João 8
8
1Askámaĩnõ Jesusro “Oliveira Matxi”, akĩ atõ aneanamã chinãvaĩi kaí. 2Askávai shavá nakoi vesokaĩki Yové Koĩni shovonamã ãwẽ iokaĩmaĩnõ yora ashkãsho chinãvaĩósho aa kesó atõ kãtxíketámaĩnõ tsaópakesho ato yosĩki. 3Aská akĩ ato ãwẽ yosĩanamãsho Moisésnĩ esepa ato yosĩarasĩ, fariseurasĩ aatíisho aĩvo veneyamẽkĩ vene wetsamẽsho ãwẽ merámaĩnõ ewevaĩvo, yora ashkã kãtxívonamã. 4Aská avaikĩ “yosin ikiyá, naa aĩvo veneyamẽkĩ vene wetsamẽsho meráai. 5Moisésnĩ eséro aĩvo askámaĩnõ shashõ tsakaki yamamáa. Askámaĩnõ miã mĩ chinãro awesatirá mĩ chinãnã?” akávo. 6Askámẽkĩ Jesus parãsho atõ nĩkãrívi, “awesá irakatsíki nõ nĩkãnoshõ”, iinã. Atõ askámaĩnõ vetĩ ipásho mevĩ mai wichai, wetsapa isi. 7Ãwẽ askámaĩnõ nĩkãki atõ ãtsã akatõsho Jesusnẽ weníinavaíki ato revíníki. “Askáro, tsoa anõ itima ivõ imísmará? Ãatõ shashõ ave tsakanõ”, 8ato avaí arimẽse tsaópakeósho vetĩ ipásho mevĩ mai wichaóki. 9Ãwẽ aská nĩkãinã vevoke ivopari kaa oĩinã wetsa atxõse, wetsa atxõse, wetsa atxõse akí voávo. Askámaĩnõ Jesus westíse tsaókémaĩnõ aĩvo aa veyó niináshõ ãwẽ nimaĩnõ 10weníinavaíki nĩkãki. “Ato voraía? Mia aská akatsikiya wetsachta niakeámará?” 11ãwẽ akátõsho “yama ikivo, Yora Ivó”, ãwẽ imaĩno “ea askásevi, eã aská, mia aotĩpásevi. Kao, anõ itimatõ ioroa”, akĩ Jesusnẽ.#8.11 Versículo 7:53-8:11namã, Gregõ vana wetsa teki akĩ wichama itivo, venápáro aya.
Jesus “ea mai shavapa amo”, iti ivo yoã
12Askásho txipo Jesusnẽ yorarasĩ ato vana aoki. “Earo naaivo mai shavapa amorvi. Yora etxõya ivoro vakíchinamã niá keskái ichnái nioma ikatsai. Awetima chinãyai, amoyai nikatsai”, ato akĩ.
13Ãwẽ askámaĩnõ fariseurasĩni “mirí ‘ea aská’, ikí mĩ vanarívi. Nokẽ tanátikiri chinãsho, yora ravésho yoã anõkasemẽkĩ mirí mĩ yoãmaĩnõro mia noke anõ akatĩpá”, akávo.
14Atõ askámaĩnõ “erí ẽ yoãnamẽkĩ, ẽ vanaro anõkase. Ẽ oánamã ẽ tanasa, ẽ kakatsainamã ẽ tanasa aká, askámaĩnõ matõro ‘anosho oá’, ikĩ ea tanama, ‘ano kakatsai’, ikĩ tanamasevi aká mato. 15Matõro yorã tanátikiri oĩsho ea mã oĩrívi. Earo yora aská amísma. 16Eã yora ẽ aská akáro anõpakĩ ẽ akárvi, erí ẽ niámashõ. Ea yonoya ẽ Papã ea peshót akásho. 17Moisésnĩ mato inãti esé vana neero yora ravésho meki tsakaki yoãmaĩnõ anõ akĩ. 18Aská akĩ meki tsakaki yoãyaro ea, ẽ Papa aká, ea yonoya”, ato akĩ.
19Ato ãwẽ aská akatõsho “atorkĩ mĩ papanã?” akĩ nĩkãvotõsho, “ea, ẽ papa aká mato onãtakĩ oĩma. Ea mã aská akáro, ẽ papa askásevi akĩ mã onãtakĩ oĩkeãai”, ato akĩ. 20Jesus askái vanaro Yové Koĩni shovonamã anõ kopímati tĩi iki kavõ tsaóa kesó nishõ ãwẽ iyãtá. Aská akĩ ato ãwẽ yosĩmẽkĩ kepoma ikívo, anõ atõ askáti ivo nokómasho.
