ലൂക്കോസ് 21
21
മ്‌ണ്ടേസിദ് കാണിക്കെ
1ഏസു സുറ്റുമ് ണോഡികൊണ്ടിര്‌ക്കാട്ടി സാമികൂരേല്യ ഉണ്ട്യേക്ക് പണക്കാറാര് കാണിക്കെ ബീ്ത്ത്‌റാദ്‌ണ കണ്ടാ്. 2പ്‌റ ഒരു ഏ്ളെ ആയിര്‌ക്ക മ്‌ണ്ടേസി റണ്ട് ഒട്ടി പണ ബീ്ത്ത്‌റാദ്‌ണാമ് കണ്ട്: 3<<ണേര്‌മായിമ് ണാന് ണിമാക്കെ സൊല്ലുറെ, ഈ ഏ്ളെ ആയിര്‌ക്ക മ്‌ണ്ടേസി എല്ലാര്‌ണ ബ്‌ഡ മൊത്തന പണ ബീ്ത്തിര്‌ക്ക. 4എല്ല ആള്‌ഗാമ് തമ്മ് സൊത്തിലിര്‌ന്ത്‌ത്തെ കാണിക്കെ ബീ്ത്തിനാദ്. ആന ഈ ഏ്ളെ ആയിര്‌ക്ക മ്‌ണ്ടേസി ഒന്റുമില്ലാത്തവാള് ആയിര്‌ന്ത് ഗൂഡി തനാക്ക് ഇര്‌ക്കാദ്‌ണ മുച്ചുഡ ബീ്ത്തിര്‌ക്ക. തനാക്ക് പെ്ളേത്ത് പോയ ഇര്‌ക്കാദ്‌ണ മുച്ചുഡ ബീ്ത്തിര്‌ക്ക>> എന്ത് സൊന്നാ്.
സാമികൂരെ ഇ്ഡിന്ത്‌പൊളിന്ത് എക്ക്‌റാദ്‌ണ പറ്റി ഏസു ണേരാത്ത്യെ സൊല്ലുറാ്
5ഏസുദ് സൊല്ലുപഡി ണഡാക്കവാരിലി ലേസ ആള്‌ഗ: <<ഈ സാമികൂരേന അളഗളാഗ ഉണ്ടാക്കിര്‌ക്ക കല്ല്‌ണ ബെത്ത്‌മ് കാണിക്കെ കെ്ഡേത്താദ്‌ഗണ ബെത്ത്‌മ് എത്തറ അളഗളാഗ കെ്ട്ടി ബ്‌ട്ടിര്‌ക്കാര്>> എന്ത് സൊന്നാര്. 6അക്കുളെ ഏസു: <<ണിമ്മ കാണ്‌റ ഈ കെ്ട്ടിര്‌ക്ക കല്ല്‌ഗ, കല്ല്‌ക്കുദ്ദാക്ക് ഒരു കല്ല് ബീസാക്ക് ഇര്‌ക്കാദെ ഇ്ഡിന്ത് പൊളിന്തെക്കു>> എന്ത് സൊന്നാ്.
കജട്ടഗാമ് കൊഡിമെഗാമ്
7അക്കുളെ അവാര് ഏസുണ: <<ഗുരുവെ, ഈ കാര്യഗെല്ല എപ്പ് ണഡാക്കു? ഇദ്‌ഗെല്ല ണഡാക്കാദ്‌ക്കുള്ള അഡ്യാള എന്തെല്ല?>> എന്ത് കേ്ട്ടാര്.
