João 7
7
Jesus ãwẽ takevõ yoã tanati ivo yoã
1Aská txipo Jesus Galileianamã kaí, Judeianamãro niokatsikíma atõ yamamakatsikitõsho. 2Aatiã judeurasĩni “Arí Peshé Aká#7.2 Aatiã tanáti aaivo peshérasĩro anõsho askata wenẽnamã atõ ipawakiri chinãti.” atõ aká ivo saí ikí omakaĩi. 3Askáki Jesus ãwẽ takevõ aská akávo. “Nenosho Judeiakiri katã. Mĩ shokõkenavorasĩni anosho mĩ akárasĩ ave oĩnõvo. 4Yorã oĩtanáka nikatsiinãro, askátõ mĩ pãté itimarívi. Aská ato mĩ oĩmatirvi”, akávo. 5(Askámẽkĩ ãwẽ takevo anõ aosmasevi.)
6Askámaĩnõ Jesusnẽ “ramachta askánamã ea niátĩpá. Matoro vokatsiinã mã voá roaserívi. 7Matoro yorã ichnatĩpá, askámẽkĩ earo awesáma, atõ ichnaa, itimatõ atõ imaĩnõ ẽ vanamaĩnõ. 8Matõro oĩtana saí ikí. Earo ramachta kaama. Aaro awesáma, askánamã ẽ niti nokóma”, ato akĩ. 9Askái vanavaí ano Galileianamãse nikawãi.
10Askávaĩi ãwẽ takevo saí ikinamã vovaitxinĩ, Jesus askásevi txipo onésho iokaĩi. 11Aská ano saí ikinamãsho judeu vevokerasĩni manái shokosho nĩkãkenávo. “Ato niárá aanã?” ikívo.
12Askái yora ãtsa kãtxíanamãsho arí yoãketanávo. Wetsarasĩ vanai “aa yora roaka”, wetsarasĩ vanairo “ato parãai ãwẽ ikírvi”, ikívo. 13Askámẽkĩ ashkãsho nĩkãnevo yoãma, judeu vevokerasĩ rakéshoinã.
14Askái saí ikí potxinikaĩanamãsho Jesusnẽ Yové Koĩni shovo chinãnii kashõ ato yosĩki. 15Askámaĩnõ judeu vevokerasĩ ravii vanavo. “Yosíkarkĩ, aweshõ aská yosikĩ, wichá tsasimasmẽkĩnã?” atõ imaĩnõ 16Jesusnẽ ato revíki. “Neskái erí ẽ vanamarvi, ea yonoyatõ vana ẽ yoãrívi. 17Yora Yové Koĩni chinãne ikiyaro, ẽ yosĩa ivo ‘Yové Koĩnamãsho oárvi’, ikĩ tanai, ‘arí ãwẽ ikírvi’, ikĩ tanaói avévakĩkatsa. 18Yora arí yoãnáyaro ‘ea yorã ravinõ’, iinã ãwẽ ikírvi, askámaĩnõ aa yonoya ‘ave ravinõvo’, iinãro anõkase, parã vana yama. 19Moisésnĩ mato inãtimarívirá esé vananã? Askámẽkĩ wetsãchta aaivo vana mã anõ ayamáai. Askáinã awesa earvi mã yamamakatsikírá?” ato akĩ.
20Aská wetsarasĩni ano shokosho nĩkãinã “mia yochĩ ichnátõ tasaaivere. Tsoã mia yamamakatsíraí?” atõ akátõsho, 21“yové ashõ sábado shavapa mato ẽ oĩmatõsho ‘wetsakarkĩ’, ikĩ chinãsho mã oĩvai. 22Moisésnĩ ina repã retás ati ivo tanáti mato eneshoti. Awesa ikĩkororá, Moisésmarívi, Abraão, Isaque, Jacó aatíisho mato eneshotirvi chinãtsoma. Aská venevakerasĩ retás akáro, sábado shavapa aká roaserívi. 23Askáinã Moisésnĩ esé vana anõ ashõ venevakerasĩ sábado shavapa mã retás akámẽkĩ, awesainã aaivo shavapa yora ẽ roa amaĩnõ ea mã ichnakévairkĩ? 24Veyó chinãnese ikĩ ea oĩtsomároa, chinã mekipatõ ishõ ea oĩtsoma”, ato akĩ.
25Aská Jerusalémnamã shokoyavo yora ravé vanai. “Naa yoraserá, atõ yamamakatsikínã? 26Awesa ashkãsho nĩkãnevo ãwẽ vanamaĩnõ wetsapa ishõse oĩaivokatá, nokẽ vevokerasĩninã. Cristo, ‘nõ manávaĩvaĩa ivose’, ikĩ chinãsho oĩaivormẽ, atovõnã? 27Askámẽkĩ naaro ‘anosho oa’, ikĩ nõ tanasai, askámaĩnõ Cristo oá ivoro ‘anosho oa’, ikĩ noke tanatĩpá”, ikívo.
