Romans 1
1
1Ekalata wee wafuma kwe Pauli, umuwomvi wakwe Klistu Yesu, umupositile musolwa wino witwa nu Leza kukuwizya Ilandwe lyakwe Leza.
2Leza walayilizizye Ilandwe Zima kali-kali mumilomo yawatumwa, ndimuno lyawalichilwa mumawaliko Matele. 3Amazwinye yaa yatakwa ku vya Mwanakwe, Imfumu yitu e Yesu Klistu: kuwuntu, wakwasilwe pachiwanza chakwe Davidi; 4ukuwa kumuzimu kweni, walolesile namaka makulu kuno a Mwanakwe Leza pano wazyulupuzilwe kumfwa. 5Mwakwe weliwe amuno Leza wampela uwupositile, alyakuti mbombele Klistu, nkolelele awantu wamyiko yonsi ukuti wasuwile swinya watontele. 6Chili nakwakwe mwemwenye mwe wa mu Roma, mwewantu Leza wawita ukuti muwe mwe wakwe Yesu Klistu.
7Achaleka nawawalichila mwensi mwewantu wa mu Roma wano Leza wakunda swinya wawita ukuti muwe mwewantu wakwe.
Ndi e Leza e Tata ni Mfumu yitu e Yesu Klistu awalole inkumbu muwawa umutende.
Ipepo lyakusalifya
8Pakutalika nkusalifya Leza wane, mwakwe Yesu Klistu, muno amwemwenye mwensi; amuno isuwilo linu Iyivwikwa munsi yonsi nuwukulu. 9E Lezanye umwenecho awino wamanya kuno chino nkuvwanga achakusimichila—e Leza-nye wino nkapakata numwezo wane wonsi wino nkawizya Ilandwe Zima ilya Mwanakwe. Leza awino wamanya kuno nkawizuka 10penye pano nkupepa. Nkalambilizya Leza ukuti munkumbu zyakwe, anzumilizye
ukuti njize mbasyungule zuwa amuno pazimba. 11Amuno nkuluchila nkaninye ukuwalola alyakuti mbape ichawila chamuzimu chimwi, alyakuti chiwasimpisye. 12Alyakuti nene namwe tupochelele ukwavwa ukulikonga, mwemwe mupochelele kwisuwilo lyane nani kwisuwilo linu.
13Swinya muwakwizuka choo wanawitu, kuno impindi mvulenye nkalondesya ukwizawasyungula, ukuwa penye chimwi chikandema. Nkulonda wamwi awakwe mwemwe nawonye watontolokwe, ndivino nalesile amakandi yamwi ayatontolokwa. 14Amuno nenji umulimo wane awakuwombela awantu wonsi; awamano niviwelewelenye, awasambilile nawano watasambililanye. 15Muno achonye-choo, nkulondesya nkaninye ukuti namwenye mwewantu mwikala mu Roma mbawizizye Ilandwe Zima.
Amaka yi Landwe Zima
16Nasyanjisya nkaninye mwi Landwe Zima; amuno amaka yakwe Leza ayakutula wonsi wano wasuwila, pakutalika awa Yuda nga pakonka amakandi. 17Amuno Ilandwe Zima alino likanena awantu vino Leza akawalungamika awawa apaliponga nawe, chino chikulondwa kwakwe woliwo alisuwilo ampela. Ndimuno amawaliko Matele yavwanjila yati, Wensi wino wawa nisuwilo, Leza wamulungamika alilandila.
Ukuwifya kwamulawa
18Amuno ukuvitwa kwakwe Leza kwawumbulika ukufuma mwiyulu kukwiza ponela awawipe wonsi nawawembu wonsi wano imilimo yawo imiwipe ikafundichila ukusimichila ukuti kutize kumanyikwe. 19Leza akawasunda, amuno vino vingaleka awantu wamanye Leza vili palwenze. Amuno e Leza-nye nalwakwe wawamanyisya ichetenye. 20Ukufumilila pane Leza walile ayelewulila insi, awantu wangamanya ichetenye kuno amaka yakwe yasi ninsilo, nakuno molimonye weni we Leza chingatenga ivintunye vyovyo vitanga vilolwe; lelo vikamanyikwa. Awantu wangamanya ivyakwe Leza pakulola vino welewula. Achaleka wasi nakapemezyo kamwi! 21Wamarrya Leza ukuwa wasimuchindika ndimuno wawela, nanti akumusalifya wasimusalifya, ukuwa amana yawo yavulunganika yawa ayavye-yavye winjila mumfinzi, watanga wamanye ichizima nanti achiwipe. 22Wakutanji wali namano, napano aviwelewele; 23wafuntuka kukupepa Leza wino asifwa, waya mukupepa amakolania yano yakaloleka ngati amuntu wino akafwa, pamwi ndivino inyunyi nanti anyama nanti avikulisi.
24Muno awuwelewele wawantu, Leza wawalechelezya ukuti wachita ivintu vyawunyali vino imyezo yawo yakundisya, wakachitilana ivintu vino vikaleta insoni. 25Amuno wakana ukupechela Leza wakusimichila, wakonka uwufi; wakapakata nukuwombela ivintu vino Leza welewula wasya ukuti wapakata umwenechonye Umwelewuzi, wino wazipila ukumutumvya penye! Amen.
26Achaleka muno awantu wakachita wonye-woo, Leza wawalechelezya waleka ukuti wachita imyata yawukwelengusi. Awanachi nawo wapilula imiwele yawanachi wali ninyengwa yakulondana awanachi watupu. 27Nawonsinye wasilonda ukupalamana nawanachi ukuwa inyengwa yawo ayakulondana awonsi watupu. Awonsi wakachita ivintu vyansoni ivyakulondana awonsi watupu, achaleka wasundwa ndimuno imiwele yamilimo yawo imiwipe yawela.
28Muno awantu watapechela e Leza wakusimichila, nu Leza-nye nawe wawalechelezya waleka amana yawo yavulunganika, ukuti wachita vino vitazipila ukuvichita. 29Wizula nuwuwelewele, nuwuwipe, nukufunuka, nukuzenkenta; wizula nuwuzuwa, nuwuchikoma, nulombwa, ichenjezya, nuwukwakwa. Wali nichinenia, 30swinya wakavwanjilana iviwipe; wapatila nu Leza kumwi, wali nimisulo nichilumba, nukuyiwanzya; wakakwelengania ukuchita uwuwipe wutupu; wasitontela awakwasi wawo;
31awazelele, wasichita vino walayilizya ukuchita, swinya wakalala wasifwila wanji inkumbu. 32Wamanyanye-nto kuno is undo lyakwe Leza lyavwanga lyati awantu wamwatanye woo wazipila imfwa. Ukuwa naponye wakalandalila ukuchita ivyamwatanye woo, awazumilizya nawanji ukuchita wowonye.
Zvasarudzwa nguva ino
Romans 1: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.