Ura për te MarkuShembull

Jezusi, shëruesi

Vëmë re se sa të zënë ishin njerëzit, duke sjellë miqtë e tyre me nevoja të ndryshme te Zoti Jezus. Këtë duhet të bëjmë të gjithë; duhet t’u tregojmë të tjerëve gjërat që dimë për Perëndinë. Shumë të rritur dhe fëmijë rreth nesh nuk dinë asgjë për Të. Është e gabuar kur nuk bëjmë më të mirën për t’u treguar atyre rreth nesh ato që dimë për Zotin.

Por Jezusi nuk erdhi vetëm për të shëruar trupat e njerëzve. Edhe ata që ishin të shëndetshëm kishin nevojë për Të, sepse çdo zemër njerëzore është mëkatare. Asnjë prej nesh nuk e do Zotin ashtu siç duhet. Shpesh në jetën tonë gjendet një “perëndi”. Quhet “Unë”! Përpjekja për ta shëruar shpirtin tonë është po aq e pamundur sa të bëjmë që njerëzit e vdekur të rikthehen sërish në jetë. Nuk duhet të harrojmë kurrë që arsyeja kryesore përse Jezusi erdhi në këtë botë është që t’i shpëtonte mëkatarët; Ai erdhi për të ndryshuar zemrat e njerëzve. Të gjitha mrekullitë e Tij janë një tablo e kësaj vepre.

Por, a do të ishte i gatshëm Ai të më shpëtonte mua apo komshinjtë e mi? Kjo pyetje e ofron përgjigjen në fjalët që lexojmë: “... dhe të gjithë ata që e preknin, shëroheshin”. Asnjë nga ata që shtriu dorën drejt Tij nuk mbeti në sëmundjen e vet. Ai shëroi secilin prej tyre. Nuk e dimë sa prej zemrave të këtyre njerëzve që njohën shërimin fizik edhe u shpëtuan. Në Bibël tregohet se disa njerëz që u shëruan fizikisht nuk u bënë ndjekës të vërtetë të Zotit. Ata erdhën te Zoti Jezus vetëm për shërimin e trupave të tyre – duket se kjo gjë ishte e mjaftueshme për ata.

Për çfarë po e kërkoni Zotin? U vini veshin lutjeve tuaja. A keni nevojë që Ai t’ju ndihmojë për të përballuar ditën? A keni nevojë që Ai t’ju shërojë fizikisht? Ndoshta luteni që Ai t’ju ndihmojë në shkollë me mësimet tuaja. Ndoshta shpesh ju ndiheni të frikësuar dhe i kërkoni Zotit që t’ju japë kurajë dhe t’ju mbrojë. Me shpresë, i kërkoni Zotit t’ju mbrojë kur bëni një udhëtim të gjatë. Të gjitha këto nevoja janë të rëndësishme. E keni vënë re sa shpesh Zoti u përgjigjet lutjeve? Ai do t’ju ndihmojë nëse e kërkoni. Por, nëse kjo është e gjithë nevoja juaj për Të, atëherë nuk jeni vërtet të shëruar. Shpirtrat tanë mbeten mëkatarë dhe fajtorë; nevoja jonë më e madhe është që të na shërohet shpirti.

Prandaj, së pari, kërkoni Zotin Jezus për nevojat e shpirtit tuaj. Ai ishte i gatshëm që të ndihmonte secilin prej atyre njerëzve të sëmurë. Ai është i gatshëm dhe plotësisht i aftë t’ju ndihmojë edhe juve në nevojat tuaja si për trupin, ashtu edhe për shpirtin.