21Askávai vanainaói. “Ẽ kakatsai. Ẽ kamaĩnõ ea itimashõ anõ itimatõ ikí shokosho vopisho ẽ kakatsainamã mato voátĩpá”, ato akĩ.
22Ãwẽ aská nĩkãinã judeu vevokerasĩ “‘ẽ kakatsainamã mã voátĩpá’, ãwẽ ikínã awesainã ãwẽ ikírkĩ? Arí yamakatsi ãwẽ ikírá?” ikívo.
23Atõ askái vanamaĩnõ Jesusnẽ ato revíki. “Matoro neno teró aaivorasĩrvi. Earo matxi ivorvi. Neno mai shavapa aarasĩrvi mato. Earo neno aaivo maĩ yoramarívi. 24Askáinãvísi mato ẽ yoãshoatĩ, ‘marí anõ itima ivõ ikí shokosho mã vopikatsa’, iinãnã. ‘Earo earvi#8.24 “Earo earvi”, ikí ã vanaro Yavé Moisésnĩ vanai ãwẽ iti keskái.’, ẽ imaĩnõ ea mã anõ ayamáro, anõ itima ivõ ikí shokosho mã vopikatsa”, ãwẽ imaĩnõ 25“tsoarkĩ mianã?” akĩ nĩkãvotõsho ato revíoki. “Txitavikíse mato ẽ yoãshoinati ivorvi. 26Mã anõ itima ivo ãtsaka eã mato yoãshoi ‘awesakatsíaki oĩnõ’, ikĩ mato chinãshoí, ati roakamẽkĩ mato ea aská akatĩpá. Ea yonoyatõ vanavísi ẽ vivarãrívi. Ãwẽnáro anõ anõka ivorvi”, ato akĩ.
27Askáki ãwẽ papa ãwẽ yoãmaĩnõ ashkãsho tanashoama ikívo.
28Askái vanainaói, Jesus. “‘Yorã Vake’, ikí anéa ivo ronõnikirívi ‘earo earvi’, ikĩ tanai, ‘arí chinãne ãwẽ ikíma’, ikĩ tanaói mã akatsai. Ẽ papã ea yosĩatõ ẽ vanarívi. 29Aská ea yonoyatõ ea peshót aká ẽ niárvi. Aaro ea enekésma, askatase ãwẽ roa aká keská ivorasĩse ẽ ashõatõsho”, ato akĩ.
30Jesus askái vana nĩkãinã yorarasĩni ãtsashósevi anõ ayakeávo. 31Aská atovo Jesusnẽ ato aská akĩ. “Ẽ vana enekima mã toĩa ivoro, aská, mato ẽ shokõkena anõpa ivo yora mã shokokatsa. 32Askáki chinã anõka ivo mã tanakatsa, anõsho yorarasĩ ati ikitái shokoa ikítõ ikí mã shokoa ivo enékatsa”, ato akĩ.
33Ãwẽ askámaĩnõ judeurasĩni “nokero Abraão revomásho yora wetsãchta ati akĩ noke toĩmarvi. Awesatõsho ‘noke enemakatsí’, mĩ ikírá?” akávotõsho, 34Jesusnẽ ato revíki. “Neskávere nĩkãtsoma. Yora anõ itimatõ ikí shokoyavoro yorã ati akĩ yonoatõ ikí atõ shokorívi. 35Yora noke mee ishõyaro nokẽ shavapa nikonkoĩsmarvi chinãtso. Askámaĩnõ nokẽ vakero askata ano shavá aaivorvi. 36Askásho atikitái mã shokomaĩnõ, eã mato enemáro, anõpai atikitaóimai mã shokokatsa. 37Mato ẽ tanasai. Abraão mato revomáa askámẽkĩ ea mã yamamakatsiki, ẽ vana matõ chinãnamã ikomasho. 38Neskái ẽ vanarasĩro ẽ papanĩ nishõ oĩsho ẽ ikírvi, askámaĩnõ matõ papã vana nĩkãshósevi mã iorívi”, ato ãwẽ akátõsho, 39“noke merayaro Abraão”, atõ imaĩnõ, “mato Abraão vakeshoro ãwẽ ipawatõ mã ikenkeãai. 40Askámẽkĩ anõka ivo Yové Koĩni vana nĩkãsho mato ẽ yoãshoasmẽkĩ ea mã yamamakatsiki. Abraãoro askái ãwẽ nitimarívi. 41Matõ papã mee itĩvísi mã ikírvi”, ato ãwẽ akátõsho, “nokero vesãkara shavõ toámarívi. Nokẽ paparo westíserívi, Yové Koĩ”, akávo.