28Atõ askámaĩnõ Yové Koĩni shovõsho ato yosĩ yosĩi isi isĩinasho vanai. “Marí ‘ea oĩi, ẽ oá tanai’, akí mã ikírvi. Askámẽkĩ erí chinãne ikí ẽ oámarívi, ea yonoyaro anõpa ivorvi, mã oĩmarvi aaro. 29Askámaĩnõ eãro ẽ oĩya. Anõsho ẽ oárvi, ãatõ ea yonorívi”, ato akĩ. 30Atõ aská nĩkãinã atõ kepokatsikimẽkĩ atxima ikívo, anõ ãwẽ askáti ivo nokómasho. 31Askámẽkĩ yora ravétõ anõ akí vanakenávo. “Cristo ivõ tachikarãsho yové akĩ nãatõ akátõ akĩ tavakeotĩpárvi”, ikívo.
32Askánamãsho Jesus aská akĩ atõ yoã nĩkãinã fariseurasĩnĩ ashõ Yové Koĩ ato vana ashõya kakáyavõ teske akaya ano Yové Koĩni Shovo vesoyavorasĩ ato yonoki, “Jesus kepona”, iinã. 33Atõ aská akatsikitõsho vanai. “Ea inokamase matonĩ ẽ nikatsai, askávai ea yonoyanamã ẽ iokaĩkatsa. 34Ẽ askákaĩmaĩnõ itimakĩ ea mato meratĩpá, ẽ kakatsai ivo shavapa mã voátĩpásevi”, ato ãwẽ akátõsho 35arímamẽ vanavo. “Atonamã kakatsiinã ‘ea mato meratĩpá’, ãwẽ ikírkĩ? Grécianamã nokẽ wetsamavorasĩ ravé peás iki shokoarasĩ ato yosĩi kakatsi ãwẽ ikíra? 36Awesainã ‘itimakĩ ea mato meratĩpá, ẽ kaanamã evé mato iovaĩotĩpásevi’, ãwẽ ikínã?” ikívo.
37Askávai saí iki roapa ivo anõ enékaĩa shavapa, Jesus weníinavaí isĩinasho vanaói. “Tsoa wakapashã vetsaraí? Vetsayatõro ea chinãvarãsho akírí. 38Ea anõ akayatõ, vanã yoãtĩ ‘awetima wakapasha ãwẽ chinãneshõ waka avái ikítõ ikí avákatsa’, ikí neea”, ato akĩ. 39Waka avá ãwẽ yoãro Yové Koĩni Chinã ãwẽ yoãrívi, anõ akayavorasĩ txipo ãwẽ yonoshotirvi. Askámẽkĩ aatiã Yové Koĩni Chinã ato yonoshoama iti, vopivai, naí shavapa kaamashõ ãwẽ ikí.
40Aská ravé ãwẽ askái vana nĩkãinã arí neskái vanavo. “Naa yoranã Yové Koĩni vana teki akaya nõ manávaĩvaĩa ivotsikĩ”, imaĩnõvo, 41wetsarasĩ vanairo “naaro Cristotsikĩ”, ãwẽ imaĩnõ, yora ravétõro, Galileianamã pakémta ravãki “Cristo Galileianamãsho oátĩpá. 42Vana neea ivoro Cristo Davipa revomamẽsho okatsairvi, Belém ãwẽ anõ kaniti ivo maĩsho”, ikívo. 43Askái anosho yora arímamẽ vana anõkinanãma ikívo. 44Ravétõ Jesus kepokatsikívomẽkĩ atxima ikívo. 45Askái teske akaya Yové Koĩni shovo vesoyavorasĩ itãi atõ vemaĩnõ, fariseurasĩnĩ ashõ Yové Koĩ ato vana ashõya kakáyavõ ato nĩkãvo. “Awesainã atxisho mã vivarãimará?” 46ato ãwẽ akátõsho, “yora askátõ vana nõ nĩkãmarvi”, ikívo. 47Atõ askámaĩnõ fariseurasĩni “mato parãoraí? 48Nokepa kakáya wetsase, fariseurasĩse aatíishonã anõ araía mã oĩinã? Akáma. 49Askámaĩnõ yorarasĩ ichnáa esé tanamasho atõ ikírvi. Yové Koĩni ato yostakatsa”, ikívo. 50Askámaĩnõ Nicodemos, yamé Jesusnĩ vanachnaya ivo, atopamẽkĩ askái vanainái. 51“Nokẽ esé, yora avé vanamasemẽkĩ ‘nõ aská anõ’ ikínã roasetirá?” 52ãwẽ imaĩnõ “mianã Galileia yorasevirá? Tanatso! Vana neea ivo ‘Galileianamãsho Yové Koĩni vana teki akaya okatsai’, ikí yoãnáa yamarvikatá”, akávo. 53Askái vanai mashtévaí atõ shavátivaĩvo.
Zvasarudzwa nguva ino
João 7: YKV
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Active: © Wycliffe Bible Translators, Inc. All rights reserved