Matiu 28
28
Iesua mutulu mumaulila
1Ioxe, Voxo so Ma'ila mukalu xe aso so uxali no anu voxo tei no anu viki la Malia so Makatala olie Malia ane vile milai so imaleisou lulu. 2Milai mixali sila mimalei lexe uni'uni toxoxu muxali. Xo angelou Tatananenge vile mulu'e no tualasou Mosinge mo mupipalo'u lavo'o muxexesou lulu anaxu ka mutalupexa no latanu. 3La alaiou lamanaxu aloxo lele'e lamixu xe lavulutiou muvalukea aloxo aisi 'o. 4Xe ane'i ta'ami e mi'oxo latolo ne mi'ume la vasime'a mu'olo'olo kena mole vasime'a musoisolisi.
5Xe tasema mimalei axone la angelo muvikane'i lexe, “Mamu so nga'ume. Xo eni alavu lexe ngingi ngene'e so ngakamulinu Iesua e mililixu no ovu valautu ka musoli. 6Anu uai 'o uasi, anu mutulu mumauli a loxo molu mulemolu mala'o. Xo ngane'e mo ngamalei, tanixu muai no anu a. 7Laso ngilou ngapalea ngalai ngavikalane'i tatisaipelou lexe anu mutulu no anu soli. Mo ngalomu, anu mu'uli noxinge mulai ne Xalili, laso ngingi ngalai ngamaisou ne. A eni ene'e so apela'inge axonesi.”
8La tasema tamei ne mimama'u ia osa'ila misevile sika mipalea milutu so ilai ia'aloi'a tatisaipeli. 9Ane'i a milalai sila Iesua muxalisi'a no vote'i la muvikala lexe, “Kakau laixe.” Sila ilou milai noxou ka misavunoxu tava'u mo mimaxa'u mama'u mo osa noxi'a noxou. 10La Iesua muvikalane'i ilou lexe, “Ngilou ngamama'u uasi. Ngalai ngavikalane'i tavivilo so ilai ne Xalili xo ane'i imaisilo ne.”
Vaikalai'a ta'ami
11Ioxe, tasema tamei a ilalaisio la se'i noxi'a ta'ami e milosou lulu milutu mi'unalai no taoni so ia'aloi'a tatiatila noxi'a tapilisti no anu mimi e muxali. 12Tatiatila noxi'a tapilisiti milomusou a'alo noxi'a mukalu la milai mipita noxi'a tatiatila noxi'a Taiuta. Mipita xe opone'i vilesisi mukalu laso mipilixinu lamoli tatila noxi'a ta'ami ne. 13La mipelototosi'a lexe, “Ngavikalane'i tamitema aloxo 'o, 'Tatisaipeliou mine'e no olovoxo ka mitokenixu Iesua vasimolu mi ne nexi teiasio.' 14Xe loxo tila no anu xamani ulomu axone la nexi mexe tavikalanu mo so ngingi ngatavulenu tu'umaxusou mi 'o uasi. 15Laso ta'ami mino'u lamoli ne xe mivulunu a'alo a loxo tatiatila mipelototosi'axu. La a'alo anene muiaveiave no taine'i Taiuta mo a uxoxolu vaimomo 'osio.
Iesua mupilixinu xaixai noxi'a tatisaipeli
16Ioxe, tatisaipeli 11 mimuamua'i xo la mixali ne Xalili mo milai avile no anu la'olu e Iesua mupela'axu lumamo. 17Milai xe mixalisou la mimaxa'u mama'u mo osa noxi'a noxou. Ia ane'i vilevilesi lopala noxi'a muvaxa mune'esio. 18Xe Iesua mune'e alai noxi'a la muvikalane'i lexe, “Mosinge mulosilo xavi so a'uli laxunu mimi mukalusi no lialia xe no tualasou. 19Laso ngingi ngalai no xale tuatuala mukalusi mo ngalapune'i tamitema mukalusi so ixali tatisaipelixeli. Mo nga'oxonu ilixo so kelele noxi'a no anu ualasou Maminge xe Olu xe Ulenu Laixe. 20Xe ngavotone'i lexe imulinu pelototo ane epilixinu noxinge mukalusi. Mo ngalomu, eni axolu noxinge utotomu xo mo ulai uxali avile no anu kaluxusou lialia 'o.”
Zvasarudzwa nguva ino
Matiu 28: ATA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Copyright 1999 New Tribes Mission, Sanford, FL 32771-1487