8അക്കുളെ ഏസു അവാര്‌ക്കെ ഇച്ചെ സൊന്നാ്: <<ആര്‌മ് ണിമാണ ഏമാത്താദെ ഇര്‌ക്ക്യ ണിമ്മ സൊക്കാന സൂസാരിത്ത് കൊള്ളുഡൊ. എന്ത്‌ക്കെന്റ എത്തിന്യൊ ആള്‌ഗ <ണാന്‌ത്തെ ക്‌റ്‌സ്‌ത്ത്> എന്ത് സൊല്ലിമ് <ണേര ണെര്‌ങ്കിറ്റ്> എന്ത് സൊല്ലിമ് എന്ന് പേരിലി ബരുവാര്. അവാര് സൊല്ലുറാദ്‌ണ കേ്ട്ട് അവാര് പിന്ന്‌മേലെ പോഗാദി. 9ണിമ്മ ജുദ്ദഗണാമ്, കലമ്പാല്‌ഗണാമ് പറ്റി കേ്ക്കുവേര്. അക്കുളെ ണിമ്മ അഞ്ച ബേ്ഡ. അദ്‌ഗെല്ല ണേരാത്തിലി ണഡാന്തെ തീരുഡൊ. ആന അദ്‌ഗെല്ല കഡേസി കാല അല്ല.>>
10ഏസു പിന്നേമ് ഇച്ചെ സൊല്ലികൊണ്ടിര്‌ന്താ്: <<ഒരൊരു ജാദിഗ ആങ്കീങ്ക് ജുദ്ദ സെയ്‌വാര്. ഒരൊരു റാജ്യഗ ആങ്കീങ്ക് ജുദ്ദ സെയ്‌വാര്. 11ഒരൊരു എ്ഡേക്ക്‌റാഗ ബൂമിക്കുലുക്കഗാമ്, പഞ്ചാമ്, ബെല്ല്യ ബെല്ല്യ ണോയിഗാമ് ഉണ്ടാവു. ബാനാത്തിലി കോവെപ്‌ഡ്‌സ്‌റാദ്‌മ് അദിസ്യപ്‌ഡ്‌സ്‌റാദ്‌മാന ബെല്ല്യ അഡ്യാളഗാമ് കാട്ടു.
12ആന ഇദ്‌ഗെല്ല ണഡാക്കാദ്‌ക്ക് മുദ എനാണ ണമ്പ്‌റാദ്‌ണാലെ അവാര് ണിമാണ പ്‌ഡിത്ത് കൊഡിമെഗപഡ്‌സിമ്, എഗുദാര് പരേസ്‌റ കൂരേല്യ അദിഗാരിഗാക്കെ കൊഡുത്ത് ജെയില്‌ക്ക് അഡേക്കാമ് സെയ്‌വാര്. അദല്ലാദെ ണിമാണ റാജാവുഗ കയ്യിക്ക്‌മ് ണാഡ് തലെവല കയ്യിക്ക്‌മ് ഒപ്പഡിക്കുവാര്. 13അക്കുളെ ണിമ്മ അദിലി എനാണ പറ്റി സൊല്ലുവേര്. 14ആന ണിമ്മ എച്ചെ ബദ്‌ള് സൊല്ലുഡൊ എങ്കാദ്‌ണ പറ്റി മുദതാനെ ണെനേത്ത് കൊണ്ട് അര്‌ക്കപഡാദെ ഇര്‌ക്കുഡൊ. 15എന്ത്‌ക്കെന്റ ണിമ്മ് പോട്ടിക്കാറാര്‌ക്ക് ആര്‌ക്ക്‌മ് ണിമ്മോഡെ മുട്ട്യാഗൊ തിലിപ്പി സൊല്ല്യാഗൊ മുഡ്യാത്തപഡി ണാന് ണിമാക്ക് അദ്‌ക്ക് പറ്റിന ബാക്ക്‌ണാമ് ബുദ്ദിനാമ് തരുവെ. 16ആന ണിമ്മ് അവ്വപ്പലാമ്, അണ്ണതമ്പിലാമ്, കുഡുമക്കാറാര്‌മ്, എ്ണേവുക്കാറാര്‌മ് ണിമാണ പ്‌ഡിത്തെ്ഡ്‌ത്ത് പോയി അദിഗാരിഗ കയ്യിക്കെ കൊഡുക്കുവാര്. ണിമ്മിദിലി ലേസ ആള്‌ഗണ അവാര് കൊല്ലുവാര്. 17ണിമ്മ എനാണ പറ്റി സൊല്ലുറാദ്‌ണാലെ ണിമാണ എല്ലാര്‌ണാമ് തൊറേന്തെക്കുവാര്. 18ആന ണിമ്മ് തലേല്യ ഒരു തലെമൂര് ബീസാക്ക് കെ്ട്ട് പോഗമാട്ട. 19ഇദ്‌ഗെല്ല ബന്താല്‌മ് പൊറിമോഡെ ഇര്‌ക്കവാര് ഉജുറുണ കെ്ഡേസുവാര്.>>