42Atõ aská akatõsho Jesusnẽ ato vana aoki. “Matõ papa Yové Koĩshoro enõ mã noíkeãai, aamẽsho oshõ neno ẽ niásho. Erí ẽ oámarívi. Ãatõ ea yonorívi. 43Awesainã ẽ vana mã tanaimará? Ẽ yosin ikirasĩ mã nĩkãkatsikímashõ mã ikítsikĩ. 44Mato merayaro yochĩ ichnátõ kakáyarvi. Mato ãwẽnárvi, ãwẽ chinãtõ mã ishõa. Txitavianamãshóse yora ãwẽ yamamaináti. Anõka ivorasĩ ichnayarvi, ãwẽ anõ ikímashõ. Parã vanã ikí kawáyasho, yoa vanã papasho ãwẽ ikí. 45Askámaĩnõ eãro anõpakĩ mato ẽ vana akamẽkĩ ea mato anõ akáma. 46Mato wetsãse anõ itimatõ ẽ ikínã ea ayará mã oĩinã? Eãro anõpakĩ mato ẽ yoãshoamẽkĩ awesainã ea mã anõ ayamárá? 47Yora wetsase Yové Koĩnáshoro ãwẽ vana anõ amíska. Ãwẽ vana mã anõ ayamáro awesáma, ãwẽnamashõ mã ikí”, ato akĩ.
48Ãwẽ askámaĩnõ judeu vevokerasĩni “‘aaro Samaria ichnárasĩpárvi, yora yochĩ ichnátõ tasaa’, nõ ivaivainatĩ”, 49atõ akátõsho, “earo yochĩ ichnátõ tasamarvi, ẽ papamẽ eséyamíska ea. Askámaĩnõ matoro enõ mato eséyamísma. 50Erí ravítakatsí ẽ ikímarívi. Enõ eséyakatsai ivoro aya. Ãatõ ‘ato ivo anõpáraki oĩnõ’, ikĩ noke chinãshokatsai. 51Neskávere nĩkãtsoma. Yora wetsa ẽ vana anõ akaya ivoro veísma ikatsai”, ato aoki.
52Ãwẽ aská nĩkãinã judeu vevokerasĩni aská akávo. “Rama nõ tanaai. Yochĩ ichnátõ mia tasaaserívi. Abraão, Yové Koĩni vana teki akayavorasĩ aká vopitivo, askámaĩnõ miaro ‘ẽ vana anõ akaya ivoro veítĩpá’, mĩ iki. 53Miaro nokẽ papa Abraão keskapárá? Abraãonĩ Yové Koĩni vana teki akayavorasĩ keyótivo. Askámaĩnõ miaro tsoasho mĩ ikírkĩ?” 54atõ akátõsho “erí ẽ ravítáro, ichnárvi. Askámaĩnõ ‘nokẽ Yové’ mã ikí ivoro ẽ papaserívi. Aa enõ eséyamíska. 55Matõro mã oĩmarvi aa, askámaĩnõ eãro ẽ oĩya. Ea vanai ‘ẽ oĩmarvi’, ẽ ikíro, mato mã yoatõ ẽ ikenkeãai. Askámaĩnõ eãro oĩsho ãwẽ vana ea anõ amíska. 56Matõ papa Abraão ẽ anõ okatsai shavá chinãsho mekípaóa. Ea oĩsho enõ mekí ranóma iti”, ato akĩ.
57Ãwẽ aská akatõsho “mia 50 vari yamamẽkĩ ‘Abraão ẽ oĩya’, mĩ ikikĩ?” 58atõ akátõsho “ase, neskávere nĩkãtsoma. Abraão merámatiã earo earvi, eaparírvi”, ikĩ atõ ãwẽ revíatõsho, 59judeurasĩni shasho mashko toĩnívo, tsakatsiinã. Atõ askámaĩnõ Jesus ano onévaí Yové Koĩni shovõsho kayakaĩi.
Zvasarudzwa nguva ino
João 8: YKV
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Active: © Wycliffe Bible Translators, Inc. All rights reserved