João 21
21
Jesusnẽ ãwẽ shokõkenavo meramaóti ivo yoã
1Askávai txipo Jesusnẽ ãwẽ shokõkenavo meramaóti, Galileia iã kesósho.#21.1 Galileia iã ane wetsaro “Tiberíades.” 2Ano shokoro naatíi, Simão Pedro, Tomé Ravé Pakéa ivo, Natanael, Galileia naki Canánamã niaya ivo, Zebedeũ vakerasĩ, ãwẽ shokõkena wetsase ravévakĩ aatíi. 3Ano shokosho, Simão Pedrõ ato aská akĩ. “Ẽ yapa akí kaaivere”, ãwẽ imaĩnõ, “mivé nõ vonõ”, ivai nõtĩ avé kãtxípakevai voshõ yamévãki atimávo.
4Aská shavá mashtémaĩnõ, iãne nonósho, Jesus iã kesó machĩ niá meravo, askámẽkĩ onãma ikívo. 5Atõ askámaĩnõ Jesusnẽ kenasho ato nĩkãki. “Vakerasĩní, mato akámará?” ato ãwẽ akátõsho, “noke akáma”, akávo.
6“Ase, pameti mekiri õtxiki tanána. Mã akatsai”, iinã ato ãwẽ yonomaĩnõ õtxivaiki atõ oĩa pameti tee ainatĩpá, yapa westímashõ. 7Aská oĩinã Jesusnẽ ãwẽ shokõkena ãwẽ anõ noípa ivõ Pedro aská akĩ. “Waanã Yora Ivotsikĩ!” ãwẽ akátõsho, “Yora Ivotsikĩ”, ãwẽ ikí nĩkãinã õpo matxi koshasho ãwẽ masõa ivõse vivaí yaneshmekaĩvaí wakã nikavaí kesó nonakaĩi. 8Pedro askákaĩmaĩnõ, wetsarasĩro waka kesósho 100 metrotishõpáchta nõtĩse kãtxísho pameti matáka ninikõvaĩi voávo. 9Askákõvaĩi machĩ shokopakei vokĩ ato oĩa, txii ma rekẽ ikitáya, yapa matxi masoi, pão masoi aká meravo.
10Atõ askámaĩnõ Jesusnẽ “ramachta mã aká ivo yapa wetsa vivarãna”, ato akĩ. 11Ato ãwẽ aská amaĩnõ, Simão Pedrõ arimẽse nõtĩ kashõ pameti machĩ nininíki. Aská ano paméyavoro 153 yapamẽkĩ pameti torásh ikíma. 12Askái anosho Jesusnẽ, “pii verína”, iinã ato kenaatõsho ã shokõkenavo wetsãse “mia tsoará”, ikĩ nĩkãma ikívo, “Yora Ivose”, ikĩ tanasvo. 13Anosho pão, yapa aká tashnasho ato inãketakĩ. 14(Aatiã vopivai weníosho, naa ato ãwẽ meramaóa ivõshoro 3.)
15Askái pii mashtémaĩnõvo Jesusnẽ Simão Pedro nĩkãki. “Simão, miaro Joãone vake. Tsoa ivo enõ noípárá, miará, naarasĩrá?” ãwẽ akátõsho, “Ẽe, Yora Ivó, ẽ minõ noía mĩ tanasai”, ãwẽ amaĩnõ, “ẽ yorarasĩ txivo mashté vesoatõ akĩ ato atso askáro”, akĩ.
16Aská avaikĩ nĩkãóki. “Simão, miaro Joãone vake. Mia enõ noírá?” ãwẽ akátõsho, “Ẽe, Yora Ivó, ẽ minõ noía mĩ tanasai”, ãwẽ amaĩnõ, “ẽ yorarasĩ txivo vesoatõ akĩ ato atso askáro”, aoki.
17Aská avaikĩ nĩkãnióki. “Simão, miaro Joãone vake. Mia enõ noírá?” akĩ. Anosho 3 akĩ ã nĩkãatõsho onískarãi. “Yora Ivó, miãro katsése mĩ tanasai askásho ẽ minõ noía mĩ tanasrívi”, iinã ãwẽ revíatõsho “ẽ shokõkenavo txivo vesoatõ akĩ ato atso askáro. 18Neskávere nĩkãtso. Mia verone nishõro õpõ yoísho mĩ chinãtõ ikí mĩ nipawa. Aská sheniwetsakaĩsho mĩ mevi mechpávakĩmaĩnõ wetsã neshavaíki mĩ chinãmanamã mia ewevaĩkatsavo”, akĩ Jesusnẽ. 19(Aská ivõ ãwẽ vanaro, Pedro vopiamẽsho Yové Koĩ yorã oĩtati ivo shovikatsakiri chinãsho ã ikí.) Askávaíki, “evé kawã”, aoki.
20Ãwẽ askámaĩnõ kakĩ patákesho ã oĩa Jesus anõ noíka ivo ãwẽ shokõkena yora ato petxiri niá meraki. Aaivoro, yamé piánamãsho Jesus tavasho “Yora Ivó, tsoarkĩ mia yomẽ akatsaiyanã?” ikĩ nĩkãvaiya ivo. 21Askáki aaivo petxiri niá oĩinã Jesus nĩkãki. “Yora Ivó, waaivororá, awesa ikatsí?” 22ãwẽ akátõsho, “awesainã mĩ anõ tsakáará? Miase etxõtso. Aaro ẽ oátishõki ‘nitxĩnõ’, iinã ẽ nitxĩa roaserívi”, akĩ. 23Askái ãwẽ vanamtásho, Jesusnĩ takéyavo “aaivo vopima ikatsai”, ikí yoãnakaĩkarãa. Askámẽkĩ “vopima ikatsai”, iinã ã ikímarívi. “Awesainã mĩ anõ tsakáará? Aaro ẽ oátishõki ‘nitxĩnõ’, iinã ẽ nitxĩa roaserívi”, iinã ãwẽ iyãtárvi.
24Aaivo ãwẽ shokõkena yoraro earvi, Jesusnẽ akárasĩ oĩvaíki wichaya ivo. Aaivo vana ẽ wichaa ivoro anõ anõkase.
25Askámaĩnõ Jesusnẽ akárasĩro itãtĩpárvi. Keyoki wicharo, papíri shovimashõ masõa anõtĩpa ikenkeãai, naaivo mai shavapa. Askáti, aa yoãnáro.
Zvasarudzwa nguva ino
João 21: YKV
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Active: © Wycliffe Bible Translators, Inc. All rights reserved