എര്‌സലേമ് അളിന്തെക്ക്‌റാദ്‌ണ പറ്റി സൊല്ലുറാ്
20<<പഡെഗ എര്‌സലേമ്‌ണ ബളേന്ത് ഇര്‌ക്കാദ്‌ണ ണിമ്മ കണ്ട, അദ് ഇല്ലാദായെക്ക്‌റാദ്‌ക്കുള്ള ഗള്യെ ആറ്റെന്ത് ണിമ്മ തെരിന്ത്‌കൊള്ളുഡൊ. 21അക്കുളെ എഗുദേലി ഇര്‌ക്കവാര് മലേക്ക്‌റാഗ ഓഡി പോഡൊ. പട്ടണാക്ക്‌റാഗ ഇര്‌ക്കവാര് അദിലിര്‌ന്ത് ഓഡി പോഡൊ. പട്ടണാക്ക് ബെ്ള്യെ ഇര്‌ക്കവാര് പട്ടണാക്കുള്ളുക്ക് പോഗ ബേ്ഡ. 22സാമി ബുക്കിലി എ്ള്‌ദി ബെത്തിര്‌ക്കാദെല്ല അദ് അച്ചെതാനെ ണഡാക്ക്യ ബേ്ണ്ടി, അയ്യി കാല പളി എ്ഡ്‌ക്ക കാല ആയിര്‌ക്കു. 23അയ്യി കാലാത്തിലി ബേ്റ്‌ക്കാറാര്‌ക്ക്‌മ് പച്ചെ പ്‌ള്ളെക്കാറാര്‌ക്ക്‌മ് സെറ്റെ കജട്ട കജട്ടത്തെ. അയ്യി ഗള്യേക്ക് അയ്യി ണാഡ്‌ക്ക് റമ്പ ബുദ്ദിമുട്ടു ബരു. അയ്യി ഗള്യേക്ക് അയ്യി ണാഡില്യ ആള്‌ഗണ സാമി റമ്പ മൊനെപഡുവാ്. 24അവാര്‌ദിലി ലേസ ആള്‌ഗണ ബാള്‌ക്കെ ബെ്ട്ടി കൊല്ലുവാര്. ലേസ ആള്‌ഗണ പ്‌ഡിത്ത് ബേ്റെ ണാഡ്‌ക്ക് എ്ഡ്‌ത്ത് പോവാര്. എഗുദാര് അല്ലാത്ത ജാദിഗ ആള്‌റ കാല മുഡ്യമാട്ട്‌ക്ക് അയ്യി ജാദിഗ എര്‌സലേമ്‌ണ മെ്ട്ടി തൊഗേത്തെക്കുവാര്.>>
മന്‌സാനായി പ്‌റാന്തവാന്‌ദ് ബരാവു
25<<ണേരാത്തിലിമ്, ണിലാവുലിമ്, ബെ്ള്ളിഗാളിലിമ് കോവെപ്‌ഡ്‌സ്‌റ അഡ്യാളഗ കാട്ടു. കഡാല് സെലെ അഡിത്ത് ബെല്ല്യാദ്‌ക്ക് ആലാത്ത് ബര ജദ്ദണ കേ്ട്ട് ഉലഗാത്തില്യ എല്ല ആള്‌ഗാമ് അഞ്ചി സദ്‌റബെ്ട്ടി അന്തബ്‌ട്ട് തള്ളുവാര്. 26ബാനാത്തിലി ഇര്‌ക്ക എല്ലാദ്‌ണാമ് അദ്‌റ്‌സി എ്ഡ്‌ത്തെക്ക്‌റാദ്‌ണാലെ ഉലഗാത്തിലി എന്ത ണഡാക്ക്യ പോദൊ എന്ത് കോവെ പ്‌ഡിത്ത്‌കൊണ്ട് ആള്‌ഗ മരത്തട്ടി എക്കുവാര്. 27അക്കുളെ മന്‌സാനായി പ്‌റാന്തവാ് സക്‌ദ്യോഡേമ്, അദിഗാരത്തോഡേമ് ണോഡ്യ മുഡ്യാത്ത ബെ്ള്‌സാത്തിലിമ് മഞ്ചിലി ബരാദ്‌ണ അവാര് കാണുവാര്. 28ഇദ്‌ഗെല്ല ണഡാക്ക്യ പ്‌ഡിക്കാട്ടി ണിമ്മ എ്ന്ത് അണ്ണാന്ത് ണോഡിരി. എന്ത്‌ക്കെന്റ സാമി ണിമാണ കാപാറ്റ്‌റ കാല ണെര്‌ങ്കിറ്റ്.>>
