Imilimo 28
28
E Pauli muchilila cha Molta
1Atula pano twafyuka, ngapano atumanya kuno ichilila chitwanga izina lyakwe Molta. 2Awakweneko awatufwila inkumbu. Amuno yatonyanga kwatalile, awapemba umulilo awatupochelela swensi. 3Pauli aswewelezya inkuni apemba pamulilo, inzoka iyivwa ichilungula ifuma, imuluma pikasa. 4Awakaya awalola kuno inzoka yamukakatila pikasa awanenana wakuti, Nachiwuzimanye umuntu wee wechikoma, atandi awe amumi, chingatenga wapususile pakwe sumbi. 5Ukuwa Pauli akuntila ichikulisi pamulilo nanti kuchisika. 6Ukuwa weni awalolechesya ukuti chandi chivimbe pamwi apungumuke apone pansi afwe. Ukuwa awala walindilila pazimba nanti kulola ichiwipe chimwi ichakumuponela, awanyoka awati, Akaleza!
7Mupipi nakokonye kwalinji ivyalo vimwi vino vyalinji avyakwe Pabliasi, wino walinji amwenichilila. Watupochelezile numutembo atulindika namanda yatatu. 8Paponye eyisi wakwe Pabliasi walwile, walazile muvitala muno walwile inzekema nisumo lyamunda. Pauli ayinjila mung'anda yakwe, apepa, awika amakasa pakwe weliwe, amupozya. 9Achila chonye-choo chachitwa, nga nawanjinye wane walwile pano wali muchilila awaya awapozwa. 10Awatupa ivyawila vivule, nga atula pane twapita muwato awatupa vyonsi vino twasowezilwe.
Pauli aruma ku Molta aya ku Roma
11Ila imyezi yitatu yasila atwinjila muwato wuno wafumile kwe Alekizanderia, wuno witwanga Waleza wantembwa, wuno walimuchizile muchilila aminjililo. 12Atula twafika mukaya kakwe Sirakusi atulinda penepo amanda yatatu. 13Ukufuma paponye atupita muwato atuya atufika mukaya kakwe Rejium. Uwacha umuza wakukambazwa awuwapupa, nga pawanda wachitiwili atufika mukaya kakwe Puteoli. 14Atuya atuzana awasuwizi wamwi awatulambilizya atwikala nawo amanda munenulambali, Ngapano atuya ku Roma. 15Awanawitu wa mu Roma awala watwivwa awiza awatusunkania kumasyo yakukazizya ayakwe Apiasi nakung'anda zyakufichila awapitanzila zitatu. Ala Pauli wawalola asalifya Leza, asankana.
Pauli mu Roma
16Atula twafika mu Roma, Pauli azumilizwa ukwikala wenga apaliponga nuwavita wino wamusunjililanga.
17Ayala amanda yatatu yasila Pauli ayita wane walinji awasongo wawa Yuda. Awala wawungana awanena ati, Wanawitu, chingatenga ntachisile awantu ichiwipe chimwi nanti achakumyata yakwe watatakulu, ukuwa naponye—wanyefile mwe Yerusalemu awandemeka mumakasa yawa Roma. 18Awambuzichisya awalonda ukuntaya, muno watanzanile numulandu wumwi wuno wayine nimfwa. 19Ukuwa walile awa Yuda walutilizya, impatichizwa ukulilila imfumu nkulu inkuta, chingatenga ntachisile ichiwipe chimwi kuwantu wane. 20Achaleka muno achonye-choo nawalambilizizye ukuti mundole swinya muvwange nani; amuno nkunzilwe numunyololo muno weliwe wino awa Israeli wakololela.
21Awamunena awati, Tusitela tupochelele kalata wumwi ukufuma kwe Yudeya kuvyako, nanti amwanawitu wumwi atatela ayize koo atunene chimwi, nanti akukuvwanjila uluwinye. 22Ukuwa tukasi twivwe chino ukwelengania, amuno tumanyile kuno awantu wakutaka ichipya chonye-choo chino uli mwenemo uluwi.
23Achaleka awala wazumilizyania uwanda nu Pauli, iwumba kulu kutaluvile aliya kuno Pauli wafichizile pawandanye wowo. Ukufumilila umutondotondo mpaka kwila e Pauli alanga akulondolola nukuwanena Ilandwe lya Wufumu wakwe Leza, Awalonda ukuwafunkulila kuvyakwe Yesu akukumya kumasundo yakwe Musa namawaliko yawatumwa. 24Wamwi awakwe wano wivwanga awazumila amazwi yano wawanenanga, ukuwa wamwi pole. 25A wala pano wakana ukuzumilizyania awapita, apano Pauli avwanga izwi lyonga ati, Ye vino Umuzimu Mwimichile wavwanjizile ichete mumutumwa e Ayizeya kwakwe wasokulu! 26Ati,
Yanga kanene awantu waa uti,
Ukwivwa kweni muliwakwivwa lelo mutaliwakwiluka;
nukulolanye muliwalola, mulilanga mukulola ichitumubulampanzi.
27Amuno imyezo yawatu waa isi namano,
amakutwi yawo yafundika,
naminso yawo yaziwata.
Alyakuti pamwi watize walola naminso yawo,
swinya watize wakwivwa namakutwi yawo,
namano yawo yiluke,
wapiluluke wize kwenene, avino Leza wavwanga,
ngambapozye.
28Ngapano Pauli apelelechezya namazwi yakuti, Mumanye kuno ikomolwa lyakwe Leza lyoo lyatumwa kumakandi. Nawonye waliyivwa! [ 29Ala Pauli wavwanga wowonye, awa Yuda awasata, awalanga wakupazuka wonganye.]
30Pauli ayikala imyaka mipuma yiwili mung'anda yino walipanga indalama, alanga akupochelela wonsi wano wayanga mukumulola. 31Alanga akuwawizizya ivya Wufumu wakwe Leza mbali nukuwasambilizya ivya Mfumu e Klistu, alanga akuvwanga nukusinama konsi nanti kusakamala chimwi.
Zvasarudzwa nguva ino
Imilimo 28: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.