ochíchí-chwǒm ńkyí badajwáp. 56Nang yeě nké o/ryí enyam-byiko ejí o-jwáp to baróng ejí o-kyú u ké kafâ-dyityém ejí, ne me to n-kyú u ké kafâ-dyityém emen. 57Bonchí ejí mú mu okpó nké o/twóm mě. Ké bubwô emen to nké me mu m-kpen n. Eringe ebónge, nang yeě nké o/ryí mě o/chi o-kpen ké bubwô ejí. 58Ńkyín kâng nké nkyi berêt mú o/fím kyíbóng. Kyi*fí wǎ berêt mú banchí enen ḿbé kpákpá ba/mû ba/ryí* ne ba-waa ányi ba-chîkpú*. Onet mú o/ryí berêt mún o/chi o-kpen ne banyá.
59Jisos o/raa ńkyín ńdyí nyǐ mu o-tángê e ké kyise-ékwâbashi ńkyí banet-Jûs, ké Kapánum.
Byiraa ḿbyí Dyikpen ńdyí ne Banyá
60Bǎmgbán emen chwóó ba/jwo ńkyí nyǐ o/raa, ne mbé ba-raa ba/fu, dyizong-kyiraa ńkyín kyi-sóng ng ejwo kyi-shwôm. Yeě odaman efwôo atông ké nkyí.
61Jisos o/waa ányi o-nyît, nang onet o*da ǎ esét* o/fu, bǎmgbán emen mbe ba-rime e ké kyitông kyi-kim ne ńkyí nyǐ o/sét*. Ne o-bí kâng kámbé o/fu, ńkyín nkyi kyi-chi i běn ba-mîng ecen ne me ké kyikû dí. 62Ben kyi/chi kyi-chi běn nǎ, â ben ba/ri Wǎn-Onet o/bwa esim o-jâ kyíbóng ké kyikit ńkyí o/mû kpákpá. 63Busun ḿbú Osówo nké mbu bu-kyâ dyikpen. Busa ḿbú onet bu*fí ké chwǒm*. Byiraa ḿbyí nn/raa ne ben, Busun ḿbú Osówo nké mbu bu-kyâ dyikpen ké mbyí. 64Nké ben banet bakíri kâng ba*fí ba-bángê ne atyém enen*. Kyi-fím ké kiimkpet kyikû, Jisos o/mû mu o-nyît ng banet ḿbé baa*ba/chi ba-bángê ne nyǐ ne atyém ebe* ne onet to mú o/chi o-chi ba-kám ǎ nyǐ. 65Ne Jisos o-chîraa o/fu, ké bubwô ḿbún chíchí nké kyi/chi ne n-sét běn n/fu, onet o*fí nang obónge mú odaman ebê o-kâm mě* â Bonchí ejí o*da ǎ etông bukwóp*.
66Ké bubwô ḿbún, banet chwóó ḿbé ba/mû ba-cen n ne nyǐ ké kyikû ba/waa ányi ba-pín ba/fu, mbé baa*cen to ne nyǐ*. 67Jisos o-bírî kâng o-bí bǎmgbán emen ḿbé ashí diǐkpú ne afee o/fu, ben to ba-dim m ba-mîng mě dí.
68Sámon Pyíta o-faa ǎ o/fu, Otu Kyítá, be byi-jâ byi-kâm yeě. Wo nké amu ne bǎmpém ḿbé badakye dyikpen ńdyí ne banyá. 69Kántîk bii/nyît ne bii/bángê ne atyém eten byi/fu, wo nké amu onet mú onong, mú o/fím ké bushú ḿbú Osówo.
70Jisos o-faa kámbé o/fu, me n*da běn ecá ben ashí diǐkpú ne afee dí. Nké nang ké nkyi éné, onet obónge ké burwám enen mu wǎ kyibî-orím. 71Nyǐ o/mû mu o-raa ng kyi-kim ne Júdas mú wǎn-Sámon-Esakáryot. Ké ebóng, Júdas nang ké o/mû ké burwám-bǎmgbán emen ḿbé ashí diǐkpú ne afee, nyǐ nké o/chi o-chi ba-kám Jisos.
Zvasarudzwa nguva ino
Jǒn 6: BKY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Published by the Bible Society of Nigeria @ 1985