Imilimo 17
17
Mwe Tesalonika
1Awala pano wapitingana mwe Amfipoli na mwe Apolonia, wafika kwe Tesalonika, kuno kwalinji ing'anda yakupepela iyawa Yuda. 2Nga Pauli aya kung'anda yakupepela muno wawelezile ukuchita wowonye. Ngakokonye mumanda yakusolezya yatatu Pauli alanga akuvwanzyania nawantu ivya Mawaliko Matele, 3alanga akuwalondololela kuno Mesaya wazipizile ale ayimbe, nga nukuzyulupuka kumfwa swinya. Pauli avwanga ati E Yesu-nye wee wino nkuwanena awili Mesaya. 4Wamwi pakwe woliwo awatontolokwa awayisanzya kwe Pauli nu Silasi; apaliponga niwumba kulu ilya wa Griki wane wapakatanga Leza, nawanachi wavule wane walinji awanankolelo.
5Ukuwa awa Yuda uwuzuwa awuwalema awawunganika wakayeluka-yeluka mumisolo akuwa iwumba kulu ilyakwe wachivulungania. Mukaya amwizula ichongo chikulu, awaya awapunguluchila ing'anda yakwe Jasoni, ukuti walemenchezye Pauli nu Silasi wawatwale kuwantu. 6Ukuwa awala wapotwa ukuwazana, awakwema Jasoni nawanyina wamwi awawatwala kwakwe wakapanzya nichongo chikulu wakuti, Awantunye waa walesile intazi konsinye! Kanonzi waa wizile mukaya kitu, 7nawe Jasoni awapochelezile mung'anda yakwe. Wonsinye wakonona amasundo yamfumu, wakuti kuli imfumu yinji, yino izina lyakwe we Yesu. 8Amazwinye yaa ayavundulania imyezo yawantu mwiwumba nawakapanzya nye. 9Wakapanzya awalifya Jasoni nawawuye indalama ukuti wawataye, ngapano awapita.
Mu Berea
10Akula vino kwafita, awanyina awatuma Pauli nu Silasi ku Berea. Nga awala wafika kweneko, awaya kung'anda yakupepela iya wa Yuda. 11Weni awantunye wawo walinji namelengania mazima ukulusye awamwe Tesalonika. Awateyelezya amazwi nukulondesya kukulu, awalanga wakusambilila amawaliko Matele amanda yonsi ukuti walolechesye ndi amazwi yakwe Pauli yalinji ayakusimichila, 12Awavule awakwe woliwo awasuwila; nawanachi wavule awa chi-Griki wane wamanyisilwe nga nawonsinye awa chi-Griki awasuwila. 13Ukuwa awala awa Yuda wamwe Tesalonika wivwa kuno Pauli wawizyanga izwi lyakwe Leza mu Berea, awaya kweneko awatalika ukuvundula nukukwakwania iwumba lyawantu. 14Achaleka nanti kuzinguluka awanyina awafumya Pauli aya kwesumbi; ukuwa Silasi nu Timoti awasyala mu Berea. 15Awantu wano wasuchilizile Pauli awaya awamufisya ku Ateni. Ngapano awanyochela ku Berea namazwi yano Pauli walondanga ukuti Silasi nu Timoti waye kweweliwe zuwa.
Mu Ateni
16Ala pano Pauli achili akulindilila Silasi nu Timoti mu Ateni, umwezo wakwe awumupota nkaninye muno waweni kuno mukaya mwizwile amakolania-pwi. 17Achaleka awapanzyania na wa Yuda namakandi wano walinji awakalumbula mung'anda yakupepela, swinya nukuvwanzyania nawantu wanji wano wayanga mumasyo yakukazizya. 18Awa Epekure wamwi na wa Stoiki awasambilizya awapanzyania nawe. Wamwi awati, Nganayo imbulisi yoo echivwange-vwange akuti chani?
Wanji awati, Ali ngati amuntu wino akutaka ivyakwe twaleza tunji. Wavwanzile vyonye-vyoo amuno Pauli wawizyanga Yesu nivyakuzyulupuka kwakwe. 19Achaleka awalema Pauli awamutwala kwiwungwe lyakwe Areopaga, awati, Tukasi tumanye imisambilizizye mipya yoo yino ukusambilizya. 20ivintu vimwi vino ukuvwanga avipya kwesweswe, achaleka tukulonda tumanye chino vikusula. 21(Amuno awina Ateni naweni wane wikalanga kokonye watachitanga ivintu vinji nkandi ukuvwanga nukwivwa ivintu vipya.)
22Pauli ayimilila pankolelo piwungwe lyakwe Areopaga avwanga ati, Mwe wantu wa mwe Ateni! Manyile kuno mwewakalumbula muvintu vyonsi. 23Amuno nalanga pano nkupita nalolechesizye ivintu vino mukupepa, naweni ileza limwi lino pali amawaliko yakuti, Kwe Leza muntamanyikwa. Wino mukapakata, chingatenga mutamumanya, weyonye awino kanonzi nkuwawumbulila. 24E Leza wino welewula insi navyonsi vino vili mwenemo, awili Imfumu e Leza wamwiyulu ninsi, asikwikala mung'anda zino zyazengwa namakasa yawantu. 25Swinya asilonda ichintu chimwi chino awantu wangamuchitila, pano weliwenye awili kapa wawumi nukufuta navinjinye kuwantu wonsi. 26Mumuntu wenganye amuno welewulizile imyiko yonsi, ukuti iwakwikala munsi yonsi. Wayania lyankani wamumpaka namasyo umwakwikala awantu, swinya wayania impindi yakwikala kwawo. 27Wachisile wowonye alyakuti wamuvwamba, pamwi wamuzane pano wakuvwamba-vwamba. Ukuwa naponye Leza asi ukutali nawila muntu; 28ndivino wumwi wavwanga wati,
Mwakwe weliwe tukayinganila swinya tuli nuwulanzi.
Chili ngati avino wakalumbulula winu wakavwanga wati,
Naswenye swewanakwe.
29Vino swewanakwe Leza awonye-woo, tutize tuwakwelengania tukuti imiwele yakwe ili ndivino ikolano lyakwe golide nanti wesilivara nanti aliwe lino lyawazwa nawakawaza wachenjele. 30Leza wapupuzya kumpindi yino awantu watamanyile chimwi, ukuwa kanonzi akukomelezya awantu wonsi ukuti wapetuke wafume munzila zyawo imbipe. 31Amuno wasola uwanda wuno alipanzizya insi yonsi nuwukulu nukusimichila, Leza wayisolela umuntu wakwizapanzya insi lyankani. Wamupanichisizya kuwantu wonsi amuno wamuzyulupuzile!
32Awala wivwa Pauli wawanena ivyakuzyulupuka kuwafwe, wamwi awaseka, ukuwa wamwi awati, Tukasi ukuti uyize uvwange vyonye-vyoo swinya. 33Achaleka Pauli afuma mwiwungwe, 34Ukuwa awantu wamwi awayisanzya kwakwe weliwe awasuwila nukusuwila; wano wumwi uwakwe woliwo walinji we Dionisio, umu Areopaga, numwanachi wino izina lyakwe walinji we Damarisi, nga nawanjinye,
Zvasarudzwa nguva ino
Imilimo 17: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.