Maki 1
1
Tioni itema so u'oxonu ilixo so kelele mulanu vaikala
1Ano'o soko'u no anu vaikala laixe so Iesua Kalaisiti anu Mosinge Olu. 2Anu uxali loxo polopeti Aisaia mukaukavunu tatei. Mulemolu Mosinge vaikalaou aloxo 'o, “Nalomu. Eni apalusou itemaxeli vile so ulanu vaikalaxeli. Anu u'uli laxuneni so ulalaxinu vote'isine. 3Anu uxixao no xale lia esi'esi mo xolinu ula aloxo 'o, 'Ngalalaxinu mo nga'isalilinoxu vote'isou Tatananenge.'” Aisaia muvulunu Mosinge vaikalaou axone. 4Laso maixene Tioni itema so u'oxonu ilixo so kelele muxali no xale lia esi'esi. Muxali la mulanu vaikala noxi'a tamitema lexe ixiunu opone'i mo i'isalilinoxu no anu Mosinge vaikalaou. Mo i'oxonu ilixo so kelele so imaxa'u lexe Mosinge muiasou susu noxi'a. 5La tamitema Taiutea oli'a tatemanu tuala Ielusalemo milailai noxou Tioni. Milailai xe tamitema ta'ei mipala'anixu susu noxi'a la anu mukelenixa'a no lexa Tiotani.
6Tioni ne anu mulavusou musakinu lavalava ane mi'oxonu no anu kameli laxusou mo usinixu no anu laleti. Xe ani'anixu ane tamusia'e ilou unuxu. 7Anu mulanu vaikala aloxo 'o, “Itema ane une'e ili'i noxilo ne anu xavinu mutiatila noxilo. Anu itema tila ia eni amitema vitanisi. Xaixai vile so loxo alulusou lamotasou lasuou ne eni alaixe so a'oxonu to uasi. 8Loxo eni la akeleningenge no anu lexasi ia anu la ukeleningenge noxou Ulenu Laixe.”
Tioni mu'oxonu ilixo so kelele noxou Iesua
9Ioxe no voxo anene la Iesua molu ne Nasaleti no xale lia ne Xalili la muxali. Muxali la Tioni mu'oxonu ilixo so kelele noxou no lexa Tiotani. 10Mukelenixu xe Iesua a utelo no lexa sila alaxu vilesisi mumaisou loxotolo mukisi mo Ulenu mulu'e noxou. La loxo ngiala e utu. 11Mukalu la xolinu vile mulu'e no loxotolo lexe, “Nini na'alixeli ne asexelaxene. Eni a'osasine misevile.”
Uluaou mutovonu Iesua
12Ulenu muxali noxou mukalu la no voxo anenesi mupalusou Iesua mulai no xale lia esi'esi. 13Xale lia esi'esi ne so tanixa'a tamisoposi tavovasi. Muxolu ne voxo 40 mo Uluaou mutovotovonu. Mutovotovonu xo xe mukalu laso ta'angelo talaixe mine'e misu'ulinu Iesua.
Iesua musoko'u xaixai noxou ne Xalili
14Xe mune'e xe Tioni mukalavusui la Iesua mulivu mu'una no xale lia ne Xalili so ulanu vaikala laixe noxou Mosinge. 15La muvikala aloxo 'o, “Taimu mutiatila a muxali 'oe. Voxo so Mosinge molu u'uli laxune'i tamitemaou a mune'e ala'alai mukalu. Ngingi ngaxiunu opongengi mo nga'isalilinoxu no anu Mosinge oponu so susu noxinge. Mo opongengi ukasou vaikalaou laixe lexe maninasou.”
16La voxo vile Iesua mumuamua'i no pa'umolu kupa toxoxu ne Xalili. Mumuamua'i la muxalisi'a Saimoni ilou vimou Anitilu a i'oxo so isu'anu uveni no kupa toxoxu ne xo anene xaixai noxi'a so ikaine'i tasinana. 17La Iesua muvikalane'i ilou lexe, “Ngingi ngolou ngane'e ngamulileli. Xo vaimomo 'o ngingi ngataxusi'a tasinana, ia eni alosoiengi so ngataxusi'a tamitema.” 18Sila alaxu vilesisi ilou mi'italonu uvenixa'a la mimulinu.
19Xe Iesua mumuamua'i mulai sevilela, la muxalisi'a Tiemisi ilou vimou Tioni e Sepeti ta'olu a i'isalilinoxu uvenixa'a. 20Muxalisi'a la mu'avali'a ilou. Sila ilou mi'umesou mami'a laso anusisi oli'a tavoiou mixolu no pouti. Ia ane'i ilou mimulinu Iesua milai.
21 Xe mune'e la oli'a milai no tuala ne Kapeniamu. La mixolu xe Voxo so Ma'ila muxali la anu mu'unalai no anu tasou lavuloto. Mu'unalai la musoko'u so uvotovoto. 22La tamitema mikuluke xo votovoto noxou xavinu, mo mi'oxo lexe, “Axova? Tamitema so lavulavu no anu lavuloto ivotonenge laixe axo'o uasi.”
23La no voxo anene itema vile angelo masua mukasou a oli'a mixolu no tasou lavuloto noxi'a ne. La angelo masua mu'ava lexe, 24“Iesua, nini so tuala Nasaleti. Nene'e noxixe so mi ma'ia? Mane nene'e so namamulonexi. Eni alavusine lexe nini Itema Malemalenga noxou Mosinge.” 25Xe Iesua mulavixu lexe, “Naxo tasiausi. Naxexesou itema ne.” 26Sila angelo masua mu'umu'umunu itema ne la mu'unga toxoxu laso muxexesou.
27La tamitema mikuluke mo mivikalane'i ngato'o lexe, “Mi ma'ia ano'o? Anu voto alavua mo xavinu musuku. Itema ano'o upalusi'a ta'angelo tamasua la ane'i ilomuxusi.” 28La alaxu vilesisi a'alosou mimi ane Iesua mu'oxonu ne muiaveiave no tuatuala no xale lia ne Xalili.
Iesua mupaipoune'i tamitema ipipiena se'i
29Ioxe, anu oli'a milala no tasou lavuloto la milai avile no tasi'a Saimoni ilou Anitilu. Milai la oli'a Tiemisi xe Tioni. 30Milai no tani ne la Saimoni semau nenie a miai no lu xo mipipiena. La alaxu vilesisi ane'i mia'aloxe noxou Iesua. 31Mia'aloxe laso Iesua mu'unalai noxie mo mutila'e no avole so mutulusie. Mutulusie sila pipiena mupaxelesie ka mi'avuti milalaxinu xa'a la'ilali.
32Mixolu xo xe aso mu'una la ane'i tatemanu tuala mine'ene'i tapipiena oli'a tamitema ane ta'angelo tamasua mikasi'a noxou Iesua. 33Mine'ene'i la tatemanu tuala latala misu'a la'oluxa'a no aitengaxu tani ne. 34La Iesua mupaipoune'i tamitema pipiena iouiou ne. Xe tamitema ane ta'angelo tamasua mikasi'a la anu mukusai'a no anu vasime'a. La ane'i ta'angelo tamasua milavusou ia anu mu'apixa'a lexe ipa'anixu mamu.
35Xe no kakau isi'isivoxosio la Iesua mutulu mula. Mutulu mula la mulai va'axu no tuala no apu vile ane tamitema ixolu uasi. Mulai so muxoxolu muvikala noxou Mosinge. 36Xe ili'i la Saimoni oli'a tamenexu milutu mo a mikakamulinu Iesua. 37Mikakamulinu xo xe mixalisou mukalui la mivikalanu lexe, “Ai, tamitema latala a ikakamulineni.” 38La anu muvikalane'i lexe, “Ani, ia talai no tuatuala se'i a uxoxolu alai se 'o so eni avotovoto noxi'a kalumo. Xo mi e eni ene'e no anu ane.” 39Laso muxixausou tuatuala no xale lia ne Xalili mukalusi. La muvotone'i nonano no tatasou lavuloto noxi'a. Xe muxalixalisi'a ta'ei ane ta'angelo tamasua mikasi'a la mukusakusai'a no anu vasime'a tamitema ne.
40Xe no voxo vile la itema vile pipiena e lepelisi mune'e noxou Iesua. Mune'e la muxolasou tava'u mo mutangatulou la mukatu noxou lexe, “Loxo nini namasaxa la nini namomomo so naxexenu pipiena ano'o so eni axali amalemalenga.” 41La Iesua tanuxu misevile sila mumexinu avolu mo mumulaxu no vasimolu itema, la muvikala lexe, “Eni amasaxa. Nini namalemalenga.” 42Xe alaxu vilesisi la pipiena lepelesi ne muxexesou itema ne sila anu vasimolu malemalenga. 43La Iesua mupalusou itema ne mulai la muvikala pakia'u noxou aloxo 'o, 44“Nalaxa'i laixe. Mamu so napala'anixu mi ane muxali noxine 'o. Na'oxo aloxo 'o. Nalai namaxa'ine noxou pilisiti mo na'oxonu ilixo so navu no anu vote'i u'isalili loxo Mosisi mulemolu so tamitema ixali tamalemalenga no vasime'a. Mo so axone la tamitema ilavu lexe nini namalemalengala.” 45Iesua mupela'u axone ia mulai la mua'aloxu mi ane muxali noxou noxi'a tamitema tavu'alo. Xe a'alosou muiaveiave laso umomomo so Iesua u'unalai no tuatuala uasi xo loxo 'o io tamitema iveli so isaxisou. U'unalai uasi muxolu no xale lia ane tamitema ixolu no anu uasi laso tamitema mine'ene'e noxousi.
Zvasarudzwa nguva ino
Maki 1: ATA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Copyright 1999 New Tribes Mission, Sanford, FL 32771-1487