അത്തി മര പഡിസി തര ഒരു കാര്യ
29ഏസു അവാര്‌ക്ക് ഒരു കദെ ബ്‌ട്ടാ്: <<അത്തി മരാണാമ് അദേപാസുള്ള ബേ്റെ മരഗണാമ് ണോഡിരി. 30അദ്‌ഗെല്ല തള്‌ക്കാദ്‌ണ കണ്ട ബേസഗെ പ്‌റാക്ക്യ പോദ് എന്ത് ണിമാക്ക് തെരിദല്ല. 31ഇദേപാസെ ണാന് സൊന്ന കാര്യഗെല്ല ണഡാക്കാദ് ണിമ്മ കാണ്‌ഗാട്ടി സാമി ഈ ബൂമിന ആള്‌റാദ് അഡ്‌ത്ത്‌ദ് എന്ത് തെരിന്ത് കൊള്ളിരി.
32ഈ കാര്യഗെല്ല ണഡാന്ത് തീരമാട്ട്‌ക്ക് ഇപ്പേത്ത കാലാത്തില്യവാര് ഇല്ലാദാഗമാട്ടാര് എന്ത് ണേര്‌മായിമ് ണാന് ണിമാക്കെ സൊല്ലുറെ. 33ബാന്‌മ് ബൂമിമ് അളിന്തെക്കു. ആന എന്ന്‌ദ് സൊല്ലുസുലാക്ക ഒരു ണാള്‌മ് അളിന്തെക്കമാട്ട.>>
സൂസാരിത്തിര്‌ക്കാദ്‌ക്കുള്ള കാര്യഗ
34<<ഈ ഉലഗാത്തിലി ണിമ്മ തിന്ത്‌കുഡിത്ത് കൂത്താഡി ബോദേ്റി ണഡാക്ക ണെനേവോഡെഗെ ഇര്‌ക്കാദി. എച്ചെ പെ്ളേത്ത് പോയില എന്ത് അര്‌ക്കപട്ട് അദേ ണെനേവോഡേമ് ഇര്‌ക്കാദി. എന്ത്‌ക്കെന്റ അയ്യി ണാള് സദിപ്പെ്ട്ടിലി ബരു. അദ്‌ണാലെ ണിമ്മ സൂസാരിത്ത് ഇര്‌ന്ത്‌കൊള്ളിരി. 35ബൂമിലി പെ്ളേത്തിര്‌ക്ക എല്ല ആള്‌ഗാമ് അയ്യി ണാള്‌ണ കാണുവാര്. 36അദ്‌ണാലെ ണഡാക്ക്യ പോര ഈ കാര്യാത്തിലിര്‌ന്ത് ദെങ്കി കഡാക്ക്യാമ്, മന്‌സാനായി പ്‌റാന്തവാന്‌ദ് മുന്തുക്ക് ണില്ല്യ തഗ്‌ദ്യുള്ളവാര് ആയ ബേ്ണ്ടിമ് ണിമ്മ എപ്പ്‌മ് പരേസി കൊണ്ട് സൂസാരിത്ത് ഇര്‌ന്ത്‌കൊള്ളിരി.>>
37ഏസു ണാള്‌ക്ക്‌മ് സാമികൂരേലി പഡിസികൊണ്ട്‌മ് ജാമാക്ക് ഒലിവ് മലേലി തങ്കികൊണ്ട്‌മിര്‌ന്താ്. 38ഏസുദ് ണായ കേ്ക്ക്യ ആള്‌ഗ ഒട്ടുക്ക് ബെ്ഡ്യാലെ സാമികൂരേക്ക് ബന്ത്‌കൊണ്ടിര്‌ന്താര്.
Zvasarudzwa nguva ino
ലൂക്കോസ് 21: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature